شبكة و منتديات العرب المسافرون

اقتباس:

المشاركة الأصلية كتبت بواسطة نـــواف (المشاركة 546386)

هلا بك اخوي ابو عبدالله

طالما انك متواصل مع الموضوع
هذي بعض الأسئلة لعل وقتك يسمح بالإجابة عليها

كم الوقت بالسيارة من تبليسي إلى برجومي

- الطريق تقريبا ساعتين ونص .. شوي منه سريع .. اكثر الطريق سيد واحد بين قرى وجبال بس جنه والسرعه من 50- 90 كيلو ..
نظامي في جورجيا اذا بغيت اغادر مدينة لمدينة ثانية اخلي الفطور بنص الطريق في مطعم شعبي وهي كثيرة منها نريح شوي بالطريق ( وهو غير متعب لانه مره جميل وممتع ) ومنها نجرب مكان جديد والاغلب كلها اطلالات على انهار او شلال ..وبالمناسبة الطريق من تبليسي فيه رافتنق اذا تحب تجربه
ماهي فعاليات برجومي لو تذكرها في نقاط سريعة ..

برجومي فيها السنتر حقها شارع واحد وجميل .. وبنهايته فيه الحديقة داخلها قصر واول مصنع مياه معدنية .. الحديقة حلوه وكبيرة وتستاهل الزيارة والمشي فيها ... وعند بوابة الحديقة قبل الدخول فيه تلفريك قديم ياخذ لفوق لمكان فيه كوفي ومنه تقدر تشوف احد يوديك لبعض الاماكن السياحية اللي صعب الوصول لها بالسيارة العادية مثل مسابح المياه المعدنية .
الاماكن حول برجومي جميله وكنا نفضل في النهار الاكل برا في المطاعم الشعبية على الانهار واذا معك سيارة تقدر تتمشى وتوقف بأي مكان تحب واماكن التوقف كثيرة مره ولو تعديت برجومي مع الجهة اللي بتدخل لها وانت جاي من تبليسي فيها اماكن اجمل بعد ... برجومي للي يحب الطبيعه تستاهل 3 ايام ..

إذا وصلت كوتايسي ماهي فعالياتها غير المغارة
وهل تنصح فيها أم تنطلق من برجومي إلى باتومي مباشرة ..
كوتايسي مره حلوه وابدا ما تنطمر بالعكس اذا وقتك ضيق خذ من برجومي وضيفه لها ..
كوتايسي اعرف فيها مغارتين :
Sataplia Nature Reserve
هذي مقفله يوم جيتها وبيستمر الاغلاق لمدة شهر بس المكان جميل وفيها مطل بانورامي بأرضية زجاجية وهو المكان اللي فيه اثار الديناصورات ... المكان حلو بس لازم يدخل معك مرشد سياحي بيشرح عن الديناصورات ويوريكم خطواتها ثم بيقول تابعوا طريقكم للمطل بروحكم وارجعوا متى ماحبيتو .. المكان انصح به.

المغارة الثانية
https://www.google.com/maps/place/%D...2!4d42.6008596

في Kumistavi

هذا ضروري انا اشوف زيارته وهو عبارة عن كهف طوله 1600 متر فيه 6 صالات والشي المهم عندهم فيه هو الاجسام الصخرية اللي نابته فيها ويقولون ان كل سنتي واحد للجسم هذا يستغرق 10 سنوات وفيه اجسام طولها 3 مثر ويمكن اكثر ... المكان مسلي وتذكرته نوعين نوع مع قارب ونوع بدونه ... اللي بدون قارب واللي بقارب بيمشون سوا داخل الكهف لمدة 50 دقيقه تقريبا ثم اللي بدون تذكرة قارب يطلعون واللي معهم تذكرة القارب يكملون الجزء المغمور في الكهف داخل قارب لمدة 10 دقايق تقريبا

حنا اعجبنا جدا ...

فيه بعد ماتفيلي كانيون
https://www.google.com/maps/place/%E...2!4d42.4068406

هذي خوانق مائية وتذكرتها بعد نوعين بقارب او بدون ... المكان صغير بس حلو ويستاهل الزيارة ... لو رحت للمكان ومعك سيارة او ماتوصل بتشوف ناس يقولون لك وقف هنا باول الطريق ويعرضون عليك جولات .. لو كملت ونزلت تحت بالسيارة بتوصل للمكان وفيها مواقف مجانية ( المواقف باول الطريق باثنين لاري مهيب شي بس بعيده شوي وخصوصا بالرجعه بيكون المشي صعود )

--
https://www.google.com/maps/place/Ok...3!4d42.5501286

Okatse Canyon
هذي انا اشوفها فخ :24:

الصور حلوه واذا رحت مالقيت شي يستاهل ابد بالنسبة للبقية ..
ميزته الوحيده انك تمشي على جسر معلق بالجبل وتشوف الي تحت .. اللي يخافون الاماكن العالية مايصلح لهم وبالنسبة لي مااعجبني ابد لاسباب :
1- الوصول له لازم مشي 3 ساعات او لازم سيارة رفيعه مره وماانصح تروح بسيارتك لانه وعر جدا جدا ... ولو لزمت بسيارتك فانت اذا طلعت من مركز بيع التذاكر ارجع مع الطريق اللي جيت منه (30 متر ) بيجي بقالة ع اليسار وجنبها طريق ترابي هذي بدايته وطوله يمكن 7 كيلو بس متعب .( اذا موب جيب عالي ماانصحك تروح ) وبتلقى عند مركز التذاكر ناس يوصلك ويرجعك ب 70 لاري انت واللي معك .
2- الممر عبارة عن جسر حديد وتحتك شبك والوادي تحتك تسمع الشلالات بس ماتشوفها الا باخر الجسر فيه مطل والطريق للنهاية متعب نزول درج وصعود ( ماحبيته ابد واقيمه صفر بالنسبة لباقي الاماكن لانه متعب ومضيعة وقت ) ...

- وسط مدينة كوتايسي جميل وفيها تلفريك يوديك لمدينة العاب فوق تشتغل .
وسط المدينة كبير ويستاهل التمشي بس المولات لاتتعب حالك لم ينجح احد .

ياليت تعطينا الواتس لشركة تأجير السيارات
- هذا الرقم
00995599333353
وهذا الموقع
www.discovercars.com
خذ التفاصيل اللي تبي منهم وانا ماسبهم ولا امدحهم الى الحين اموري زينه الحمد لله بس في تبليسي وقفت السيارة خمس ايام ويوم جيت اشغلها طلعت البطارية فاضيه وكلمتهم وخذو موقعي وقال 10 دقايق ويجي لك واحد ..
هل السيارة ديزل أم بنزين وهل بيستنزف مادياً

بحكم ان السائح بياخذها من تبليسي وبيوصل فيها باتومي

- ااسيارة اللي معي بنزين هايبرد والحقيقه ماحسيت بصرف يستاهل وسعر البنزين مثل السعودية تقريبا وترا جورجيا ميب كبيره يعني مافيه مشاوير بعيده بس خطوطها قديمه وبين قرى والسرعه قليله بعد

بافتراض خط السيرة كالتالي
تبليسي - برجومي - كوتايسي - باتومي
هل ترى أنه خط سير مثالي أم يحتاج تغيير ؟

ممتاز جدا
فيه منطقة بعد قودواري
https://www.google.com/maps/place/St...2!4d44.6411419

انا سكنت قودواري قبل مطل الصداقة بشوي المكان حلو شوي ( المنطقة فعالياتها شتوية عشان كذا ميته بالصيف تقريبا ) بس لو برجع ثانية بتعدى قودواري واوصل تقريبا للقرية في الرابط فوق مدري وش اقول الطريق فيه منطقة من اجمل ماشافت عيني سبحان الله العظيم وجانا فيه سحابة بردية على كيف كيفك من اسبوعين من الان تقرييا ..
المنطقة بس تمشي وجلسات ع النهر مافيها اي فعاليه بس خضرة وموية وهواء نظيف ..

ماهي باقة الانترنت المناسبة والأسعار
وخصوصاً للي مستأجر سيارة ويحتاج قوقل ماب بكثرة

الانترنت ببلاش
الشركة هذي
https://www.magticom.ge/

اخذت منهم شريحه نت مفتوح ب 5 لاري بالاسبوع (خمس ريال ) الشهر ب 160 لاري .. الاسبوع ب5 يقولون عرض بس الى الان مستمر وانا اجدده بالتطبيق حقهم واسدد بفيزا تسوق الراجحي ..

الشركه مكاتبهم موجوده بكل مكان اول مره بيطلبون الجواز عشان تسجيلها ثم خلاص جدد بالتطبيق .. وتقدر تضيف مكالمات 60 دقيقه و100 رسالة ويطلع الاسبوع ب 12
فيه شركات يقولون تغطيتها افضل بس ماجربتها انا لانه هذي طلعت زينه الا في كوتايسي مهيب ذاك الزود

وشاكر لك مقدماً

هلا اخوي نواف .... حياك ربي والردود فوق بالاحمر واتمنى تكون مفيده ولو بجزء بسيط لك .. واي شي انا اعرفه ابشر به ... وتروح وترجع بالسلامة