تجربتي مع سكست ميونخ +حادث
 

اسعد الله اوقاتكم بكل خير
بنقل لكم تجربتي مع سكست بشهر سبتمبر وياليت تفيدوني اكثر في اجراءات بعد الحادث
تم استئجار سياره مرسيديس فئه c فل انشورنس عن طريق الموقع الكتروني وتم الدفع
وصلت هناك وجاني ايميل وانا بالطياره انه بما انك دافع وكاتب جميع بياناتك عندك شي اسمه سمارت شك ان وفرحت بالرساله وقلت ماني مطول باخذ السياره وامشي .. رحت لهم وقاعدين يدورون بالسيارات وقالو للاسف مو موجوده راجع المكتب .. راجعت المكتب وكان معي الموظف نفسه واللي ساعدني اتخطى السرا الموجود وقال سيارتك غير متوفره مع الاسف فيه سياره ثانيه اعلى قيمه وتدفع بس ١٥٠ يورو المهم قلت هذا خطاكم انا مالي دخل وشوي جابو لي موظفه لبنانيه عندهم تتكلم عربي قالت موجوده سيارتك بس بنزين قلت لا ابي ديزل قالت تدفع ١٥٠ زياده قلت اوكي بس لاتجيني سياره بوقس قالت خلاص جب الفيزا وتفاجات انهم يبون يسحبون ٦٥٠ يورو قلت ليه اساسا خاصمينها من اول قالت لا ٥٠٠ وديعه وال ١٥٠ زياده وبرضه مشيت الموضوع ابي اخلص المهم يوم جيت استلم السياره الا وهي بوقس :16::16::16: وانا ارجع لها وبكل برود تقول الموظف خطأ انا مالي دخل واعصب عليها وهي اللي كانها تقول لاتشكي لي وابكي لك وقامت تتكلم عن معامله لها في لبنان لها اكثر من شهر وقامت تفضفض المهم سالتني لوين رايح قلت لها النمسا ايطاليا سلوفينيا قالت شوووووو سلوفينيا مافيك تروح لها ممنوع ولا يشملها التامين قلت ليش قالت يسرقونها بكل بساطه قالت اذا بتروح ع مسؤوليتك روح وانا اللي اقول ايه ايه عادي طفشت من طول الانتضار واقعد انتظر الموظف لين رجع وعطاني مرسدس فئه e بنزين ولكن كان فيها نظام eco الايكنومي يمشيني ٩٠٠ كيلو الفل

والحمدلله انتهت المعاناه بعد انتظار ٣ ساعات او اكثر عشان سياره واليوم الثاني رجع لي مبلغ ٦٥٠ يورو اللي كنت حاجز فيه السياره عن طريق الاون لاين
وسلوفينيا الغيتها من الخطه واستبدلتها باضافة يوم بزيلامسي ويوم بايطاليا
نجي للمعاناه الثانيه
قبل التسليم بيوم قدر الله علي وسويت حادث بسيط وانكسرت الشمعه اليمين وكنت صادم لوحه بالخط لاني كنت بسوي يوتيرن وتفاجات بسياره مسرعه وشطفت اللوحه
المهم انا فيه معلومه براسي او احد قايل لي انه اذا مافيه طرف ثاني بالحادث او اصابات مايحتاج تدق ع الشرطه
دقيت ع الشركه نفسها وبلغت عن الحادث وماجاب لي طاري اتصل ع الشرطه
قالي بشوف اقرب مكتب لك يجي يبدل سيارتك قلت مايحتاح بعد بكره راجع المهم قالي مر اقرب مكتب لك بكره وانا وقتها في قارمش واقرب مكتب في انسابروك وقلت مره وحده اسلمها بالمطار
وفعلا سلمتها بالمطار وسالت اللي استلمها عن ورقه مخالصه قال مايحتاج وسالت موظف ثاني مغربي قال تامينك زيرو روح وانت مطمن المهم ماعجبني كلامهم ورحت للمكتب واحصله زحمه قلت اجل مايحتاج.. وقبل اختم الجوازات خروج تجيني رساله (لعدم توفر رصيد كافي تم رفض عمليتك الشرائيه من كست) وتجيني مره ثانيه مع انه فيها رصيد ٥٠٠ ريال
انا هنا جاني احساس الافلام والمطلوبين امنيا:19: .. قلت بس اكيد معممين عني ماأطلع :20:
المهم ختمت وطلعت على لندن والحمدلله.. طبعا بعد ماشفتهم ناوين يسحبون الفلوس من الفيزا سحبت كل فلوس الفيزا الباقيه وحولت فلوسي لبنك ثاني
واليوم الثاني تجيني رساله تم خصم ٧٠٠ يورر من الفيزا :30:
صار رصيدي بالسالب حوالي ٤٠٠٠ ريال معقول فيزا مسبق الدفع وبالسالب المهم زين معي بطاقه ثانيه وحساب ثاني
وارسلو لي فاتوره بقيمة العقد انه ٧٠٠ يورو مع ان العقد اللي معي ٦٥٠ قلت زين دامها فلوسهم ممكن الاوله عليها بلوك وفعلا كان بلوك بس مادري ليش هالزياده
المهم ارسلو لي ايميل ثاني وفيه ابلكيشن اعبيه تاريخ الحادث ومكانه ورقم بلاغ الشرطه مع رسالة تهديد (نرجو ملئه وتوقيعه واعادته لنا خلال عشرة ايام والا سنتخذ الاجراءات القانونيه )😣
انا ابي افهم هل ممكن يحملوني تكاليف اصلاح السياره وانا مامن زيرو؟
وهل ممكن احد يساعدي اعبي هالاوراق بحيث انها ماتدينيني؟

حبيت انقل لكم تجربتي معهم عشان ماحد يعيد المشكله ونشوف نهايتها معهم سوا
وهذي الاوراق اللي مرسلينها

عليكم السلام

الله يعوضك خير

مشكلتك انك ما بلغت الشرطة وبما أنه ما عندك تقرير من الشرطة التأمين ما يشملك هذا هو النظام المتعارف عليه

الله يسلمك
فعلا سكست مستحيل استاجر منهم مره ثانيه تعامل زفت وتأخير ... الحسنه الوحيده احيانا سعرهم ارخص من الشركه المنافسه لكن دامهم حراميه ادفعها بموافقتي افضل للشركه الثانيه

التأمين زيرو ومتاكد منه
لكن الاوراق اللي جتني يبون فيها تفاصيل الحادث
وهذي هي ارفقتها

المشكله الموظف ماقالي اتصل بالشرطه ولا جاب طاريها

ماقول الا الله يكون بعونك ض

الله يكون بعونك

بسيطة
الورقة فقط تعبيها وهي معروفة لشركات التامين
احسن تقفل الفيزا وتسحب كل فلوسك من البطاقة وتغير حتى لا يخصم اي مبلغ من طرفهم
دام عند تامين شامل امورك في السليم
انا بالعادة اسحب على شركات التاجير اذا كان خصموا اي مبلغ اروح افتح بلاغ للبنك ويرجع المبلغ بعد ٦٠ يوم