السلام عليكم ورحمة الله وبركاته
صباح الخير / مساء النور والسرور
الجزء السادس
مغادرة الشمال التركي والتوجه الى اسطنبول
يوم الجمعة الموافق 17/4/2015
صحينا بدري بدري اتفقنا من بليل ان بنتحرك الساعة 7 ان الله اراد
محنا مستنين فطورهم الماصخ ...... بنفطر بالطريق باي مكان
الحساب مسجل عندي بالورقة باليورو والدرهم الاماراتي فقط
من بليل قلت لا يا عناقيد حولي من الحين واعرفي كم بالليرة بالضبط
بالاماراتي 665
و كلمت اختي بليل ع الواتس قلت لها دقي ع البنك واسأليهم كم فندق سحب وبالتفصيل
وما قصرت سألتهم و ع طول خبرتني قلت بعد لزم اتأكد ليكون سحبوا وادفع لهم بعد يا حبيبي
.gif "(37)")
المهم نزلنا سوينا الشيك اوت وكانت المصادفة ان مريم ما داومت قاعد مكانها شاب سوري
قلت له نبي نطلع قال ع الساعة 8 بتيجي مريم ... لا شكرا مستعجلين نبي نطلع الحين
شوف الحساب كم ؟ .... قال دقيقة ودقيقة تلحقها دقايق يمين يسار ما عرف كم حسابنا
عطيته نسخة الحجز وحدة بالعربي و الثانية بالتركي المبلغ مدون ع الورق باليورو والدرهم الاماراتي كما ذكرت سابقا
وعليهم خط يدي " القيمة بالليرة التركية" قال ما بقبل الا تدفعون باليورو يا ابن الحلال ما عندنا الا ليرات "كذابة"
قال لا ما اعرف كم يساوي بالليرة طيب شوف بالنت ... قال مافي نت عندي كيف اذا الموتيل كامل النت فري تضحك ع مين يا شاطر
حاول من موبايله ما فتح عطيته موبايلي قعد يمكن 5 دقايق ولا عرف قلت له اقول ياولد الحلال هات انا بكتب لك ...
شفته كاتب تحويل من الدولار الى اليورو ......... لا فالح الاخ
وجا ابوي حط الشنط وشغل السيارة وانا للحين ما حاسبتهم ..... عصب يلا يلا يا بنتي خلصينا
.gif "(150)")
طلعت له المبلغ كم بالليرة قال لا ما اظمن يمكن غلط بطيح بمشكلة لزم اتاكد
شاسوي لك يعني لا عارف اطلع ولا تبانا نطلع لا حول ولا قوة الا بالله
اتصل ع زميله سوري بعد "موظف مطعمهم" جا وطلع ولله الحمد فالح قعد ع الكمبيوتر والنت شغال زي الفل فتح قوقل دقيقتين وحول المبلغ
وقال ادفعوا كذا .......... قلت له لا ناقص المبلغ حسابكم بالضبط 482 ليرة قال لا عادي ......
لا مو عادي خذ الليرتين مانبي شي بذمتنا الحق حق ......... واخيرا دفعنا وركبنا سيارتنا متجهين الى طرابزون
اخر نظرة ع البحيرة ...... ان شاء الله راجعين راجعين
.gif "(89)")
" انصح بالاقامة فيه "
بما ان طيراتنا الظهر قلت استفيد من الصبح بروح لمطل بوزتبه بطلع حرتي ذاك اليوم ما شفت شي وبنفطر هناك ...
ومسكنا الخط وتك تك تصوير وتوديع الشمال الساحر
اشوف ذاكرتكم قوية ولا لا ......... منو من الاعضاء بالمنتدى القديم نزل صورة هالمكان بتقريره ؟؟؟
جزاه الله خير الجزاء اعتمدت بشكل كبير ع تقريره
احتمال ترتيب الصور غير دقيق
وصلنا لطرابزون في غضون ساعة ع ما اظن ... اذا غلط مشوها محد يوقف لي ع الحبة
كانت سرعتنا متوسطة لا اقل من 80ولا اكثر من 120 .. شفناهم سرعوا سرعنا معهم خففوا خففنا معاهم معاهم
كنا نمشي بدون عمي سايجك ساجيك مادري شو اسمه لان اللوح واضحة جدااااااااا
وصلنا وسط المدينة في كلمة حفظتها اذا شفتها عرفت اني قريبة من السوق اوتوقار حاجة كذا المهم
لما تجون لوسط المدينة في اشاير
اول اشارة تدخلك ع منطقة سكنية لو لفيت يسار وهذي صورتها
اما ثاني اشارة تدخلك ع مواقف التاكسي
اما الثالثة منها تدخل ع الميدان ومنها ع بوزتبه ....... العلامة الدالة ع فتحت المطل وجود محل مخبوزات ديكوره ابيض من تشوفونه لفوا
وهذي المحلات ايضا ركزوا عليهااا
من هنا تلفون يساااار
بعد المخبز في محل فواكه منه تلفون ع اليمين وتطلعون فوق فوق فوق فوق اي لفه تجيكم ع اليسار تلفونها وتكملون فوق
"هذا محل الخضروات ..... ركز ع الطريق كتكات من عنده تاخذ يمين "
لما تشوفون الدرج من عنده تلفون يمين "هذي اللفة الاولى لجهة الــ يمين"
ومنها تكملون فوق وبتطلعون بالنص في مسارين يمين ويسار
عشان المطل تاخذون يمين "ثاني لفة لليمين " تمشون شوي وتشوفون المطل ع ايدكم اليمين
" بكل الطريق بس مرتين تلفون يمين " الطريق سهل جداااا واسألوا اي حد يدلكم "
وصلنا كانت الساعة 8:15 ولا حد فاتح هههههههههههههههههههه يا فرحة ما تمت
قعدنا نصور ونصور ونتأمل الجو ....... المطل رااائع بالنهاااار
سبحان الله كل شي بالنهار احلى
للحين هذا احلى مطل بتركيا من وجهة نظري
كل ما جيت بصور كلمة طرابزون من تحت "من الشارع " ما تضبط معاي ...
خلصنا تصوير رجعنا لسيارتنا شفناهم يفتحون الكوفي رحت عنده اشوف المنيو مافي شي ممكن ينأكل
قلت خلاص ننزل لمطاعم الميدان شكلها حلوووووووة ونزلناااا
في مطلات اخرى بس بوزتبه اكثر ارتفاع
المهم وصلنا الميدان جينا نوقف شفنا الكل يطالعنا قال ابوي شكله ممنوع سالنا قالوا ايوة ممنوع
ياسلام وليه الكل موقف عادي الا نحن ...... امرنا لله تحركنا .... رجعنا للموقف اللي بفلوس من هنا تدخل له "ع اليسار"
قال السكيورتي الساعة بـ 4 ليرات !!! نعم ياخوي وقفنا عندكم قبل كم يوم قلتوا لنا اليوم كامل 5 ليرات كيف كذا؟!!!
قال الحين صبح الاسعار غير .. خلاص ساعتين بـ 4 ليرات
....... نصب هو
ابوي قال امشي يا بنتي فكينا اصلا ما بنقعد اكثر من ساعتين امشي بس
ورحنا نشوف المطاعم ما عجبني شي
اصلا حاطه عيني اكل عند النوافير بوسط الميدان مهما اشوف ما بقتنع هناك يعني هناك
قعدنا وطلبنا اومليت وبرك جبن وعصير برتقال لي وشاي للوالد
طفش اهلي قعدنا نص ساعة نستنى حشى مو بيض ذبيحة ..
ناديت البنت تعالي وين طلبنا تاخرنا ع المطار .. قالت ليش انتوا اصلا طلبتوا
.gif "(50)")
ههههههههههه لا احلفي انتي بس
.gif "(92)")
وعدت الطلب وجا الـ........ قال بس 10 دقايق وبيوصل الطلب ... امرنا لله نستنى
وكل شوي يجي مصور طفشونا الصورة بـ 20 ليرة لا شكرا مانبي عنا كاميرتنا طيب 15 لا شكرا طيب 10 ليرات لا
بعدين ابوي قال حرام يا بنتي يترزق الله ما جا يشحت ناديه يصورنا .. وناديناه بصراحة هو شيبه محترم من قلنا له لا راح اما الباقين زن زن زن
وصورنا 4 صور واختار منها 2 قلت له كلهم قال لا بس 2 حلوين الثانيات مغمضه انتي ههههههههههههه
قال شوي واجيب الصور ...... حمضهم وجابهم حلوين الصراحة وكاتب بالورقة 20 ليرة عطيناه
وشكرنا وراح ......
تذكرت كلام الشيخ مشاري الخراز جزاه الله خير
لما قال بالمولات تدفعون وانتوا ساكتين وفرحانين ما تكاسرون
ولما يجيكم البائع المتجول تكاسرونه ع مبلغ هو بحاجته مبلغ يصنع فرق لديهم
حسيت بالذنب
قمت ادور عليه ألين لقيته وعطيته المبلغ كامل ....
قعد يشكرني ورفع ايده فوق يدعي لي ....
يالله مرات الواحد قلبه يصير قاسي ع ناس محتاجه "الله يحنن قلوبنا عليهم والله يرزقهم"
وطبعا ابوي سمعني كلمتين هههههههههه قال جايه من العين لهنا وقفلت معاج ع مبلغ تافه
يابنتي ما تعرفين الخير وين اعطي بدون ما تحاسبين لا تردينهم .. هذيل الاجر فيهم ...
البرك حقهم مو شي بالباف بستري ...
بيضهم نفس بيض الامارات حسيته هرموني مو زي الباقين ..
الفطور ما عجبني يادوب سديت جوعي .. بكملها باسطنبول
كنت مخططه ع نصرت
خلصنا ولله الحمد وحسابنا طلع ع ما اظن 27 ليرة
رجعنا لسيارتنا كانت الساعة 10 يعني باقي ع طيارتنا 3 ساعات
الحضور بالرحلات الداخلية قبل بساعتين فقط ...
بس خفت نطول بتسليم السيارة "ملقوفة" احب اروح قبل الوقت
بالطريق ابوي قال فضيحة نسلم السيارة كذا ... بغسلها طيب
شفنا محطة دخلناها ما عندهم غسيل وقعدنا ندور ... تذكرنا وحدة باول السوق رجعنا لها
غسلناها اوتو ماتيك ورحنا ع منطقة التنشيف ...... في شايب يرش السيارة بماي وصابون !!!
ومافي حد ينشف ولا ينظف من داخل !!! ......... سألنا قالوا كذا غسيلنا ههههههههه
غير غير عنا ونزلنا نحن ننظف السيارة من داخل وننتظر الشيبه يرش السيارة .. جا ورش وخلص
وطلع الحساب فقط فقط فقط 3 ليرات
وكملنا للمطار
المسافة من السوق للمطار قريبة جدا ما تاخذ 10 دقايق
المهم وصلنا المطار ونزلت انادي حد يستلم السيارة سلمناها وشيكوا عليها وانتهينا
طلعت البوابة فوق قعدنا ندز في العربانة
" نصيحة اول شي نزلوا شناطكم بعدين سلموا السيارة" فكرت البوابة تحت طلعت فوق ويا الطلعة تهد الحيل مع الشناط
دخلنا لقينا كونترات الخطوط التركية فاضية بيفتحون قبل بساعتين وبعض الناس ملاقيف مثل عناقيد واصلين قبل بساعتين و 40 دقيقة
جلسنا نستنى الين شرفوا ... الحلو بالخطوط الداخلية دقيقين بالوقت مو زي الدولية مرات يستهبلون ...
تحسنت فكرة الخطوط التركية عندي خاصة ان كراسيها مريحة هالمرة" بس وجباتهم استغفر الله حتى عصير التفاح مادري كيف طعمه
الاقلاع 13:15
الوصول 15:05
سأذكر بعض النقاط الخاصة بالشمال التركي :
المدة بنظري كااافية للمناطق اللي زرتها ... لو الواحد استغل اليوم كامل كافي جدا اما طول الوقت نوم راحت عليه
يومين في اوزنجول جدا كافية ومنها تطلع لـ ايدر " براي الشخصي ايدر لا تستحق المبيت ما فيها شي"
طرابزون قعدت فيها ليلتان فقط لو زدت فيها يوم كان افضل عشان اغطي حديقة وادي زيقانا مثلا ومتحف ايا صوفيا و قصر اتاتورك
ريزا منطقة جميلة للاسف لم يكن لها نصيب ضمن جدولي و حتى اوردو حلوة وفيها تلفريك
نصيحة اللي بيروح الشمال يسمع كلام المراقب ماجد الفهد ولا يخطط ع كيفه اخونا ماجد ادرى ..
خلكم من الفلسفة "الكلام لي" واسمعوا نصايح الخبراء جزاهم الله خير الجزاء
الشراء من القرى افضل بكثير من الشراء من ميدان طرابزون
اذا ما حصلت محل صرافة تقدر تصرف بمحلات الذهب
ما تحتاج اي جهاز ملاحة او برنامج اللوح بالشوارع كافية وواضحة جدااا
النت "الواي فاي" بجميع فنادق تركيا ضعيف خذلك شريحة بنت من شركة تركسال افضل شركة عندهم .. وحط رصيد كافي لان صعب تلاقي محلاتهم
راجع فاتورة المطاعم مرات يزودون مبلغ بسيط ما تنتبه له الا بالتدقيق
لنجاح رحلتك بالشمال التركي لابد من استأجار سيارة وانت تسوق بنفسك وتكون حر والسواقة سهلة ما يبالها شي اهم شي اطلع الليسن الدولي
عند استأجار السيارة ادفع مبلغ التامين كاش لضمان استرجاعه عند تسليم السيارة
صور من الجو لـ اسطنبول
طبعا انا عند الدريشة و الوالد بجنبي و بجنبه تركية معاها ولدها
اقترح ابوي علي التالي : اقوم ابدل اخلي الحرمة مكاني وولدها بالنص وهو ع الطرف
وانا اروح الجهة الثانية عند بنتين خليجيات ... يعني مافي تصوير رفضت قلت له روح انت يا حبيبي
.gif "(94)")
قعدت اصور وشوي ونمت لما صحيت اشوف ابوي راح عند البنات ههههههههههه
عادي كبير "الله يحفظه" مثل ابوهم
وولد الحرمة جا عندنا عمره سنتين فديته عسووول ...
يالله ذبحونا بالتركي "ديك رومي" حقهم ..... لقيت كيك بالتوت التهمته كان جيد و اخيرا جابوا عصير زين
نزلنا ع التختيم ولاول مرة اشوف موظف بالمطار يسلمني جوازي وهو يبتسم بداية حلوة
.gif "(125)")
و ع الشنط ..... الحمد لله ما تاخرنا ع طول لقينا اغراضنا ..
توجهنا للبوابة نبي تاكسي .. هالمرة موقفين العالم طوابير تركب بالدور
جا دورنا بعد طول انتظار قال مسؤولهم 70 ليرة لتقسيم نعم !!!!
لا ما بركب بالكثير 50 ليرة فقط رد علي من سنتين كان 50 ليرة
قهرني ضحكت بوجهه قلت له بتضحك علي كنت هنا قبل 3 شهور ودفعت 50 ليرة لتقسيم لا تستهبل
قال انتي حرة اوقفي محد بيشلكم ......عادي بوقف ...
ابوي: يابنتي العرب كلهم راحوا ونحن واقفين
انا: ابوي الله يخليك اصبر لا تخلي الكلاب يضحكون علينا
جا ثاني تاكسي قال 70 ليرة بعد قلت للمسؤول انت خلك بعيد انا اتفاهم ..
سالته بكم قال 80 يخرب بيتك زودت 10 ليرات ع صاحبك
ورجعت ووقفت وابوي يابنتي بركب اي تاكسي خلاص فكينا فضحتينا ع 20 ليرة
ابوي والله ما بركب باكثر من 55 ليرة والله لو اقعد لبليل ليش النصب
عصب قال اصلا انا غلطان اللي يت معاج ما تسمعين الكلام
.gif "(7)")
وجا 3 تاكسي قلت له 50 ليرة قال لا 60 قلت له لا 55 بس
قال يلا اركبوا هههههههههههههههههههه
لفيت اطالع المسؤوال واقوله بـ 55 ليرة بروح لتقسيم .....
ضحك ورفع ايده يأشر لي وقال تمام تمام عرب تمام
.gif "(127)")
ما احب حد يقص علي ابدا
وهذي بعض الصور من الطريق ...... جابنا اعتقد من طريق خلفي ما قد شفته قبل
ووصلنا تقسيم تحديدا لفندق CVK اربع نجوم مقابل الميدان ع طووول وشارع الاستقلال بوجهك
كنت حاجزة من بوكينق
زي ما ذكرت باول جزء 6 ليالي بقيمة 3543 درهم اماراتي ما يعادل 2500 ليرة
يعني معدل الليلة الواحدة 590.5 درهم إماراتي الغرفة توأمية مطلة ع المدينة
اول ما وصلنا سألوني لو ابا ادفع المبلغ كامل ولا ع اجزاء فأخترت ادفعه كامل واريح راسي عشان ما افكر اغير الفندق لو ما عجبني
وطلعنا غرفتنا ونحن طالعين قال لنا شوفوا الغرفة المطلة عشان لو حابين تغيرون
رحنا نشوف معاه فتح الغرفة ويقولي ادخلي شوفي .... خبل فيها شنط اقوله في ناس قال لا ... اجل الشنط لمين ؟!
انتبه وقعد يتأسف ... قال دقيقة ارجع اجيب كرت غرفة ثانية ... لا اصبر مابا الا غرفتنا هيا طلعنا
ماعرف وين راحت صورة الاطالة .. كانت ع المدينة "عمارة مكسرة"
دورة المياه الله يعزكم
غرفتنا زوينة المساحة كافية بالنسبة لي
اما الوالد قال لا ضيقة وين نحط الشنط نغيرها لوحدة مطلة ع الاستقلال
صلينا ونزلنا نسألهم لو نبي مطلة ع الاستقلال كم الفرق ...
قالي 200 يورو بالليلة شي ما يدخل العقل
.gif "(33)")
يعني نزيد ع سعر الغرفة 1200 يورو عشان اطلالة ..... بلاها اصلا طول الوقت بنكون برى
قال ابوي اكيد انتي فهمتي غلط يقصد 200 يور لكل المدة رجعت وسألته قال لا لا 200 لليلة الواحدة ...
مستهين بلغة بنته ما عنده ثقة فيني ابدا
وطبعا ما غيرنا غرفتنا ...
.gif "(2)")
نزلنا ع الميدان
المهم نزلنا نتمشى في شارع الاستقلال شويتين وندور مكان نتغدى فيه .. كانت الزحمة خانقة
دخلنا نمشي بالشوارع الجانبية شفنا كم مطعم امبين عليهم مطاعم بسيطة جدا
دخلنا واحد شفت فيه شباب عرب قلت نجرب اكلهم المطعم نظام اطباق "اللي زي كذا ديما اكلهم ماله طعم"
كنت ابا مطعم بعيد شويتين .. شو نسوي بعد حكم القوي ع الضعيف
دخلنا وجربنا الطعم عادي جدا جدا اهم شي سدينا جوعنا الحساب طلع اممم اعتقد 34 ليرة هالمطاعم تدفع قبل ما تاكل
يعني تقريبا حسب الصحن بـ 6 ليرات
ما شاء الله يمكن 4 طوابق وكلهم فل فل
اطلالة المطعم
"ركزوا ع الحلاق"
خلصنا ورحنا ع محطة المترو ادور كرت اسطنبول للمواصلات ما لقيته
اخذت فيش الوحدة بـ 4 ليرات و ركبنا المترو من تقسيم الى كابتاش نزولاً
مشينا ع البحر شويتين رحنا لمكان ركوب العبارات قلت ناخذ جولة البسفور
مكان ركوب العبارات "ميناء كاباتاش" خلف محطة الوقود ... تنزل من المترو تطلع فوق وتمشي باتجاه البحر متجه الى قصر دولما بهجه
كانت الساعة 6 مساءً تاخرنا .. اخر جولة 5:30 نصيب ..
قلت خلاص نروح ع اورتاكوي نشوف الغروب هناك واضاءة الجسر
ندور تاكسي مافي تكاسي الدنيا زحمة اجازة ... وقفنا مقابل بوابة دولما بهجه سراي
بالزور لقينا 1 ادق جامته بكلمه ما يبي يفتحها تميت ادق هههههههههه
الين فتح قلت له اورتاكوي قال 70 ليرة ........ شو شو ؟!!!
اورتاكوي قريبة اول رحت لها مرة بـ 20 و مرة بـ 25 ومرة رجعت منها لتقسيم بـ 15 ليرة" وهذا يقول لي 70 ليرة
حاولت اتفاهم معاه رفض قال 70 ولا ما تركبون ....... ياعمي زول غيرك 1000
وقعدنا نستنى اشوف الباصات جايه ابوي نركب باص .. كلهم يمشون جنب البحر الا ما نلاقي واحد رايح اورتاكوي
قال زحمة بينفجر الباص وين نركب وقعدنا نستنى ونستنى ... بعد نص ساعة شفنا تاكسي ركض سألته بكم تودينا
قال لا لا زحمة زحمة ما بشل حد ...... يا ابن الذين
وجا واحد شامي هو وزوجته سلموا علينا وقالوا لنا لا تستنون التاكسي ما بيرضون يشلون حد اجازة وزحمة امشوا
وسمعنا كلامهم ومشينا ع امل نلاقي تاكسي يشلنا ولا باص ولا دولمش
بوابة دولما بهجه سراي الجانبيه
ومشينا من عند قصر دولما بهجه
الين فندق شنغريلا "تذكرت العضو مكة نزل فيه وكتب تقرير عنه وبجنبه متحف "
وفندق فور سيزون اسطنبول
و شيراغان بالاس كمبنسكي اسطنبول
ومرينا ع جامعة و ع معالم كثيرة كله مشي في مشي
عندهم تشكيلات روعة ألقيت نظرة من الخارج ... شفت جوتي عندنا بالعين نازل عليه سيل عندهم حاطينه بالـ Display
قاومت رغبة الشراء "عناقيد انتي جايه سياحة فقط تسوق لا لا لا .. لو فتحت المجال بفتري"
موجود ع بداية اورتاكوي
وكملنا مشي الين جامع المجيدية ... الحمد لله ما تعبنا تعبنا بس عطشنا شويتين ... ما صدقنا وصلنا ع طول شربنا في الماي لين قلنا بس
فيديو
ونحن قاعدين كان بجنبا سعودي و زوجته كل حد في حاله مالنا شغل ببعض الين جا ولد سوري عمره اظنن 9 سنين يبيع ورد
لزق لزقه فينا .. خذ ورد لزوجتك حبيبتك اهديها وردة حمرة عبر عن حبك إلها ونحن ميتين من الضحك
قاله ابوي مو حبيبتي ولا زوجتي هذي بنتي ... قال اه بنتك حبيبتك بنتك نور عينك عمو خذ لها وردة هذي نور عينك دلعها هههههههه
واستلم ابوي الله يوفقكم عمو اهديها وردة وان شاء الله تشوفها عروس ههههههههه وعطيناه 5 ليرات قيمة الوردة جيت انقي وردة استحيت ههههههههههههه
قلت له خلاص روح مابا الوردة قال لا خذي ... ياخي روح ما اباها ... حسيت باحراج هههههههههه
واول ما راح الولد لف السعودي يقول لابوي جا قبل ومسك فيا مسكه يعرفون اهل الخليج ما يفكونا
انتوا من وين ... من الامارات ياهلا وانت من وين من الرياض ياهلا فيك
ما شاء الله ع الولد عليه لسان الله يستر منه لـ كبر والله يرزقهم ويستر عليهم ... اللي بعمره بالمدرسة .. الظروف وما تسوي
بما ان الوالد تعبان من الشمي خليته ورحت الفلف شويتين واصور لكم
فندق ذا هاوس نزل فيه العضو مكه ونزل عنده تقرير ... عيب الفندق الوحيد كل حجوزاته غير مسترده ...
شفت عائلتين من الإمارات
آآه يا لميس آآآه هالمكان مرتبط عندي بمسلسل سنوات الضياع
اللي ع اليسار مادو "ديكوره ابيض" فاتح شباك ع قولتهم للي يبي يطلب اسكريم "
دخلنا مادو وكان فل اكثر الزبائن حريم ومن الكويت
.gif "(149)")
طلبت هوت شوكليت وقهوة تركية و كنافة بالجبن للوالد ...... طبعا ذقتها من عنده مابا اكثر عشان اطلب كمبير
بصراحة هالمادو حلو عكس اللي بتقسيم حتى عمالهم نظاف ما فيهم ريحة
دفعنا وطلعنا نمشي شوي حولين جامع المجيدية
لما جينا نطلع فضى
واخذت كمبير بـ 18 ليرة احسه نصب علي ذيك المرة اعتقد كان اقل
قلت له دور لي اصغر حبة بطاط ... حرام ما باكل وايد .. المهم اخذتها وجلست عند الجامع
والقطاوة من كل صوب وانا اصارخ ورفعت رجولي ولا في فايدة جت وحدة من وراء ظهري بغيت اطيح انا والكمبير
اكلت شويات وعطيت الباقي القطاوة وهجوم ع الكمبير
وقمنا نسحب رجولنا ابوي خلاص اعلن استسلامه يبي ينام ابوي نقعد شوي الجو حلو واغاني ودنيا قال لا بنام هلكان
طيب وقفنا ع راس الشارع نستنى تاكسي وربي فرجها ع طول لقينا واحد سألت بكم لتقسيم قال 30 ليرة
و بنفس الوقت وقف الوالد تاكسي ثاني .. قلت له مين وقف اول نركب معه ..
وركبنا معاه بـــ 20 ليرة اكدت عليه قبل ما اركب ينزلنا عند حافظ مصطفى قال طيب
لما قربنا عرفنا الطريق ع طول قال ابوي الـ... بينزلنا بنفس المكان اللي نزلنا فيه نحن وريل اختج ذيج المرة
.gif "(36)")
ايوة يالحبيب تقول طيب و بتنزلنا عند حافظ مصطفى وانت جاي من وراء اه يالـ ...
لف ودنا من قدام قال لا هذا كله الميدان يابن الذين حافظ مصطفى هناك .. قال مافي هنا انزلوا ... شو نسوي نزلنا حسبي الله عليهم
لو ركبت مع الثاني كان احسن ..... الثاني عليه اخلاق لما اعتذرت له قال روحوا اركبوا معاه هو وقف قبلي اخلاق
.gif "(95)")
وطلعنا لفندقنا قضينا صلاتنا ونمنا ع طول استعداد لذهاب الى ......... ما بخبركم خلكم متابعين
والسموحة ع التاخير
دمتم بحفظ الرحمن
[/CENTER]
202الاعجاب
26-05-2015, 11:55 AM
رد: رحلتي الى الشمال التركي واسطنبول بالصور والفيديو 11 ليلة 
رد: رحلتي الى الشمال التركي واسطنبول بالصور والفيديو 11 ليلة 
.gif "(35)")
.gif "(22)")
.gif "(148)")
.gif "(155)")
.gif "(48)")
.gif "(60)")
.gif "(6)")
.gif "(123)")
.gif "(114)")
العرض العادي
المواضيع المتشابهه 
