|
حسافه على الحديقة اسعارها غاليه و ما شفتوا الا اللي ذكرتهم اما المطعم الايطالي ههههه |
تقرير خفيف دم الله يخلي الوالده والمدام ربع التسوق لازم اي شي يعجبك اشتريه قبل لا تندم وترجع ما تحصله عادي من اول يوم اتسوق هههه الطريج الجبلي يخرع بالليل الله حفظكم مع دعوات الوالده حسافه على حديقة الحيوان ما استانس سعود بانتظار الباقي والصور :7: |
اهلا و سهلا بالنسبة للاوت لت نعم الاسعار تفرق كثير.. على سبيل المثال.. جزمة اديداس اعزكم الله هناك بالسعودي تطلع ب 400 ريال هنا في الشرقية لقيت نفسها ب 750 ريال اما بخصوص السيارة.. تحجزها اون لاين و تعبي بياناتك فقط و الرخصة السعودية تكفي |
اعتذر عن تأخيري في تكلمة التقرير و ذلك لانشغالي و سفري الى الرياض برحلة عمل عموما الحلقة الخامسة في هذا اليوم قررنا نروح على لوس انجلوس و كان الجدول كالاتي فطور في البيت مسكنا خط لوس انجلوس و رحنا على الووك اوف فيم الشهير (نجوم المشاهير) وصلنا و وقفنا في مواقف عامه كان سعر المواقف 25 دولار لليوم كامل. نزلنا و تمشينا شوي بين النجوم و فجأه ولدي سعود يصرخ سباااايدرمااان سبااايدرماان.. شاف معشوقه سبايدرمان.. طبعا سبايدرمان ما صدق خبر جا على طول و معاه صاحبه ميكي الملقوف .. جاو عندنا يلا صوره صوره و نشب في حلقي و سعود يصارخ و يسويله حركة الخيوط و انا اقول نو ثانك يو المهم مع الازعاج و القروشة صورنا مع سبايدرمان و ميكي النصابين و اخذو مني 30 دولار و فاجئني بسؤاله بتدفع كاش ولا بطاقة.. سبايدرمان طلع معاه جهاز مدى هههههههههههههه الله يسامحك يا سعود خليتنا نصور مع سبايدرمان من جولي شيك. كملنا تمشي مرينا على المسرح الصيني و هو المسرح الشهير اللي تنعرض في الافلام اول بأول .. دخلنا كم محل سوفينير و بعدها قررنا نتجه للجميله سانتا مونيكا رحنا على سانتا مونيكا وقفنا السيارة في مواقف عامه و نفس السعر 25 دولار لليوم نزلنا و تمشينا في ال3رد ستريت.. شارع جدا جميل تكسوه المطاعم من الجهتين (حلوه تكسوه) و ناس تغني بالنص و بعدها كملنا تمشي لين شاطئ سانتا مونيكا الرائع.. جلسنا نستمتع بمنظر البحر لين جاتني هوملس من وراي خرعتني ما ادري وش قالت بس واضح انها تدعي علينا و جيسس و ذا لورد و هيل اللي هو الجحيم .. المهم مشينا من عندها و كملنا مشي اخذنا ايس كريم لسعود من كشكات الايسكريم اللي على البحر. بعدها رجعنا لل3رد ستريت و قررنا نتغدى في مطعم ما يبيع الا دجاج سواءا اصابع او ساندويشات.. كان ممتاز بصراحة.. بعدها رجعنا للسيارة و قررنا نرجع لارفاين عشان نروح صيدلية وولقرين الشهيره الطريق الى ارفاين كان جدا زحمه اخذ معاي الطريق ساعه و اربعين دقيقه وصلنا للصيدلية.. الحريم بدأو غزوتهم الثانيه في قسم المكياج و الكريمات و انا و سعود رحنا نتمشى و فجأه سعود يأشر على الخمر لونه احمر يقول (بابا ابغى جوس) قلت له يا ولدي هذا جوس يخليك تشوفني انا سبايدرمان ههههه. رحت شريت له جوس طبعا مو الخمر ههههه و بعدها حاسبنا و توجهنا لشقتنا الجميله. سعود نام بدري و قررنا نظبط لنا فلم و نتفرج و هذي نقطة حلوة ان الشركة المأجرة للشقة حاطه بالتلفزيون اشتراك في Hulu مجانا للعملاء و هو مثل نتفلكس. و هذا كان يومنا الخامس.. نرجع لكم برحلة ديزني لاند في الحلقة القادمه و اعذروني ما عرفت اظبط الصور |
حلوة تفاصيلك الواقعية ونقلك الصادق ليومياتك بعيدا عن بهارات الإبهار والتشويق وتصوير منطقة هوليود وسانتا مونيكا والثيرد ستريت وبيفرلي هيلز على أنها الحلم صعب المنال..ومن تحقق حلمه بالوصول لهم فهو في جنة الله في أرضه ... معاك حق هالمناطق مافيها إلا صرف فلوس على الفاضي ..صعوبة في إيجاد الباركنات وإذا لقيت لك باركنغ فأصحابه حرامية يأجروه باليوم ومن بيقعد طول اليوم في شارع؟ معروف بتتمشى فيه ساعة ساعتين وبتطلع ليش تدفع 25 دولار على ساعتين؟ حط لي سعر الساعة الأولى مثلا بكم والساعة الثانية بكم والنصف ساعة بكم ؟ وما زاد عن ذلك...الخ نفس الباركنات المحترمة في الدول الراقية.. وعندك موضوع هالملاقيف اللي يتنقزون ويزعجون الواحد إلا بنصور معاك وعقب ياخذون مبلغ وقدره ..نفس نيويورك والتايمز سكوير..نصب في نصب..:20: غير الزحمة ..شفت المشوار؟ ساعتين إلا ربع :12: والله ماتوصل إرفاين إلا ماتحس بأصابع رجولك ..وتخيل لو كل يومين نازل الشمال عشان معظم المطاعم بعيدة في الشمال أو المولات أو سيكس فلاقز وغيرها فتضطر تسوق ساعة ونص رايح ساعة ونص راجع ..وجربت في أكثر من وقت أروح الشمال .. الضحى زحمة الظهر زحمة العصر زحمة الليل زحمة لين 12 بالليل ..ما أدري هالأوادم ماينامون؟ مايشتغلون؟:9: عشان جذي أنا أرجح السكن بالجنوب ..والنزول مرة أو مرتين للشمال وخلاص لين يوم السفر لأن زحمتهم تطفر.. متابعين معاك نقلك الحي والجميل لرحلتك الممتعة.. |
ههههههههه سبايدر مان كشخه يخيرك كاش ولا كرت هذا دليل ان هذي مهنتهم لان جهاز السحب عليه رسوم شهرية وعلى كل عملية سحب عموله .. الله يحفظه سعود يبي جوس احمر 😃😃 هههههه السوق وراك وراك عليهم بالعافيه معاك إلى ديزني لاند |
جميل زرتوا جادة المشاهير وشفتوا المسرح الصيني ما شفتوا مايكل جاكسون جنب سبايدر مان هههههه لاعبينها صح جنب كل نجمة يضبطون الكاركتر وهات تصوير سانتا مونيكا شاطئ رائع لو شبيت بشعرها نار وخليتها تعرف هيل مضبوط هههههه |
مستمتعين بالسوالف وعليهم بالعافيه الحريم يستاهلون التشري وسعود طلباته اوامر المواقف صاجة قطريه وايد ب 25 دولار لو يحسبونها بالساعه افضل وبانتظار القادم |
الحلقة السادسة في هذا اليوم كانت وجهتنا الى ديزني لاند و طبعا حجزنا التذاكر اونلاين قبلها بيومين و اخترنا نضيف عليها الاكسبرس باس او الفاست تراك. صحينا الصباح و فطرنا في البيت و جهزنا و توجهنا لدزني لاند اللي تبعد ربع ساعه عن الشقه (الحمدلله اول مشوار قصير) توجهنا هناك و رحنا جهة المواقف, التنظيم للمواقف جدا رائع .. ناس واقفين ينظمون المواقف بحيث ان كل لاين يمتلي اول عشان يفتحون اللاين الثاني. وقفنا و توجهنا لجهة الباصات المقله الى البارك و بعد وصولنا توجهنا للحديفة الاولى اللي هي ديزني كاليفورنيا ادفانتشر لاند. بدينا نلعب سعود في و كان جدا مبسوط و اغلب الالعاب كانت له .. المكان ممتع الجو العام جميل و الاحلى التشورو حق دزني كان لذيذ. بعدها قررنا انا و المدام نلعب لعبة الاصنصير و كانت كما اذكرها رهييييبه و تخوف و تحس انك تطير. بعدها كملنا تمشي في البارك و سعود نشب الا يصبغ وجهه و صبغناه و فجأه شفنا الحب الاولي لسعود سبايدرمان طبعا الاصلي مهو مثل النصاب هذاك. اخذ سبايدرمان سعود بالاحضان و سعود بدأ يسولف معاه و يسوي له حركة الخيوط بيده.. ما تصدقون فرحة سعود لما شاف سبايدرمان ياخذ و يعطي معاه.. اخذنا كم صوره رائعه مع شيخ العناكب بعدها قررنا نتغدى في احد المطاعم اللي هناك. طبعا الاكل مش ولا بد بس مشي حالك. قررنا نروح للبارك الثاني.. و كانت اغلب الالعاب للاطفال و بدينا نلعب سعود لين تعب و نام. هنا الحريم بدأت غزوتهم الثالثه بمحلات ديزني و شراء ملابس للاحفاد و الصغار و انا ماسك عربية سعود و جالس استقبل مسجات البنك بالمبالغ المخصومه ههههههههههه بعدها توجهنا لميكي داون تاون و هو المكان اللي فيه بيوت ميكي و ميني و غيره من شخصيات ديزني الاساسية. سعود صحى و اخذته داخل بيت ميكي.. تمشينا داخل بيته الجميل و في اخر جزء قابلنا شيخ الفيران ميكي ماوس,, سلم عليه سعود و تصور معاه و طبعا سواله حركة سبايدرمان مع ان ماله دخل بس خلاص مسكت غلط. بعدها قررنا نطلع و نرجع للبيت لان صارت الساعه 6 و التعب حل علينا بعد يوم ممتع مليء بالاثاره طبعا مشوار الرجعه ما اخذ اكثر من عشرين دقيقه و رجعنا لشقتنا الجميله. راجع لكم باليوم الجديد و رحلة ضواحي ارفاين و حديقة الفراولة |
اللله ياديزني لاند..:e022::62: أجمل مدينة ترفيهية بالعالم مو بألعابها بل بشخصايتها وعروضها المتميزة.. حلو أنكم حجزتوا التذاكر قبلها بكم يوم وغريبة وجود تذاكر لديزني بخاصية الفاست تراك..على خبري لين العام ماكان في لديزني وتذاكرها هاخاصية وإن وجدت فهي لكم لعبة فقط وعلى الأبلكيشن تحجز دورك والتذاكر مالها دخل.. على العموم منتظرين منك توضيح لما استجد..:63: حبيبي ياسعود الحمد لله ربي عوضه بسبايدرمان الأصلي وتواصل معاه وفرح به.. ماشاء الله كيف كفاكم الوقت تمشي ولعب ومشتريات لحديقتين وخلصتوا الساعة 6:00؟ :e419: خسارة ماجلستوا للعرض الختامي والألعاب النارية ..قمة المتعة ..:e24c: متابعين معاك يومياتك الجميلة في لوس أنجلوس..:62: |
| الساعة الآن 06:27 PM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO