يا مرحبا أبرار ... الله يسلمك

الله يسلمك يا ايمان .. بذكر لكم كل شي ايجابي أو سلبي

الله يسلمك ياشهد


الله يسلمك ياحبيبنا الغردقاوي

يا هلا أبو غسان ... أسعد الله أيامك

الكافيهات كويسه وأنا قهوتي اسبريسو فقط وعن تجربة كأنك تشربها في ايطاليا .
أما تعامل الناس ... واجهت خلال هاليومين الغير مبالي وواجهت المتعاون أكثر من اللازم . قبل شوي نزلنا اوبر عند مطعم وكان حسابه ١٠٧ قرفنا "أظن هذا اسم عملتهم على ما سمعت منهم " وما كان معي إلا ٥٠٠ ونزل يصرف من المطعم اللي نزلنا عنده ورجع يقول لي ما لقيت ويبي يمشي ويترك حقه ... أخذته داخل المطعم وصرفت وعطيته ١٥٠ وراح في حال سبيله ... يعني مبدئيا كويسين الناس هناك

اليوم ويك إند والمطعم مليان ومشكلته صاخب جدا أكثر من أمس واليوم زادوا على الضحك العالي "هز كتوف" هذا هو الشيء الوحيد الغير مريح لكن الأكل ممتاز .

أبشر يابو معتز

الرحلة لمدة ١٣ ليلة على خطوط ناس لثلاثة مسافرين أنا والمدام وطفل خمس سنوات والإقلاع الساعة ١٥:١٥ وصلنا الساعة ١٣:٣٠ ووقفنا في السرى ننتظر تسجيل الوصول وتسليم الحقائب ولما وصلنا الدور قال لي الموظف أنت ما معك تأمين أوكرانيا !!! قلت له وشو تأمين أوكرانيا !! أنا معي تأمين التعاونية لكوفيد ومعي تأمين ثاني لكل دول العالم !!! قال لي لأ . أنا سمعت "لأ" ووقف شعر راسي .. وش يبي هذا في الوقت الضيق ؟ قال لي لازم تأمين أوكرانيا . قلت له طيب والحل . قال لا تشيل هم . ورحنا على مشرفهم وفتح جواله على موقع التأمين هذا وبدأ يطلب لنا تأمين وكل شوي ما يضبط ويعيد إلى أن صارت الساعة ١٤:٤٠ دقيقة وكل شوي يجي مسافر يسأل وأنا ودي لو أنط في حلقه لكن البرستيج ماسكني . وأخيرا قبل الموقع طلب تسجيل التأمين باستخدام "مدى" وأيميل "جي ميل" ما يقبل فيزا ولا هوت ميل حسب هذي التجربة ، وبعد حل هذي المشاكل قدر الموظف يصدر لي ولزوجتي تأمين من هذي الشركة الأوكرانيه وبقى الولد الصغير قال لي شف ما يمدينا رح أركض على الجوازات ونعدي الجوازات ركض وهم يقولون أركض على البوابة ٢٨ وحنا نركض للبوابة ولما وصلنا شيكوا أوراقنا وقال الموظف وين التأمين الأوكراني قلت له الموظف اللي ساعدنا في تسجيل الوصول قال ما يمدينا وألحق على الطيارة . قال لأ ما أقدر !!! واتصلوا عليه وجاء يصدر للولد تأمين أوكرانيا ومسؤول البوابة يقول بنقفل وحنا في قمة التوتر وشوي وتجي رسالة خصم المبلغ وما وصل ايميل تأمين الولد أقصد الوثيقة وقال لي الموظف أدخلوا الطيارة بيقفلون الباب . ودخلنا الطيارة بمجرد وصول رسالة خصم المبلغ من الحساب . وقال لي نزل الوثيقة من الايميل عند الوصول ... "مرينا بممر السعادة وحنا في قمة التوتر" وصلنا باب الطائرة الساعة ١٥:١٣ قبل الأقلاع بدقيقتين والمفروض إن البوردينج قفل من ١٣ دقيقة ... دخلنا الطيارة وقفلت المضيفة الباب مباشرة ... جلسنا وبدأت الطيارة بالرجوع للخلف

آه شي يوتر من جد ....

وعند الوصول قابلنا موظفة الجوازات وطلبت الجوازات والتأمين وفحص pcr وعطيتها المطلوب فقط وطبقت نصيحة المحاماة "الجواب بقدر السؤال مثل ما تركب الصامولة على البرغي لا زيادة ولا نقصان" وسكت عن تأمين أوكرانيا مع أنه صدر لي ولزوجتي وللولد بعد لكن ملف pdf موجود فقط لي ولزوجتي أما الولد ما لحقنا ننزل ملف ال pdf حقه قبل دخول الطائرة . عموما بعد ما شافت الأوراق ختمت الجوازات وهنا قلت الحمد لله وما سألت عن تأمين أوكرانيا المزعوم ولكن الحق يقال موظفين "ناس" قدموا تعاون كبير جدا حتى أن الموظف كان يشتغل على طلب التأمين من جواله والله أن عبدالجبار العتيبي بطل وابن ناس خلصنا وطلعنا الطيارة وهو كان يقدر يقول لي كمل أواراقك وأرجع لي ... الله يجزاه خير .

وما أنسى أني وقت تسجيل الحقائب كنت أنظر لشاشة رحلة تيرانا وأقول في نفس كنت ناوي أروح لألبانيا بعد ما شفت تقرير أبو لجين ولكن غيرت رأيي بعدين على أوكرانيا بسبب درجة حرارة الجو ... ولكن الحمد لله مشت الأمور وهذا حنا في كييف . وسبب بقائي في كييف من أمس وإلى بعد بكره له سبب آخر بقوله لكم بعدين لأني أنا ما أحب المدن الكبيرة وأحب الطبيعة والأرياف والهدوء .

مبروك للأرجنتين ولعشاقها ولميسي