|
اتفق معك بخصوص المتاحف الأطفال ما يحبونها أبداً ماشاء الله عليك تقرير رائع ومفصل ومتابعين معك |
اقتباس:
اقتباس:
هلا وغلا والله انشغلت صحبتي مهاجرة هيا وأهلها كندا الله يسهلهم وكل يوم مشغلين معاهم وكمان عندي سفره سريعه لرياض يوم الأربعاء احتمال أكمل التقرير الاسبوع الجاي وكمله معاك تقريرك أن شاء الله اقتباس:
أعذرينا على التأخير اقتباس:
هلا اخوي صحيح المتاحف ما تناسب عبالنا خصوصا كل المتاحف معلوماتها بالانجليزي بس لاحظت اطفال كثير في المتحف الوطني وكانوا مهتمين بالمعلومات الموجوده بس أفضل شي لأطفالنا القبه السماويه لأنها جدا ممتعه اعذروني على التأخير |
ماشاء الله والحمد الله ع سلامتكم اشكرك ع التقرير الرائع بس شنو سالفه شطاف ماخذته معك |
اقتباس:
اختياري المتاحف تقدر تقول فضول مني لاني ما شفت احد يذكرها كثير وانا نوعا ما محبه لتاريخ ماليزيا الحمدلله ما صادف ونسرقنا فيها ممكن نقول فيها نصب من التكاسي و الاسعار في السوق الليلي والصيني ويعتمد على المكاسره بس بشكل عام اهم شي الجوازات ما كنا ناخذها معانا والشنط نشيلها بشكل كروس زي كذا http://forums.bascota.com/image/photo1375607558_427.jpg اقتباس:
الله يسلمك الشطاف مهم لان احيانا يكون الفندق مافيها شطاف الحمام وانت بكرامه وساعتها بتستخدم كاسه او علبه مويه اول سكن سكنته الحمام كان بشطاف لكن الثاني الثالث ما كان فيه عشان كذا كنا ماخذين الاحتياط وجايبين الشطاف من ساسكو وفي ناس ما يهمهم الشطاف هو موضوع على حسب الاشخاص |
نصائح توخذ بعين الأعتبار حقيقه بعض المتاحف لا تفيد الشخص السهر في السفر متعب حقيقه الابتعاد عن المطاعم العربيه شيء طيب فيه أنثي ما تحب الذهب:53: المتاحف العلميه والطبيعيه تسعد الأطفال تلقاهم منسجمين توفير صراحه العرض ماشاء الله 23 الف شيء طيب للعدد التسوق ما أحد بيقلل منه باتا اسعاره رخيصه كيف جودتها بعد السفر سلام العرب علي العرب .....فيه ناس فيها الخير والبركه وفيه ناس لو تسلم ما ترد وحصلت معي من قبل :21: بغيت أقول ترا ما نبي منك شيء يا هوه شكرا لك ونقدر وقتك لإكمال التقرير |
وينك ليمو يلاا كملي التقرير الله يعطيك العافيه حبيبتي ❤️❤️ بانتظارك بشووووق م |
اقتباس:
صدقت ما في انثى ماتحب الذهب الحمدلله سفره اقتصاديه وكنت شايله هم ان الميزانيه ما تكفي بس ما حسيت بالتوتر هناك لان شفت كل شي رخيص جوده الجزم بعد السفر جدا عاليه ورجعت طلبت من قريبي يجبلنا منه وهو جاي صحيح والله السلام لله ماحد يبغى منهم شي بس العجيب انا امشي ولا اسلم على العرسان بس برضو نضراتهم عجيبه اقتباس:
يسعدلي قلبك الان بنزل جزئيه بس قاعده اعدل فيها |
اهلا وسهلا بجميع الاعضاء ادري طولت وتأخرت في تكمله التقرير بس كنت مشغوله الاسبوعين اللي فاتت بين صحبتي وبين سفرتي السريعه لرياض وبين تجهيز اوراق المحكمه العذر منكم جميعا لدرجه بديت افكر اختصر في التقرير بس في الاخير اقول ممكن تجربتي او ملاحظتي اللي بختصرها تفيد المسافرين الجدد فانتوا اش رايكم اكمل التفاصيل او احاول اختصر ؟ يعني هل ملاحظتي مهمه ولا قاعده اقرقر على راسكم وبس (بسبب ملاحظات الاعضاء حابه اتكلم عن سبب عدم تحولي للمبلغ كامل في جده لان بعض الزوار يكتفوا بقراءه مشاركات صاحب التقرير كان لنا زياره انا وبنت عمتي لمحلات الصرف في جده قبل السفر بكم شهر لتحويل من الريال الى ليره تركيه وفي نفس الوقت شيكت على سعر الصرف للرينجت الماليزي وكان ١.٠٢ في جده وفي نفس اليوم اتواصلت مع قريبي وسألته كم سعر الصرف في ماليزيا و قال ١.٠٥ وكان ملاحظته انه دائما سعر الصرف في ماليزيا افضل سوا من شارع العرب في ماليزيا او سحب من الصراف عشان كذا اكتفوا بتحويل مبالغ بسيطه في بلدكم و الباقي في ماليزيا وقبل السفر كنت اقرا تقارير الاخوان وحبيت فكره واحد فيهم انهم بيستخدموا ظروف لتوزيع الفلوس لكل يوم ف وقت عمل الميزانيه حددت مبالغ متوقعه لكل يوم مثلا لسن وي لاقون وجنتنق والاي سيتي وكذا تحديد المبالغ ما كان بشكل عشوائي كنت مسويه بحث في المواقع الرسميه لكل مكان ابغى اروحه وعرفت اسعار الدخول منه حلوه الفكره تساعدك في تنظيم صرفيتك وما تصرف زياده عن اللازم في اليوم في ناس تستخدم السيفتي بوكس بس للامانه انا ما اقتنعت فيه لان السيفتي بوكس ينفتح بمفتاح يعني مو انت الوحيد اللي تقدر تستخدمه وانا بما اني حاجزه عن طريق الموقع فأغلب الشقق ما كان فيها خيار السيفتي بوكس عشان كذا اكتفيت بالسحبيات وغالبا كنا ناخذ جميع المبالغ معانا بس الجوازات كنت اتركها في الشقه لان حتى لو صاحب الشقه او العامل قرر احد فيهم يسرق الاكيد ما بيسرق الجوازات لان اكثر شي كنت خايفه منه موضوع ضياع الجواز لان اصدار الجوازات صارت معاناه بالنسبه لنا وفي الاخير هيا مجرد وجه نظري في الموضوع والله الحافظ والواحد ماله الا التوكل على الله سبحانه وتعالى ) بسم الله نبدا تكمله اليوم الرابع في ماليزيا الاثنين ٧ نوفمبر ٢٠١٦ اليوم كان موعد سفرنا الى بينانق على الخطوط الماليزيه لاربعه اشخاص والوالد حجزناله باص لبينانق سبب اختياري الخطوط الماليزيه ان قريت من واحد من الاعضاء انه مسموح ب ٣٠ كيلو وزن مجاني والكلام صحيح واتأكدت من المطار أنه يمديك تقسمه على شنطتين ممكن كل وحده ١٥ كيلو او ٢٠ والثانيه ١٠ يعني تتصرف في الوزن براحتك السبب الثاني الخطوط الماليزيه كان عليها عرض وكان سعرها ارخص من سعر اسيا اير بعد ماتشتري وزن منهم ملاحظتي احيانا الواحد يستخدم موقع زي موقع الطيار او موقع wego ويدوه اسعار الرحلات بس اللي صار العرض كان على موقع الخطوط الماليزيه ولما دخلت الموقعين اقارن كان سعرهم اغلى بكثير عشان كذا وقت ما تنفذوا حجوزاتكم لا تنسوا تتأكدوا مو موقع الشركه الرسمي واذا فيه عروض او لا حاليا انا انصح اي احد في المنتدى ان الروحه لبينانق تكون عن طريق الباص بدل ما تضرب مشوار للمطار ولازم تروح بدري قبل الرحله خصوصا اذا معاك شنط وبعدين تستنى الرحله وبعد ما توصل استنى العفش وتشيل هم وزن العفش واشتري وزن وعندكم الباصات ماحد يسأل عن كم شنطه ولا كم وزن وطريق بينانق من اللي سمعته من الوالد بعدين والاعضاء أنه طريق جميل جدا وكله طبيعه وخضار تبارك الرحمن والباصات مريحه جدا يعني الطريق بياخذ ٥ ساعات لبينانق لو حسبتوها بين انكم بتروحوا لمطار كولا ولازم تاخذ احتياط للوقت في الزحمه ومده الرحله والكلام ذا كله حيكون نفس وقت الطريق تقريبا http://www.arabtrvl.com/up/uploads/a...8122574852.jpg موعد اقلاع الطائره كان الساعه ١١:٢٠ الصباح وكان اتفاقي مع الاخ عبدالرحمن انه يجيني على الساعه ٧ عشان نوصل الوالد للمحطه لان رحلته الساعه ٨:٣٠ الصباح ويكون وصوله الساعه ١ مقارب لوقت وصولنا بس اللي صار رحلته اتأخرت لساعه كامله عاد لا احيكلكم اليوم اللي قبله على بال ما تعشينا واستنينا بعض الملابس تنشف ورفعنا الدنيا ما نمنا غير الساعه ٣ الفجر وصحينا ٦ عشان الصلاه ونستعد نسلم الشقه عاد وقت القومه كل اللي في بالي كان مقوله جدي الشهيره ( مقام الصبح بيقع بكا ) >>> مثل حضرمي الترجمه الجداويه ( اذا ما نمت بدري حتقوم وانت تبكي ) والمقوله صحيحه جدا حقيقي يا جماعه الا السهر انتبه منه وانت عندك رحله صباحيه على بال ما جهزنا نفسنا وسلمنا الشقه ونزلنا الشنط كانت الساعه سبعه ونص وصلنا المحطه نزل الاخ عبدالرحمن الله يعطيه العافيه يتكلم مع الموظفه ويشرحلها تنبه الوالد وقت موعد الرحله واي باص بيتوجه لبينانق ومشينا وكان وجهتنا لمطار كوالالمبور الدولي klia1 لان رحلات الخطوط الماليزيه من هناك تقلع اما اللي حاجزين عن طريق اسيا اير يكون وجهتهم klia2 عاد الشباب الله يصلحهم مدري اش جاهم وصرقعوا بالرجال شغلوله دقاقات واغاني خليجيه طول الطريق تلاقيه اتحسبن علينا بدل ما نشغل فيروز ويسمع اغاني رايقه على الصباح سمعناه الطار http://www.arabtrvl.com/up/uploads/a...2356031691.jpg وصلنا المطار وقطعنا البوردينق ودخلنا العفش وكان كله سريع اهم شي لما تقطع البوردينق تحط جنسيتك صح لان وقت ماحجزت الرحله ما طلبوا مني اي معلومات بس اكتفيت اتاكد من أن الاسم زي اللي في جواز السفر فطورنا كان ماك وكنتاكي طلبنا برجر دجاج من ماك وحلا ردفيلفت ومن كنتاكي تويستر عاد احب انبه اللي بيطلب فطور لا ينسى يقولهم without eggs ولا حيلاقي البرجر بالبيض http://www.arabtrvl.com/up/uploads/a...2356577681.jpg بعد ما خلصنا فطور اخذنا لفه في المطار واتوجهت لصيدليه كنت مصورتها بس طارت الصوره عجيبه صيدليتهم كانها سوبر ماركت بدا معايا الم في الحلق من ثاني يوم في ماليزيا وانا ربطه بحساسيتي من الاناناس لاني اكلته يومين ورا بعض بس في الاخير طلع التهاب في الحلق في صيدليه المطار طلبت الموظفه شي لعلاج الحلق اعطتني الحبوب العجيبه الغريبه دي طلعات في الاخير اعشاب ومو علاج حقيقي وبمجرد ما اخذته للمره الثانيه بدأت ارجع وانتوا بكرامه والحبه طلعت زي ما اخذتها عشان كذا اتكلم عن الادويه الضروريه في السفر لان ادويتهم تجاريه و مفعولها ضعيف اهم شي ممكن تشيلوه هو المضاد الحيوي و هنا غلطتي ما اخذته معايا خذوا فيفادول وبنادول كولد اند فلو ادويه الزكام ادويه الكحه قطره عين ( اختي فجأه عينها اتحسست هناك بس القطره مو ذيك الاهميه ) انا اخذت معايا ادويه الحساسيه زي كلارا جدا كويس علاج دوار البحر ( انا اخذته وانا في الطياره لان عيال عمي بمجرد ما وصلوا الجزر بدأ عندهم الغثيان وبمجرد ماحد يبدا فيه الكل يصير زيه على كلامهم على طول اخذوا الدواء ) اخذت فولترين لان اختي تجيها كتمه وما فتكرنا الدوا الا في مطار الملك عبدالعزيز والحمدلله كانت موجوده صيدليه النهدي اخذنا بخاخ وقايه من الحشرات للامانه انا استخدمته اول يوم بس والوالد بدا يحك ويحس نفسه اتقرص استخدمها مره وحده كمان اخذنا فوار فيتامين سي عارفين اكثر شي اتمنيت لو اني اخذته العسل لان العسل والليمون افضل علاج للتهاب الحلق المضاد الحيوي ضروري تاخذوا كميه كافيه لان في السفر ممكن اكثر من واحد يمرض فيكم هذي الادويه اللي جات في بالي وطبعا كل واحد ممكن يضيف الادويه اللي تهمه http://www.arabtrvl.com/up/uploads/a...2358635282.jpg http://www.arabtrvl.com/up/uploads/a...2358635151.jpg الحمدلله تم الوصول واستقبلتنا امطار الخير الرحله كانت ٥٠ دقيقه كان وصولنا على الساعه ١٢:١٠ >>>>>>> لو لاحظتوا كان وصولنا جدا بدري وكان فكرتي أنه يمديني استفيد من اليوم بس صار العكس بسبب السهر في اليوم السابق والمرض واكثر شي قهرني اخر ١٠ دقايق غفت عيني وفاتني منظر الجزيره من فوق كنت كثيره متحمسه للمنظر بس ما مدري كيف نمت استلمنا الشنط وهيا متروشه من المطر بس استلام الشنط كان جدا سريع مطار بينانق صغير ومرتب ومافيه تعقيد كبير http://www.arabtrvl.com/up/uploads/a...2360011732.jpg خرائط الجزيره حاطينها في المطار عندي ملاحظه لاحظت في خريطه كوالالمبور اللي تتوزع فيها زي الخصم والخصم هذا ممكن تستخدمه في دخول الاكواريوم اللي في كوالا واتأكدت من موقعهم أنه من ضمن الخصومات عشان كذا خذوا الخرائط وشوفوا اش فيها ممكن تفيدكم http://www.arabtrvl.com/up/uploads/a...2360925571.jpg بما اني بتكلم عن المطارات انا ذكرتلكم اني مطار كوالالمبور بيحذر من فايروس زيكا وهذا المسج وصلني من شركه موبايلي اول ما وصلت ماليزيا ياريت الكل ينتبه وخصوصا الحوامل الله يحفظ الجميع http://www.arabtrvl.com/up/uploads/a...2360011591.jpg هذي الكراسي اتسدحنا فيها وصارت سرير بقدره قادر لانه استلمنا الشنط على الساعه ١٢ ونص بس اتصلت على بابا اشوف فين وصلوا وكلمنا السواق وقال إن وصولهم بيكون على الساعه ٢ والمحطه اللي اخترتها كانت قريبه من المطار عشان تكون على طريقنا كان اجباري ننتظر في المطار لمده ساعه اسم المحطه (Sungai Nibong Express Bus Terminal ) قريبه من كوينسبي مول طلبنا اوبر على الساعه ١ ونص ووصلنا المحطه بس الباص اتأخر وقعدنا نستنى والين وصل الباص وبعدها رحنا للسكن في باتوفرينجي طلع المبلغ ٦٥ رينجت ( تقريبا مده المشوار ساعه واربعين دقيقه يعني اللي يحب يستخدم اوبر بالساعه ويخليه يستنى ارخص بكثير من التكاسي ) مقارنه بالاسعار اللي يعطوها السواقين السعر جدا رخيص http://www.arabtrvl.com/up/uploads/a...8240272621.jpg وصلنا الفندق تقريبا على الساعه ٣:١٠ والمطر ما وقف ابدا طول الطريق ماشاءالله وبسبب المطر طاحت شجره من جهه الحدائق ( فراشات فواكه التوابل ) واتقفلت المنطقه وللاسف ما كتشفت الموضوع الا ثالث يوم في الجزيره ولا كان غيرت خطتي من البدايه طبعا في طريقه ثانيه للوصول انك تاخذ الطريق العكسي بس ما غامرنا لان ما كان معانا سياره والخوف انهم يكونوا مقفلين بس اختنا ام جسومي ماشاءالله عليهم هيا وزوجها كان معاهم سياره وغامروا وراحوا ولقوهم فاتحين >> اهنيكم على الشجاعه بتكلم عن السكن ( كموقع الموقع جدا ممتاز مقابل لفندق شانغريلا طبعا اختياري للسكن هناك أن أغلبية العرب بيسكونوا في الباتوفرينجي بس يا جماعه جورج تاون برضو منطقه حلوه انا حبيتها وكثير اوروبيين في هذيك الجهه) ( السكن نفسه يشبه فندق بس الشقه اذا احد حاب يحجزها ترى جدا قديمه بس ميزاتها نظيفه بس ما فيها اي ترفيه او جمال صراحه ما انصدمت لان صاحب الشقه قلي لا تتوقعي تكون شقه ترفيهيه نحن معاييرنا منخفضه كان سؤالي له إذا نظيفه وكان رده انها نظيفه وكان هذا اهتمامي عشان كذا لما دخلتها ما انصدمت فيها بس ممكن احد ثاني ينصدم وفيها انترنت وفيها مطبخ متكامل ) وقت تسليمنا مفتاح الشقه الموظف طلب تأمين ١٠٠ رينجت الصراحه استغربت لاني مو حاجزه في فندق بس افتكرت كلام واحد من الاعضاء انه افضل شي تدفع التأمين كاش عشان وقت الخروج تستلمه مباشره منهم لان اذا دفعت بالبطاقه بتاخذ وقت الين ترجع لك طبعا لا ننسى نستلم الايصال ونحافظ عليه لان وقت الخروج الموظف ما كان موجود وطلب اني اسلم الاستقبال الورقه وهما بيدوني المبلغ في الليل على الساعه تسعه خرجنا السوق الليل السوق الليلي تقريبا يفتح من الساعه ٦ الى ١١ او ١٢ الليل ملاحظاتي على السوق الليل شنط تقليد بس مو درجه اولى اسعارهم مبالغ فيها ولو مشيت وطنشتهم ممكن السعر ينزل طول ما انت ماشي يعني ضروري تكاسرهم تقريبا لنص المبلغ او اكثر حسيته شبيه بالسوق الصيني في كوالالمبور لو انت غايتك تقضي ملابس اكتفي ببرجايا تايمز سكوير ملابسهم جدا جميله وخامتها حلوه واسعارها رخيصه وعندك سته ادوار بتلاقي كل شي يناسبك ميدفالي صحبتي كثير مدحته بس ما زرته بس بعد ما رجعنا ورتني شنط اشترتها من هناك ماركات مخفضه واسعارها معقوله http://www.arabtrvl.com/up/uploads/a...2413015471.jpg السوق الليلي جماله انك تتمشى فيه وتشرب عصير وتاكل ذره وتتفرج في السوق http://www.arabtrvl.com/up/uploads/a...2413015782.jpg http://www.arabtrvl.com/up/uploads/a...8241301634.jpg الكشك الاول عجبني انه كاتب بالعربي ومحدد سعر معين وسعر معقول للسلاسل العلبه الحديد هذي اشتريتها من حرمه وكانت محترمه الزبائن وحاطه سعر محدد العلبه سعرها ب ٢٢ رينجت وانا قبلها مريت على محل ثاني طالبين ٨٠ رينجت على نفس العلبه ونزلته الين ٥٠ رينجت بس حسيتها مبالغه في السعر العلبه اخذتها عشان كنت حابه اهدي جدتي الله يحفظها عود بخور اشتريته من الماجد للعود في جده انا كنت ناويه اشتري من محل اسمه نخبه العود في كوالالمبور عمي اشترى منه لجدتي بس قبل السفر قالتلي انتبهوا من المحل العود خشبه وداهنينها ريحه وانه مغشوش بس الدهن ريحته طيبه وانا للامانه ما افهم في العود عشان كذا اشتريت من الماجد لانه معروف للكل عاد انتبهوا من محل نخبه العود واذا كنتوا حابين تهدوا احد عود اشتروه من هنا عشان ماتتغش هناك http://www.arabtrvl.com/up/uploads/a...8241553861.jpg هذا ديكور مطعم من برى بس مدري اش اسمه حبيت فكرتهم احواض سمك تختار اللي تبغاه ويطبخولك هو وعندهم فرقه تراثيه تغني ماليزي بس ملاحظه السعر محطوط على الحوض سعر الجرام مو سعر الكيلو فانتبهوا من هذا الشي لان ممكن يكون سعر ال ١٠٠ جرام ب ٦ رينجت لا تنسى انك بتضرب المبلغ في 10 وبيطلع 60 ريجنت للكيلو لان الكيلو = ١٠٠٠ جرام بس لو فرضنا ال ١٠٠ ب ٦٠ رينجت بيطلع المبلغ للكيلو 600 رينجت لانك بتضرب المبلغ في ١٠ عشان تصير كيلو عشان كذا انتبهوا اذا كان جرام او كيلو عشان ماحد يورط انا ما طلبت شي منهم بس مريت على المطعم وانا استكشف المكان http://www.arabtrvl.com/up/uploads/a...2418099281.jpg طبعا مستحيل احد يمشي في الشارع وما ينعرض عليه مساج بس انا حبيت البنت من دا المحل اسمها اميره عاد حبيتها خصوصا انها قدي بس ما قدرت تكمل دراستها درست لثانوي عشان تساعد اهلها ويوفروا لاخوها مصاريف دراسته والحلو طلبتها في يوم تجينا تسوي مساج كامل وكان حسابهم ٧٠ رينجت ما طلبوا مبالغ زياده ارقامهم 0124667882 0174856228 يفتحوا من ١٠:٣٠ الصباح الى ١٢:٣٠ الليل الشي الثاني اللي استغربته كل ما مريت من محل عربي وفي محل هندي اول شي يعرضوه الشيشيه هل العرب صارت ثقافتهم المعروفه المعسل ؟ استغربت جدا لان اغلب الأيام كان ينعرض علي المعسل الشي الثالث اش هرجه المطاعم نص ابوها ضايفين لها حضرموت زعلوني بما اني حضرميه كنت ادخل الاقي اكل شامي وكباب طيب جيبولنا عصيده هريسه حتى لو لخم راضيين عشان يكون مطعم حضرمي من جد ( اللخم شي يشبه الفسيخ ) قلبونا من حضارم لشوام عاشت حضرموت الشاميه لا يزعلوا اهل الشام علينا بس تخيلوا مطعم شامي ويبيعوا فيه اكل حضرمي اكيد بيكون غريب عليكم http://forums.bascota.com/image/photo1375607558_427.jpg نصيحه اذا كنت بتمشي في سوق او مكان زحمه او باصات الشنطه تنحط بدي الطريقه وهذي نصيحه قريبي http://www.hayahmall.com/image/cache...12-500x500.jpg بس عندي ملاحظه للجميلات انا شنطتي كانت بدا الشكل فيها حديد لا تغلطوا غلطتي الشنطه اختاروها جلد بس او قماش لان الحديد يألم شويه وحاولوا يكون وزن الشنطه خفيف عشان كتفكم اكتفوا بشاحن متنقل محفظه صغيره مفاتيحكم واذا كان في نيتك تقضي شيلي معاك شنط ظهر نحن كنا نشتري ونحط في شنطه الظهر اريح بكثير من الاكياس وتحسيها اخف بس بقولكم على سوبرماركت اكتشفته بالصدفه اسمه هابي ماركت happy market جنب محلات المساج وقريب من الهولدي ان كنت يومها قاعده امشي في الشارع والا اشوف عرب عرسان جايين من بعيد الا اصف على جنب عشان اتجنبهم << اعترف صرت زي باقي العرب الا العروسه بنفسها اتوجهت لعندي تكلمني للامانه انخرشت ما اتوقعتها تكلمني ويطلعوا العرسان المساكين ما عندهم شرايح جوال ولا انترنت وما معاهم كاش ويسألوا عن صرافه الراجحي قلتلهم ما اعرف فين بس بشوفلكم قوقل ماب وفين ممكن نلاقي maybank لان اسعارهم حلوه في الصرف قالوا طيب كانت الصرافه بعيده فعرضت عليهم اني اطلبلهم اوبر قالوا طيب وطلبتلهم اوبر واستنيت الين جات السياره وبعد ماكملت طريقي دخلت السوبرماركت الا الاقي صرافه الراجحي في وجهي والمساكين ضربوا مشوار وهيا جنبنا ف ميزه السوبرماركت أنه فيه صرافه الراجحي وأسعاره ارخص بكثير من سيفن الفن http://www.arabtrvl.com/up/uploads/a...2413016043.jpg العشا كان من ماك بس نظامهم غريب تبغى مايونيز ادفع ١ رينجت مو ببلاش مصروفات اليوم كامله من السكن الى محطه tbs الى مطار ١٥٠<<< المبلغ المعتاد 120 للمطار بس انا دفعت زياده عشان مشوار المحطه تذكره باص رايح جاي ب ٨٠ دواء ب ١٤ رينجت الفطور من ماك وكنتاكي ب 29.35 رينجت من مطار بينانج الى محطه الباصات الى الفندق ٦٥ رينجت غدا بابا من كنتاكي ومشتريات من السوبر ماركت ب ٨٥ ثلاثه عصيرات ب ١٤ بطاقه شحن ب ١٠ عصايه سلفي ب ٢٥ علبه حديد ب ٢٢ سلسله محفوره ب ١٥ مساج رجول ب ٢٥ ماكدونالدز للعشا ب ٤٥.٥ المبلغ كامل 579.85 ارجع اعتذر على التأخير حقيقي كان نفسي اضيف اليوم الثاني في بينانق بس جايينا ضيوف من الطائف قلت على الاقل انزل جزء بسيط |
تسلمي اختي بسالك كم المسافة بين اقلاع الطيران الماليزي واقلاع طيران اير اسيا المسافه بين المبينين كم تاخذ وقت عاد بعدين بقلكم الموضوع معذورة اهم شي لا تطولي كثير |
اقتباس:
من برى السواق اشرلي عليه ما كان جدا بعيد اذا انت ناوي في نفس يوم وصولك لمطار كوالالمبور تتوجه لمكان ثاني عن طريق الطيران الافضل تخلي وقت كافي بين الرحلتين والاغلب اتفقوا أن ٥ ساعات وقت كافي اتوقع قرب سفركم ان شاء الله بحاول استعجل في تكمله التقرير |
| الساعة الآن 12:51 PM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO