|
اتمنى مساعدتي في السفر السلام عليكم اخواني قررت السفر بالعائلة ( واحترت بين مصر او اندونيسيا ) علما انه اول مره اسافر خارج السعودية عدد الاسرة ٥ الميزانية بالتذاكر والاجار والمصاريف ٣٠ الف الفترة (٢٥) يوم وانا افكر باندنوسيا لكن اخاف من اللغة هل اجد من يتكلم عربي فاتمتى اعطائي الافضل بين الدولتين واتمنى اعطائي اماكن الزيارات في اندنوسيا فهدفي استمتاع الابناء وكذلك التسوق للمدام ولكم خالص الشكر |
عليكم السلام ما فيه مقارنه بين مصر و اندونيسيا كل شي مختلف وما فيه اي قاسم مشترك بينهم انا ارشح لك اندونيسيا بلد جميل ما راح تندم على زيارته بس فلوسك ما تكفي لكل هذه المدة لازم تزيد المبلغ او تنقص المدة و الشي المهم اللي لازم تعرفه ان البلد ما هو رخيص |
وفقك الله يالغالي اشكر لك ردك الجميل واتمنى من بقية الاخوة التفاعل واعطائي ما يرونه مناسب |
من استشارك دخل بذمتك .. مصر لاتصلح ابد لاي شخص وخصوصا وانت معك عائلتك (اكلمك من واقع تجربه جيت مصر مرتين وجيت اندونيسيا ) مصر بلد سيء جدا من تالي ونصب ويزعجونك بكل زاوية اضافه الى ان اماكن التحرك في القاهره مثلا ماهي هكالزود .. والاكل دمار الدمار حتى اسال رواد مصر ياخذون معهم (حبوب النزلات المعويه ) ههههههههههههه اضافه الى عدم الارتياح هناك مضايقات حقيقيه في مصر لابتزاز اموالك وماتدري من تثق به ثم ان جو مصر في الاشهر القادمه حر فوح اندونيسيا خيار جميل للعائله : الطبيعه مختلفه كليا وامطار وخضره وشعب طيب ودود ( لااااا تشيل هم اللغه فهم يتكلمون لغه عربيه احسن منك ) جاكرتا فيها مولات واسواق شعبيه وملاهي مائيه وغيرها ثم (قبله الخليجيين ) بونشاك تاخذ لك فيلا انت وعيالك وتنبسطوا فيها والجو خيال وبراد وتجربه جديده (وبلا دوشه المصاريه وواخز بال سعادتك ) وهناك باندونق وغيرها وكلها لامشكله مع العربي والان طلعت التطبيقات زي اوبر وكريم تستخدمها برخص التراب بتنقلاتك وارخص وامن من التكاسي لكن فيه مشكله صغيره المبلغ لاتقول 30 الف قل 20 لان التذاكر احتمال تاخذ منكم 10-12 الف .. يعني الباقي معك 18 الف وهي ميزانيه عاديه لـ 25 يوم لكن يبغالها ضبط شوي .. وزع رحلتك 4 ايام جاكرتا اول شي 10 ايام الجبل غير جو هناك 5 ايام باندونق ثم ارجع جاكرتا هذا والله اعلم نصيحه مره اخرى لاتروح مصر والله ماتسوى سمعتها وباعطيك من الاخر (اكثر اللي يمدحون مصر ) مايمدحونها لمعالمها السياحيه ابدا !! |
وعليكم السلام راي مثل الاخوان اعتقد اندونسيا هي الانسب اللغة سوف تجد الكثير يتحدث العربية ولكن هناك اشكالية في المزانية بمكانك زيادتها او تنقص عدد الايام وهناك اماكن كثيرة تزورها مثل جزيرة بالي وشواطها والمطاعم وكذالك باندونق اهم شي ابعد عن جاكرتا وبما انك عائلة الافضل استجار شقة حيث ان التنقل من فندق الى فندق متعب للعوائل وميزة الجبل الاخضر انه يقع في وسط كل المدن السياحية جاكرتا و باندونج وبوجور بحيث بامكانكم زياره هذه المدن صباحا والعوده مساءا ميزة الفلل انها كبيرة ورخيصة وراح توفروا كثير عن اسعار الفنادق بالتوفيق |
اخواني ابو سارة ابو لجين وفقكم الله كفيتم ووفيتم وبيض الله وجوهكم اتوقع التذاكر ١٥ يبقى ١٥ السكن ممكن ٧ لاف ( صح ) باقي ٨ وش رايكم ازيدها ١٠ يعني ١٨ الف للسياحة يصير المجموع ٤٠ ولا استغني عن خبراتكم لكم ودي واحترامي |
خذ نصيحتي اذا انت متأكد من تواريخ سفرك روح على المكاتب السياحية واحجز طيران غير مسترد من عندهم بحيث توفر مبلغ كبير لان الخطوط السعودية حصلت لها تذاكر مباشره بحدود 2500 وفي الموقع ماتقل عن 3500 والجارودا ايضا ب 2400 والموقع 4000 |
تروح وترجع بالسلامه ومثل ماذكر الاخوان لايوجد مقارنة بين مصر واندونيسيا في جميع النواحي والمبلغ المذكور مايكفي 25 يوم 1- لابدتذكر تاريخ الرحله عشان نعرف هل هو موسم او لا فاسعار السكن تفرق بين الموسم وغيره 2-لابد ان تعرف سعر التذاكر عشان تعرف كم يبقى من المبلغ 3- لابد ذكر عدد افراد الاسره عشان يكون معروف مقدار الصرف اليومي وان شاء الله الجميع مايقصر معاك |
بخصوص الطيران عندك العماني انا حاجز عليها شيك موقعهم وحط الخيارات مع الشركات الاخرى باالنسبة للغة لااعتقد فيه مشكلة حتى لو لغة خفيفة انجليزي تمشي لابد يكون معك سائق ان رغبت الخروج من جاكرتا ويوميتة من 150 ريال الى 180 ريال العملة طايحة عندهم الان والسائق يكون مرشد ومترجم . اندونيسيا بلد جميل وطبيعة وتعامل الشعب رائع جدا وخدوم الاهم انك لاتدخل معهم في مشادات وخلافات على امور تافهه . |
وأنا ان شاء الله مسافر العيد لوحدي مدري كم بتكلفني |
| الساعة الآن 01:34 PM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO