حياك الله اخت حواء ديزني في اورلاندو مو في ميامي والسكن مثل ماتفضل الاخوان في منطقة كيسيمي ومتوفر بكثره شقق وفلل هذا اولاً بالنسبه لنا كسعوديين يجب اخذ ثلاث جرعات لمن فوق 18 سنه وجرعتين لمن فوق 12 سنه وتامين طبي ضد كورونا لمن هم اقل من 12 سنه اضافة الى تطبيق توكلنا بالنسبه لنا كسعودين حتى في الرجعه طلبوا تطبيق توكلنا في مطار ميامي من قبل الخطوط القطريه

الشركه اسمها سكست (sixt)
من مطار اورلاندو

اخت حواء انا رجل فوق ال 50 واسافر من عام 1977 يمكن قبل ينولدون نص اللي في المنتدى والحمد لله اذا انتقدت ليس كلامي كتاب منزل لكن اؤوكد لك انه ليس فيه استنقاص او تقصد لدولة قطر الغاليه هذا اولاً
ثانياً لو كلفتي على نفسك وقريتي اول مشاركة في هذا الموضوع واول من انتقدته مطار الرياض وذكرت ان السراء واصل الشارع وذكرت بالحرف الواحد(ربعنا مايتغيرون) في قصتي مع لخبطت الجوازات في الخروج لبنتي وذكرت اعتراف موظف الجوازات بان الخطاء منهم وانا ابن البلد ولم اجامل او اكذب او افتري على احد ..
اما بالنسبه للخطوط القطريه اقول لك تجربتي بصراحه الوضع اذا استمر كذا فسوف تحدث كوارث في كاس العالم !! يا اختي تخيلي الى الان النزول والصعود في اغلب الرحلات بالباص وهناك اعمال ومعدات في المطار ،،
مثلاً قبل شهر بعض افراد الاسره حبوا يرجعون للسعوديه من اورلاندو مع ان عندهم حجز عوده على القطريه لكن اشتريت تكت جديد على الاماراتيه مباشره من اورلاندو وكانت الكاونترات 4 فقط واقسم برب البيت يمكن 10 دقايق وحنا خالصين هذا اولاً اما رحلتنا قبل البارح من ميامي وكانت كاونترات القطريه 12 كاونتر واقسم بالله جلسنا في السراء من البدايه حتى النهايه ساعه ونص هذا يدل على اللخبطه وجهل الموظفين وكل واحد يسال الثاني وجايبين ناس مو مؤهلين ومو محترفين ،،
طيب ماعلينا ركبنا الطياره و90٪ منهم هنود ولا هو تعالي او كبر حاشا لله لكن لان الاسعار رخيصه فنوعية المسافرين متدنيه وتلاحظ ذالك في كل شي واقسم برب البيت حتى روائح الطائره صارت مقززه ومقرفه ،،،
طيب ماعليك من كلامي يمكن حظي كان سيئ انا سألت مضيفه جزائريه عن الوضع اللي صاير وفعلاً اكدت لي ان الوضع متدني وان عندهم عجز في الطيارين والمضيفين وقالت لي انهم وصلوا البارحه الساعه 1 والان اقلعتا الساعه 8:30 يعني اقل من 20 ساعه راحه وقالت هذا ينعكس على الخدمه وتعامل المضيفين مع انها كانت معنا راقيه جداً ،،
عموماً انا عن نفسي لن اغامر مع حبي واحترامي لاخواننا القطرين بان اسافر مع القطريه في الوقت الحالي وبيرزقهم الله من الهنود وماهم في حاجة فلوسي ،،
نعم القطريه كان لها السبق في اسعار رخيصه ومحطات كثير واستراد كامل المبلغ في حال الالغاء وتغير الرحله مجاناً لابد ان نذكر الحسنات حتى نكون منصفين والحمد لله على كل حال التعب منسي ورحنا ورجعنا ولله الحمد والشكر على كل شي ،،
تحياتي لك اخت حواء وعلى فكره قطر غاليه واهلها غالين وليس انتقدات شركة نقل يعني ان الواحد متحامل او له قصد اخر ،،
للعلم نقطة اخيره بما انني من عشاق امريكا والمفروض يكون كل كلامي عنها مدح فاحب اقول اسؤ واقذر مطار شفته في حياتي مطار ميامي حتى ماكلفوا انفسهم يصبغون جدرانه المتهالكه من عشر سنين وهذي بويته

تم الإرسال من SM-N960F باستخدام Tapatalk

جزاك الله اخوي على ردودك، اسمحلي كان عتاب بسيط لبعض الاخوة ولكم جميعا مني الشكر والتقدير والاحترام، انا ممتنه جدا لجميع مشرفين المنتدى والاعضاء للي تقدمونه من مجهود جبار ومعلومات قيمة جدا جدا للسياح بشكل عام، والاختلاف لا يفسد للود قضية وانا من الي تستفيد وايد من خبراتكم الواسعة وما اقدر اوفيكم حقكم الا بالدعاء لكم بمزيد من العطاء والنجاح ورضى الله سبحانه وتعالى عليكم

ابد والله انتي اللي سامحينا وغيرتك طبيعيه ويدل على رقيك واخلاصك واعتزازك ببلدك ،، المنتدى صحيح ان وسائل التواصل الاخرى طغت عليه وصار من الماضي لكن له بالقلب مكانه وانا عن نفسي يهمني واراه مرجع موثق بالصور ،،،
مره اخرى كلنا اخوان اخت حواء وبالعكس اصلاً كيف يستفيد المسافر او يتنور الا بالمواضيع والمداخلات والنقاشات .،،
اسعد الله ايامكم جميعاً وغداً تبداء دورة الحياة من جديد 💐💐💐💐