شبكة و منتديات العرب المسافرون

وعليكم السلام ورحمة الله ،

ما شاء الله مبروك ألف مبروك الله يتمم لك على خير ،

راجع ردودي المقتبسة في الاسفل لمواضيع واستفسارات الاعضاء سابقا ممكن تفيدك ،

اتمنى لكم سفرة ورحلة شهر عسل سعيدة ،

اقتباس:

المشاركة الأصلية كتبت بواسطة nsd (المشاركة 596513)

سافرت سفرة شباب لأندونيسيا في اغسطس 2018 لمدة 10 ايام ، 4 ايام منها كانت في جزيرة بالي وليت طولنا فيها اكثر مدينة صخب ما تنام 24 ساعة العالم صاحية .

افضل وأامن الفنادق والمنتجعات

حسب المنطقة الي سكنت فيها في كوتا على البحر ( ما انصح بالمنطقة للعوائل المحافظة ) كان افضل فندق بوجهة نظري الهارد روك ، ما سكنت فيه لانه وقتها كان سعره مرتفع و سكنت في فندق بجانبه اسمه ذا كوتا بيتش هيريتيج - مانيجيد باي أكور خمسة نجوم ممتاز من الداخل لكن شكله قديم من الخارج وميزته تحته بقالة صغيرة 24 ساعة ما تقفل .

اتوقع في شواطئ هادية في سيمنياك وغيرها تنفع للعوائل المحافظة .

جدول منسق للجولات اليوميه

في جزيرة بالي لو تنزلي تمشي برجلك في منطقة حيوية مثل كوتا كل يوم ما تطفشي هههههه ما بالك اذا فيها جدول ، يمكن البحث في المنتدى عن الجداول اليومية في بالي ومبدئيا الفعاليات والالعاب المائية ممكن تحجزونها من الاكشاك والمكاتب السياحية هناك او من الفنادق .

افضل مكاتب تاجير السيارات

في منطقة كوتا بسبب ضيق الشوارع مشوار 2 كيلو مثلا ممكن ياخذ ساعتين من الزحمة خصوصا وقت الذروة فاستبدلنا فكرة السيارة وقتها بطلب دباب من تطبيق جراب لكن حنا شباب ، انتم ممكن تستأجروا سائق بسيارة باليوم او تطلبون Grap على كل مشوار .

صرف العمله الافضل اين؟

في جزيرة بالي الريال السعودي مظلوم وغير مطلوب مثل المدن الاسلامية الاخرى جاكرتا وبونشاك وغيرها ! الدولار العملة الصعبة والمطلوبة في كل دول العالم مطلوب ايضا هناك في بالي بسبب كثرة السياح الاجانب من استراليا ودول العالم الاخرى .

افضل سعر صرف للريال السعودي في جزيرة بالي تجدونه في مصرف BMC وهو منتشر في جزيرة بالي يمكن السؤال عنه هناك .

وانصح ايضا باستخدام فيزا سفر مسبقة الدفع من البنك السعودي للاستثمار واضافة العملة الاندونيسية او الدولار واستخدمها في الفنادق والمحلات الرسمية وذلك للتخفيف من حمل الكاش .

افضل خطوط طيران

اتوقع الخطوط السعودية او الخطوط الاندونيسية الافضل في الرحلات المباشرة ، واذا لم تتوفر رحلة مباشرة الى بالي يمكن الذهاب الى جاكرتا ومن ثم شراء تذكرة طيران داخلي الى بالي ، لا تحجزوا ذهاب الى بالي في نفس يوم الوصول الى جاكرتا تحسبا لأي تأخير يحصل في رحلتكم الدولية من السعودية او على الاقل اجعلوا فرق 6 ساعات على الاقل عن الرحلة الدولية .

اقتباس:

المشاركة الأصلية كتبت بواسطة nsd (المشاركة 574414)

وعليكم السلام ورحمة الله وبركاته ... وأسعد الله وقتك الله يحييك

ما شاء الله زرت اندونيسيا مرات عديدة وأول مرة تزور بالي ؟!

ايه انصحك وبقوة تزورها طابعها غربي تحس نفسك في استراليا من كثر الاستراليين هناك ... صحيح معلوماتي قديمة من أغسطس 2018 تقريبا لكن ان شاء الله تكون مفيدة و حيث أنها أول زيارة لي لاندونيسيا كانت رحلة لمدة 10 ايام ما بين جاكرتا و بونشاك وبالي والحقيقة اجملهم بالنسبة لي كانت بالي وجلست فيها 4 ليالي وقليل عليها من كبرها احس اني ما سويت شيء هههههه .

أفضل منطقة شاطئية هي منطقة كوتا القلب النابض للجزيرة وبما انكم شباب راح تعجبكم فيها كل شيء فنادق محلات مطاعم مقاهي شاطئ مول ملاهي مائية صخب الخ ... لكن بوجهة نظري حسيت المنطقة مستهلكة شوي يبي لها تطوير من الحكومة .

فيه مناطق شاطئية اخرى احدث من كوتا ولكن وقتها حسب ما كنا نقرا انها اقل صخب وهادئة تناسب العائلات او شهر عسل اكثر من الشباب ... المناطق هي منطقة سيمنياك ومنطقة نوسا دوا ... اقرا عنهم اكثر ممكن تعجبكم .

جزيرة بالي كبيرة جدا يوجد بها ايضا منطقة مرتفعة وسط غابات اسمها ابود اذا بتطول تستحق الزيارة او السكن فيها كم يوم .

افضل منتجع في كوتا او خلنا نقول فندق اتوقع الهارد روك ووقتها ما اخذناه لانه اتذكر كان سعره غالي ولكن اشوف انه مناسب للشباب كموقع ومرافق الفندق المسبح وغيره .

https://www.booking.com/hotel/id/har....html#tab-main

انا بصراحة سكنت في فندق بجانبه اسمه ذا كوتا بيتش هيريتيج خمسة نجوم

https://www.booking.com/hotel/id/the...tml?aid=304142

الفندق جيد كموقع و غرفه نظيفة وفخمة لكن شكله الخارجي تحسه 3 نجوم ههههه لانه قديم شوي وكان فيه ميزة تحت الفندق بالضبط بقالة صغيرة فاتحة 24 ساعة ... السلبية في الفندق ولكن اتوقع السلبية هذه موجودة في كل بالي وهي رائحة كريهة كانت في اللوبي وفي الممرات بسبب طقوس الهندوس في العبادة يشعلون عود في عشبة ويحطون معها اكل وتلاقيهم يحطونها في كل مكان ... الحمد لله على نعمة الاسلام و الله يهديهم ( بالي معظم سكانها من الاندنوسيين الهندوس ) .

4 ايام او 5 ايام مناسبة لاستكشاف منطقة كوتا وما حولها وبعض المناطق الاخرى في بالي ... لكن للاستمتاع اكثر واستكشاف كامل الجزيرة تحتاج يا تطول المدة او تزورها اكثر من مرة مستقبلا .

انا اتذكر في الاربعة ليالي الي قضيتها هناك وكانت من اجمل الليالي التمتع في النهار في الشاطئ وفي الليل التمشية سيرا على الاقدام في المنطقة والمقاهي والمطاعم ... زرت مول الديسكفري ... ملاهي ال waterbom ... حجزنا رحلة اكتيفيتي اونلاين بحرية جيتس كي ... بانانا .. flyfishing ... Parasailing عن طريق شركة بسبب سعرهم مغري افضل من الكوشكات سائق خاص جانا من الصبح اخذنا من الفندق وطلعنا ورجعنا للفندق مشمول مع السعر .

المطاعم في بالي طابعها غربي بسبب كثرة السياح الاجانب الغربيين استراليين وغيرهم ... يعني فاست فود برجر وستيكات بيتزا الخ ... فقط تاكد انه حلال او kosher ذبائح اهل الكتاب وسمي بالله وكل .

اتذكر فيه مطعم عربي وكافيه في نفس الوقت بس بعيد شوي تحتاج جراب اسمه شيشة كافيه اكلت فيه كويس بس غالي شوي حطه في القائمة عندك اذا حاب تروحه .

انتبه هناك في منطقة كوتا تروح مشاوير بالسيارة انتبه خصوصا في الليل وقت الزحمة .. والله لا تتورط في الزحمة اقل شيء ساعتين وانت ما تحركت غير امتار ... الشوارع ضيقة وبعضها مسار واحد ... خلي خيارك الاوحد دباب سواء تطلبه بتطبيق جراب او تستاجر انت لو تعرف تسوق مع اني انصح بتطبيق جراب اوفر لك واريح .

المعذرة على الاطالة وأي سؤال حاضرين

اقتباس:

المشاركة الأصلية كتبت بواسطة nsd (المشاركة 574515)

شكرا لك يا مشرفنا العزيز آخـــرفـــرصـــة ومنكم نستفيد ايضا وهذا أقل ما نقدمه لاستفسارات الاعضاء .

معلومة نسيت اذكرها ومهمة لصاحب الموضوع ... اذا كنت بتعتمد على الكاش في سفرك لشرق اسيا مثلي ( اذا تاكد سفري انا ادفع بالفيزا مسبقة الدفع البنك السعودي للاستثمار حجوزات الطيران الدولي والداخلي والفنادق من هنا بدون الغاء مجاني عشان يكون السعر ارخص ومناسب واخفف من حمل الكاش ) فمحلات الصرافة في جزيرة بالي يظلمون سعر صرف الريال السعودي عكس جاكرتا وباقي اندونيسيا ومع انها دولة اسلامية وفترة حج الريال مطلوب والمفروض يكون العكس لكن في بالي الدولار هناك مرغوب اكثر فحاول تبحث عن افضل سعر صرف للريال السعودي واماكن موثوقة ... انا كنت اصرف من مصرف BMC سعره كويس للريال واذا جبت له بعض الفئات الي يحتاجها بسبب نقصها عنده مثل الخمسات والعشرات مثلا يعطيك سعر افضل ههههههه ... المهم خذ معك ريال سعودي عادي لانه اذا قلت لك خذ دولار ممكن تخسر بسعر صرفه هنا وايضا هناك ما يكون فارق كبير بينه وبين صرف الريال اذا صرفت من مصرف ما يظلم الريال .

وتوضيح نقطة اخرى بخصوص طلب سيارة جراب او دباب في بالي ... صحيح حذرتك من الزحمة وطلب السيارة لكن لا ارفضها رفض تام احيانا قد تحتاجها لمشوار للمطار مثلا سواء وقت الوصول او عند المغادرة .. او اذا طلعتم برحلة اكتيفيتي بحرية عن طريق شركة اكيد بيجيك سائق سيارة خاصة صباحا .. يعني حاول تقنن من السيارة وخليها للضروريات وخارج اوقات الذروة والزحمة لانه الدباب بيختصر عليك وقت كبييير جدا ... المشاوير القريبة داخل كوتا خذوها دباب جراب او مشي اذا قريب لكن في الليل والسهر خلي مشوارك بالدباب اامن واضمن .