|
مساعدة في تخطيط رحلة شهر عسل السلام عليكم ورحمة الله وبركاته.. بعد قراءة في الموقع لأيام قررت أسجل وأكتب الموضوع عشان أحسم الموضوع وأختار وجهتي.. لظروفي الصعبة بعد الزواج ما سافرت لأي مكان.. ولا طلعت من مدينتي (جدة) واللحين ربنا فرجها وصارت الأمور جدا ممتازة.. أفكر أسافر مع زوجتي لأول مرة لنا بعد زواجنا بـ 6 شهور... يوافق من منتصف أغسطس لحد منتصف سبتمبر.. ومدة الرحلة من 10 أيام إلى 12 يوم.. أريدكم تساعدوني في أفضل مكان لنا، نحب زيارة المتاحف والحدايق والملاهي والحركة في المدن.. والطبيعة محد يقولها لا... والسفرة لحالنا طبعا من دون أطفال. فكرت في اسبانيا، ثم غيرت إلى ألمانيا قالوا طبيعتها أحلى.. لكن ما عندي مانع في غيرها لو كان مناسب.. خصوصا إنها أول سفرة لنا خارج السعودية (ما قد تعدينا الخليج :21: ) نرجو مساعدة الخبراء وشكرا جزيلا لكم.. المشكلة المدام تبغى أوروبا وأنا ودي في ماليزيا سؤال ختامي، هل 20 ألف ريال تكفي (بدون تذاكر السفر) لمدة 10 أو 12 يوم سفر ؟ لأني حاطها كميزانية للسفرة والشكر لكم جميعا مرة أخرى |
و عليكم السلام حياك الله بيننا رغم انه شهر عسل متأخر لكن أشوف توقيتكم مناسب جداً و ارشح تحجزون من بداية سبتمبر عشان الجو يكون احلى بكثير و تخف الزحمة كمان لازم تحجز طيران من بدري ان اخترت الوجهة عشان يقل عليك السعر أنا أشوف ذهاب و عودة من زيورخ مدينة جميلة و فيها شلالات الراين و بقربها مدينة لوزيرن أحد اجمل مدن سويسرا اللي فيها القمة الثلجية ( قمة تتلس ) تطلعون لها بالتلفريك ساعة منها و انتوا في يورب بارك في مدينة رست الالمانية تخصصون لها يوم كامل يورب بارك مثل ديزني لاند مدينة العاب ضخمة كمان مدينة انترليكن الشهيرة ليست ببعيد عنها حوالي 100 كلم يعني تركيزك كله راح يكون على المناطق حول زيورخ اليوم تقريباً 1000 ريال لا يشمل تذاكر الطيران و المواصلات من أي نوع |
الله يعطيك العافية أخوي ما قصرت.. بس سويسرا اللي فهمته من القراءة غالية... هذا غير أنها مشهورة بالطبيعة أكثر من النشاطات زي ما فهمت.. فكرت سابقا برحلة للجنوب الألماني (ميونيخ و شتوتغارت و قارميش ولو ممكن كمان فرانكفورت ورست يوم واحد) مشكلتي أفكر ما أستأجر سيارة وأكتفي بالقطارات و وسائل النقل العامة بس خايفإني أضيع بسبب إني عليمي في السفر :20: ودي أسمع رأيك أخوي بخطتي أنت وبقية الأعضاء.. ما نستغني عن خبراتكم. فكرت في اسبانيا (قرطبة و مدريد و برشلونة وغرناطة ) .. مشكلتي ما أحس نفسي من النوع اللي ممكن يجلس في كوخ على طبيعة حلوة، ممكن يوم واحد ولا يومين أوكي، بس أحس إني أحب جو المدن والمتاحف والأشياء هذي.. |
وعليكم السلام اذا تفكر في أوروبا فكر في السيارة فهي نص المتعه. .. انا ارشح لك ماليزيا سلانجور يومين بينانغ يومين لنكاوي 4 أيام كوالا 4 أيام. .. إذا ترغب في اوروبا. . وصول ميونيخ واستلام سيارة والتوجه مباشره الي سالزبورغ يومين زيلامسي او كابرون 5 أيام انسبروك 3 ايام ميونيخ يومين. . مبداين لمعرفة ميزانيتك 1 / حدد تواريخ سفرك وعدد الأيام؟ 2 / شيك على سعر الطيران الدولي؟ 3 / شيك على سعر الطيران الداخلي في ماليزيا أو على سعر ايجار السيارة في أوروبا استلام وتسليم ميوينخ؟ 4 / شيك على الفنادق مو شرط كوخ؟ |
