![]() |
مجموعة استفسارات السلام عليكم ورحمة الله وبركاته .... سفرتي بعد أقل من شهر تقريباً إلى ماليزيا والخطة كالتالي : الححز على الخطوط القطرية الذهاب 22 نوفمبر الوصول 23 والعودة 4 ديسمبر (زوج وزوجة وبنوتة 4 سنوات) 1. الوصول يوم 23 لكوالا سيكون الصباح حوالي الساعة 8 الصباح وبعد الإجراءات والعفش أتوقع ساعة أو ساعتين بالكثير .... حجزي في فندق صنواي لاجون (جناح تنفيذي من بوكينج وغير موضحة الإطلالة بالحجز- أحد عنده فكرة؟ ومجرب نفس الخيار ؟) هل ممكن أني أدخل الفندق بدري ولا صعب؟ وإذا رفض الفندق إيش ممكن أستفيد من الوقت بدون إرهاق لبنتي وزوجتي 2. حجزي في فندق صنواي من 23 إلى 26 نوفمبر, الأي سيتي تنصحوني فيها أو لاء بحكم تجربتكم أشوف الآراء متفاوتة فيها؟ 3. حجزي لبينانج من 26 إلى 30 نوفمبر (فندق جولدن ساندس- غرفة تنفيذية مطلة عالبحر) .... هل تشوفوها كثيرة على بينانج ؟ وأنا حبيت الفندق عشان بنتي ولكثر الألعاب والنشاطات وأحواض السباحة فيه ؟ 4. حجزي لكوالا من 30 نوفمبر إلى 4 ديسمبر (فندق تريدرز- جناح مطل على البرجين) واختياري له للإطلالة المميزة ولقربه من الحدائق التابعة للبرجين وفخامة الفندق ... هل من أحد زاره مؤخراً وإيش رأيكم فيه؟ طبعاً في فكرة حالياً بإضافة ( ايبوه - فندق بيست ويسترن) هل تنصحوني بتغيير الخطة بإضافة ايبوه وذلك بتقليل يوم من سيلانجور ويوم من بينانج ؟ وكيف رأيكم بالفندق ؟ 5. لو اعتمدت بروح ايبوه كيف تنصحوني فيها قبل بينانج أو بعد ؟ وكيف المواصلات لها ؟ لأني قبل إضافتها كنت ناوي من سيلانجور لبينانج (باص ايرو لاين رايح من سيلانجور وراجع لكوالا) 6. هل فيه أشياء معينة في ايبوه أو بس استجمام ؟؟؟ 7. تم استبعاد لنكاوي بالإجماع بيني وبين المدام لعدة أسباب ... 8. سؤال أخير المدينة يلي فيها ألعاب كاملة (هيللو كيتي) وين موجودة؟ وكيف ممكن أزورها ؟ ولو أحد جربها ممكن يفيدني عنها بحكم البنت تحبها كثير وودي أفرحها !!! عارف الاستفسارات كثيرة بس صراحة أول مرة أسافر برا المملكة ومعاي طفلة فالواحد يحسب شوي زيادة الله يعطيكم العافية سلفاً ويجزاكم كل خير ويوفق الجميع .... |
اقتباس:
أهلا وسهلا وأتمنى لكم سفرة ممتعة .. راح أجاوبك على الأسئلة اللي أقدر عليها وبقية الأسئلة ما راح يقصروا الاخوان معاك 1/ الإطلالة ما أدري عنها مو مذكور فعلا ولكن تقدر تتواصل مع الفندق وراح يخبرك ... عدل في الحجز واذكر الوقت اللي راح توصل فيه وان شاء الله راح يدخلوك 2/ الاي سيتي ما جربتها وأشوف أنها عادية جدا 3/ أربعة أيام مناسبة جدا واختيارك مناسب جدا للفندق 4/ اخوي عسكر الهاجري سكن فيه وان شاء الله راح يفيدك فيه بالنسبة لايبوه ممكن تنقص يوم من بينانج ويوم من كوالا ولكن اشوف ان راح يكون عليكم تعب 5/ أذا اعتمدت ايبوه تكون قبل بينانج وما أدري هل فيه باصات ايرو لاين 6 / العالم المفقود بالاضافة إلى الاستجمام 8/ ما عندي علم وان شاء الله الاخوان ما بيقصرون تحياتي |
اقتباس:
ما قصرت يا أبو سعد , بيض الله وجهك ومشكور لإجاباتك |
عليكم السلام ورحمه الله وبركاتو بالتوفيق 1 بالنسبه للوصول بلغ الفندق بوقت وصولك وشزف ردهم لان اكيد متعودين على الوقت واذا توفرت الغرفه بيدخلونك بدري خصوصا وصولك مو وقت موسم اجازه 2راسل الفندق عن الاطلاله والاخوان المجربين ماراح يقصرون 3الفندق ممتاز والايام مناسبه خصوصا انك ماراح تروح لانكاوي 4بالتسبه لفندق ترايدرز موقعه مميز وجميل والاخوان اللي زاروه مؤخرا ماراح يقصرون بالنسبه لايبوه فكره حلوه وهي اربع ساعات من سيلانجور اليها وايضا من بينانج الى ايبوه 4 ساعات لك الحريه انا انصحك بهذا الجدول الاربعاء 23..الخميس24 ...سيلانجور يوم الاول مجمع الماريتز او بوترجايا والمسا الاي سيتي واليوم الثاني العاب صنواي والمسا المول القريب براميد مول الجمعه 25 السفر من سيلانجور الى بينانج الجمعه 25.السبت 26.الاحد 27 .الاثنين 28 .الثلاثاء 29 تزور فيها حديقه الفراشات والفواكه والهضبه والسد واذا حاب رحله بحريه مع ان رحلات لانكاوي اجمل وزياره مصانع القهوه والشوكلاته والتمتع بالشاطئ الثلاثاء 29 من بينانج الى جوهر باور طياره الثلاثاء29 .الاربعاء 30 جوهر باور لان فيها ملاهي هيلو كاتي و ايضا اوت لت تزور هابو كاتي والاوت لت ويوم تخلي ليغولاند الخميس 1 باص من جوهر باور الى كوالالمبور 4 ساعات تقريبا او طيران اللي يريحك الخميس 1 الجمعه 2 السبت 3 الاحد 4 وعن نفسي انصحك انك تستخدم الطيران بالتنقلات بين المدن اولا لان معاك طفله وثانيا حتى تستفيد من اليوم اللي بتسافر فيه بحيث ماتتعب من التنقل بالباص ويضيع عليك اليوم وثالثا الطيران هناك اسعاره مناسبه فراح يكلفك تقريبا 1600 ريال الرحله من بينانج الى جوهر بور 680 رينجت اذا اخترت باقه القيمه اللي يكون معاها وزن مجاني والرحله من جوهر باور الى كوالمبور 410 رينجيت باقه القيمه ومن كوالمبور الى بينانج 501 رينجيت باقه القيمه طبعا هذي اوقات الرحلات تكون الظهر توجد رحلات ارخص لكن الصباح بدري او العشا وتوجد اسعار ارخص ولكن بدون امتعه 5- مثل ماقال اخوي ابو سعد اذا اعتمدت ايبوه خلها قبل بينانج والوصول لها باص 4 ساعات 6. رد اخوي بو سعد وممكن تدخل موضوع الاخ هاي مزمز زارها قريب 7. المده قصير ما تتحمل اكثر من ثلاث مناطق والخيار يكون بين بينانج او لانكاوي مع الافضليه والجمال في لانكاوي ولكن لكل انسان مزاجه ودامكم متفقين على بينانج بالتوفيق 8.المدينه هي جوهر باور تبعد عن كوالالمبور 4 ساعات باص ويوجد فيها مطار والاقامه فيها 2 ليلتين تزور هالو كاتي والملاهي ليغولاند والاوت لت تم اقتراح لك جدول اذا حبيت تزور جوهر باور بالتوفيق |
اهلًا اخوي سامي ماقصروا الأعضاء في ردودهم..بالنسبه لفندق ترايدز ما انصحك فيه الفندق من داخل قديم و الأجنحة صغيره جدا لذلك انصحك بفندق جراند حياه المجاور له والمطل ع البرجين عندهم غرف جراند ديلوكس مطله على البرجين مساحه الغرفه 63 m... أتمنى لك رحله سعيده |
فعلا جراند حياة كوالالمبور افخم فندق سكنته في حياتي تتعامل معاملة الملوك فيه بس احس ينفع للعرسان الغرفة كلها زجاج حتى المكتب قلبي طاح وجالسة على اعصابي من الورعان الله يصلحهم ههههه تريدز قريب منه وموقع ممتاز مالي تجربة قريبة فيه فقط السنة اللي فاتت وكان مقبول وفيه قولف يوصلك للبرجين بالنسبة للهيلوكاتي في جوهر لكن ماجربتها كانت ضمن المخطط واتكنسلت اي سؤال احنا حاضرين ورحلة سعيدة يارب |
اقتباس:
ما شاء الله رد وافي الله يجزاك كل خير إنت والجميع ومشكورين جداً جداً |
اقتباس:
والله باقي محتار الجناح بتريدرز بمساحة 48م وعاد وأنا أخوك أحس الإطلاله فخمة على كلام الناس أنه إطلالة جراند حياة جانبية للبرجين وهذا تطلع من الفندق مباشرة على الحدائق .... عاد محتار والله ما قصرت أخوي شكراً لذكر تجربتك ونصيحتك |
اقتباس:
والله أنا زيك شيكت عالمواقع شفت الوضع حق عرسان ما معاهم أطفال والجناح صحيح واسع بس مفتوح بشكل كاشف كل شي !!!! الله يعطيكي ألف عافية يارب |
اقتباس:
رحلة موفقة سعيدة إن شاء الله |
الساعة الآن 02:09 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO