ايوة هذه رسوم مكتب التأشيرات للشخص البالغ 300 ريال تقريبا .

اما المكاتب اللي بره ..ياخذوا على الجواز الواحد من 800 الى 1000 ريال ,,وتروحو انتم للتبصيم فقط.


ع العموم ..طريقة تعبئة الابلكيشن جدا سهلة ..بس عشانها اول مرة راح تشوفونها صعبة .

هذا الموضوع لاخونا وحبيبنا اخر فرصة

http://www.arabtrvl.com/vb/t5780.html


وشوفو النماذج.

يديك العافيه بس عندي كمان كم استفسار عن السياره
عشن استأجرها فيزا مسبقة الدفع تمشي والا لازم كريديت كارد ؟! وبالنسبه للتأمين كم ممكن ياخذو ؟!

الله يعافيك والشر ما يجيك

متطلبات استئجار السيارة كما يلي:
فيزا كريديت كارد (مسبق الدفع عليها اشكاليات كبيرة مرة تمشي ومرة لأ ..مثلا موقع هيرتز ما يقبل الحجز بالمسبق الدفع ..ولازم كريديت)
رخصة محلية
رخصة دولية
جواز السفر

التأمين على حسب حجزك..
اذا والله حجزك تأمين عادي ..اقل سعر ..ياخذوا مبلغ ممكن يوصل الى 2000 يورو كتأمين ويرجعوه بعد فترة
وفيه شركات تحجز مبلغ 500 يورو ..يعني تعتمد على الموظف في الاستقبال .

واذا كان حجزك شامل ,, يعني تأمين شامل ..ياخذو مبلغ الحجز فقط وزيادة بسيطة عليه .

انصحك اذا كانت هذه المرة الاولى لك ..تاخذ سيارة مؤمن عليها تأمين شامل .


وبالتوفيق

الله يسعدك اخ ميدو إجاباتك دايما شامله :e306:

طيب بسال بالنسبه لكشف الحساب والتأمين الطبي للفيزا
كيف التواريخ عدلنا موعد الرحله ل ١٦ أكتوبر التامين الطبي حق شهر مثلا يكون لشهر أكتوبر !
وكشف الحساب برضو شهر سبتمبر والا احتاج اعرف النقطه هذي !

وانا جالسه ابحث وأجمع معلومات قريت كلام كثير دحين لو سار السكن
ف ديفون يكون محسوب لفرنسا والا سويسرا ؟ لان السكن برى جنيف ارخص
السكن احتمال يكون ف ديفون وايستوالد افيدوني الله يسعدكم

اولا اختيارتكم ممتازة سواء ديفون او ايستوالدو


ديفون طبعا محسوبه لفرنسا


ثانيا ماهي قصد انها أرخص بل اجمل من جنيف بكثير وباذن الله راح تشوفون الفرق لما تسكنوا فيها وتمرون جنيف لو زياره

اللهم امين واياكم .

كشف الحساب ..اعتبروا قبلها ستة اشهر من تاريخ تقديم الكشف.
المهم يكون موضح فيه مصدر للدخل المالي ..الراتب مثلا.
يعني لو بتقدوا اوراقكم في 8 سبتمبر ..فيعني توفرو كشف حساب شهر مارش الى اوغسطس .

اما التأمين ..لو كان المدة تبعه شهر ..فيبدأ من تاريخ سفركم .. مثلا من 16 اكتوبر الى 15 نوفمبر.



ملاحظة:
دام وقت السفر تغير وتقدم اسبوعين ..فيبقى راح تلحقوا على الكثير من الانشطة اللي لا تزال مفتوحة.



وبالتوفيق

طيب تمام الله يسعدكم سؤال كمان :3:

ينفع اروح فرنسا يومين او ٣ بالسياره صح ؟ ممكن تنضاف للرحله

يعني 6 ايام سويسرا و 3 فرنسا الفيزا سويسرية يجي صح ؟!

وينفع الوصول سويسرا والعوده من فرنسا ؟ عشن تكونو فالصوره انا ابغى ديزني لاند بس

اسألتي كثيره معليش بس زوجي ساب لي التخطيط وابغى أكون قدها واعرف كثير تفاصيل

نعم ..ليش لأ .

عندكم فرنسا والمانيا وايطاليا والنمسا ممكن تزوروها لو اسعفكم الوقت ..وكل دول الشنجن.

حلاة مطار جنيف جاي بالنص على الاراضي السويسرية وعلى الاراضي الفرنسية...ويستقبل التأشيرتين .





نعم ..ممكن الوصول جنيف والمغادرة باريس ..بالضبط نفس رحلتي الاخيرة ..وكانت ارخص من اني لو خليتها جنيف جنيف او باريس باريس.

فيصير عندكم خيارين:
الاول استلام السيارة الايجار من جنيف وارجاعها الى جنيف ثم بالقطار الى باريس
الثاني ..استلام السيارة من مطار جنيف القسم الفرنسي ..وارجاعها في باريس
في باريس ..جنة السيارة الباركنج..أبدا ما تحتاجوها..حتى روحة الديزني اما تاكسي او رير (ميترو مجازا)

ودامكم تقرون التقارير وكذا ..ما راح ينخاف عليكم .. كل شي موجود بالمنتدى.

ملحوظة:
فيه العاب اليوروب بارك ..جميلة وكبيرة وتقع في الغابات السوداء في المانيا .. وافضل من الديزني (رأيي الشخصي)
الا اذا كانت الديزني مطلب اساسي ..فأوكي ..(عدد ايامكم ما يسمح تزوروا الثنتين ..بيكون هجولة.)

اهم شي تقروا التقارير الخاصة في كيفية الذهاب الى ديزني وشراء التذاكر وكم يوم وكذا.


وبالتوفيق