اقتباس:
السفر يكون بإذن الله 2 سبتمبر والرجعة بعدها بحدود 12 يوم الطيران متوفر وعندي تذكرة أنا والمدام عالخطوط السعودية.. السيارات في أوروبا استلام وتسليم ميونيخ بحدود الـ 650 دولار على حسب البحث السريع بس ما أدري كم بيكلفني البنزين أو الديزل. الفنادق بشوفها مباشرة بعد ما ألاقي خطة الرحلة المناسبة.. الخطة اللي اقترحتها أخوي كويسة، لكن ملاحظ إنه أغلبها في الطبيعة ولفترة طويلة ( زيلامسي وانسبروك) هل ممكن نختصرها أكثر؟ فكرت أنزل ميونيخ ومنها على فرانكفورت ثم رست (أليورب بارك) ثم على شتوتغارت وانزل جنوب على النمسا والرجعة من ميونيخ .. بس ماهي راضية تزبط المسافات والمواعيد أحس الجدول متلخبط ( كله عشان نفسي أزور اليورب بارك :) ) قاعد اللحين أبحث عن كابرون وزيلامسي، سمعت عنها كثير لكن للأسف ما أعرف عنها إلا اسمها .. |
بالتوفيق اخوي والخيره فيما اختاره الله وباذن الله تستمتعون برحلتكم طيب عندي اقتراح دامك ماتحب الطبيعه كثير وودك بمتاحف ومولات وتسوق وجو مدن ليه ماتخلي رحلتك لنركيا لان اوروبا (النمسا والمانيا وسويسرا ابرز ماتتميز فيه هو الطبيعه والريف اكثر من جو المدن والتسوق ) وتقسم ايامك بين اسطنبول وماحولها وبين انطاليا وشواطئها الخلابه وماحولها |
الله يعطيكي العافية أختي... بعد المشاورة مع المدام يبدو بأني سأعتمد خطة الأخ الجوكر.. خصوصا بعد المناظر الحلوة في زيلامسي والنمسا مع تغيير بسيط في عدد الأيام في كل مدينة .. المشكلة ما حصلت حجز إلا على فرانكفورت، ألاقي قطار ينقلني إلى ميونيخ أو لا ؟ وهل أحصل مدينة ألعاب في النمسا ؟ لأنه أوروبا بارك صار الوصول لها سفر زيادة.. |
حبيبي يسعدك ربي. .. حلاوت أوروبا في اريافها نسئل الله لنا ولكم الجنة. .. وصول فرانكفورت الرجعه من مين؟ |
اقتباس:
حطيت خطة عالسريع ويا ليت أسمع رأيك فيها أخوي: الوصول لميونيخ من فرانكفورت والخروج منها مباشرة للرحلات التالية: باد ويسي.. يوم واحد سالزبورغ في النمسا .. يومين زيلامسي .. 4 أيام قارميش .. يومين الرجوع لميونيخ 3 أيام والرجوع لجدة (فيه خطة بديلة وهو إلغاء المرور على باد ويسي في ألمانيا ونخلي يومها في النهاية لميونيخ، وفيه خطة ثانية إضافة يومين للرحلة وتصير ١٤ يوم بس وقتها ماني عارف كيف التوزيع يكون وهل تكفيني ميزانيتي (٢٣ ألف بدون التذاكر) أو لا ) هل هو مناسب أخوي أو لا؟ وشكرا جزيلا للجميع.. والله استفدت منكم كثير :1: |
وعليكم السلام ورحمة الله وبركاته في البداية بارك الله لكما وبارك عليكما وجمع بينكما بخير وبما إنك مفكر بزيلامسي حط في بالك راح تلاقي عرب وايد هناك وبالنسبة للأماكن والجداول السياحية لقيت لك هذا المخطط ((اضغط هنا)) و((هنا)) وإن كنت تبي مقترح آخر ممكن إيطاليا نابولي 3 ليالي روما 3 ليالي فلورانسا 2 ليلتين بحيرة غاردا (سكن) + فينيسيا (زيارة) 4 ليالي ميلان 2 ليالي * بحيرة غاردا فيها مدينتين ترفيهيتين + أكواريوم + سفاري وأتمنى لك التوفيق |
عطني تواريخ سفرك وعدد الأيام وابشر. .. |
اقتباس:
بالنسبة لايطاليا فما أتوقع أروحها خصوصا إني خلاص حجزت لفرانكفورت. اقتباس:
السفر يوم 2 سبتمبر إلى فرانكفورت الساعة 9 صباحا والوصول الساعة هناك الساعة 4 عصرا الرجوع يوم 16 سبتمبر إلى جدة الساعة 5 عصرا والوصول 11 مساءً إلى جدة 14 يوم .. طبعا أول يوم تقريبا ضايع والأخير نص ونص :( وشكرًا لكم جميعا على تعاونكم. |
بعطيك رأي شخصي ارجع واكرر شاور الكثير واستخير ربك قبل كل شيء. . فرانكفورت أو فيسبادن يوم ... الاتجاه صباحا مبكرا الي. . كونستانس أو سانت غالن 3 ايام .. انترلاكن أو لوتربرونين 5 أيام .. مونترو أو انسي يومين. . فرايبورغ 3 أيام. .. الذهاب مباشره صباحا الي المطار.. |
جرب حمل الملف من ((هنا)) |
اقتباس:
آخر خطة استقريت عليها: الوصول للمطار واستلام السيارة ومباشرة من مطار فرانكفورت لـ بادن بادن ليلتين في بادن بادن ليلتين في قارميش 4 ليالي في زيلامسي ليلتين في سالزبورغ 4 ليالي في ميونخ (تسليم السيارة ثاني يوم في ميونيخ والرجوع بالقطار لفرانكفورت) بس المشكلة ماني شايف شي جميل في بادن بادن ممكن يجذبك.. وهل أخلي زيلامسي 6 ليالي كاملة منها يوم كامل أروح لسالزبورغ وأرجع؟ الخطة هذي هيا في الغالب بس ممكن تتعدل اليالي وتتبدل مدينة واحدة، غير كذا ثبّت على ألمانيا والنمسا. والمعذرة أخوي الجوكر تعبتك معايا :24: اقتباس:
الله يجزاك بالخير يا رب :14: |
معليش ع التأخير ٠٠ جدولك ممتاز بس القياده في النمسا أصبحت معقده وان شاء الله انها تتيسر اذا ناوي تدهب مباشره روح فريبورغ او ستراسبورغ ثلاث ايام انترلاكن او ضواحيها ٥ ايام فوشن او قارمش او سانت غالن او كونستانس يومين ميونيخ بناء ع رغبتك في زيارتها ٣ ايام فرانكفورت يوم نصيحه و وجهت نظري كنسل ميونيخ اول ماتوصل ريح يوم كونستانس او سانت غالن ثلاث انترلاكن ٤ ايام مونترو او انسي يومين فرايبورغ او ستراسبورغ ثلاث ايام فرانكفورت يوم |
اقتباس:
الله يعطيك العافية أخوي ما قصرت.. المشكلة خطتك هذي جات متأخرة بعد ما ضبطت رحلتي في دماغي على خطتك الأولى.. بس عندي ليلتين في النمسا ماني عارف وين أقضيها .. وهيا بين (انسبروك) و (سالزبورغ) أيهما أفضل ؟ وكمان زيلامسي الكثير ينصحوني ما أسكن بالسنتر.. هل نصيحتهم ممتازة أو لا؟ وشكرا جزيلا لك أخوي بالتحديد على كل ردودك معي والله ما قصرت.. بس إذا خيرت الإنسان حيرته، خلني لا أطمع وأقعد كل شوي أغير.. نثبت على خطتنا السابقة :) |
استخير ربك قبل كل شيء اسكن في كابرون اذا في زيلامسي سيبك من السنتر اسكن في فندق مطل ع البحيرة أنسبروك حلوه سالزبورغ جميله كلها خيارات جميله نصيحتي اذا يومين اسكن في سفيلد او كيتزبوهل متع نفسك ف الارياف دامك في أوروبا ارجع وأقول أنا اخاف تتوهق بموضوع القياده في النمسا |
اقتباس:
عن نفسي راح أتوكل على الله وبروح مع الرخصة الدولية، ونقول يا رب تنحل المشكلة قبل وصول موعد سفري.. الصيف جاي والشعب مليان هناك وأتوقع تنحل المشكلة لمصلحتهم هم. بشوف المدن اللي ذكرتها بإذن الله.. فكرت أروح سالزبورغ وجنبها وولف قانق وغيرها.. وبعدين اقول روح انسبروك وحولها برضو مجموعة نشاطات حلوة، المقصد فكرت أجرب في رحلتي مدينة كبيرة (ميونيخ) ومدينة صغيرة (انسبروك أو سالزبورغ) وبقية الأيام في الطبيعة والأرياف.. لكن نحط كلامك في الحسبان ونفكر ونقرر.. الله يكتب اللي فيه الخير وألف شكر لك أخوي الجوكر على كل ردودك ومساعدتك. |
| الساعة الآن 10:45 PM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO