|
افيدوني عن جزيره بالي السلام عليكم واسعد الله جميع اوقاتكم بكل خير قررت اني اسافر لإندونيسيا شباب مع العلم اني زرتها مرات عديده ولكن جزيره بالي هالسفره حاب ازورها هل تنصحوني ؟؟ وين افضل منطقه في بالي ؟؟ وأفضل منتجع من تجربه وكم يوم حقها بالي ٤ ايام مناسبه او ٣ تكفي وتحياتي لكم 🙏 |
اقتباس:
وعليكم السلام ورحمة الله وبركاته ... وأسعد الله وقتك الله يحييك ما شاء الله زرت اندونيسيا مرات عديدة وأول مرة تزور بالي ؟! ايه انصحك وبقوة تزورها طابعها غربي تحس نفسك في استراليا من كثر الاستراليين هناك ... صحيح معلوماتي قديمة من أغسطس 2018 تقريبا لكن ان شاء الله تكون مفيدة و حيث أنها أول زيارة لي لاندونيسيا كانت رحلة لمدة 10 ايام ما بين جاكرتا و بونشاك وبالي والحقيقة اجملهم بالنسبة لي كانت بالي وجلست فيها 4 ليالي وقليل عليها من كبرها احس اني ما سويت شيء هههههه . أفضل منطقة شاطئية هي منطقة كوتا القلب النابض للجزيرة وبما انكم شباب راح تعجبكم فيها كل شيء فنادق محلات مطاعم مقاهي شاطئ مول ملاهي مائية صخب الخ ... لكن بوجهة نظري حسيت المنطقة مستهلكة شوي يبي لها تطوير من الحكومة . فيه مناطق شاطئية اخرى احدث من كوتا ولكن وقتها حسب ما كنا نقرا انها اقل صخب وهادئة تناسب العائلات او شهر عسل اكثر من الشباب ... المناطق هي منطقة سيمنياك ومنطقة نوسا دوا ... اقرا عنهم اكثر ممكن تعجبكم . جزيرة بالي كبيرة جدا يوجد بها ايضا منطقة مرتفعة وسط غابات اسمها ابود اذا بتطول تستحق الزيارة او السكن فيها كم يوم . افضل منتجع في كوتا او خلنا نقول فندق اتوقع الهارد روك ووقتها ما اخذناه لانه اتذكر كان سعره غالي ولكن اشوف انه مناسب للشباب كموقع ومرافق الفندق المسبح وغيره . https://www.booking.com/hotel/id/har....html#tab-main انا بصراحة سكنت في فندق بجانبه اسمه ذا كوتا بيتش هيريتيج خمسة نجوم https://www.booking.com/hotel/id/the...tml?aid=304142 الفندق جيد كموقع و غرفه نظيفة وفخمة لكن شكله الخارجي تحسه 3 نجوم ههههه لانه قديم شوي وكان فيه ميزة تحت الفندق بالضبط بقالة صغيرة فاتحة 24 ساعة ... السلبية في الفندق ولكن اتوقع السلبية هذه موجودة في كل بالي وهي رائحة كريهة كانت في اللوبي وفي الممرات بسبب طقوس الهندوس في العبادة يشعلون عود في عشبة ويحطون معها اكل وتلاقيهم يحطونها في كل مكان ... الحمد لله على نعمة الاسلام و الله يهديهم ( بالي معظم سكانها من الاندنوسيين الهندوس ) . 4 ايام او 5 ايام مناسبة لاستكشاف منطقة كوتا وما حولها وبعض المناطق الاخرى في بالي ... لكن للاستمتاع اكثر واستكشاف كامل الجزيرة تحتاج يا تطول المدة او تزورها اكثر من مرة مستقبلا . انا اتذكر في الاربعة ليالي الي قضيتها هناك وكانت من اجمل الليالي التمتع في النهار في الشاطئ وفي الليل التمشية سيرا على الاقدام في المنطقة والمقاهي والمطاعم ... زرت مول الديسكفري ... ملاهي ال waterbom ... حجزنا رحلة اكتيفيتي اونلاين بحرية جيتس كي ... بانانا .. flyfishing ... Parasailing عن طريق شركة بسبب سعرهم مغري افضل من الكوشكات سائق خاص جانا من الصبح اخذنا من الفندق وطلعنا ورجعنا للفندق مشمول مع السعر . المطاعم في بالي طابعها غربي بسبب كثرة السياح الاجانب الغربيين استراليين وغيرهم ... يعني فاست فود برجر وستيكات بيتزا الخ ... فقط تاكد انه حلال او kosher ذبائح اهل الكتاب وسمي بالله وكل . اتذكر فيه مطعم عربي وكافيه في نفس الوقت بس بعيد شوي تحتاج جراب اسمه شيشة كافيه اكلت فيه كويس بس غالي شوي حطه في القائمة عندك اذا حاب تروحه . انتبه هناك في منطقة كوتا تروح مشاوير بالسيارة انتبه خصوصا في الليل وقت الزحمة .. والله لا تتورط في الزحمة اقل شيء ساعتين وانت ما تحركت غير امتار ... الشوارع ضيقة وبعضها مسار واحد ... خلي خيارك الاوحد دباب سواء تطلبه بتطبيق جراب او تستاجر انت لو تعرف تسوق مع اني انصح بتطبيق جراب اوفر لك واريح . المعذرة على الاطالة وأي سؤال حاضرين |
تسلم على هالتفصيل والطرح الجميل 🙏 ماقصرت تحياتي لك |
الله يسلمك .. ابد في الخدمة حيّاك الله وبيّاك وتروح وترجع بالسلامة ان شاء الله . |
ما قصر nsd اذا كنتوا شباب كوتا فقط اما بقية المناطق ممكن تزورونا زيارة بدون سكن والافضل السكن في هارد روك او حواليه الشواطي متشابهة والأكثر حركة شاطى كوتا |
شكرا لك يا مشرفنا العزيز آخـــرفـــرصـــة ومنكم نستفيد ايضا وهذا أقل ما نقدمه لاستفسارات الاعضاء . معلومة نسيت اذكرها ومهمة لصاحب الموضوع ... اذا كنت بتعتمد على الكاش في سفرك لشرق اسيا مثلي ( اذا تاكد سفري انا ادفع بالفيزا مسبقة الدفع البنك السعودي للاستثمار حجوزات الطيران الدولي والداخلي والفنادق من هنا بدون الغاء مجاني عشان يكون السعر ارخص ومناسب واخفف من حمل الكاش ) فمحلات الصرافة في جزيرة بالي يظلمون سعر صرف الريال السعودي عكس جاكرتا وباقي اندونيسيا ومع انها دولة اسلامية وفترة حج الريال مطلوب والمفروض يكون العكس لكن في بالي الدولار هناك مرغوب اكثر فحاول تبحث عن افضل سعر صرف للريال السعودي واماكن موثوقة ... انا كنت اصرف من مصرف BMC سعره كويس للريال واذا جبت له بعض الفئات الي يحتاجها بسبب نقصها عنده مثل الخمسات والعشرات مثلا يعطيك سعر افضل ههههههه ... المهم خذ معك ريال سعودي عادي لانه اذا قلت لك خذ دولار ممكن تخسر بسعر صرفه هنا وايضا هناك ما يكون فارق كبير بينه وبين صرف الريال اذا صرفت من مصرف ما يظلم الريال . وتوضيح نقطة اخرى بخصوص طلب سيارة جراب او دباب في بالي ... صحيح حذرتك من الزحمة وطلب السيارة لكن لا ارفضها رفض تام احيانا قد تحتاجها لمشوار للمطار مثلا سواء وقت الوصول او عند المغادرة .. او اذا طلعتم برحلة اكتيفيتي بحرية عن طريق شركة اكيد بيجيك سائق سيارة خاصة صباحا .. يعني حاول تقنن من السيارة وخليها للضروريات وخارج اوقات الذروة والزحمة لانه الدباب بيختصر عليك وقت كبييير جدا ... المشاوير القريبة داخل كوتا خذوها دباب جراب او مشي اذا قريب لكن في الليل والسهر خلي مشوارك بالدباب اامن واضمن . |
اشكرك كل الشكر nsd وشكرا يامشرفنا اخر فرصه لاعدمناكم وبالنسبه لصرف العمله انا اصرف من السعوديه قبل اطلع والباقي كاش في حال احتجت في المدينه جنب الحرم الصرف جدا ممتاز وافضل من اندونيسيا ومكه قبل كم يوم وصل الالف ب٤مليون و٦٥ الف واذا عندكم اي معلومه او اي مكان تنصحوني بزيارته لاتبخلون علي تحياتي بكم 🙏 |
العفو و الله يحفظك ويسلمك رحلة سعيدة ان شاء الله . ايه صحيح كلامك اسمع عن محلات الصرافة الي قريبة من الحرمين الشريفين ممتازة وحتى بعد عندنا في جدة البلد يوجد محلات صرافة وافضل في فترات المواسم تصرف من هنا يكون الصرف ممتاز لكن اغلبنا ما يصرف مبلغ كبير يا دوب الي يكفي يوم او يومين الوصول وبعدين يكمل صرف من هناك شوف انت احسبها براحتك . بالنسبة للاماكن انا ذكرت لك الاماكن الي رحتها او زرتها لاني لاني ما طولت في بالي 4 ليالي فقط وعموما في كوتا استكشاف المنطقة بالتمشية على الاقدام في النهار او بداية المساء فيه متعة ..... يفيدونك الاعضاء اكثر باماكن اخرى وابحث انت ايضا حسب رغباتك . |
| الساعة الآن 02:50 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO