رحلتي الى الشمال التركي واسطنبول بالصور والفيديو 11 ليلة - الصفحة 37

عناقيد الربيع · 02-07-2015, 12:22 PM

اقتباس : المشاركة الأصلية كتبت بواسطة العقرب

بصراحه مجهود كبير وتقرير ولااروع وسرد جميل وصور مميزة

تسلم اخوي كلك ذوووق

عجبنى الشمال كثير لكن اسطنبول احس انها صعبة

الشمال حلو بس من عقب المغرب يصير ممل جدا

اسطنبول فاتنة بس يبالها برودة اعصاب

وخصوصا التكاسي واضح انه التعامل معاهم صعب

الا صعب طماعين جشيعين الله يهديهم بس

شكرا ع المرور الجميل

وخلك متابع

دمت بحفظ الرحمن

عناقيد الربيع · 02-07-2015, 12:24 PM

اقتباس : المشاركة الأصلية كتبت بواسطة hazim b

الله على روعة التقرير يا عناقيد.

تسلم اخوي من ذوقك ..

ابدعتي بالوصف والصور رائعة.

ان شاء الله افيد زوار تركيا لو بشي بسيط

الصور بالحظ والله هههههههه احب اصور بس ما اعرف

بانتظار آخر جزئين.

متابعتكم تسعدني

كل الشكر ع المرور الرائع

دمت بحفظ الرحمن

عناقيد الربيع · 03-07-2015, 05:04 PM

السلام عليكم ورحمة الله وبركاته

صباح الخير / مساء الورد

يوم الاربعاء

الموافق 22/4/2015

اخر ليلة في اسطنبول

صحينا ع اجواء باردة و ممطرة

خصصنا هاليوم لاسواق لشراء الهدايا

صحيت بدري واجهزت وخلصت

يلا يا ابوي قوووووووم قوووووووم

تأخرنا ولا يرد علي .. يشخر الحبيب

قلت له انا نازله افطر باااي

نفسي في بيض

قلت يلا بجرب هالمطعم بجنب الفندق ع طول ع ايدي اليمين

"ملاصق لحافظ مصطفى" شكله بسيط بس ديما اشوف الناس مجمعه عليه فقلت بجربه

طلبت هوت شوكليت و بيض بالطماط

وانا اكل كل شوي حد يجي من الاطفال "يشحتون" الله يفرج عليهم

قلت لهم تبون تاكلون تعالوا ..

قالوا صدق كانوا بنتين و جلست وحدة والثانية استحت

شوي وجلست و شويات وجا ولد و بعده بنت قلتلهم عااادي تعالوا كلوا معانا

خليتهم ياكلون وانا قمت وطلبت لهم صحن ثاني و مشروبات

و اهل المطعم معصبين جا واحد منهم حاول يطردهم

قلت له انا بدفع جيب الحساب وخلهم ياكلون حرام

جا الثاني معصب ووايد شكله المسؤول يكلم صاحبه

خفت انهم ما يجيبون الطلب للاولاد ويطردونهم لو رحت

قعدت الين وصل الطلب كاامل ودفعت وبعدها رحت

واكدت عليه قبل ما امشي يخليهم يكملون

"قعدت اتأمل في حالهم والله يكسر الخاطر االله يفرجها عليهم"

اللي قالت ابوي توفى بسوريا واللي قالت احاول اجمع انا واخواني فلوس اجار البيت

واللي قالت نفسي ارجع المدرسة .....الخ

قلبك يعورك لما تشوف اطفال يركضون وراك عشان ليرة ..

اللهم عز الاسلام والمسلمين

المهم

نزل ابوي رحت معاه ع سميت سراي وكملت فطور هناك

بعد ما فطرنا ولله الحمد

رحنا ع المترو " مترو تقسيم"

والنزول في محطة VEZNECILER

ابا اروح لجامع السليمانية

بعض الناس قد راحوه فحاولوا يقنعوني انه عااادي زي باقي الجوامع مافيه اي شي زيادة

اصريت ع رأيي .. كيف نفس الشي وفيه قبور السلاطين " سليمان وامه واخته و اهم وحدة هويام" الله يرحمهم

ورحنا .. المطر كل ماله ويزيد

ابوي وين المظلة ..... قال شكلي نسيتها امس في الباص

طيب مو مشكلة بناخذ غيرها

شفت عائلة خليجية جايبين معاهم عربانة اطفال مع ان في ملصقات بالمترو توضح انها ممنوعة !!

اخذنا مظلة وحدة من واحد واقف عند محطة المترو بـ 5 ليرات

ابوي يقولي يا بنت اسمعي الكلام خذي مظلة لااااااااا مابا امسك شي ابا اصور

لما تطلعون فوق تشوفون هالعمارة في وجهكم تقريبا

اوقفوا مقابلها يعني وجهكم للعمارة وخذوا الطريق اللي ع ايدكم اليسار

تمشون سيده في سيده وبتشوفون جامع السليمانية قدامكم

واللوح في كل مكاااان و واضحة جدا

"اللوح البنية تدل ع الاماكن السياحية"

انتوا بتكونون جاين من الجهة الخلفية

ما ركزت كثير اعتقد مقابل الجامع مطاعم متواضعه اللي ع ايدكم اليسار بالصورة

فيديو

أفضل جامع في اسطنبول من حيث البنيان و الاطلالة الساحرة

من اهني اخذنا سيدة يعني خلينا الجامع وراء ظهرنا

متجهين الى مقهى حسنو علاء

شفت عدة تغريدات من الاخ عبد الله العطاس

"كان له دور كبير في اختياري لبعض الاماكن باسطنبول"

تمشون سيده في سيده الين تشوفون هالمحل

من عنده تلفون يسار و تمشون شوية تشوفون المقهى

واللوحة فوق واااضحة

اصلا من توقفون باول اللفه تشوفونه واااضح قدامكم

"المبنى البيج"

الطلالة ذي تحطيم هههههههههه

طفشونا قعدنا نتريا الكنافة اكثر من 45 دقيقة

طول هالوقت قعدنا نكلم واحد سوري صديق صديق الوالد

عنده مكتب سياحي في اسطنبول

سألته عن جولة بالـ هليكوبتر مدة ساعة

قال الشخص الواحد بـ 400 يورو

يعني وقتها ع حسب صرف اليورو 1680 درهم إماراتي

يعني الشخصين بــ 3360 درهم إماراتي

حاولت معاه ينقص ما رضي قال لو وافقتوا بعد نص ساعة نيجي ناخذكم من تقسيم

قلت له بصريح العبارة لا بفكر ولا شي اقولك ياها من الحين ميزانيتنا ما تسمح

وسالته عن جولات لـ 10 اشخاص الواحد بـ 200 ليرة .. قال لا ما بعرف اول مرة بسمع هالحكي

اركبي لحالك احسن شو بدك مع الناس ..

" كل يوم تقريبا كنت ادور جولة واشوف البروشورات مالت المكاتب السياحية باسطنبول واحد بس عنده وقالي حاليا موقفينها"

كنت شايفه قبل موقع بالنت بس لان محد تعامل معاهم ولا فهمت وين مكانهم فما تعنيت اسأل عنهم

" الوالد قال السعر مناسب هليكوبتر يابنتي مو باص" ههههههه

الصراحة ندمانه اني ما جربتها

تقيمي للكوفي :

الخدمة سيئة جدا ثقال

الطعم عااااادي جداااا

السعر حاله حال اي كوفي

اللي في الاطلالة فقط لا غير

لفينا يسار يمين نبي جراند بزار "تقدرون تشوفونه من اطلالة المقهى" قرريب

الطريق حولين المقهى مغلق رجعنا من نفس الطريق

بس من عند المحل اخذنا يسار وكملنا سيده في سيده

محلات مواعين ورررخيصة نفس بضاعة السوق المصري و بنص السعر

خلوا السور ع ايدكم اليمين وكملوا سيده

اصلا في لوح واااضحة جداااااا

اخترت هذا لبنت اختي وقلت له ابا نفسه لبنت عمتي

دور ما لقى فما اخذته قطن وسعره حلو بـ 70 ليرة

"اباهم يلبسون نفس الشيء"

صعوداً الى سوق محمود باشا

جيت محمود باشا عشان هالمحل "من السفرة الاولى عيني عليه"

اقول لابوي مذكرة انه ع الطرف

و كان ع طلعة ومشينا مشينا

وكل شوي يقولي مانتي داريه وين المحل

بس بتعبينا ع الفاضي

و ما شاء الله علي جيت عليه بدون ما اضيع

"اذا عجبني شي احفظ مكانه"

واخذت منه فستانين

اسعارهم حلوة

الاسعار مكتوبة يعني مافي مجال للتزويد

صرفنا 300 دولاً

سعر الصرف 2.68

احسن صرف صرفهم نفس صرف الشمال التركي

في الجانب الاسيوي لحظت ان الصرف عندهم غالي

في تقسيم وسط بس الافضل ع الاطلاق الصرف في المناطق الشعبية

ودخلنا جراند بزار "السوق المسقوف"

لان اختي موسطيتني ايب اساور و قهوة

قالي ابوي شوفي حمال يا حلوة ما بشل

هالمرة ما لقيت ديزاينات حلوة واسعارهم مبالغ فيها

كانت الاسويرة الوحدة ع 5 ليرات واذا اخذنا كمية ناخذهم بـ 4 ليران

شفتهم بـــ 8 ليرات

قلت له لاااااا 4 ليرات قال لا 5

بعطيك 50 ليرة و باخذ 12 حبة موافق .. اختاري

" بعد ما درت نص السوق اخيرا حد عطاني بالسعر اللي اباه 50 ليرة لــ 12 حبة "

اخذت من عند هالشايب لوحتين

الوحدة بــ 5 ليرات يا بلااااااااااش

وهذي اللوح

حلو هالمحل للي عنده بنات

المطر غززززززير

فيديو

اخذت علبتين الوحدة 500 غرام

محمت افندي

افضل بن عنده مكانه مقابل السوق المصري

يعني لو انتوا داخل السوق المصري اطلعوا من المدخل الجانبي

ع ايدكم اليمين لو جايين من امينونو وبتشوفونه ع طول مقابلكم

واذا جايين من فوق "من جراند بازار" اطلعوا من المدخل الشمالي

" كلاَ ع حسب اتجاهه " ابدا ما يضيع وارخص وفرش لما تشترون منه نفس

افضل حلقوم عنده حلوته معتدة اخذت كيلو بـ 50 ليرة

واخذت طقم براديين نفس ذيك المرة هدية

واخذت شاي برمان "كرتون صغير"

كله بـ 125 ليرة

وصتني اختي بجبن اخذت لبيتها ولبيتنا

علبتين جبن حامض و علبتين جبن طويل

كله طلع بـ 22 ليرة

نبا نرجع بتاكسي بما ان محملين بالاغراض

سالنا اول واحد الين اخر واحد كلهم قالوا من امينونو الى تقسيم 40 ليرة

وااايد حد المشوار من 15 الى 20 ليرة بالكثير

جا واحد شايب يبين عصاة السلفي قال تاكسي لا اركبوا الترام

سمعت كلامه لانه اوفر لنا ..

ركبنا من امينونو الى كاباتاش "بالترام"

و من كاباتاش الى تقسيم رجوعاً بالمترو

"كاباتاش هي حلقة الوصل"

والمشوار كله كلفنا اقل من 10 ليرات ولا ذل التاكسي

وصلنا تقسيم حطينا الاغراض وصلينا

و نزلنا ع طول نتغدى .. وبما ان ما باقي الا اليوم

قلت ما يصير نفوت بالي بيك

ركبنا المترو من تقسيم الى ليفنت 4

" تدخلون كانيون مول و تطلعون من البوابة الرئيسية بالشارع المقابل

مطعم مأمون أغلو

من دخلنا وانا اسالهم عن بالي وينه ما بيجي اليوم؟

رجعت وسألت وينه ما بيجي اتصلوا عليه

جيت من دبي عشان اشوفه

وسألت وسألت طفشتهم ههههههههه

اول ما ياب المنيو سألته وينه بالي

قال انتي وايد سألتي عنه "يعرف انقلش يمشي نفسه"

اتصل عليه قوله ناس من دبي يبونك هههههههه

قال مستحيل يجي هو في امريكا مع صديقته الممثلة ... سويت نفسي اعرفها

ايوة ايوة طيب خلاص احباااااااط ما شفنا حد لا بالي و هويام و لا بيرين سات

المطعم الوحيد اللي شفت الماي عنده باكثر من ليرة

قال عاشق اسطنبول اذا رحت لمطعم بالي لا تفوت الكنافة

اممممم كلها شيرة

" اكله اقل من العااادي و غالي ما يستاهل اصلا المشوار "

طلبت منه يجيب المنيو بالتركي ورحت ادوره ما طاع

ابوي قال اخر يوم لا اطفشينا خليني ادفع واسكتي فضحتينا بكل مكان تدققين

( قبل شهر او اكثر بشوي شفت وحدة بتويتر كاتبه انها جربت المطعم

ولما جت الفاتورة قامت وسحبت المنيو بالتركي ودفعت ع حسب اللي مكتوب داخله

قالت فررق في السعر اللي بالعربي دبل)

قبل ما يوصل الاكل قعدت افكر وين وين نروح

تذكرت مكان غرد عنه عبدالله العطاس

" نادي الخيول"

قلت بس نروح له كنت حافظه تغريدته

قعدت ادورها ادورها ادورها ما لقيتها من زحمة الصور

فتحت تويتر حاولت ادورها ما لقيتها

ارسلت لـ اخوي عبد الله

وكان سريع التجاوب ولله الحمد

قالي طريقة الوصول و ع طول انطلقنا

ننزل في محطة ITU

كان ذاكر الساعة بـ 100 ليرة

اللي اكتشفته اول ما وصلت المحطة هو التالي المبين في الخريطة

"ان شاء الله واضح .. لسه مبتدأين بعالم الخرايط"
مول استينا بارك

مول يونيك اسطنبول

نادي الفروسية

كلهم قراب من بعض

لو كنت اعرف كان وفرت وقت ورحت له امس

هنا مكتب المدرب اسمه سلجوق رحت عنده

قلت له ابا دورة لمدة ساعة ابا اجرب ركوب الخيل بالاجواء الباردة

قال وصلتي متاخر 6 نخلص بس لمنتسبين الناي اللي مشاركين ببطولات

اما التدريبات العادية خلااااص وقفنا تعالي الصبح

لا انا طيارتي الصبح بس 10 دقايق حتى هههههه

كلم اللي معاه بالمكتب حرمة ورجالين رفضوا

قهروني بس الغلط مني نسيت انهم يقفلون 6 المساء

فيديو

رجعنا من محطة ITU "جامعة اسطنبول"

الى تقسيم بالمترو

بكل مشوار ندفع ما لا يزيد عن 6 ليرات لشخصين

رديت اخذت شادو الواحد تقريبا بـ 22 ليرة وانا طالعه من المحل

الوالد كان واقف مقابل السفارة الفرنسية مشيت سيده اشوف المحلات الثانية

شوي وجا واحد من جنسية عربية يكلمني خليجي لف علي لفه قلبي طااااااااح

ما حسيت بنفسي الا وانا اصارخ باعلى صوتي ابوووووووووووووووووووووووووووووووي

لف شو شو الحقه الحقه الكلب و ع طول ركض الرجال ما عاد شفته الا بالردة للفندق

شافنا رجع وركض قليل ادب ..

"نصيحة لا تمشون ابدا بروحكم ابدا مشكلة شارع الاستقلال بالعرب المهاجرين"

من اهني شرينا شنطة نحن فيها الهدايا .. بكل الشارع شفت محلين بس يبيعون شنط سفر

واحد اسعاره في العليلي اما هذا اسعاره زين اخذناها بـ 80 ليرة

تعشى الوالد في سميت سراي بشارع الاستقلال

وبعدها رجعنا للفندق

ونحن قريب الفندق خفت اني اجوع بليل ههههه

رحت لسميت سراي اللي بنفس سايد الفندق

واخذت فطيرة جبن بـ 3 ليرات وشوية

و من الدكان عصير ليمون بليرة ونص

وطلعنا حاولت ارتب شوي اغراضي

استعداداً لسفر بس دون جدوى ههههه

ضبطت المنبه ع الساعة 7 صباحاً عشان الحق ايب حلويات

ترقبوا الجزء الاخير

يوم السفرة

يوم العودة الى الإمارات الحبيبة

دمتم بحفظ الرحمن

|القحطاني| · 03-07-2015, 07:51 PM

ما شاء الله جزء جميل وأجواااء رهيييييييبة جدا

الأمطار روعة .. ويا زين الكنـــــــافة

غريبة المطعم عنده أنواع كثيرة كلها ماء ههههههههههه

الله يعطيك العافية

ذيبة · 03-07-2015, 08:48 PM

روعة عنقودة تسلمين على التقريرالرائع

زهرة نيسان · 03-07-2015, 10:34 PM

الله يسعدك عنقودة سردك عفوي ممتع
ضحكت على بالي بيك ههههههههههههههههههههه
الكنافة ما ادري ليش يطولون

العقرب · 04-07-2015, 02:13 AM

هالجزء عجب ام عبدالله لان فيه تسوق

فساتين وجنط ومكياج ومواعين

الله المستعان ...

طارق عنايات · 04-07-2015, 08:02 AM

رائع جداً ما تقدمين

تقرير حافل بكل التفاصيل

لي عودة

استوقفتني هذه الصورة

شكرًا لك

كتكات783 · 04-07-2015, 08:29 AM

رااااااائع مبدعتنا ..

مازال التقرير يستكشف أكثر وأكثر معالم تركيا وخصوصاً اسطنبول ..

بصراحة أماكن كثيرة ذكرتيها .. أشوفها حصرياً هنا ..

لفتة جميلة جداً منكِ للأطفال ( الله يلطف بحالهم )

بانتظار الجزء الأخير .. ومشاعرنا مختلطة مابين فرحاً باكتمال موسوعتك التركية وحزناً على توقف إبداعكِ في هذا المتصفح ..

لكِ كامل التقدير ..

hazim b · 04-07-2015, 06:30 PM

تقرير رائع جدا .للاسف وصلنا ليوم العودة
مبروك عليكي ال 5 نجوم.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تجربتي في مطعم Nusr-Et Steak House بالصور والفيديو	عناقيد الربيع	تركيا	63	19-02-2018 02:13 PM
برنامج سياحي بجدول للشمال التركي واسطنبول	أبو أسامة	تركيا	48	24-01-2018 02:56 PM
رحلتي العائلية الى الشمال التركي (عشرة أيام ممتعة) معلومات مهمة	(( أبو رائد ))	تركيا	46	11-01-2018 11:11 AM
جدول رحلتي (عشرة أيام) إلى الشمال التركي بالتفاصيل ( للفائدة والاستفادة)	(( أبو رائد ))	تركيا	8	02-11-2015 04:12 AM