شبكة و منتديات العرب المسافرون - ليمونة بين احضان تركيا وروعتها

صباح النور والخير
تاريخ اليوم الخامس والعشرون من يناير
تفاصيل يوم امس تاريخ الرابع والعشرون

رحلة القريه العثمانيه و المسجد الكبير والسوق المسقف ولكن كان يوم اجازة لهم الاحد فبعض المحلات مفتوحه والغالب مغلقه

المهم اني تسوقت واخذت الي ابيه واشتريت مكسرات مشكله يابلاش عندهم الكيلو ع ثلاثين ليره والتين المجفف الخمس كيلوات في بوكس طبعا جاهز مجهز ع مئه ليره بعد المكاسر تسعون ليره

القريه العثمانيه الطريق سهل وسلس وبسرعه وصلنا ويمين الشارع ثلج والتشجار مثلجه والنباتات كلها بياض
نزلنا وصورنا والارض مثل ماتعرفون كلها صخور متيبسه وثابته لكن ليس بارض مسطحه وسيده لا ارض متصاعده ومتنازله بسبب الصخور ومثلجه وتزلق وياسلام سلم نحتاج بدي قترد بس نسند نفسنا عليه عشان لانطيح نسقط وتصير فشيلتنا فشيلتاه وشماته من بعض العرب

المهم صورنا وصورنا حته حته بما انه شحيته اول مره تشوفها لازم اخليها تاخذ جوله واهي ماتبي وخايفه ع نفسها لا تسقط عمك اصمخ احلل التذكره احللها يابنت والاتشوفين معالم تركيا

دخلنا مطعمنا البيت المعتاد وطلبنا فطور لشخصين لانه ماشاءلله خير وزايد بعد تشكيله متنوعه من الاجبان والزيتونات والمربى والعسل والزبد والقيمر قشطه وخبز وبيضتين لشخصين وبطاطا بالجبن وطلبنا اكسترا حبوها المناتيش وشاي ع كيف كيفك
الحساب كله سبعه واربعين ليره يابلاش

وصدفه والا في حفل خطوبه ع ما اعتقد المقروده بتنقرد وتنيل مع بختها التركي وحفل ورقص وغنى وطبول وطقطقه عشنا اجواء حلوه وجميله وتصورتهم وتصورنا وياهم لقافه مانتوب منها للذكرى فقط

بعدها الى السياره سر اخذت منا القريه ساعتين

توجهنا الى المسجد الكبير الجامع وبعدها قلت للتاكسي خلاص انتهى دورك معاي توكل ع الله كان حسابه للجامع والقريه مئة ليره عداد
ومن ثم وصلنا وصورنا وشفنا جمال ورعة المسجد ومكان الخطيب وعجبني النافوره الي حق الوضوء بوسط المسجد

ومن ثم مشي الى السوق المسقف

صرفت مادري كم بس اشتريت مناشف ومكسرات ومطارة لقهوتي الغاليه بعد مادري شنو اي وكريمات للوجه والجسم ياحبي للكريمات شريت تقريبا خمس كريمات وثلاث ليف ع مئه ليره

ومن ثم جلسنا في كافيه شربنا شاي
وتدفينا من البرد احسابي عشرون ليره بعدبلاش

اخذنا نفسنا مشيا ع ارجلنا مع رذاذ الثلج والبرد يكفخ فينا بس شعور طيب يرد الروح
تاكسي ودنا الى الفندق ماعاد فينا حيل نحمل بهالاكياس تعبينين
ومن ثم وصلنا للفندق نزلنا الاغراض وردينا لنفس التاكسي وقتله اخذني جوله حول بيت الحرير وكم مشوار وشارع وبعدها الى المطعم الي منتوش ذابح عمره يبي رز كويتي يبي عيش ارز واهو قريب للفندق بشوي وللمجمع كينت طلبنا دجاجه مشويه بالفرن لذيذه والله وثلاث مواعين ارز ابيض وبالعافيه

والى الفندق مشيا ع الاقدام لتهضيم العشاء مع اني ما اكلت الا القليل بس الحركه بركه
والسفر مو كله تكاسي ودلع لا حرك نفسك وحرك الدم الي بجسمك يمكن يحس ع نفسه هههههه

وسلامتكم