![]() |
تقرير رحلة الى النمسا الفاتنة والشمال الايطالي الخلاب - يوليو 2023 3 مرفق السلام عليكم ورحمة الله وبركاته في البداية احب اشكر جميع القائمين والاعضاء في هذا الموقع اللي اعتبره المرجع العربي الأول في السفر واستفدت منكم من استخراج تأشيرات السفر الى تسليم السيارة في المطار مسار الرحلة كان كالتالي: الوصول ڤيينا والإقامة 4 ليالي سالزبورغ 3 ليالي برونيك ( الشمال الإيطالي ) 3 ليالي ميلان 3 ليالي التاشيرة حجزنا قبل الموعد بشهر على المركز الموحد النمسا فرع الخبر تاريخ 7 يونيو وصلتنا الجوازات تاريخ 21 يونيو والمدة كانت سنة لي و 6 اشهر للأهل مع العلم كل الجوازات فيها مدة اكثر من 5 سنوات الوالد استخرج تاشيرة فرنسية واعطوه ثلاث سنوات ماشاء الله الطيران حجزنا على الخطوط القطرية بسعر 2500 ريال سعودي للشخص على السياحية عددنا كان اربع اشخاص 3 يوليو الدمام - الدوحة - ڤيينا 16 يوليو ميلان - الدوحة ڤيينا خدمة العملاء عندهم سواء الرقمية او في المطارات ممتازة جدا جدا واحترافية اعجبتني التوسعة في مطار حمد الدولي مسوين حديقة داخلية مغطاة بالزجاج وحواليها المطاعم والمحلات تطلع من جو زحمة المطارات ماعجبني ان الذهاب للطيارة كان بالباص في الذهاب والعودة تمنيت يكون جسر الرحلة: وصلنا مطار ڤيينا على الساعة 2:30 مساء والكاونتر ماكان مزحوم كنا متوترين شوي لان الوالد فيزته فرنسية وماستعملها وجهزنا حجوزات وهمية في فرنسا اكثر المدة اعطيت الوالد التكيك والخطة الدفاعية ووصلنا الى ضابط الجوازات وكان كل شخص لازم يدخل بروحه وزاد التوتر عدا الوالد من الجوازات بدون اي سؤال واحد من الموظف النمساوي السمح ( ليت يتعلمون الالمان ) طلعنا من المطار واخذنا اوبر الى الفندق بمبلغ 45 يورو ( طبعا في فيينا اعتمدنا في تنقلاتنا على اوبر بحكم ان السيارة في العواصم الاوروبية تكون متعبة والمواقف غالية والحمدلله خطوتنا كانت موفقة VIENNA وصلنا الفندق Hilton Vienna Park وكان مزحوم شوي وفيه خليجيين كثير الفندق خمس نجوم واللوبي حقه شرح وفخم ومقابل حديقة Stadtpark ويبعد عشر دقايق مشي عن السنتر وامامه مول صغير فيه متاجر متنوعة وسوبرماركت خذنا غرفة كورنر باطلالة على الحديقة كلفتنا حول 250€ من تطبيق Hilton Honors شامل الضريبة بدون فطور يوم وصلنا زدنا عليها فطور 22 يورو للشخص والصراحة يستاهل بوفيه متنوع ولذيذ اول يوم خصصناه للراحة بعد الرحلة تعبنا شوي وتجولنا بالحديقة اللي مقابلة الفندق ثاني يوم كان حافل بالانشطة :13: الجو في جميع ايام فيينا كان جميل وصادفنا مطر في ثالث يوم اقصى حرارة كانت 27 وغائم جزئيا ولكن اذا راح طلعت الشمس يصير حار انطلقنا الى السنتر وتحديدا عند ساحة Michaelplatz اللي فيها عربات الخيل مصفوفة كأنها سيارات تاكسي خذنا عربة لاربع اشخاص وكان سعرها 90 يورو لمدة 40 دقيقة ممكن السعر غالي شوي ولكن يستاهل لانه يلف فيك السنتر كله ويعطيك معلومات سياحية عن تاريخ المدينة العريق اشوفها افضل طريقة تبدا فيها جولتك في فيينا تكون على عربة خيل وتعيش الاجواء الكلاسيكية! يوم نزلنا رحنا الى شارع Garben اللي يعتبر شارع المشاة الرئيسي في السنتر وفيه مطاعم ومقاهي انواع واشكال بالاضاقة الى البراندات العالمية المكان طبعا مليان حياة وناس رايقة ومبسووطة وموسيقيين تقهوينا في مقهى Demel وكان راايق والحلى عنده تحفة جلسنا ساعتين بعدين توجهنا الى السوق الشعبي في المدينة واسمه Naschtmarkt عبارة عن شارع طويل وعلى جوانبه اكشاك مأكولات شعبية وبوتيكات صغيرة توقعته اجمل صراحة ولكنه عادي خصوصا ان اغلب المنتجات هي تركية ف ماحسيت انه له طابع نمساوي اصلي ولكن على كل حال تجربة بعدها اكلنا غدا عشا في مطعم Lugeck مطعم جلساته جميلة واكله لذيذ وتقريبا بالسنتر ثالث يوم توجهنا الى نهر الدانوب تحديدا منطقة Alte Dounau كما يسمى الدانوب القديم هذي اعتبرها المنطقة الترفيهية الافضل في الدانوب لوجود انشطة ومطاعم متعددة بجانب النهر اخذنا قارب كهربائي احنا نسوقه ب 25 يورو للساعة الجولة كانت ممتعة ورهيبة تمشي بالقارب ويوقف عندك الوز والبط وتشوف الشعب يمارس هواياته من الكاياك والسباحة والاسترخاء بالقوارب رجعنا القارب ورحنا تغدينا في مطعم Strand Cafe اللي على ضفاف النهر الجميل من اعلى المطاعم تقييم في المنطقة ويستحق ذلك واكله لذييذ وخدمتهم ممتاز بعد ماخلصنا رحنا الى منطقة البرلمان وتحديدا حديقة Volksgarten تعتبر من اكبر حدائق الورورد في اوروبا والجلسات فيها فاتنة ويوجد مقهى باطلالات حلوة عليها بعد ما استنشقنا ريحة الورد العطرة تمشينا في شارع البرلمان الحيوي والمكان بدون مبالغة كأنه متحف مفتوح كل مبنى اجمل من الثاني وبتصاميم فخمة جدا ونظافة عالية في المنطقة رحنا الى مقهى Cafe Landtmann الاسطوري يعود انشائه الى عام 1873 يعني بالضبط قبل 150 سنة متخيلين!! المقهى فيه ثلاث جلسات : داخلية وداخلية بزجاج من الاعلى وخارجية على الشارع طلبنا 4 انواع حلى وكانت قمة في اللذة خصوصا ال Kaiserchmarn هذا مثل البانكيك بس مقطع رابع يوم بدأنا اليوم بزيارة جبل Kahlenberg يبعد عن وسط فيينا نصف ساعة تقريبا وفي قمته يوجد مقهى ومطعم باطلالات بامورامية ساحرة على فيينا تغدينا وتقهوينا في هالمنطقة الجميلة وكسرنا صخب وزحمة فيينا في هذا المكان الرايق طريق العودة مرينا على الحي اللي اسفل الجبل ويعتبر من ارقى الاحياء في العاصمة ويسكنونه اغنياء البلد البيوت راقية ومتعة بصرية في المشاهدة بعدها ذهبنا الى ملاهي Prater وهذي تستحق يوم كامل بالراحة نظامها دخول مجاني وتدفع عند كاونتر اللعبة باسعار تعتبر مناسبة الالعاب فيها من العجلة العملاقة والعاب اطفال الى قطار الموت الى الالعاب الخطرة تعشينا في مطعم برجر في المنطقة ولكن لا اذكر اسمه الاكل عنده كان راااائع بعد ماخلصنا من براتر واللعب توجهنا الى الفندق وختمنا فيها برنامجنا في فيينا عاصمة الانس الراقية النطيفة اللي تستحق الزيارة! خامس يوم هذا كان يوم الانتقال من فيينا الى سالزبورغ بالقطار حجزنا قطار OBB درجة بزنس ب 120 يورو للشخص والمدة ساعتين وربع الفئة هذي تعتبر اعلى من الفرست في درجات هذا القطار وجدا مريحة وكل ثلاث مقاعد صايرين بشبه كبينة خاصة القطار انطلق 1:30 ووصلنا سالزبورغ الساعة 3:45 مساء بعدها وصلنا فندقنا الكلاسيكي Sheraton Grand Salzburg من اجمل الفنادق اللي زرتها في في حياتي والسبب الفندق محافظ على هويته العريقة واهتمامهم بأدق التفاصيل لراحة النزيل. يبعد عشر دقايق عن البلدة القديمة وامامه حديقة ميرابل SALZBURG اليوم السادس قضيناه جولة في البلدة القديمة والتمشية في ازقتها مثل شارع Getreidegasse مرورا ب نهر Salzach وجسر العشاق سالزبورغ تعتبر مدينة الموسيقي موزارت فراح تلاحظ في كل زواياها ارث هذا الفنان وتسمع الحانه الجميلة طبعاً المدينة تقدر تلفها كلها بنص يوم لانها صغيرة ولكن جميلة وتستحق انك تزورها ماحصلت لنا الفرصة نطلع بالقطار الجبلي لقلعة Fortress Hohensalzburg ولكن كثير يمدحون الاطلالة من فوق اليوم السابع اخذت اوبر ورحت الى قرية Freilassing الألمانية عشان استلم السيارة من مكتب Sixt وفرق في السعر 200 ريال باليوم عن لو استلمها من النمسا! حجزي كان على Volkswagen تيغوان ولكن عطوني ابقريد مجاني الى BMW X4 بنفس السعر وخذت تأمين شامل ومساعدة على الطريق لمدة عشر ايام وكلفني 1500 يورو غير شاملة الوديعة وكانت 300 يورو طلبو مني الرخصة السعودية والدولية وصورة من جواز السفر خصصنا هذا اليوم لزيارة قرية هالشتات Hallstatt وتبعد ساعة وعشرين دقيقة في الطريق وقفنا في Seegut Eisl عبارة مزرعة صغيرة وفيها محل خدمة وشراء ذاتي يبيع منتجات الخرفان اللي بالمزرعة وجربنا عندهم الايسكريم وكان لذيذ وصلنا هالشتات وجلسنا ندور على موقف قريب وحصلنا في P2 ( غالبا المواقف تكون فل بس انتظر شوي او خذ لك لفة وتحصل ان شاء الله ) ركبنا الباخرة لمدة ساعة حوالين البحيرة وسبحان الخالق على المناظر الخيالية وبعدها طلعنا الى بالعربة الجبلية الى منصة Skywalk ومنها تشوف كل القرية والبحيرة من فوق نزلنا وتمشينا في القرية الحالمة ومنازلها الملونة لاحظت كثير صينيين في هذي القرية لدرجة ان انشأو نفس القرية هذي ومبانيها في الصين ! قضينا يوم كامل فيها والصراحة تستاهل بعدها رجعنا الى سالزبورغ اليوم الثامن خصصنا هذا اليوم لزيارة بحيرة ولف قانق وزيلامسي وصلنا الى قرية ولف قانق وتمشينا بسنترها الجميل عجبني الطابع العام للمكان يمكن اكثر مكان حسيت باصالته النمساوية من مباني ومطاعم وبدون شي خارجي بعدها رحت مع اخوي الى تجربة البرشوت في الناحية الثانية من البحيرة عند مكتب FlyTandem في St. Gilgen التجربة اسطورية وفعلا ادرينالين والكابتن يسوي حركات يشقبلك وتحس انك بتطيح بعدها طلعنا ورحنا الى زيلامسي قلنا نتمشى ونتعشا فيها ساعتين البحيرة جميلة والسنتر جميل ونظيف بس للامانة كثرة الخليجيين والعرب افقدتني الشعور اني مسافر وبالنمسا يعني تقدر تقول المنطقة فاقدة طابعها النمساوي التقليدي بس بشكل عام المكان لطيف والناس محترمة تعشينا في فندق قراند وللامانة المنيو عنده محدود للعشا فقط 3 اطباق بس طلبنا سمك وكان طيب ولذيذ رجعنا بعدها لسالزبورغ لحزم الحقائب والتوجه في اليوم التالي لجبال الدولومايت في الشمال الايطالي. BRUNECK اليوم التاسع الطريق من سالزبورغ الى برونيك تقريبا ثلاث ساعات ونصف قلت لازم اوقف في نصف المسافة في مكان جميل والخيارات كانت انسبروك او منتزه فيه غزلان اسمه Aurach Wild Park وللاسف اخترت الثاني وصلنا للمنتزه والدخول 10 يورو للشخص وكان جميل والغزلان تشوفها تاكية عالعشب بدون حاجز ولكن المشكلة كله رقيات ونزلات وغير مناسب ابدا للعوايل طلعنا منه ولا ادري ان الطريق لبرونيك من هذا المسار راح يكون فيه وعورة شديدة للغاية يعني الى درجة بعض المناطق يكفي سيارة وحدة بس وضييق حسينا ان المشوار 7 ساعات من التعب ولكن الحمدلله ان الوقت كان نهار اللي بيسافر للشمال الايطالي من النمسا الافضل انه يختار الطريق اللي يمر على انسبروك وليس Kitzbuhel بعد هذا العناء استقبلتنا ايطاليا وجبال الدولومايت وباقي تقريبا ساعتين على الغروب ف المنظر كان جميييل وياخذ العقل من اول نظرة ارتحت وحبيت المنطقة هذي صراحة فيها شراحة وجمااال حجزنا كان في شقق K1 Mountain Chalet تبعد 7 دقايق بالسيارة عن سنتر برونيك وملاصق لها تلفريك ياخذك 2200 متر شقة صالة وغرفتين نوم وبلكونة واسعة فيها جاكوزي واطلالة على التلفريك ب 490 يورو في الليلة حطينا اغراضنا وارتحنا شوي بعدها رحنا تعشينا في المطعم المقابل للشقق كان مزحوم بس حصلنا طاولة المطعم كان رووعة والاكل لذيذ جدا منيو البيتزا بروحه ثلاث صفحات اليوم العاشر رحنا الى سان كانديدو San Candido وبالطريق وقفنا في محل اجبان رهيب اسمه Zinnen Tre Cime ما ابالغ اذا قلت الذ توست جبن اكلته عندهم !! بعدها رحنا الى تلفريك سان كانديدو المفتوح والجو كان غيم وبراااد وصلنا الى القمة وكانت فيها انشطة وفعاليات كثيرة وفيها مقهى ومطعم باطلالات بانورامية جلسنا حول ساعتين روقنا بعدها نزلنا الى تحت وتوجهنا الى مصنع Loacker يبعد حوالي اقل من 20 دقيقة هو بالنمسا بس عالحدود مع ايطاليا المكان حلو بس تقدر تقول انه محل كبير يعرض منتجات لوكر ومقهى اكثر من انه مصنع بالرغم انه يوجد مصنع حقيقي بجانبه ولكن غير مسموح بدخوله للعامة نزلنا نص منيو الحلى في المقهى والايسكريم والقهوة وياساااتر ياللذة صدق يستاهل الزيارة بعدها رجعنا الى برونيك وتجولنا في سنترها اللطيف وحوالين النهر الصااافي اللي يشق القرية انصح بالسكن فيها لان سنترها حلو وفيه حياة وبرضو تتوسط المزارات السياحية والقرى في منطقة الدولومايت اليوم الحادي عشر طلعنا عالتلفريك اللي لاصق بالشقق مررنا بالغيوم الكثيفة الى ان وصلنا للقمة المكان في القمة كبيير وفيه مسارات للهايكنق ومسارات للتمشية ومشاهدة المناظر والجبال الشاهقة وفيه مطاعم ومقاهي واطلالات حلوة ويوجد متحف يحكي عن تاريخ المنطقة والمتسلقين الجو برااد فوق انصح تجيبون جاكيت خصوصا لو معكم اطفال نزلنا بعدها وانطلقنا الى عرووس الشمال الايطالي وهي اورتيساي Ortisei الساحرة المسافة كانت ساعة وشوي الى سنتر اورتيساي القرية هذي ماسميت العروس عبث فيها جمااال واناقة والتمشية فيها بحد ذاته برنامج تعشينا في مطعم Cascade بجانب النهر متخصص بالبيتزا اكله رائع وجلساته حلوة قريبة من النهر وعندهم منيو بالعربي القرية هذي تستحق انك تزورها وتخصص لها يوم كامل للامانة ولكن ما انصح السكن فيها لانها بعيدة شوي عن المناطق السياحية يعني اقل شي ساعة عن بحيرة برايس وساعتين تقريبا عن سان كانديدو والمنطقة اللي حوالينها وخيارات السكن فيها محدودة MILAN اليوم الثاني عشر حزمنا الحقائب واتجهنا الى اخر منطقة وهي ميلان عاصمة الاناقة والموضة الطريق كان اربع ساعات ونص اخترنا فيرونا Verona كنقطة استراحة وكان اختيار موفق المدينة ونيسة وجميلة وصادقنا جو غائم وبارد, تجولنا في الساحة الرئيسية وشوارعها العتيقة بعدها اكملنا باقي الطريق الى ميلان وصلنا المدينة واقامتنا كانت في فندق Westin Palace Milan اخذنا غرفتين جراند ديلوكس متصلين في القسم الجديد بقيمة 300 يورو للغرفة بدون فطور الصدق الفندق فخم ورااقي ويستحق سعره العالي واللوبي وااسع والستاف جدا متعاون ولطيف تمشينا في منطقة بورتا نوفا Porta Nouva تبعد سبع دقايق مشي فقط وهي تعتبر ميلان الحديثة تمشي وكانك في دبي. عجبني البرج اللي اسمه الغابة العمودية Bosco Verticale خارج عن المألوف ومعطي جمال للمكان المنطقة فيها حديقة كبيرة ومحلات تسوق وسوبرماركت كبير ومناسبة للعوائل اليوم الثالث عشر استقبلنا الصباح بأمطار غزيرة الحمدلله لان اكثر شي كنت متخوف منه الجو في ميلان لان في يوليو يعتبر كانك في الخليج من الحرارة والرطوبة ولكن الامطار لطفت الجو وصار اغلب اليوم غائم وهوا عليل محطتنا الاولى كانت محمصة ومقهى ستاربكس Starbucks Roastery Milan اللي يعتبر الأكبر في اوروبا! كان في طابور انتظار طويل ولكن سريع ودخلنا في 5 دقايق.. المكان عجيب وكأنك في قلب الحدث في المحمصة تشوف حبوب البن تدفق في الانابيب من الاعلى والتحميص امامك. بعض القهوة والمخبوزات حصرية وتباع فقط في هذا المكان على الزحمة والعالم الا ان نفسيات الموظفين جدا جميلة ويخدمونك بابتسامة عرييضة. بعدها مشينا الى ساحة الدومو Duomo وتبعد 5 دقايق مشي فقط. الساحة هذي من اكثر الأماكن اللي فيها حيوية في اوروبا وفيها طاقة جميلة وودودة تغدينا في احد المطاعم القريبة اسمه Spontini متخصص بالبيتزا عالماشي بدون جلسات.. لذيذة وطازجة كانت وطلبنا زيادة من لذتها. دخلنا القاليريا Galleria والتقطنا الكثير من الصور والمكان تحفة معمارية في التصميم والفن. حذرونا كثير من النشالين وشفنا مقاطع سرقة بنفس المكان ولكن الحمدلله التزمنا الحذر وخلينا المحافظ والشناط في الامام ولا احد قرب منا. مشينا الى منطقة Brera الراقية هذي افخم منطقة في ميلان وواضح ان الاثرياء يعيشون فيها شوارعها وازقتها انيسة وجميلة وتنفع تجيها تتقهوى او تتعشا على الغروب اليوم الرابع عشر خليناه كامل لبحيرة كومو Como البحيرة عملاقة طولها تقريبا 45 كيلو ومشهورة بفلل المشاهير والاثرياء وتصورت فيها افلام جيمس بوند وستار وارز. رحنا من الصباح الى قرية ميناجيو Menaggio في غرب البحيرة الطريق لها كان وعر شوي بس الناس تسوق عدل وراكدة وصلت المواقف الا رجل هولندي طالع من موقفه واعطاني تكت من عنده باقي فيه 5 ساعات الله يجزاه خير تقهوينا وتغدينا في وسط القرية والمناظر كانت وكأنها رسمة سبحان الخالق. يعجبني الطابع الايطالي في العمارة من الالوان والتصميم واندماجه مع طبيعة المكان اللي تفوق الوصف اخذنا العبارة الى قرية فارينا Varrena وهنا كان اسوء قرار القرية جدا صغيرة ومتروسة بالسياح وكلها درج ماتنفع نهائيا للعوائل وكان الجو فيها لايطاااق من الحرارة على انها مقابلة ميناجيو من الضفة الاخرى الا انها كانت مكتووومة جدا للاسف تعبنا وماستمتعنا وكنسلنا نزور اهم قرية في البحيرة وهي بيلاجيو Bellaggio رجعنا بالعبارة الى ميناجيو ورجعنا الى ميلانو اليوم الخامس عشر رتبنا شناطنا ورحت غسلت السيارة وعبيتها فل وتوجهنا للمطار للعودة للوطن سلمت السيارة في المواقف وتشيكو عليها امورها تمام والوديعة رجعت في اقل من يوم الى بطاقتي المطار كان مزحووم جدا ولكن عجبني فيه انه سلس وماتتعطل من الكاونتر الى البوابة جميع حقائبنا كانت زايدة وزن ووحدة منهم 13 كيلو زيادة والموظفة مع ابتسامة شحنت الشناط الحمدلله بس استغربت ان السوق الحرة قبل الجوازات عكس باقي مطارات اوروبا اللي زرتها مثل وميونخ وامستردام . انطباعي عن المناطق اللي زرناها والشعب اللي تعاملنا معه: فيينا: فاقت التوقعات بحيويتها وتنوع الانشطة اللي فيها من ساحات ومباني ونهر جميل ولاحظت نظافتها واهتمامهم فيها سالزبورغ: مدينة صغيرة هاربة من رواية سحرتنا بجمالها وموقع استراتيجي لزيارة القرى اللي حواليها برونيك: اكثر مكان استمتعنا فيه والجو كان باارد والطبيعة ترد الروح فعلا ريف يستحق الزيارة ميلان: برايي فيها اجمل ساحة في اوروبا وروح المدينة جميل واناقتها ملفتة وموقعها نقطة انطلاق لاماكن كثيرة الشعب النمساوي: وجدته محترم وفي حاله ولكن غير مبتسم وغير ودود مع وجود بعض الافراد اللي كانو في عكس ذلك وما تعرضنا لاي موقف عنصري للامانة الشعب الايطالي: شعب باختصار يحب الحياة وودود جدا ويخليني عادي ارجع لايطاليا عشان بس اتعامل معهم واستمتع باسلوب حياتهم الرايق في هذي الرحلة تعمدنا نركز على الاماكن السياحية ونستمتع فيها اكثر من التسوق فلذلك جميع الايام كانت تمشية وجولات سياحية بالرغم ان المدن اللي زرناها فيها اوتلت كبير ولكن باعتقادي ان التسوق يسرق وقت كبير من البرنامج عندي مشكلة في اضافة الصور اول ماعالجها بضيف في المرفقات بعض المقتطفات بدأ من فيينا ونهاية بميلان وهنا نوصل الى نهاية التقرير ولكم جزيل الشكر على وقتكم ومشاهدة تجرتبي الاوروبية! تحياتي. |
عليكم السلام والرحمة الحمدلله على السلامه بدايه موفقه وخط سير حلو بالنسبه لإختياراتك متابعين معاك واهم شي لاتنسى الصور |
تقرير جميل من بدأيته وترتيب أنيق ، أتوقع سيكون موضوعك مرجعاً للعديد من المسافرين :1: إلى الامام :64: |
لله يسلمك باذن الله |
من ذوقك والله ياغالي |
اقتباس:
|
اقتباس:
الله يسلمك :e304: باذن الله |
الحمدلله على السلامة.. سرد في القصة ولا اروع، وتفاصيل لا تُمل. جدد الله اسفارك |
تخطيط ممتاز للرحلة |
الساعة الآن 09:27 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO