شبكة و منتديات العرب المسافرون

الجزء الثاني من رحلتي لاكسفورد

السلام عليكم يا شباب ويا شابات :)
أعتذر عن تأخري في كتابة الجزء الثاني
لأني مثل ما قلت لكم كسول جدا في الكتابة ولكن في القراءة لا .. شي ثاني :)
في الجزء الأول

http://www.arabtrvl.com/vb/t21417.html

ذكرت لكم الفنادق اللي سكنتها وبعض الملاحظات البسيطه
واليوم بالجزء اثاني بتكلم عن الأماكن اللي استهوتني في اكسفورد مدينة الأبراج التاريخية
أنا مدحتها لأني وجدت فيها ضالتي وهي السياحة التاريخية والمتاحف والمباني الأثرية والقرى الصغيره الريفية
وش اسوي هذا اللي احبه
كل مرحلة عمرية لها اهتماماتها
بالمرحلة من عمري هذا اللي الله قدرني عليه :)
ما علينا ,,,
طبعا أول شي سويناه لما قررنا الجلسه باكسفورد اننا أخذنا بطاقة اسبوعية للباص
زي أويستر اللي يعرفونها أهل لندن
وكان سعرها 40£ لجميع الخطوط والشركات
كأنها كانت تصلح للسمارت وزن .. وش حدود السمارات زون ؟ .. علمي علمكم :) المهم
انها تودينا لكل المناطق اللي رحنالها بدون اي مشاكل
وأذكر كان فيه شركة رخيصه اسمها Magic على ما أظن .. كنا ناخذها مرات ب 1£
اذا نسينا البطاقه مثلا .. أما باقي الشركات فكانت ب 1.80 و 2.10 على حسب الوقت .
على فكره المدينه عبارة عن جامعة مقسمة لعدة كليات وبعدها بنوا حولها المدينه ... مو العكس
فلا تستغرب لو كل شوي أقولك كلمة كلية .. والكليات أغلبها كانت دينية .
سنتر أوكسفورد الرئيسي هو ألتقاء 3 شوارع هي
ٍSt. Aldate`s
Queen St
High St
هذا هو السنتر
المطاعم والمقاهي والمحلات والزحمة والفله
خليط عجيب من الأمم اللي أغلبهم جاييين يدرسون لها في مكانها الصحيح
لكن الأكثر هم الصينيين .. اللي لاحظته عليهم ان ماعندهم أتيكيت أو ذوق .. فعلا همج بالنسبة لباقي السواح
وكثرة الطليان أيضا .. فرق بينهم وبين الصينيين .. الطليان يسوون جو للمكان اللي يجونه
أول يوم وصولنا باستكشاف المدينه .. تمشينا في شارع High St
لقينا University Church
كنيسة الجامعة .. وهي كلية بنيت عام 1200 تقريبا
كان الدخول لها ب 4£
وكان فيها برج عجيب تشوف فيه أطراف اكسفورد .. الصعود له عن طريق سلم تقريبا رأسي ويكفي شخص واحد بس
صعوده متعه ,, اللي نازل يوفق ويعطيك ظهره وانت تنحشر وتطوفه .. مع الابتسامات طبعا
وما أنصح اللي وزنه زايد أنه يصعد السلالم .. لكن أنا وصاحبي ضعاف ونصعده بدون مشاكل
وفيه كنيسه أيضا ومقهى تبع للكنيسه .. تحرجنا أننا نشتري منه .. لأننا مو من الضرورات أننا نشتري
وفيها مبني دائري يسمونه THe camera أو القمره وهو اسم عربي وكان مكانه بنص الكنيسه
وهذا هو البرد اللي كلمتكم لكم عن صعوده

http://www.arabtrvl.com/vb/picture.p...ictureid=53810

وهذا مبنى القمره

http://www.arabtrvl.com/vb/picture.p...ictureid=53809

بعد ما طلعنا من الكلية كملنا بطريقنا الى أن وصلنا جسر في آخر الشارع
وكان تحته محل صغير لتأجير القوارب
كان مكانه تحت هذا الجسر

http://www.arabtrvl.com/vb/picture.p...ictureid=53812

القوارب 3 أنواع :
مجداف
وقارب زي قوارب البندقيه
وقارب البدالات أو الدواسات
أخذنا قارب البدالات
وكان سعرهم موحد ..
مع السايق 30£
من غير سايق 22£
وطبعا قارب البدالات من غير سايق
والأسعار بالساعه
قلت لصاحبي النص ساعه الأولى انت ارتاح
وعليك النص ساعه الثانيه
لما انتهت النص ساعه لقينا بنات ماخذين قارب زي قوارب البندقيه اللي واحد يوقف بالخلف ويجدف بعمود
ومن غير سواق !!
ومتوهقات وصايرات بعرض النهر ولا يقدرن يطلعن يمين أو يسار
والوقت قرب المغيب
لما قربنا عندهم صاحت وحده أرجوكم شوفولنا حل
صدمناهم خفيف وعدلنا وضعهم قلت لها امشوا على طول ... صارت تفتر بمكانها
قلت لها تبين نسحبك .. قالت يا ليت ونكون شاكرين
وما كانا حنا اصلا بعيد عن المرسى.. شغلة ربع ساعه
صرنا قدامهم وصاحبي ورا مقابلهم وماسك العصا حقهم وانا اسوق
نسحبهم بعصاهم ... لما مشينا استانسوا وكانو متروعات
وصلنا تقريبا أخر ناس :)
وما قدرت أنزل تعوقت من كثر الدوس :)
من كثر الأماكن اللي نشوفها قلنا باليوم الواحد ندخل مكان أو مكانين بس
ماودنا نحرق الديره .. وجهزنا ترمس شاي واشترينا فرشه صغيره واشترينا شاي أكياس
فصرنا أي جلسه حوالين النهر .. بسطنا فراشنا وجلسنا إلى ما نمل ولا عمرنا ملينا :) لكن نقوم نروح كافيه ناكل أو نشرب قهوه نرجع ناكل مره ثانيه :)
انا اذا سافرت يزيد وزني من كثر الأكل :)

فيه كليه ثانيه اسمها
Balliol College
بنيت تقريبا عام 1263
والدخول لها 2£
فيها كنيسه صغيره وأمكان الدراسه القديمه وصاله كبيره فيها لوحات قديمه لأشهر الذين تخرجوا منها على مر العصور
وبالنص فيه حديقه جميله ومرتبه ترتيب مو طبيعي وفيها مقر الطلاب
وهذي صورها :

http://www.arabtrvl.com/vb/picture.p...ictureid=53808

http://www.arabtrvl.com/vb/picture.p...ictureid=53807

http://www.arabtrvl.com/vb/picture.p...ictureid=53806

http://www.arabtrvl.com/vb/picture.p...ictureid=53805

http://www.arabtrvl.com/vb/picture.p...ictureid=53804

معلش لا تدققون بالصور
يعني بسوي نفسي مصور وآخذ لقطات أقلد صاحبي :)
أصور أي شي وأقوله شرايك بالزاويه :) :)

وهذا اللي قدرت أتكلم فيه اليوم
وان شاء الله اقدر اكتب الجزء الثالث من رحلة اكسفورد اللي فيه فعاليات أكثر