استفسار عن النمسا
 

السلام عليكم
ولاول مره مفكرين انا وزوجي نطلع النمسا انا عادة مااحب اروح لدوله الا اكون عارفه عنها كل شيءءء
ارتاح نفسيا خصوصا ان لغتنا على قدنا
:e328:
سفرتنا بداية سبتمبر
اسبوع تقريبا
لاافقه شيئا عن النمسا ودخلت برامج سياحيه بس غالبا تكون عبارة عن زيارة قصور ومعالم وومن هالامور وماتعجبنا
يعني ابي ساحه مفتوحه واسواق شعبيه رخيصه وارض خضراء وبحيره وفندق اطلالته طبيعه او بحر
وابي اعرف جوها بذا الوقت ومعنا بنتي 3 سنوات:e328:
اعتذر عن الاطاله وجزاء الله خير من يضع لنا معلومات وافيه :e328:

لو تاخذ لفة في بوابة النمسا بتلقا كل اللي تسأل عنه
وعلى فكره النمسا النقاب ممنوع
انصحك تروح زيلامسي - وادي تيرول عموما
ممكن تروح جنوب المانيا قريبه من زيلامسي تقريبا 40 كم
وانصحك تأجر سياره وهي ثلاث ارباع المتعه

و عليكم السلام و رحمة الله و بركاته
اختي الكريمة احييك على اختيارك النمسا خصوصا و اوروبا عموما لقاء اجازتكم و لكن قبل ما اتشرف بالرد عليك ببعض المعلومات أتمنى اعرف التالي :

• هل مدة الأسبوع تشمل يومي السفر؟
• هل عادي يكون مطار الوصول مطار ميونخ او لازم فيينا؟

مع تمنياتي لك بسفرة سعيده

الوصول فيينا لاننا ماحنروح غير النمسا
وايه يومين السفر تشمل مدة الاسبوع

انا ماحطلع من النمسا ومدة سفري قصيره مااتوقع تكفي غير زيلامسي لو لقيت برنامج حلو مع فيينا طبعا

ايش اسم المدينه اللي قريبه من ززيلامسي لو سمحت وايش الاجراءات اللي لازم اتخذها للسفر الى المانيا
انا لاول مره حروح اوروبا🙃

السلام عليكم و رحمة الله و بركاته

• المدينة القريبة من زيلامسي : اذا قصدك بلده فهي كابرون تبعد تقريبا 10كم و اذا قصدك مدينة فهي سالزبرغ تبعد تقريبا 100 كم و هذه كلها تتبع النمسا بينما ميونخ تبعد 170 كم و هي تتبع المانيا.
• الإجراءات اللازمه لدخول المانيا : اذا معاك فيزا شنغن النمسا فلا توجد أي مشاكل تقدري تدخليها عاادي جدا من النمسا يعني بعد ما تخلصي من النمسا تروحون لها من غير أي مشاكل و لكن لو عندك فيزا شنغن النمسا و حبيتو وصولكم اول مره لألمانيا يجب ان تكون معاك حجوزات السكن التي تثبت انك جالسة اكثر مدة في النمسا ( عشان لو سالك موظف الجوزات في المطار تقدمينها له).
• اذا وصولك مطار فيينا و حسب المدة اللي ذكرتيها و حبك للطبيعه و حبك لزيلامسي فانصحك بالتالي :

1. حاولي يكون موعد وصولكم بدري يعني لو كنتي من اهل الرياض او قريبه اختاري طيران ناس لانه مباشر و كمان موعد الوصول تقريبا 7 الصبح يعني تسفيدي من اليوم
2. الذهاب مباشرة بالسيارة او بالقطار الى الخيار الأول ( 2 سالزبرغ 3 زيلامسي 1 فيينا) الخيار الثاني ( 5 زيلامسي 1 فيينا) الخيار الثالث (4 زيلامسي 2 فيينا)
3. الوقت من فيينا الى زيلامسي بالسيارة تقريبا 4 ساعات بالقطار تقريبا 5 ساعات . اذا بالسيارة يكون موعد وصولك باذن الله 12 واذا بالقطار بيكون حسب القطار اللي تختاروه .
4. بخصوص السكن في زيلامسي هو متنوع و حسب ميزانتكم فيه على البحيره و فيه غيره ادخلي على موقع حجز مثل بوكينق و اختاري حسب التاريخ و و اكتبي اسم الفندق هنا و رح نقولك عن مناسبة لكم من ناحية الموقع او أي شي اخر. شوفو فندق غراند زيلامسي اذا يعجبكم

رح ارجع و اكمل لك باقي الرد باذن الله بعد الإفطار

الله يجزاك خير
بالنسبة لخيارك الاول مايحتاج ادخل المانيا وشكلي بمشي عليه :e04a: لان مدة سفري قصيره
للاسف اني بعيده عن الرياض لكن ممكن احجز من تبوك الى الرياض دام فيه استغلال للوقت وسياره ماحنستاجر فكيف يكون التنقل من مدينه لمدينه والحججز هل سائق او قطار او ...
بس اعتمد خيارك راح احدد السكن من بوكينق مع استشارتكم اكيد :e20c:

شكلي بكنسل المانيا وابقى على النمسا سفرتي كلها اسبوع :e311:

• فيه شي ابيك تنتبهين له قبل تحديد الجدول و هوا نتم عادي تنامون في الطيارة و الا لا عشان اذا عادي و لا عندكم مشكلة في مواصلة الرحلة فخلو جلوسكم في العاصمة فيينا في الأخير و عشان تستفيدون من يوم الوصول و وقته يعني من المطار دايركت الى زيلامسي ( في القطار تقريبا 5 ساعات في السيارة 4 ساعات تقريبا).
• ليش الفقره اللي فوق مهمه عشان في ردي الأول نصحتك بطيران ناس عشان موعد وصوله بدري و تقدرون تروحون زيلامسي و توصولنها على الظهر ان شاء الله و لكن لو خطتكم تبقون في فيينا ( عاصمة النمسا) بعدين تروحون زيلامسي فانا انصحك بالخطوط السعودية عشانها توصل تقريبا الساعة 2:40 الظهر بتوقيتهم و هذا موعد مناسب جدا للي بيجلس في فيينا عشان الفنادق لو رحتو بدري مارح يسون لكم تسجيل دخول الا بعد الساعه 2:00 وحجزك رح يكون تبوك جده فيينا على الخطوط السعودية بينما على طيران ناس رح يكون تبوك الرياض فيينا
• في الجدولة المقترحة انتم تقررون أيام الجلوس حسب رغباتكم والنمسا فيها الكثير من البلدات السياحية و المدن لكن المشهور هي زيلامسي ( انصح فيها بشده) - هالشتات - سالزوبرغ - قراز ( ليست مشهوره لدينا) - انسبورك ( بعيده جدا عن العاصمة فيينا لا انصح فيها بالنسبة لك).
• أرى ان تكون هذه المرة جلوسكم يقتصر على زيلامسي و فيينا
• التنقل بين المدن كما ذكر اخوي رايق التكسي غاليا القطار حلو و سهل و تقدرون تاخذون التذاكر من المحطة او من النت ( فيه موضوع لشرح شراء التذاكرمن النت و اذا حبيتو تشترون من النت و فيه أي استفسار اكتبو هنا و بنساعدكم باذن الله و فيه تطبيق للقطارات ). و كمان فيه موقع انا استخدمتو شخصيا السنة اللي فاتت ورح اتعامل معاه السنة هذي بإذن الله حجزت سيارة مع سائق و اسعارهم اقل من التكاسي بنسبة 40% اسمه get transfer مثلا طلعت من المطار الى زيلامسي بـ 329 يورو (ذهاب فقط ) ( اذا حبيتو تستخدموه اكتبي هنا و بنشرحه لك باذن الله ) .
• التنقل سهل جدا بين المدن و واضح في القطارات
• النت مهم جدا و انصحك من غير وجع راس او تسألي عن الشرايح قبل ما تسافري من ارض الوطن و انتي في المطار اشتركي في احدى باقات التجوال ( هذي غير ان عندك خاصية التجوال) بالباقات على حسب يعطيك نت و كمان فيه مكالمات مجانية . اشتركت فيها السنة اللي فاتت لمدة شهر بـ 499 ريال و كانت معااي ممتازه نت مفتوح و 1000 دقيقة مجانا ( السنة هذي شيكت حطوها 500 دقيقه )و استقبال مكالمات مجانا .
• السكن في زيلامسي اختارو و حطوه هنا و رح اقولكم راي من الأشياء المهمة في السكن هو لا يكون في السنتر و لا بعيد و كمان يعطي بطاقة زيلامسي كابرون فيها توفير كثير
• السكن في فيينا يكون قريب من شارع المشاة karntner يكون كل شي حولك مطاعم أسواق حديقة شتات وكمان حطو الأسماء هنا و نرح نفيدكم باذن الله.
• بخصوص السكن سواء شريتي من المواقع مثل بوكينغ او هوتيل ..... او من المكاتب السياحية ادخلي أي موقع حق حجوزات مثل بوكينغ و غيره وشوفي الأسعار و كمان الموقع و التعليقات اذا اعجبك كم واحد حطي أسمائهم هنا لا تروحين للمكاتب السياحية و تخلينهم يختارو اغلبهم اصلن ما قد سافر لها روحي لهم اذا تبينهم و انتي عارفه الفنادق اللي تبينها خيار اول خيار ثاني و هكذا.
• احس انكم مترددين في السفرة توكلو على الله الأمور كلها سهله ما يحتاج أي خوف البلد سياحي و حتى فترة الأسبوع كمان حلوه و ان شاء الله السنة اللي بعدها متاكد بترجعون لها.
• موضوع الفيزا ما ادري عندكم و الا لا اذا لا فيه موضوع من اعداد اخوي اخر فرصة في بوابة فيزا شنغن جدا مفيد و لو مشيتي على الخطوات مارح ياخذ منكم وقت و لكن لو حبيتو تعطونها مكتب هذا راجع لكم بس زيارة مكتب التاشيرات سواء اللي في جده او الرياض لابد منه عشان التبصيم و خلصو موضوع الفيزا بدري عشان ترتاحون.
• في ردي لم اتتطرق الى الأماكن السياحية اللي في المدن و ذلك لي لا اطيل عليكم و كمان لان كل معظم فنادق في النمسا فيه برشورات بالعربي تشرح لكم و كذلك اذا عزمتو و كنتي حابه أماكن اكتبي هنا وما رح انا او الأعضاء يقصرون معاك
• بخصوص الحجاب ( و ليس النقاب النقاب ممنوع) ابعدي عن الحجاب الأسود اختاري أي لون اخر.
• بخصوص اللغه عادي جدا اصلن لغتهم الاصلية الألمانية حتى اللي معاه انجليزي مارح يستفيد منها الا في الفندق.
• باذن الله اذا تسهلت اموركم الى النمسا و كنتو خايفين من استخدام القطار انا بشرح لكم بعض النصائح المهمه يخليك ما تستخدمين الا القطار و تنبسطين فيه

أتمنى اني اجبت على استفساراتك و أبعدت عنك التردد و الخوف و اذا باقي أي شي ااو أي استفسار اكتبي هنا و انا و أعضاء المنتدى مارح نقصر ابد.
ارجع و اقول كل ما اكتبه يعبر عن راي الشخصي و عن تجاربي الشخصية الذي يعجبني قد لا يعجب غيري و العكس و من المستحيل كل ما كتبته يعجبك اخذي ما يعجبك و ترتاحين له
زوري النمسا حتى لو جلستو كل المدة في فيينا لا تخلين احد ياثر عليكم بسبب المدة حتى أسبوع حلو

شورك وهداية الله وبنكنسل سالزبورج وبنستغلها في فيينا وزيلامسي
وببحث عن موضوع القطار وافهمه زين باذن الله الف شكر ماقصرت .

بعد ردودكم ماعاد فيه تردد الله ييسر لنا وباذن الله بس ارتب سفرتي واختار الفنادق برجع لكم اكيد الف شكر للجميع ولي عوده للاستفسار عن القطار والاماكن .:e307:

السلام عليكم ورحمة الله وبركاته
كيف حالك اخوي خالد...
حبيت استفسر منك عن السفر للنمسا
وبأذن الله انا بسافر للنمسا في اكتوبر وبأذن الله بتكون المدة 8 الى 7 ايام ..
واذا مافيه كلافة عليك ابي استشيرك في السفر للنمسا
انا ودي ازور فيينا و زيلامسي
وما ادري الى الان ماحددت مطار الوصول والمغادرة
وش رايك في هذا الترتيب الرياض - فيينا والجلوس لمدة يوم ثم الذهاب الى زيلامسي وتسجيل الدخول في فندق سوبيريور تيروليرهوف - زيل أم سي
والجلوس في زيلامسي 5 أيام ثم العودة الى فيينا وجلوس يوم او يومين (طبعاً ماحدت الفندق الى الان) ثم العودة من مطار فيينا الى الرياض