|
من زار المغرب؟ شوروا علينا السلام عليكم شلونكم عساكم طيبين 3 شباب نفكر في زيارة المغرب في اجازة عيد الفطر الموافقة 11/4 لمدة 9 ايام شرايكم في المغرب بشكل عام لمن يزورها لاول مرة وهل من نصايح طبعا اطلعت على تقارير القسم واستمتعت واستفد منكم وايد الغاية من الرحلة استشكاف واول زيارة لبلد في افريقيا وبلد عربي خارج دول الخليج احتكاك بالشعب ورؤية الثقافة و التاريخ المغاربي رايكم في معاملة واطباع الشعب مثلا و البنية التحتية والاماكن السياحية هل هي تستحق عملنا مخطط ومحتاج مشورتكم قسمنا الايام مابين فاس وماحولها وطنجة وماحولها اذا عندكم توصية على اماكن معينة ولا فنادق ولا مطاعم ماتتفوت او اي ملاحظة يريت تفيدونا اليوم الأول الخميس 11/4 نطير من قطر 1:30 فليل ونوصل الدار البيضاء 7:30 ناخذ السيارة ونتجه الى فاس الطريق 4 ساعات بنأجر سيارة وبنسوق بنفسنا (رايكم في السواقة في المغرب هل هي افضل أو السواق او المواصلات العامة او السيارة الشخصية) بنختار السكن في رياض (بيوت شعبية تم ترتيبها لتكون نزل او فنادق صغيرة بطابع مغربي جميل) اخترت فندق رياض الاميني Riad El Amine اليوم الثاني الجمعة 12/4 رحلة ريفية منطقة افران ساعة ونص جبل Michlifen و Habri (مناطق للتزلج لكن ما ادري هل بيبقى شي من الثلج في وقتنا ولالا)، عين فيتال ووسط مدينة افران (طبعا سمعت ان الاماكن في فاس تكون مغلقة يوم الجمعة خاصة بداية اليوم الى العصر لذلك خليت هذا اليوم للأرياف ولا أنا ودي لو نرتاح اول يوم ويكون جدول قريب وخفيف فهل هذي المعلومة صحيحة او الي يقدر يفيدنا فيها) اليوم الثالث السبت 13/4 نتريق في الفندق وجولة مشي في المدينة القديمة نتجه الى سوق باب الرصيف الى جامع و جامعة القرويين الى متحف النجارين الى سوق باب بوجلود الى حديقة جنان السبيل والعشاء في رياض قصر فاس مطعم L'Amandier اليوم الرابع الاحد 14/4 تسجيل خروج من فاس الى مكناس جولة قصيرة ساحة الهديم ثم إلى طنجة (حسيت مكناس مافيها شي مميز وزيارة فاس تغنيك عنها شرايكم؟) 4 ساعات الطريق الى منتجع فرح طنجة (رايكم فيه اذا حد جربه) الدخول للفندق والعشاء فيه والاستراحة اليوم الخامس الاثنين 15/4 الى وسط المدينة في طنجة نرجع سيارة الايجار (متردد في هذا القرار) وناخذ جولة مشي وسط مدينة طنجة. متحف القصبة و Bab Al Bahr ثم الى Grand Soccoسوق شعبي و حديقة المندوبية الى طنجة مارينا باي وكورنش طنجه، الى متحف ڤيلا هاريس اليوم السادس الثلاثاء 16/4 شفشاون قرية تراثية ذات مباني زرقاء جميلة ، واقشور شلال وطبيعة، مدينة تطوان (اذا رجعنا السيارة نروح مع مرشد سياحي واذا مارجعناها نروح بسيارتنا) اليوم السابع الاربعاء 17/4 في طنجة حديقة الرميلات ومغارة هيرقل ومنارة رأس سبارطل ثم العودة للفندق والاستعداد (اذا رجعنا السيارة نروح مع مرشد سياحي واذا مارجعناها نروح بسيارتنا) اليوم الثامن الخميس 18/4 ممكن نزور تطوان اذا ما اسعفنا الوقت نزوها اليوم الي قبله ثم الى محطة القطار (قطار سريع الى العاصمة) والسكن في كازا (ما اخترت مكان هل ترشحون لي فندق؟ الميزانية لين الف ريال قطري لليلة اهم شي 3 اسرة منفصله يفضل لو سويت غرفة وصالة) اليوم التاسع 19/4 ساحة الامم المتحدة ساحة محمد الخامس مسجد الحسن الثاني طيارة العودة الساعة 9:50م ، نتجه للمطار الساعة 6:00م اذا عندكم اماكن اكثر ممكن نزورها او تشوفون ان في مكان مهم في المدن المذكورة ماحطيناه في الجدول ممكن تفيدونا وشكرا لكم اكثر شي يهمني تعليقكم على النقاط باللون الاحمر بشكل خاص وعلى كل شي بشكل عام |
منور أبو صلووووح وان شاء الله أبو أحمد خبير المغرب يفيدك |
وعليكم السلام الافضل انكم تأجرون سيارة وتسوقون أفضل من السايق والالتزام معاه الشوارع في المغرب منظمة وممتازة لكن الله يعينكم على الشرطة :31: الجدول ممتاز لكن وايد فيه تنقلات راح تتعبون ياريت تقللونها عشان تستمتعون أكثر بالمكان الشعب المغربي مثل كل الشعوب فيه الزين وفيه الشين والحمدلله كانوا طيبين وتعاملهم زين معانا بالنسبة للسكن في كازا اختار منطقة عين ذياب هي الافضل واختار السعر اللي يناسبكم |
اقتباس:
|
هلا بوصلوح لك رسالة على الخاص |
الرد اليوم باليل ان شاء الله كامل ووافي |
اقتباس:
حتى اشوف في موقع رينتال كار وديعة السيارة مبلغها وايد كبير تقريبا 8,000 ريال قطري شسويتوا معاهم؟ وهل رجع لكم المبلغ؟ انا حجزت من رينتال كار شركة هيرتز اظن انها عالمية المفروض تعاملها جيد وموثوق بخصوص التنقلات فعلا انا مأيدج انهم وايد لكن هذا راي الشباب شاسوي كان ودي انه اقل فعلا انا مخططي في البداية كان طنجه فقط ثم دخلنا فاس معاها وجاتني نصايح بالحذر من فاس فقسمت فترتي في فاس بعد يومين في افران ويومين في فاس والله يحفظنا يارب ويبعدنا عن اهل السوء شكرا لكم على الاضافة والمشاركة |
اقتباس:
|
وعليكم السلام بما اني راده من المغرب تقريبا من شهر ان شاء الله اقدر افيدكم .. اول مره ازور المغرب وكنت حاطة لها تقيم في بالي وايد عالي لكن اقولها وللاسف ان الناس معطينها اوفر ريت ولا احد يزعل مني هذا رايي ..وان شاء الله غيري يكون رايه افضل مني .. المقصد لاتحط انها افضل من مصر من ناحية التعامل و البخشيش .. الثقافه اللي عندهم والحضاره وتاريخهم جميل و غني .. الشعب ماابي اظلمهم لكن النص التعامل معاهم وايد جاااف وما ياخذون ويعطون وكونوا حذرين .. البنية التحيتيه ممتازة الاماكن السياحيه تقريبا متشابهة خصوصا الاسواق والمدن العتيجه .. احنا كنا في باص مع قروب الحمدلله ما صدفنا شي .. بس السواقع سهله والشوارع سعيه ومرتبه .. فاس دربالكم منها وهذا الكلام اقوله لكم من اهلها مو مني اهما بنفسهم حذرونا فيها وتمشينا مع قايد ضروري داخل المدينه العتيجه ولا تضيعون فيها لانها كلها سكيك ضيجه..وفيها فوق 1000 سكه .. اللي يطلبون منكم فلوس وايد دربالكم على اغراضكم ومن اليهال .. بعض اماكن السكن في فاس palais faraj suites fes riad fes والرياض اللي انت ذاكره بعد ممتاز احنا سكنا في hotel sahrai جدول اليوم الثاني حلو بس الثلج مافي على كلامهم.. واليوم الثالث.. مكناس ما تسوى فاس كافي .. طنجة سكنا في فندق هيلتون ما انصح فيه بس اللي يشفع له موقعه النظافه ما كانت ممتازه و مستهلك.. عندكم فندق لا ميراج le mirage tanger من طنجة زرنا اصيليه حلوه منطقة ساحليه مع المزرات السياحية اللي ذكرتها المغارة وراس سبارطل من المطاعم الحلوه في طنجه nono sea taste والاكل المغربي في مطعم فندق قصر الزاهيه.. كافيه salon bleu له اطلاله على طنجه .. شفشاون حلوه وبتحسونها غيير عن فاس وايد تختلف وبتشوفون اليهال يقولون لكم نمشيكم في شفشاون ونصير مرشدين لكم ونصوركم عادي تقدرون تعاملون معاهم وبالاخير تكرمونهم 50 درهم الى 100 لا تزيدون في ال 100 وافضل 50 لانهم يطمعون بس للامانه تصويرهم احترافي :) تطوان مافيها شي المدينه عادية .. كازا سكنت في ماريوت حلو ومرتب ونظيف وسعره ممتاز وسكنت في الفورسيزن ممتاز من كل النواحي بس السعر غالي .. في كازا سوق الحبوس سوق تقليدي وكل شي مغربي ومشغولات يدويه فيه حلوه .. التكاسي حاولوا تتعاملون معاهم بالعداد اللي يرفض لا تركبون معاه واذا اضطريتوا اتفقوا على سعر بسيط لان عادي لما يوصلكم يقول ابي زيادة.. من المطاعم في كازا umayya corniche - مغربي la sqala - dar dada - في اغاني و دي جي ricks cafe - beach mama - كفيتوا ووفيتوا وغطيتوا اغلب الاماكن ان شاء الله قدرت افيدكم لو بشي بسيط .. واتمنى لكم رحلة سعيدة |
اقتباس:
بخصوص المشي في المدينة القديمة في فاس شلون نحصل مرشد سياحي ليوم واحد تتوقعين الفندق ممكن يوفر لنا هالشي امم تعليقج محبط شوي هههه لكن احسن زين ان تصارحينا بهالاشياء بدال مانروح وننصدم شكرا لج ماقصرتي .. |
| الساعة الآن 03:08 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO