|
هلا ومسهلا فيكم اعتذر عن التأخير كنت استعد للمقابلة في السفارة والحمد لله انتهيت منها اليوم بنجاح . راجع لكم بعد شوي لاكمال الشرح. اقتباس:
وانا اسعد بتواجدي بينكم وبردودكم المحفزة اقتباس:
شاكر تواجدك ومشاركتك اقتباس:
اقتباس:
اتفق معك ان تخوف الكثير من الناس من اكمال مستنداتهم بأنفسهم يفقدهم الكثير من المتعة وقد يضعهم في مواقف محرجة .... |
حياكم الله من جديد ،، الان بنشوف كيف تقدر تبدأ عملية اضافة افراد الاسرة الى الملف التعريفي وكيف تسدد رسوم الفيزا وتحجز موعد اول شي ندخل على الملف التعريفي زي ما سوينا في الخطوة السابقة من خلال الرابط التالي : سجل دخولك ومن خلال القائمة اللي باليسار اختر جدولة الموعد / New Application اول شيء راح يسألك عن نوع التأشيرة وفيه نوعين : 1.تأشيرة لغير المهاجرين 2.تأشيرة هجرة طبعا نختار تاشيرة غير المهاجرين ونضغط متابعة بيطلب منك الان تحديد المكان اللي بتسوي فيه المقابلة : 1.الرياض 2.جدة 3.الظهران حدد المكان اللي تبيه واضغط متابعة الحين نجي لفئة التأشيرة ونختار All Others الان تحدد درجة التأشيرة وحنا اتفقنا اننا مقدمين على فيزا سياحة وعلاج كونهما مع بعض ورمزها هو B2 نضغط الحين متابعة بتجيك صفحة فيها معلوماتك تأكد منها ودخل البيانات الناقصة لو كان فيه بيانات ناقصة واضغط متابعة وصلنا الحين الى الخطوة رقم 6 وهي خطوه مهمة جدا منها نظيف افراد الاسرة واحد ورى الثاني نضغط على أضف بالاسم ويجينا النموذج التالي : نضيف بيانات الزوجة ونلاحظ ان اول خانة اللي هي Relationship انا مختار فيها Spouse يعني زوجة عبي البيانات بشكل دقيق واهم شي رقم تأكيد النموذج الخاص بالزوجة وهو اللي يبدأ بــــ AA00 اضغط حفظ الآن بعدين نضغط اضف بالاسم ونضيف افراد الاسرة واحد واحد حتى ننتهي الان يتكون صفحة العائلة مثل الصورة فوق نضغط متابعة بيجيك هذا السؤال اختر نعم وبيجيك سؤال ثاني اختر " لا " الان نحدد مكان استلامنا للجوازات بعد ما تنتهي انا اخترت فرع الربيع بالرياض نضغط متابعة الان وصلنا لمرحلة الدفع نضغط على تأكيد الخيارات الموجودة هي : 1-الدفع اون لاين عن طريق سامبا اذا كان عندك حساب عندهم 2-الدفع عن طريق طباعة الايصال والذهاب لاحد فروع بنك سامبا للسداد يعني مالك الا بنك سامبا للسداد. طيب الحين هنا فيه لفة خطيرة لازم تكون دقيق !! هبلتني لين عرفتها بعد مكالمات نع السفارة والبحث بالنت فركز معي يرحم والديك ترى الدعوه مافيها استرداد للفلوس J فيه شي اسمه رقم الــــــ CGI وشو هالرقم ؟ وكيف نقدر نجيبه !! هذا الرقم تحتاجه علشان تسدد قيمة الفيزا اذا كنت تبي تسدد من الفرع اضغط على Over the counter راح يطلع لك الايصال اللي من المفروض تطبعه وتاخذه علشان تسدد في الفرع وهذا شكله : http://www.arabtrvl.com/up/uploads/a...7986197351.png وراح تلاحظون انه طلع لكم رقم الـــCGI يعني هالخطوة لازم نسويها سواءاً كنا نبي نسدد بالفرع او بالنت. فاذا كنا نبي نسدد بالنت ناخذ الرقم من هنا ونرجع للصفحة اللي قبلها ونكمل التسديد من هناك. اما اذا كنت تبي تسدد بالفرع لاحظ ان هالاستمارة لها تاريخ نهاية لازم تسدد قبله. نرجع الحين للتسديد بالنت : نرجع للصفحة اللي قبل نضغط الحين على Electronic وتجينا الصفحة التالية : اضغط على US Embassy for Visa Payment ملاحظة :طبعا لازم تكون مفعل من حسابك خدمة سامبا كونكت وهذي مجرد انك تدخل على حسابك اضغط عليها وخطواتها واضحة وسهلة. نرجع لموضوعنا اذا ضغطت على الرابط بتجيك الصفحة ونختار منها نوع الفيزا اللي هو اول واحد ب 608 للشخص الواحد ونختار عدد الفيز المطلوبة في حالتي كانت 5 عدد افراد الاسرة بعدين اضغط على اضغط هنا للدفع اضغط على أكمل بيجيك نموذج تعبي فيه بعض البيانات اهمها هو رقم الــــ CGI اللي طلعناه من شوي اضغط موافق وبتجيك الصفحة التالية اضغط على أكمل بتجيك الصفحة التالية وهذي الصفحة مهمة لازم تطبعها وتاخذها معاك للسفارة وانت رايح للمقابلة لان فيها اثبات باستلام المبلغ وان العملية ناجحة وفيها رقم مهم جدا اللي هو رقم الطلب!! طيب هذا الرقم وش نستفيد منه ؟؟؟؟؟ انت الان انهيت عملية السداد بنجاح طيب وش الخطوة اللي بعدها ؟؟ نقفل الشاشة وننتظر 24 ساعة بعدها ندخل من جديد على الملف التعريفي ونكمل شغلنا نرجع لنفس الطلب اللي بديناه ونكمله راح تظهر لنا هذي الصفحة : وفيها اسماء الاشخاص وامام كل شخص خانة يجب ان تدخل فيها قيمة. رقم الايصال ؟ نحط فيها رقم الطلب اللي فوق يعني انت وكل افراد الاسرة بتستخدمون نفس رقم الطلب اللي موجود في ايصال الدفع وتحطه في خانة رقم الايصال قدام كل فرد ثم تضغط على متابعة. طيب ليش ننتظر 24 ساعة ؟؟ لان عملية الدفع تحتاج على الاقل 24 ساعة علشان تتفعل ويقب النظام انك تدخل رقم الطلب. مبروك ،،،،،، خلصت الصعب وما بقى الا تحديد الموعد بتطلع لك هالصفحة اختر الموعد اللي يناسبك وبعدها راح يطلع لك تأكيد الموعد اطبعه وخله معاك اذا جيت تروح السفارة وبكذا تكون انتهيت وما بقى لك الا المقابلة . وباذن الله بعد موعد مقابلتي راح انزل لكم وش اللي صار معي بالتفصيل. ان شاء الله اكون وفقت في اني اشرح هالعملية المعقدة وسهلتها لكم. انتظروني غدا علشان نشوف وش صار معي بالمقابلة J |
تفاصيل دقيقة و رائعة أسلوب جميل في الشرح كثير راح يستفيد منه بانتظار أسئلة المقابلة و ما جرى فيها |
انا يا اخي مقدم معك في نفس اليوم اللي هو يوم الاثنين يعني امس واليوم شيكت على الطلب issued يعني صدرت مبروك علينا :18: |
اقتباس:
الجميل تواجدك ودعمك وتحفيزك ،،، شاكر ومقدر لك وان شاء الله المشاركة القادمة بتكون عن المقابلة وما حدث فيها. اقتباس:
والحمد لله انا بعد شيكت ولقيت انه تم قبول الطلب. بس صدفه جميله تواجدنا في نفس المكان بدون موعد وبدون لا نعرف بعض.:32: |
مرحباً مجددا ،،،، اليوم راح اعلمكم وش صار معي بالمقابلة وعلشان الخص الموضوح راح اقسم الموضوع لنقاط رئيسية ونفصلها كل واحد لحاله وهالنقاط هي : 1. الوثائق المطلوبة في المقابلة . 2. الممنوعات والمسموحات عند الدخول للسفارة. 3. اجراءات المقابلة من الدخول الى الخروج. 4. مابعد المقابلة . + + + الوثائق المطلوبة في المقابلة + + + راح اذكر الوثائق المطلوبة واللي لازم تجيبها معاك وامام كل وثيقة راح اكتب اذا هي طلبت مني او لا. بس لازم تلاحظ شغلة مهمة كون وثيقة معينة ما طلبت مني ما يعني عدم طلبها منك علشان كذا خلك بالمضمون وجب كل الوثائق الضرورية : 1- وثيقة تأكيد النموذج D160 اللي فيها صورتك والباركود (طبعا لكل افراد الاسرة).طلبوها مني. 2- وثيقة اثبات الموعد.طلبوها مني في التفتيش الامني لدخول حي السفارات وعند دخول السفارة. 3- سند تسديد رسوم الفيزا.لم يطلبوه مني. 4- الجوازات.طلبوها مني. 5- صورتين شخصيتين لكل فرد من الاسرة حسب مواصفات السفارة.لم يطلبوها مني. 6- الاثباتات الشخصية السعودية ( الهوية الوطنية – سجل الاسرة )لم يطلبوها مني. 7- تعريف العمل لرب الاسرة.طلبوها مني. 8- كشف الحساب لاخر 3 اشهر.طلبوها مني. 9- الجوازات القديمة.لم يطلبوها مني. + + + الممنوعات والمسموحات عند الدخول للسفارة+ + + 1- ممنوع احضار الجوالات 2- ممنوع احضار اي ريموت كنترول ( ريموت السيارة – ريموت باب القراج ....ريموت مكيف البيت :1: دايم انساه في جيبي ) 3- ممنوع احضار اي جهاز كهربائي. 4- ممنوع ادخال اي سوائل معاك ( ماء – عصير- عطر – كريم لوشن – اي مستحضر تجميل ) طبعا الحريم شناطهم مليانه من هالامور . الخلاصة السوائل كلها ممنوعه. 5- يسمح بادخال حليب الاطفال ومستحضرات العناية بالطفل الضرورية وذلك باشتراطات معينة وفي اضيق الحدود. 6- يفضل عدم احضار الاطفال تحت 14 سنة والسفارة تحث على هالشي. + + + اجراءات المقابلة من الدخول الى الخروج + + + 1- موعدنا كان الساعة 9:30 صباحا ، طبعا لوجيت قبل الموعد باكثر من ربع ساعة راح يطلب منك الانتظار خارج السفارة لين يبقى 15 دقيقة على موعدك ويدخلونك واذ جيت متأخر بأكثر من 30 دقيقة ماراح تدخل وبيطلبون منك تجدول موعد جديد 2- وصلنا قبل موعدنا ب 10 دقايق انا وزوجتي وما احضرت الاطفال لانهم تحت 14 سنة والسفارة تقول جنة الاطفال بيوتهم :1: . 3- وقفنا بالمواقف وخلينا اغراضنا جوالات وريموتات بالسيارة ونزلنا وأول شي استقبلنا الامن السعودي وتاكدو من ان عندنا موعد وطلبو انا نرجع شنطة زوجتي للسيارة لانها ممنوعة !! فرفضت وقلت لهم انها مافيها الا اوراق ثبوتية ولافيه داعي لارجاعها فوافقوا وقالو ادخل واذا دخلوكم كان بها والا رجعوها للسيارة. 4- وصلنا للكاونتر الخارجي تأكد من 3 اشياء معي وهي الجوازات + اوراق تأكيد النماذج لكل جواز + ورقة اثبات الموعد ووجهنا لبوابة التفتيش والدخول. 5- في البوابة الحريم يدخلون مع بوابة والرجال بوابة والموضوع مثل تفتيش المطار عدين التفتيش بسهولة ودخلنا. 6- في الداخل ساحة فيها مبنى على اليسار تبع التأشيرات نصيناه على طول. 7- اول ما تدخل بتلقى مكتب في وجهك تروح له استقبلنا شاب عربي محترم اخذت الجوازات وادخل بياناتنا في النظام وحط باركود على كل جواز واعطاني دقم وقال احتفظ بالرقم الين تخلص آخر خطوة والحين اقعدوا بالانتظار لين ينادونكم. 8- طبعا اللي صدمني كان الرقم : 96100000 9- والعدد واصل 150 بس !!! 10- تعوذت من ابليس وقلبت الورقة واكتشف المفاجئة ان الرقم 00000196 هههههههههه طبعا مكتوب بالانجليزي وممكن تقراه من الجهتين :1: 11- بس مع كـذا ضاق صدري قدامي 46 متقدم وكلهم مقابلات !! متى بنخلص. 12- بس كانت سرعة الانجاز رهيبة وفي فترة بسيطة نادو رقمي وقالو روح للشباك رقم 3 . 13- في شباك 3 كان فيه موظفة مبتسمة استقبلتنا واخذ الجوازات وسألتنا سؤال واحد فقط وهو سبب ذهابكم وجابوتها انها اجازة سياحية. 14- طلبت منا تعريف العمل وكشف الحساب. 15- اخذت بصماتنا طبعا تبدآ بالاربع اصابع لليد اليسرى ماعدى الابهام بعدها الاربع اصابع باليد اليمنى من غير الابهام بعدين الابهامين مع بعض. 16- بعد البصمات سلمتنا جميع الاوراق وقال روحو للشباك 12 او 13 لتأكيد ومطابقة البصمة. 17- رحنا على طول وكان قدامنا شخصين بسرعة وصلنا الدور وتوجهنا للشباك، وعنده طلب منا الموظف التبصيم من جديد بس كانت البصمة لليد اليسار فقط بعدها قال لنا ok ارجعو للانتظار وبينادون رقمكم للمقابلة. 18- ما امدانا نرجع الا هم منادينا على شبك رقم 5 وفيه قابلتنا موظفة امريكية مبتسمة تتكلم العربية بشكل جيد سألتنا 4 اسئلة الاول عن سبب الزيارة وقلت لها اجازة سياحية ، والثاني عن المدن اللي بنزورها وجابتها عليه ، والثالث عن اذا كان سبق لنا ان ذهبنا الى امريكا وقلت لها لا ، والرابع هو نفس السؤال الثاني بس جابته بلفه وجاوبتها بوضوح وبالتواريخ عن المدن اللي بنزورها. 19- قالت لنا مبروك تمت الموافقة ع الفيزا انتظرو 4 ايام عمل وبيجيكم رسالة من ارميكس لاستلام الجوازات ورجعت لنا كشف الحساب وتعريف العمل. 20- لاحظت ان كثير من الاوراق المطلوبة لم يسألوا عنها مع انها مطلوبة حتى الصور !! فتوجهت لموظفة الاستقبال وسألتها فقالت : هل اخذو جوازاتكم فقلت لها : نعم ، فقالت : اذا مبروك وهذا يعني ان معلوماتك واضحة ومكتملة وقلت لها طيب الصور ليش يطلبونها اذا ما بياخذونها فقالت لي بعض الطلبات تكون الصور المحملة من النت في النموذج غير واضحة علشان كذا نطلب الصور بس في حالتك ما احتاجوها عموما هذا دليل على ان اموركم كلها تمام. طبعا لاحظت اشياء كثيرة اهمها: 1- الابتسامة الدائمة على وجيه الموظفين وتعاملهم اللطيف. 2- مدة الاجراء اللي مرينا فيه من نادو رقمنا ما تجاوزت 15 دقيقة والوقت الاكبر راح في انتظار دورنا مع ملاحظة ان العدد كان كبير جدا ولم نتأخر. 3- مقابلتنا كانت مباشرة وبسيطة بينما لاحظت ان فيه مقابلات طولت كانو يسألون بالتفصيل ويدققون في كل معلومة لكن الغالبية كانت مقابلاتهم سهلة ومباشرة. + + + مابعد المقابلة + + + بامكانك الان وفي فترة انتظار رسالة ارامكس الاستعلام من خلال الموقع الالكتروني على الروابط التالية : التحقق من حالة التأشيرة : https://ceac.state.gov/CEACStatTracker/Status.aspx خيارات تعقب جواز سفر : http://www.ustraveldocs.com/sa_ar/sa-niv-passporttrack.asp اتمنى اكون نقلت لكم هالتجربة بشكل واضح وسهل يساعدكم في استخراج الفيزا الامريكية. لا تنسوني من دعواتكم واتمنى لكم رحلات سعيدة . نراكم في مواضيع اخرى اعدكم ان تكون مفيده بإذن الله. كان هنا مسافر معاكم |
والله لي الشرف اني اتعرف عليك يالغالي ووالله تقريرك وافي ياليتك مقدم بعدك عشان استفيد منك رايح وانا مدري وش السالفه ههههههههه ابشرك اليوم ارسلولي واكيد ارسلولك ارامكس رساله تفيد بوصول الجواز والله تفاجئت تخيل 48 ساعه بس عشان فيزا امريكية والله وقت قياسي جدا جدا جدا بالتوفيق والله يهنيك بسفرتك ويحفظلك الاهل والاحباب :e032: |
ياقلبي على هالموضوع:e022: أنا دايم أسوي للناس أجرائات الفيزا الامريكية وأستمتع وأنا أسويها من كثر حبي لاميركا:14: وملاحظة بسيطة .. مش شرط التسديد يكمل 24 ساعة .. أنا سددت في الليل واليوم الثاني الظهر حجزت موعد .. والملاحظة الثانية بخصوص الصور الشخصية ما يحتاج أبدا تاخذها للسفاره إذا حملتها بالموقع .. مشكووور على الموضوع وعلى الافاده .. وحلو غيرت من نفسك:72:تفيد وتستفيد |
اقتباس:
الف شكر والشرف لي والله بتواجدك بالموضوع وبمعرفتك. وبالنسبة لتجربتك المهم انك استلمت الفيزا بالاخير.:58: وبالفعل 48 ساعة وتستلم جوازك مدة قياسية. أتمنى لك رحلة سعيدة وممتعة ونبيك تعطينا تقرير حلو بعد الرجعة بالسلامة ان شاء الله. اقتباس:
اجل خربنا سوقك :25::24: اشكرك على الملاحظات القيمة وشرفني تواجدك يالغالي. الله ييسر امورك ويفتح لك ابواب الرزق |
اما شايل ريموت المكيف معك :) زين اللي ما شلت المايكرويف ههههه المقابلة دايم سهلة و اسئلتهم مباشرة بس تختلف حسب وضعك لأنهم يدرسون وضعك و المستندات اللي مقدمها قبل المقابلة و غالباً يكونوا اتخذوا قرار و المقابلة للتأكيد أسلوبك في توصيل المعلومة رائع شكراً على طرح تجربتك الرائعة الله يحفظك |
| الساعة الآن 09:29 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO