|
طلب جدول سياحي وبعض الاسئلة حول لندن السلام عليكم ورحمة الله وبركاته جزاكم الله خير اخواني انا توني مسجل بعد ما اخذت جولة في المنتدى وشدني تفاعل بعض الاخوة جزاهم الله خير لذا قررت الجأ لله سبحانه ثم لكم بالاسئلة اللي في بالي حاليا قاعد اخطط للسفر الى لندن لمدة 8 ليالي في اخر شهر 5 ميلادي باذن الله سبحانه والسؤال ممكن تفيدوني ببعض الاماكن للسكن لشخصين سواء كانت فنادق او شقق فندقية يكون فيها غرفتين مثلا للنوم (او ثلاث اشخاص) طبعا خارج شارع اجوارود وممكن تفيدوني بجدول سياحي في لندن لأبرز الاماكن |
وعليكم السلام وحياك الله ان شاءالله بنرد عليك بس نعرف جم ميزانيتك للسكن ؟ المسافرين عايله ولا شباب ؟ العرب المسافرون |
اقتباس:
اذا كنا شخصين بتكون الميزانية بحدود 500-800 دينار تقريبا للفترة كاملة اما اذا كنا 3 اشخاص ممكن توصل الميزانية الى 1000 او 1200 تقريبا ولو في شي افضل من هالميزانية وشي مناسب ممكن نستفيد من خبرتكم المسافرين شباب |
اوكي راح احطلك على فرضيت اثنين وهم فرضيت تواريخ على الفنادق المجربة هذا ميلينيوم موقعه ممتاااز بشارع معروف بالنايتس بريدج سلون ستريت كله ماركات وقريبه منكم السفاره والمطاعم العربيه والكافيهات وهارودز حلو بس يعيبه صغر الغرف يعني حق شخصين حلو Hotel Millennium London Knightsbridge, UK - Booking.com امبا ماربل ارتش سابقا ثيسل من الفنادق اللي احبها موقع ممتاااااااااز كل شي يمكم وحواليكم في اوكسفورد ستريت والاهم الغرف وسييعه ويشيل 3 Amba Hotel Marble Arch, London, UK - Booking.com كمبرلاند من نفس امبا ويمه بينهم ممر الغرف زينه يعني احسن من الميلينيوم بالوسع Hotel Cumberland London, UK - Booking.com راديسون بلو بورتمان يصير بنفس شارع فندق امبا بس من داخل يمه ريجنسي وقريب عالاوكسفورد ممتاز حق 2 Radisson Blu Portman Hotel, London, UK - Booking.com ماندفيل الغرف صغييره بس حق 2 ورا السلفردجز موقعه حلو قريب على طبعا الاوكسفورد وجيمس شارع كله مطاعم وكافيهات The Mandeville Hotel, London, UK - Booking.com هذا اخر واحد بحطه لك اخاف اكثر وتحتارون بارك بلازا ويستمستر مجابل بيغ بين ويم لندن اي موقعه وايد حلو وكل الباصات تمر عليه ويمكم محطة القطارات بس مايحبونه الخليجين بعده عن السوق مع انه مااشوفه بعيد اذا بالباص لي بيكاديللي بالضبط طبعا مع وقفه المحطات ممكن 15 دقيقه اواقل بالاندرقراوند اقل من 10 دقايق انت في اوكسفورد Hotel Plaza Westminster Bridge, London, UK - Booking.com اذا تبون شي ارخص اقدر اعطيكم فنادق بعد واذا بعد انتوا من النوع اللي عادي عنده الفندق بس نام مش حالك هم فيه اعطيكم مثل نوعية bed&breakfast .. هذا جدول ل 10 ايام http://www.arabtrvl.com/vb/t1726.html وهذي موسوعة http://www.arabtrvl.com/vb/t1932.html وموسوعة المواصلات http://www.arabtrvl.com/vb/t2664.html الاندرقراوند http://www.arabtrvl.com/vb/t1947.html بطاقة الاويستر انصحكم فيها حق الباصات الاندرقراوند تغنيكم عن التكاسي اتسونها لمده اسبوع ممتاااازه http://www.arabtrvl.com/vb/t1808.html شوارع لندن الحيويه http://www.arabtrvl.com/vb/t1479.html انتوا من محبين التسوق والنهار ولا من محبين السهر ؟ يعني سياحتكم شنو تحبونها تكون ؟ عشان نقدر نساعدكم زياده ... وان شاءالله اللي ذكرتهم لك يفيدونكم |
ياهلا ومرحبافيك اخوي ممكن اعرف الميزانيه الي ذكرتها تشمل ايش هل هي بدون تذاكر او مع تذاكر وسكن ومصرف يعني ابغيك تفصل لي اشوي عشان نقدر نشوف المناسب لك وبنعطيك ان شاء الله خيارين خيار في ظل الميزانيه المذكوره وخيار ثاني لو تقدر تزيد الميزانيه اشوي عشان نشوف لك مثلا سكن افضل واشياء ثانيه افضل لان خبرك كلشي بسعره وبالتوفيق يارب |
مرحبا مشرفتنا ابرار ماقصرتي جزاج الله خير يا خبيرتنا |
اقتباس:
مراحب بوسعد ولو ماسويت شي يجزيك مثله[emoji1374] العرب المسافرون |
الله يحييكم بيننا ماقصروا أبرار و أبو سعد خيارات الفنادق اللي حطتها مشرفتنا رائعة و أي استفسارات ابشروا الخبراء ما يقصرون |
للامانه ماقصرتوا الله يجزاكم خير راح افصل شوي لعل وعسى هالمعلومات تفيد بمزيد من الخيارات الميزانية المقترحة لجميع السفرة للشخص الواحد بين 700 و 900 دينار ممكن تزيد شوي السفره شبابيه ما يمنع يكون فيها رحلات الصبح مع السهر ولكن مو شي اساسي على حسب الاجواء السكن الى الان ما تحدد ثلاث اشخاص او شخصين :29: هل الافضل ناخذ فندق او شقق فندقية تكون غرفتين مثلا وصاله او غرفة وصالة اذا حبينا ان نقعد فيها بوقت مالنا خلق نطلع |
اقتباس:
أهو الشقه أفضل بتطلع عليكم أرخص من الفندق - بس الشقه انا ماافضلها والسبب ابي ارجع مكاني القاه نظيف ومرتب .. يعني تقدر تحصل شقه في بورتمان سكوير بحدود ثمانمية باوند للأسبوع ما يقارب اربعمية دينار حلوه على ثلاث او اثنين .. ووعموما في بعض الشقق ننصح ان تشوفونها بعينكم لان اذا نعتمد على بس المكالمه يمكن ماتعجبكم .. البد اند بريكفاست bed&breakfast احسه يصلح لكم كويس ورخيص .. بس يعتمد اذا انتوا تحبون هالنوعية العرب المسافرون |
اقتباس:
عندي تساؤل حاليا المصاريف بالنسبه للشخص الواحد من 800 دينار الى 1000 بالكثير هل تكفي اقامه ل8 ليالي شامله السكن والتذاكر والمصاريف الثانيه + تسوق خفيف كهدايا ممكن افاده هل تكفي وشنو الفنادق اللي ممكن نسكن فيها على هالمصاريف والمده المقرره |
الميزانية اذا انتو اقتصاديين بتكفي ولو كل واحد الف دينار بعد احسن الفندق عادي اسكن فنادق رخيصه تناسب ميزانيتك واكثر وقتك بيكون خارج الفندق انصحك اسكن في شارع الاوكسفورد خليك جنب الزحمة ماشاء الله ابرار ماخلت شيء وكمان ابوسعد خبير بلندن |
الله يعافيك تسلم ما سويت شي التذكره على البرتش للشخص 160 د.ك السكن بعطيك فنادق ارخص من اللي ذكرتهم وانا مجربتهم بنفسي .. 1- فندق 82 لندن الاجمالي 394 د.ك على اثنين 197 د.ك موقعه حلو بنهاية الشارع اللي فيه تشيرشيل و راديسون بلو مشي تقريبا لي اوكسفورد 10 -12 دقيقه Hotel 82 London, UK - Booking.com - هذيل الثلاثه قراب على محطة بادنغتون 2- shaftesbury premier الاجمالي لسبع ليالي 456 د.ك على اثنين 228 د.ك موقعه زين بس انصح بالغرف اللي فوق لاتاخذون تحت ويبعد عن محطة بادنغتون 5 دقايق تاخذون باص او اندرقراوند على الاوكسفورد ماياخذ 10 دقايق Hotel Shaftesbury Premier, London, UK - Booking.com 3- corus hotel الاجمالي 407 د.ك على اثنين 203.5 د.ك موقعه حلوو على الشارع الفندق شرح ومرتب واقرب محطة اندرقراوند لانكستر قيت 5 دقايق انت في اوكسفورد . Corus Hotel Hyde Park, London, UK - Booking.com 4- بيست ويسترن الاجمالي 501 على اثنين 250.5 د.ك موقعه حلوو يم فندق كورس رقم 3 شرح ومرتب واقرب محطة اندرقراوند لانكستر قيت 5 دقايق انت في اوكسفورد . Mornington Hotel, London, UK - Booking.com لوقلنا خذيتوا التذكره وفندق رقم 3 يطلع مجموع السكن والتذكره على الشخص 363 د.ك من 1000 عندكم 637 د.ك انا اشوفه مبلغ حلو اذا ما كان في تسوق لسبع ليالي كمصروف واشياء خفيفه .. مثل ما قال اخوي فارس بتكفي الميزانيه ان شاءالله اذا اخترتوا الانسب والاوفر |
الله يعطيكم العافية جزاكم الله خير راح نحسب حسبتنا واي شي ان شاء الله ما نستغني عن خدماتكم ووقفتكم :e032: |
| الساعة الآن 07:02 PM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO