باريس الجميلة - الصفحة 3

توبليرون · 03-01-2015, 12:59 AM

السلام عليكم

بس حبيت اضيف لكم هالصورة من السوق

المقام عند برج ايفل

نسيت اضيفها بالجزء السابق

وصلنا يوم الأحد

اقدوا البنات مبجر اليوم علشان بيروحون

لبوتيك مدام كوكو شانيل

اطلعواا

واحنا قعدنا وراهم وتجهزنا للطلعة

لقوا البنات ان المحلات مسكرة

ورجعوا لنا وقررنا نروح للوفر

وهذا اول وصولنا من ساحة اللوفر

حظنا واللوفر لازم يطق علينا المطر

محد بقى يدخل للمتحف....بس صورنا بره

بعدها رحنا جهة اليسار وفي ممر

هني قبل لا ندخل الممر

وهني في الممر شبابيك تطل على المتحف

وصلنا للخارج

ورحنا جهة اليسار من الباب

ودخلنا من باب جانبي

وشفنا لادوريه للطلبات التيك اوي

كملنا داخل لقينا قاعة مطاعم

وشوفو الزحمة

هذا مطعمنا مع جاره نفس الشركة

وتقريبا نفس الأطباق

الأطباق مغربية او تونسية

هذا اختيارنا من الغدا

طلب العيال

طلب مادري منو نسيت

طلبي

عطونا رهش مع الغدا

ما جسناه ما نشتهي عيش ووراه رهش ما يصير ههههه

وهذه حلوى جنها لقيمات يابسه بس

وشاي منعنع بعد هالغدوة

كان حسابنا انا ويوسف وغنومة 50 يورور

عطونا 3 علب من الحلى والروب بالفواكه

توبليرون · 03-01-2015, 01:00 AM

بعد الغدا رحنا نتمشى في السوق

اللي تحت

سوق صغير وحليييووو فيه

محل عطور اذا شريت عطرين يعملون خصم

تشريت منه هدايا رجالي ونسائي

حتى العطور الجديدة نفس الشي الخصم للاثنين

والبنات اشتروا بعد

مكياج واصباغ

هذا الهرم مقلوب داخل السوق

دخلنا ابل ستور

قعدنا انا وغنومة على جنب

مثل مسطح ينفع كرسي وعلى الجانب

ومعانا وحدة صينية ....جان يكرشونا على قولتكم

اطردونا لا تقعدون ....طلعنا وصورت المرة الالف للهرم المقلوب

ورحنا محل

printemps

للماركات يتكون من كذا بوتيك وفيه دورين

عجبتنا هالجنطة الكبيرة

هني بصور غنومة وقف يوسف جدامها

علشان تشوفون الحجم

وهذا الريال الف مرة يمر جدامي ما خالاني اصورالجنظة بروحها

وهذه كانت بالبوابة للمحل

هذا المحل اللي اغراضه ملونه

كان بلندن والبحرين افتحوا منه

طلعنا بعدها ولقينا بوحسون قاعد بكافيه

مقابل اللوفر عند محلات السوفونير

فج الغيم

طلعنا تقريبا الساعه 3,30

وقررنا نروح الشانز لأن بوحسين يبي يشوف

مبارة مانشستر سيتي بالمطعم مال الفيش اند شيبس

ينقل مباريات

اشارة في بوابة اللوفر للتاكسي

ورحنا بداية الشانز لمحل

A&F

وقفوا طابور العيال وانا ودانه قعدنا على كراسي الشانز بره

هذا مبناه ضخم وباول الشانز من جهة اليسار اذا انتوا جاينين من الكونكورد

وهذا من الداخل ظلمة هالمحل انا داخلة فيه بلندن

وقفت هالسيارة والعالم تجمعواا عليها

انا كان وراي كشك طرشت دانة شرت لي ماي

وانا رحت بعدين وشريت منها جنط خام حق شغالاتي

طلعت اللي تبيع لبنانية

شوي ويطق علينا المطر

وقعدنا بمكانا بس فتحنا المظلة مثل الناس اللي قاعدة

الحمدلله ما طولو العيال اكثر من ساعة

ويوم شافوا المطر شفنا السينما قريب دومينوز بيتزا

وكانت تعرض افلام اجنبية

وقررنا ندخل الفيلم

مقابل كافيه نابولي كان باب السينما

قصينا التذاكر

وراحوو تشرووا العيال لهم ....على فكرة الفيلم باقي عليه ربع ساعة

قال لنا الموظف بعد ما اخذ شاف التذاكر قال انتظروا ربع ساعه

يعني يبينا ندخل حده حده

دعاية

الكراسي مريحة

هذه فكرة عن الفيلم

LUCY

في شريط لوك بوسون الخيالي العلمي الجديد Lucy (حقق 45 مليون دولار في الأسبوع الأول لعرضه في اميركا)، امنيتنا مستجابة مع كل ما يحتويه من حركة استعراضية ومؤثرات بصرية وسمعية (من تنفيذ ILM) وترفيه وتشويق وحبس انفاس. والاهم سيناريو اذكى قليلاً مما سبق وقدمه، تقدمه امرأة تشبه "الابطال الخارقين" هي البارعة سكارليت جوهانسن المحاطة بالنجم مورغان فريمان، ومعهما الممثل المصري عمر واكد الذي بدأ يثبت قدميه في السينما العالمية، وخصوصاً انه يشارك في دور بطولي كشرطي فرنسي وليس كارهابي عربي مثلاً. بطل الفيلم الرئيسي ليس لوسي (سكارليت جوهانسن) صاحبة القوى الفكرية والجسدية الخارقة التي تصعّد التشويق بوتيرة تصاعد قدرات دماغها، بل لوك بوسون الذي استخدم 100% من قدرات الحركة والمؤثرات ليقدم ثريلر ينطلق بقوة من حقيقة علمية تقول إن الانسان لا يستخدم عادة إلا 10% من قدراته الفكرية.

تمنيت بذيك اللحظة ان تكون هالمادة عندي تعطيني قوة للمشي

توبليرون · 03-01-2015, 01:02 AM

رجعنا الفندق بعد ما شفنا بوحسون

للصلاة قبل المغرب ونحط الأغراض اللي شريناهم

عجبتني الدرايش

هذا فندق قبال فندقنا

وصلنا الفندق

وهني ييييعت واكلت هالكرواسونه بالكاكاو

تفضلوو عقب ما أكلت نصها ههههه

بعد الراحة قررنا نروح للحي التايلندي

وهذه الخريطة

بالغصب دليناهم

نسال وياشرون لنا الناس على المكان

فلافل معز

شافنا واحد لبناني وقعد يسولف مع بوحسين

وقال له انت من السالمية صح؟؟

العيال وانا خفنا قلنا اشلون عرف ....يوم شافنا مستغربين

قال انا اختي كانت بالكويت وساكنه بالسالمية ههههه

طلع ما يعرف الا السالمية هههههه

صدفه ان احنا من السالمية

وهذا مجابل مطعم معز

مطعم لبناني

تفضلوو

بعد العشا

رحنا جهة النافورة

هني كان تجمع ونسمع ناس تصارخ مثل المناظرات اللي بالهايد بارك

بعدين يوولهم اهل المحل ووخروهم عن محلهم

راحوو عند النافورة

وقعدنا بهالكافيه اللي على يمينه شارع اللي يوديكم على كنيسة نوتردام

فندق صغير

وعلى يساره محلات وبسطات كثيرة

وهذه بعض الطلبات

كنا برة بس استبردنا دخلنا داخل

وهني مساج صيني

وقعد يوسف وابوه.....بوحسين اللي يدلكه رجل

كل واحد 5 يورو

بعد ما خلصوا قال لي بوحسين قعدي خل يسوون لج مساج

قلت له اخاف من الديسك اللي بالرقبة

....قال خل تدلك اريولك.....طبعا على البنطرون

ودلكت لي ريولي وقعدت اسولف معاها

وتحاول انها تتعلم اللغة العربية مني

مثل اشلون تنادي الزباين العرب

والخمسة....والعشرة بتعرف اشلون تقولهم

قعدنا نضحك عليها.....لأن ما تعرف تنطق الراء فتقول عشهة

ماهي قادرة تقول عشرة

البسطات

العيال وصلوو للكنيسة

وهذا تصويرهم

وتأجير تاكسيين للشقة

.....هني مافي تكاسي كثيراركبوو العيال واحنا وراهم بعد خمس دقايق

ونشوفكم بالجزء الجديد

توبليرون · 03-01-2015, 01:05 AM

السلام عليكم

اليوم عاد البنات قالوا مافيهها كيري ميري

لازم بوتيك مدام كوكو شانيل

راحوو وهذه الصور

مع ان ممنوع التصوير بس يقولون صورنا بالخش والدس

عنوان البوتيك

Chanel,31 Rue Cambon

شرت بنتي تكرمون كعب وبروش

مشترواتها مع جنطة سيلين

ضيفوههم ...على طلبهم قهوة....للأسف ماعندي للضيافة الا هذه الصورة

مع صور من البوتيك

وهذه ضيافتي ....لما شريت جنطتي من غاليريا لافاييت

انا قلت مابي الا ماي

محل حلويات من طريجهم

وانا وبوحسين رحنا نتريق تحت

بالكافيه

وهذا ريوقي مع كرواسونة وقعدت بره الجوو براااد وقعدت اصور

بهذه الصيدلية

مارضوو يبيعون ليوسف دوا الا بوصفة طبية

مع ان بالشانز عادي باعووه

وحتى بتركيا عادي وارخص من هني طبعا

مادري ليش ما شرى له كمية من تركيا

هدوووء مريح

بس بعض الزباين يمرون ياخذون ريوقهم وهم اللي ماشين

استبردت ورحت داخل الكافيه وبوحسين راح المطعم التركي

ياكل بيض.....ههههه

يقول آشر له ابي بيض عيون

))يقول على هالنطرة والا مسوي لي بيض فوح ((مسلوق

ههههههه يقول بغيت اكسرها على راسه خخخخخ

يتني دانة وطلبت لها هذا

رجعنا الشقة عقبها

وقعدت اضبط الشنط وبعدين

اتصلوو فينا البنات على الساعة 12 وقالو تعالو لنا في مطعم هندي

وارسلوا لنا الخريطة واسم المطعم

ورحنا لهم

.....من الطريج ....الأوبرا

الكرت

الخريطة

وصلنا المطعم

وهذه صور المطعم والطلبات

كان مزحوووووم

المطعم مو واسع بس صفتين وكان زحمة

وصل

الحلوووو

صور السناب شات من البنات اخذتهم

برياني دياي وبرياني وربيان

كاري

برياني خضار لي....قايلة لكم ما اثق باللحوم من شرق اسيا والهند

هههههه

غنومه برياني دياي

مرق كاري

هني تذوقت مرقة العدس اللي طلبها يوسف والكل عجبته

كانت لذيذة

بعد الغدوة الحلوة

قررنا نروح بريماك انا والبنات بسس

وطلبنا تاكسي من المطعم

وصل التاكسي

والا فيه شبكة wi fi

استانسو البنات وشبكوو عليه

وانا ما خليت التصوير

من الطريج

كان في نهر ما صدته

وصلنا المول

يتكون من 5 ادوار 3 بس مواقف السيارات

و2 المول ,والمحلات

عنوان البريماك

Primark Villeneuve

وهذه خريطة

للي خايفين من سالفة النقاب

شوفو مافي داعي للخوف

وهذا بريمارك

هني اول شي معاي البنات بعدين تطشرنا

المحل زحمة عرب واجانب

طلعت برة على ما يحاسبون البنات

واشتهيت

وشريت الوردة

على فكرة بريماك بالطابق الثاني

وتحته بنفس المساحة محل مارك سبنسر

اجياس بريمارك

بعد ما خلصنا من بريماك تمشينا بالسوق

بس الجياس وايد

قررنا نرجع....ورحنا للانفورميشن

وهذا هو بالوسط

وهذه المحلات يمه

انا احبها الخبزة الالمانية

بس مافي مجال ابدااا

وهذه خدمات مكتب الانفورميشن

طلبنا منهم تاكسي

اتصلت بالتاكسي....اخذت رقم موبايل بنتي....وقالت بعد عشر دقايق

نزلوا تحت ودلتنا على ان نروح السرداب الثاني ونطلع على الشارع

وننتظر هناك

بس طلعنا والا يتصل فينا السايق

ووقف لنا وساعدنا في شيل الاغراض

ووصلنا يمكن 25 يورو

الى الشقة

وصلنا الشقة

خفنا من الشحن...قلنا بوحسين ماكو الا نشحن

ضبطنا 3 جناط وعطيناهم دانة وابوها علشان

يروحون يشحنونهم حق الكويت

كل المكاتب اللي راحو لهم يطلبون مبلغ خيالي

طلع الوزن لل3 جناط 28 كيلوو=1850 يورو

اشدعوووة وهذه الجناط الصغار بس

قلت لابوحسين....ارجعوا وخلوها معانا بالطيارة على الاقل اضمن

ورجعواا

وهذه الصور عجبتني اشعة الشمس المغارب لونها عجييب على المباني

بس حسافة هذه من شباك المطبخ

بعد ماريحنا وضبطنا شغلنا

رحنا نتعشى مع ابوحسين عنده خوش مطعم يقول

وأخيرا صورت الساعات عدل

من ساحة محطة القطارات

ووصلنا مطعم بوحسوون....مطعم تركي

بجانب المحطة من جهة الساعات واضح

وشوفو طلباتنا التركية

طلب بوحسون

طلبات البنات

أخيرا طلبي

ورجعنا جهة الساعات ههههه

وبما انها الليلة الأخيرة

لازم نودع الشانز

غنومة تعبت ارجعت مع ابوها الشقة...ورحنا ,,,انا ويوسف وفرفر ودانه

وقعدنا نتمشى ونتشرى

ما نخلص من المشترى لأخر رمق هههههه من مونوبكس

...وبعدها للهاقن داز...

وهذه طلباتنا

انا ويوسف

انا

ويوسف

طلب دانة

طلب فرفر

طق مطر واحنا قاعدين....وهذه الصورة من خلف الشباك

وداعية يا أخر ليلة تجمعنا

ايفل بالليل

من شقتنا

ونشوفكم بالجزء الأخير ان شاءالله

Umhusoon
ارسلت بواسطة Tapatalk

البداية فكرةمعجبون بهذا.

توبليرون · 03-01-2015, 01:07 AM

السلام عليكم

ووصلنا لليوم الأخير من سفرتنا

واللي قضيناها بتركيا وبعدها باريس

واليوم الأخير قعدنا الصبح انا وبوحسين

وبعد ما سكرت جنطتي وجنطته

رحنا نتريق تحت بعد ما قعدت العيال وقلت لهم تجهزوا

علشان التشيك اوت

وهذا ريوقنا

بعدنا ما خلصنا الا فرفر تتصل علي

وتقول العاملة يت تبي تسوي تشيك اووت

قلت لها توو الناس

قالت لا صج مكتوب الساعة 11 التشيك اووت

قالت لها ميخالف نص ساعة على ما نجهز

قالت اوكي

رحت للعيال وطلعنا الشنط انا وابوحسين

والعيال يبدلوون ويشيكون على اغراضهم

الساعة 11,30 كلنا تحت

قعدنا ننتظر السيارة

التاكسي بما ان مافي مكتب عندنا بالعمارة رحنا

قبل يوم يعني الصباح بالجزء السابق

رحنا انا وبوحسين يوم نتريق

للفندق اللي قبال مبنانا

وطلبنا منهم ان يتصلوون على تاكسي علشان يوصلنا المطار

ما قصروا سيداا راح اتصل قال كم شخص

قلنا 6 وعشر جناط

قال متى تبونه قلنا الساعة 12 ونص

قال اوكي كلمهم قال السعر ب90 يورور موافقين قلنا اوكي

ومثل ما اتفقنا وصل بالوقت المناسب

وهذا رقمه

وهذه من الطريج

باريس عيونها تترقرق تبي تبجي

علشان ام حسون تبي تهدها هههههه

لا تلومونها

محطة قطارات

النوفوتيل ....للمطار اعتقد

وقربنا من المطار

منو شاف الطيارة

نموذج الكونكورد...

توبليرون · 03-01-2015, 01:10 AM

وشوفو كل تيرمنال صغير جذيه

انا قبل قلت لكم انه مطارهم حلووو كله قاعات دائرية

هذه وحدة وتختص بطيران معين

يوصلك التاكسي لباب التيرمنال

واخيرا وصلنا للتيرمنال اللي فيه الطيران التركي

شايفين السيارة كم تبعد عن التيرمنال

ما احب المطارات اللي فيها مشي وااايد

هني راحتي بهالمطار

والسايق كان يفتش على هذه العلامة عند البوابة

وبعدين وقف بالمواقف

شايفين اسماء شركات الطيران اللي

بتطير من هذا التيرمنال

لنا وقفة وسالفة الشحن

اول ما وصلنا شفنا الطيران التركي

وشفنا ميزان الحقائب

وزنا الجناط وعادلنا بينهم

وطبعا الجناط زادت واحنا عندنا وزن زايد

في مكتب خاص لدرجات رجال الأعمال او الأدارة للطيران التركي

راح بوحسين وأخذ معاه المترجم التركي دانه ويوسف

وسألوهم عن الوزن الزايد وكم سعره

المهم قالو له انت اوزنهم وتعال

قال له وزنهم قال لا لازم عند الكاونتر

رجنا الكاونتر والا تصير من صوبنا موظفة جزائرية حبووووبة جدا تضحك معانا

ولها طولة بال

قالت بوزن الجناط الكبيرة اول وبعدين الصغيرة

واللي داخل الطيارة عطتنا لهم اوراق

انتبهوووو معاي

المهم طلع الوزن الزايد 33 مثل ما توقعنا

قالت لكم كل شخص 3 كيلو فري

يعني 3 × 6 =18

يعني باقي 15

قال لها ابوحسين يلا وعلشاني 3 فري منك هدية خخخخخ

والله عطتنا

وبعدين عطتنا ورقة نروح فيها للشخص اللي في المكتب

علشان ندفع الفلوس الزايدة

طلع الوزن الزايد سعره =300 يورو بس

وين كنا ووين صرنا ههههه

1850.....الشحن بره

وهني 300 الفرق واضح 1550

الحمدلله ....يعني لا تستعيلوون وتودون شحن خارجي

نهييييبة

التذاكر

كاونتر التركية

رجعت فرفر وغنومة اللي راحو يسوون التاكس فري قبل لا ندخل

الجناط العفش

وطبعاا ودت ورقة الغاليريا لافاييت بعد

ويابت الفلوس وعطوها بالكويتي

حلوو وزعناهم بينا انا وهي ويوسف

المهم بعد الكاونتر قالو لنا روحوا من هنا سيدة وراهم مافي مشي وايد

وهذا ستاربوكس ....والعيال قالو يبون يروحون يتغدون بماكدونالد

لأنهم مو متريقين

وهذا الممر اللي دخلنا بين كاونتر التركية

وستار بوكس

العيال اكيد راحوو تحت

من هذا الدرج

وهذا خلف الدرج

جلسات للانتظار

وهني دانة وستار بوكس

ويوسف وابوه ماكدونالد

وهني نزلت مع البنات تكرمون للحمامات

راح تكون على اليسار بعد السوق الحرة

وشايفين مكينة للانترنت......بس احنا شابكين من المطار

المهم....وصلت تكرمون الحمام والا بس حمام تغيير الاطفال هو اللي مفتوح

واشوف الحريم يدخلون هني

والحمامات الثانية

في وحدة افريقية تنظف الحمامات

مسكرة المدخل بعربانة ادوات التنظيف

جت بنت انجليزية صغيرة وحمام الأطفال يستخدمونه الحريم لأن فيه افرنجي

شفت عاملة التنظيف طلعت من حمام بعد ما نظفته

قلت للبنت يلا روحي

راحت والا العاملة تقول لا لا

قلت لها ليش صغيرة ومحصورة...دخليها قالت خل تروح جهة الرجال

مسكينة اوقفت البنت وهي تتحرك مو ثابتة

والا ايي اخوها ينطرها ....ما اشوفها الا تأشر له على ملابسها توسخت

مسكينة ....الحمدلله بهالوقت طلعت الحرمة وكان دوري المفروض

فقلت للبنت يلا روحي انتي

مسكينة استانست وتقعد تتشكرني

يا حياتي كسرت خاطري

بس الأفريقية بطتت جبدي

ليش الحمام اللي تنظيفه خلي العالم تدخل

والا طلع لا لازم تنظف كل الحمامات

وتنظف عقبهم بديتول وتمسح

تدرون هذا تسويه بكل ثقة وكانه مافي ناس تنطر

وترى مو بس هذه لا في وحدة ثانية نفس الشي بالحمامات الداخلية عند البوابات

بعد هذا رحت للسوق الحرة وشرينا منهم بسكوت احب البسكوت اللي بالمطارات

وكاكاو

ومجلة شرت دانة وغنومة

شوفو شنو شريت

البسكوت لذيييييييييييذ

جداااا

بعدها رحنا جهة البوابة رقم 54

ودخلت هالسوق الحرة ابي اشتري شي بعدني للحين عندي مجال للشراء ههههه

ويا كثرهم الصينين.....

شريت العطر اللي ابيه

وبعدها رحت هالطريق.....العيال وابوهم راحوو قبلنا

بس انا وفرفر هني

وكمان خليت فرفر ورحت هني

للعبور للبوابة

ممر متحرك طوييييل

هذا فيديو ....ترى مو صوتي

‫ظ…ط·ط§ط± ط¨ط§ط±ظٹط³ ...ط§ظ„ظ‰ ط§ظ„ط¨ظˆط§ط¨ط©‬&lrm; - YouTube

وهني خلاص وصلت لحد الجووع واحس خلاص

ايدي قامت ترجف وجسمي تعب

رحت لكافيه قريب من الانتظار

وطلبت منها ....ماعندها الا ساندويتش الجبن اللي مافيه بيكون

الباجي اغلبه فيه حتى السلطة

اخذت السندويتشة ...واكلتها الحمدلله

ردت روحي خخخخ

تفضلوو وهذا الكافيه مبين

وهذه بوابتنا

وهذا بعد سوق حرة قريب مني

والجوازات زاهبة...وجناطنا كوود

وبالأنتظار.....ربعي يتمشون

ووقفنا طابور بعد تغيير البوابة الى البوابة 56

بس الحمدلله قريبة مننا

وصعدنا طيارتنا التركية

وخفت من اللي جدامنا على اليسار

يمكن شرب بطلين قبل لا تتحرك الطيارة

خفت من انه يرجع جدامي استغفر الله ولا اخذ

من المظيفة بطلين وحطهم بجيب الكرسي

وصلنا مطار اسطنبول

وسيدااا لبوابتنا ولقينا الناس ينتظرون قعدنا يمهم

والعيال راحو يتمشون يقولون ملينا من القعدة

وشووي صعدنا الطيارة وطارت

ودخلنا الطيارة التركية.....من اسطنبول للكويت

وكانت طيارة جديدة بس بدون شاشات للتلفزيون

بس نظيفة ومرتبة

وهذه وجبتهم تصوير غنومة

وهذه بعض مشترواتي الخفيفة من تركيا وباريس

غنومة تقول زادت هذه شسوي فيها

وهذه صور ما اضفتها من قبل

يوسف مع هرم اللوفر

وهذا تصوير يوسف من فوق غاليريا لافاييت

قاعد ينطرنا قلت له روح الطابق السابع

فيه مطل على باريس

....وهذه صوره بدزني ....محملينه الجياس

خوش تصوير

هذه مشترواته من الاوت لت

هذا مادري وين مصورها

معرض الرينو

كانت درجة الحرارة

بدزني

الاوت لت والمطر

وقوس النصر الجديد

وسلامتكم

الحمدلله الله سهل سفرتنا هذه وكانت رحلة جميلة مباركة من رب العالمين

وان شاءالله اشوفكم بتقارير جديدة

بس ادعوو لي اسافر ابي سفرة بالشتاء

MOBARKI · 03-01-2015, 02:36 AM

تقرير رائع وصور جميله

شارلوك هولمز · 03-01-2015, 09:17 AM

رائعه باريس بروعتك ام حسين ماقصرتي والحمدلله رزقك برحلة فالشتاء

هولمز

fanda · 03-01-2015, 09:23 AM

تقرير مميز و غني بالمعلومات
يعطيك العافيه يا ام حسين

فيصل · 05-01-2015, 03:21 AM

يارب تسهل سفرتها بالشتاء يا رب

شكرا لك ام حسين

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تقريري عن أسكتلندا الجميلة	وجهات أوروبية	بوابة بريطانيا	119	18-08-2019 10:46 AM
ذكرياتي الجميلة	عين على السماء	البوابة السياحية	71	29-01-2018 12:19 AM
ثلاثة أيام في كوتا كينابالو الجميلة	Deena	ماليزيا	57	18-03-2016 10:43 AM
اثيوبيا الجميلة # الحبشة #	شارلوك هولمز	بوابة اثيوبيا	38	08-05-2015 11:11 AM