|
هل توزيع وترتيب الأيام مناسب ؟؟ و شركات السيارات السلام عليكم جميعاً رحلتنا ان شاءالله مدتها ( 23 ) يوم ترتيب الرحله حسب رأينا : * من 24 يوليو الى 29 يوليو ( انهايم ) ( 5 ليالي ) طبعاً اول يوم ضايع بحكم الوصول متأخر ، وصعبه الخروج والتمشي فيه .. هل تكفي انهايم 4 او 5 ايام او أزيد عليها يوم ؟ * من 29 يوليو الى 5 اوغسطس ( سان دييقو ) (7 ليالي ) هل تستحق سان ديقو أسبوع كامل ؟؟ انا حابه اطول فيها لان جوها جمييل .. * من 5 الى 9 اغسطس ( لاس فيقاس ) (4 أيام ) هل تكفي 4 ايام او أزيد يوم ؟؟ * من 9 الى 16 اوغسطس ( لوس انجلوس ) (7 ) ايام يكفيها 7 ايام او اكثر ؟ 16 اوغسطس العوده الى الوطن بعد الظهر بإذن الله .. هل الترتيب ومدة الاقامه في كل مدينه مناسب او تقترحون علي تبديل شي .. مانستغني عن خبرتكم وتجاربكم احبابي .. ملاحظة : اتمنى زيارة سان فرانسسكو كم يوم .. بس للأسف زوجي رفض بحكم بعدها ( يقول 6 ساعات بعيده :24:: |
اي شركات حجز السياره افضل ؟ مرحبا ايهم افضل لحجز سياره : من شركة رينتال كار ؟ او الشركة الاصل ؟ وهل الاسعار بتكون نفسها او تختلف ؟ واذا كان الافضل الشركة الاصل ,, اي الشركات ارخص وتعامل احسن ؟ ولكم خالص شكري وتقديري |
مرحباً بك أخت ليالي الأفضل الحجز عن طريق شركات الأصل مباشرة لأنها مو زي أوروبا الأسعار متفاوته أمريكا واضحه حجوزاتهم يفرق في التأمين وأنصحك بشركة national car بس لازم تنتبهي لشغله أول ما تدخلي الموقع فوق على اليسار United States / English اضغطي عليها وغيري الدولة من United State إلى مقر إقامتك لأن المقيمين برا امريكا التأمين يكون مجاني لهم مضاف للسعر بعكس لما تكون مقيم في امريكا أو امريكي تدفع للتأمين وهذا يوفر عليك تقريباً 30% وأي استفسار أحنا حاضرين |
|
الاخت ليالي افضل شركات السيارات alamo , enterprise ممكن تدخلين موقع اكسبيديا للمقارنة --------------------------------------------------------- ملحوظة ياريت تخلين استفساراتك بموضوع واحد شاكرة لتعاونك:3: |
سان دييغو لا تحتاج 7 ليالي 4 ليالي كافية و خلي 3 ليالي سان فرانسيسكو يمكنكم اخذ طيارة المسافة قريبه جدا و الاسعار معقولة |
وعليكم السلام ورحمة الله وبركاته تقسيم الايام حلو لكن لاس فيغاس اشوف ٤ ايام تكفيها وزياده فما انصح تزودون عليها ويقول المثل: قال رحت كاليفورنيا؟ قال ايه.. قال مريت سان فرانسيسكو؟ قال لا... قال اجل مارحت كاليفورنيا :14: |
انا دمجت لك الموضوعين و اي استفسار جديد ضيفيه هنا :13: |
وعليكم السلام ورحمة الله وبركاتة تخطيطك جميل والمده جميله أنهايم ولوس أنجلس أجماليهم 13 يوم كثير شويه لأن أنهايم تعتبر من لوس انجلس او بالاصح جنوب لوس انجلس تبعد تقريبا 30 دقيقه بالكثير يعني لو المدتين تكون إجماليها 10 ايام أشوفها جداً كويسه وبالنسبه لساندييغو 7 ليالي = 8 ايام كثير 5 ايام جداً كافيه في في هذا الحاله يصير عندك 5 ايام زياده خلوها لسان فرانسيسكو صراحه سان فرانسيسكو حلوه وتستحق الزياره وخصوصاً خط العودة من سان فرانسيسكو - لوس أنجلس جداً جداً جميل. خذوها ساعة صدر الطريق highway 1 مصنف من افضل 10 طرق في العالم من ناحية المناظر لعدة سنوات وتقدرون تخلون يوم في نص الطريق تريحون فيه والرأي لكم |
عليكم السلام .. اسمحي لي اختي اني اجاوب على اللي اقدر عليه من استفساراتك: السلام عليكم جميعاً رحلتنا ان شاءالله مدتها ( 23 ) يوم ترتيب الرحله حسب رأينا : * من 24 يوليو الى 29 يوليو ( انهايم ) ( 5 ليالي ) طبعاً اول يوم ضايع بحكم الوصول متأخر ، وصعبه الخروج والتمشي فيه .. هل تكفي انهايم 4 او 5 ايام او أزيد عليها يوم ؟ بالنسبه لأناهيم فهي مدينه حلو وهاديه .. ممكن يتم دمج مدة اناهيم مع لوس انجلوس اللي ذكرتيها تحت لان أناهيم في جنوب لوس انجلوس والمسافه بالسياره تقريبا45 دقيقه حسب الطريق * من 29 يوليو الى 5 اوغسطس ( سان دييقو ) (7 ليالي ) هل تستحق سان ديقو أسبوع كامل ؟؟ انا حابه اطول فيها لان جوها جمييل .. كثير 7 ليالي في سان دييقو انا اشوف 4 ليالي كفايه عليها وباقي المده ممكن تنضاف للوس انجلوس وهي اللي فيها المتعه الاكبر من وجهة نظري * من 5 الى 9 اغسطس ( لاس فيقاس ) (4 أيام ) هل تكفي 4 ايام او أزيد يوم ؟؟ 4 ليالي في لاس فيغاس جداً مناسبه بشرط انكم من قبل ماتوصلون لها تحطون لكم جدول يكون في كل يوم حضو Show * من 9 الى 16 اوغسطس ( لوس انجلوس ) (7 ) ايام يكفيها 7 ايام او اكثر ؟ بالنسبه لي انا اجلس في لوس انجلوس شهر ولا امل فإذا خذيتي بإقتراحي وقللتي المده في ساندييغو وضفتيها للوس انجلوس بيكون احسن لان عندكم ديزني ويونيفيرسال ستوديو وسيكس فلاغ غير المولات والشوارع والمتاحف وشاطئ سانتا مونيكا واشياء كثيره 16 اوغسطس العوده الى الوطن بعد الظهر بإذن الله .. بالسلامه ان شاءالله هل الترتيب ومدة الاقامه في كل مدينه مناسب او تقترحون علي تبديل شي .. مانستغني عن خبرتكم وتجاربكم احبابي .. ملاحظة : اتمنى زيارة سان فرانسسكو كم يوم .. بس للأسف زوجي رفض بحكم بعدها ( يقول 6 ساعات بعيده :24:: والله انا نفسك زرت الغرب الامريكي 4 مرات ولا مره فيها رحت سان فرانسيسكو لاني اتكيسل المسافه ، ممكن بالطياره تروحون لها 3 ليالي وتنبسطون ، انا ناوي ازورها ان شاءالله الصيف الجاي لاني راح اجلس اكثر من شهر في الغرب الأمريكي |
مرحبا ايهم افضل لحجز سياره : من شركة رينتال كار ؟ او الشركة الاصل ؟ انا عن نفسي افتح موقع الشركه الاصليه ورينتال كار، بس بالعاده احجز من رينتال كار والحمدلله ماواجهت اي مشكله وهل الاسعار بتكون نفسها او تختلف ؟ ممكن يكون في فرق في السعر والافضل تشوفين السياره في الموقعين وتحكمين بناء على السعر واذا كان الافضل الشركة الاصل ,, اي الشركات ارخص وتعامل احسن ؟ انا عن نفسي ما اتعامل غير معا Dollar اشوف اسعارهم حلوه وخدمتهم ممتازه ولكم خالص شكري وتقديري |
ألف شكر للجميع وماقصرتوا .. إقتراحتكم على العين والراس ولـــكـــن : دائماً ينصحون هنا افضل تقسيم المدة بين الشمال والجنوب للسكن في لوس انجلوس .. علشان كذا أخذت رأيي الاغلبيه .. ولو علي انا وزوجي تقلييل التنقل بين السكن لوجود الاطفال ( الله يحفظهم ) وشيل الشنط .. غير هذا ، دخلت موقع بوكينق وشفت اسعار السكن بــ انهايم ارخص من الشمال مثل هوليود وغيره من مناطق الجذب بالشمال .. بالنسبه لــ سان دييقو .. اشوف الكل يمدحها ويمدح جوها .. قلت يمكن تكون روقاان بالنسبه لنا وخاصةً اننا نميل الى الجو الاوروبي .. بالنسبه لــ سان فرانسسكو : كيف اقنع زوجي فيها ؟؟ هل فيه وسائل نقل مثل القطار او الباصات لها من لوس انجلوس ؟ وبكم تقريباً اسعار تذاكر الطيران من لوس انجلوس الىها وإيش اسم الخطوط الافضل ؟ وهل السكن فيها غالي ؟ ممكن ترشحون لنا سكن فيها موقعه جمييل وسعره مناسب ( شقق او سويتات ) ( سمعت ان يونيون سكوير او ساحة الاتحاد حلووه للسكن ) وايش هي الاماكن الجميله فيها ؟ |
اما بالنسبه ل تأجير السياره : هل التأمين ضروري نظيفه ؟؟ ( اشوف في موقع رينتال كار مكتوب التأمين ضد الحوادث والسرقه مضاف مجاني للسعر ) هل هذا يكفي ؟؟ وإيش هي الاشياء الضرورية اللي اضيفها عند حجز السياره غير كرسي الطفل ؟ ( القارمن معانا فــ مانحتاج ناخذ منهم ) ثانياً : عادي يقبلون فيزا مسبقة الدفع عند الاستلام بالمطار ؟ او لازم الفيزا الائتمانيه العاديه ؟؟ ولازم تكون الفيزا بأسم السواق مثل مكاتب اوروبا ؟ والرخصه السعوديه المترجمه بالانجليزي تكفي ؟ او لازم رخصه دوليه ؟؟ معليش طولت عليكم بالاستفسارات ،، استحملوني .. |
رد بالنسبه لــ سان دييقو .. اشوف الكل يمدحها ويمدح جوها .. قلت يمكن تكون روقاان بالنسبه لنا وخاصةً اننا نميل الى الجو الاوروبي .. سان دييغو مدينة بحرية واللي يحبون أجواء البحر والشواطئ تنفع لهم.. بالنسبه لــ سان فرانسسكو : كيف اقنع زوجي فيها ؟؟ من مبدئ التغيير لإكتشاف مدينة جديدة وهي مدينة جميلة جداً والطريق لها ايضاً جميل على البحر و خضرة وجبال هل فيه وسائل نقل مثل القطار او الباصات لها من لوس انجلوس ؟ صحيح يوجد قطار وأقل مده تقريباً 7 ساعات بالقطار والباص 10-12 ساعه وبكم تقريباً اسعار تذاكر الطيران من لوس انجلوس الىها وإيش اسم الخطوط الافضل ؟ أسعار التذاكر تتراوح من 120 دولار إلى 250 دولار للشخص وكل ما حجزتوا بدري كل ما كانت أرخص طيران فيرجن إذا وقتها مناسب بتكون أرخص طيران هي و Southwest وهل السكن فيها غالي ؟ صحيح السكن فيها غالي نوعاً ما مقارنةً بأمريكا لكن أقترح تشوفون موقع Airbnb ممكن ترشحون لنا سكن فيها موقعه جمييل وسعره مناسب ( شقق او سويتات ) ( سمعت ان يونيون سكوير او ساحة الاتحاد حلووه للسكن ) وايش هي الاماكن الجميله فيها ؟ صحيح يونيون سكوير تعتبر هي السنتر للمدينة ومنطقتة جميلة زي ما قلت أنا الـ 3 سنوات الأخيرة ما استخدم الا airbnb و homeaway في امريكا وفكرتة شقق يملكها ناس ويأجرونها. توفر مواقف, غسيل ملابس, وأكل بعض الأحيان خصوصاً إذا المدة طويلة |
اما بالنسبه ل تأجير السياره : هل التأمين ضروري نظيفه ؟؟ صحيح ضروري وإجباري في كل الأحول لأن تكاليف التصليح او لا قدر الله صار عليكم حادث ما معاكم تأمين أو منتهي على طول سجن والخروج بكفاله حتى يتم تقييم السعر ودفعه ( اشوف في موقع رينتال كار مكتوب التأمين ضد الحوادث والسرقه مضاف مجاني للسعر ) هل هذا يكفي ؟؟ يكفي لكن أيضاً انصح الدخول لـ: alamo car rental و national Car لمقارنة الأسعار ونوع التأمين المضاف وزي ما قلت لا تنون تعديل مكان الإقامة فوق إلى خارج أمريكا عشان التأمين يضاف مجاني وإيش هي الاشياء الضرورية اللي اضيفها عند حجز السياره غير كرسي الطفل ؟ ( القارمن معانا فــ مانحتاج ناخذ منهم ) هذا أهم شي القارمن وكرسي الطفل والتأمين وتعبية البنزين أنتوا عبوا يعني لا تطلبوا تعبئة البنزين وقولوا بنرجعها معبيه فل لأن أسعارهم ثابته على ما اعتقد 3.5 دولار للجالون. بس سعر البنزين برا ارخص ثانياً : عادي يقبلون فيزا مسبقة الدفع عند الاستلام بالمطار ؟ او لازم الفيزا الائتمانيه العاديه ؟؟ ولازم تكون الفيزا بأسم السواق مثل مكاتب اوروبا ؟ صحيح يقبلون مسبقة الدفع ( إذا فيها شريحة يكون فيها رصيد) لكن دائماً أنصح أنه ما تكون طباعه أنصح بالمحفور (الأسم والمعلومات) والفيزا تكون بأسم نفس المستأجر. لكن الفيزا مسبقة الدفع بعض المحلات ما قبلت معي أعتقد كانت مشكلة من نفس البنك لأن أجهزتهم هناك...مادري والرخصه السعوديه المترجمه بالانجليزي تكفي ؟ او لازم رخصه دوليه ؟؟ الرخصة السعودية الجديدة تكفي معليش طولت عليكم بالاستفسارات ،، استحملوني .. في الخدمة وهذا هدف المنتدى بس نبغى منك ما تنسينا بالتقرير المصور اللي يفيد أخوانك وأخواتك |
بعد إذن صاحبة الموضوع حبيت اشكر اخونا ابوناصر المسافر على معلوماته القيمة ، وحبيت استفسر منه في موضوع اشار إليه في رده حتى تعم الفائدة للجميع وخصوصا اني كنت ابحث عن شخص قام بهذه التجربة، اشرت اخوي الغالي في ردك الموضح تحت بتجربتك لكل من airbnb و homeaway ، انا بصراحة دخلت على هالموقعين من فتره طويله وبصراحه فيهم خيارات كثيره ومتنوعة للسكن في أمريكا لكن ماحصلت احد من رودا هذا المنتدى العزيز قدم تجربته في هذين الموقعين ، فهل من الممكن فضلاً وليس أمراً انك تقدم لنا شرح لتجربتك مع هالموقعين ، وشكرا اقتباس:
|
ابو ناصر المسافر شكراً لك من القلب على ردك وتوضيحك .. معليش أخي الكريم .. مافهمت بالضبط نوع التأمين اللي نضيفه بالضبط غير التأمين المجاني المضاف للسعر ,, في موقع رينتال كار مثلاَ .. مايكفي التأمين المجاني المضاف للسعر ؟ هو نفسه اللي تقصده عندما اكتب مثلاً ( السعوديه ) بدلاً من امريكا ؟؟ إذا بغيت احجز من شركة alamo car rental و national Car |
انا مع الأخ الكريم / العنان في كيفية طريقة حجز سكن من الموقعين اللي ذكرت سابقاً ،، وفعلاً نادراً مانقرأ عن تجارب احد معهم في منتدانا .. وهل هم مضمونيين المؤجرين في هذه المواقع . وكيف طريقة الاتفاق معهم وتحويل المبلغ ؟؟ |
اقتباس:
صحيح الموقعين جداً رائعين لأمريكا homeaway أقدم من Airbnb فعشان كذا خياري الأول في أمريكا دائماً Homeaway ثم يليه airbnb وصارلي استخدمهم تقريباً في امريكا وغيرها من 3 سنين الحمدلله ما قد واجهتني مشاكل أبداً مع كل الموقعين ولكن أقرا آراء الزوار قبل الحجز السكن اللي يعجبك الأجانب يكتبون أدق التفاصيل في آرائهم. ووعد أن شاء الله في أقرب فرصه راح أكتب عن airbnb بشكل عام و homeaway بشكل خاص لأمريكا |
اقتباس:
بارك الله فيك اخوي ابوناصر المسافر وعساك على القوة وان شاءالله باكون من اللحين مترقب لطرحك اللي راح يفيد الجميع ويثري القسم . |
اقتباس:
ما اقصد تأمين إضافي كان قصدي أنك تقارني مثلاً ناشيونال كار يحطون تأمين الخدمة على الطريق مجاني يمكن ما تلاقيه في موقع رينتال كار يعني الأشياء الإضافيه المجانيه غير الأساسيات صحيح هو نفسه بكتابة السعودية بدلاً من امريكا |
اقتباس:
فعلا اختي ليالي هالموقعين يعدون من أهم المواقع لحجز السكن في أمريكا ونفتقر لمعلومات تفصيلة عن التعامل معه، لكن اخونا الكريم أبوناصر المسافر ذكر لنا مشكوراً انه راح يقوم بشرح هالموقعين في القريب. |
اخي الكريم / ابو ناصر اطلعت على موقع Home Away وشاهدت الشقق ،، بعضها مناسب وبعضها غااالي وبعضها متدني المستوى .. بس الأهم من هذا كله ،، مواقعها ؟؟ عندي خوف وتردد اننا نحجز سكن يكون موقعه مو مناسب ،، مثلاً : في شوارع فرعيه او منطقه غير آمنه او نائية او او او .... هذا غير ,, صور السكن بالموقع تكون عكس الواقع وخاصةً انها شقق واكواخ لــ مالكين .. يااااريت لو تذكر لي سكن مجرب مناسب واعجبك ،، في اي منطقة معروفه ب لوس انجلوس او المدن الاخرى اكون لك من الممتنيين المقدريين |
اقتباس:
أقترح والرأي لك أنك تقري آراء الزوار review وتشوفين تعليقاتهم/تقييمهم/ ا واللي ما فيه تقييم تجنبيه وفي نفس الوقت شوفي المناطق المناسبه لك في خريطة قوقل وقارنيها بخريطة الموقع.. يععني المقارنات تفيدك كثير حتى مع مواقع أخرى وأختلاف الأذواق أيضاً يلعب دور لأن ممكن شي يعجبك ما يعجب شخص ثاني والعكس حقيقة لوس أنجلس ماني من عشاقها فعشان كذا خبرتي في مناطقها قليله نوعاً ما بكن حتى في البحث إذا تبغين منطقة معينةفي لوس انجلس بدال ما تحطين اسم المدينة تحطين المنطقه مثلا Hollywood hills حي او منطقه في لوس أنجلس تبحثين بها |
السلام عليكم ممكن للمره الثانية تقترحون علي توزيع (23) يوم بالترتيب في ( لوس انجلوس & سان دييقو & لاس فيقاس ) مع استبعاد ( سان فرانسسكو ) :11: واذا كان مناسب نقسم مدة لوس انجلوس بين الشمال والجنوب او يكفي منطقة وحده بس .. وياريت تفيدوني بسكن مجرب بالمدن الثلاث موقعه مناسب وسعره بين (1000 الى (1500 ) ريال ( سويتات او شقق فندقية ) مكون من غرفتين نوم وصاله ومطبخ عدد الاشخاص ( 3) كبار و (3 ) اطفال |
السلام عليكم نفيدكم انه تغيير خط سيرنا عن الأول وصار كالتالي : على خطوط الاتحاد من ابو ظبي الذهاب الى فرانسسكو والعوده من لوس انجلوس .. هل توزيعنا للأيام مناسب ؟؟ سان فرانسسكو ( 4 ) ايام من غير يوم الوصول .. لأن وصولنا بيكون متأخر .. سان دييغو ( 4 ) ايام لاس فيقاس (4 ) أيام لوس انجلوس ( 11 ) يوم بس جداً محتاره في مسألة تقسيم مدة ايام لوس انجلوس .. هل الافضل نقسم الايام بين الشمال والجنوب ؟ او يكفي الاستقرار في احدهم ؟ وأي المناطق تنصحوننا بالسكن فيها .. الجنوب ( انهايم او ارفاين ) والشمال ايهم افضل ( هوليود أو ويستوود أو بيفرلي هيلز او سانتا مونيكا ) ؟؟ وكيف ترتيب المدن الاقرب لبعض ؟؟ علشان يمديني بحجز السكن والسياره وغيره .. يارييت تساعدونا كما عودتمونا .. |
مقترحي لكم 4 ايام سان فرانسيسكو (والسكن قرب ساحة الاتحاد او في منطقة فيشرمان على البحر ) 3 ايام لاس فبغاس (ومن سان فرانسيسكو الى لاس فيغاس بالطيارة ) ومدة الطيران ساعه ونصف وسعر التذاكر بحدود 100 دولار او اقل على حسب تاريخ الرحلة 4 ايام ساندييجو 4 أيام ايرفاين او شاطي نيوبورت 8 أيام لوس انجلوس والسكن في سانتا مونيكا او ويست وود والسيارة تستاجرونها من لاس فيغاس وتسلمونها في لوس انجلوس |
للعلم لاس فيغاس حارة جدا في الصيف ولو تلغونها يكون افضل |
يعطيك ألف عافيه خبيرنا / مقدام تخطيط جمييل .. بس سان فرانسسكو ماتحتاج سياره للتمشيه ؟؟ وايش المواصلات البديله فيها ؟ وعلى اي خطوط نحجز من سان فرانسسكو الى لاس فيقاس ؟ ايهم افضل برأيك ؟ واطمع بكرمك استاذي الفاضل لو عندك اقتراحات للسكن في المناطق المذكوره ويفضل شقق فندقيه او سويتات بفنادق وأسعارها مناسبه ( غرفتين نوم وصاله ومطبخ ) عددنا (3 ) كبار و (4) اطفال .. اكون لك شاااااكره .. لأني بحثت في بوكينق وقليييل احصل سويتات او شقق فندقيه .. والمواقع الاخرى متخوفه من مغامرة الحجز منها .. |
دخلت موقع ( national car ) لتأجير السيارات وأشوف حجز السياره من لاس فيقاس اغلى من سان فرانسسكو ب (1550 ) ريال الفرق ؟؟؟ ليه ؟ علشان الولاية غيير ؟ |
في امريكا :e50c:اشهر موقع لحجز السكن اكسبيديا يوجد به عروض جميلة واسعار تنافسية وافضل من بوكينق وموقع آمن 100% حجز السيارات:e42e: افضل شي شركة المو |
سعر اجار السيارات يختلف من شركه لاخرى ونصحكم بموقع اكسبيديا اللي يقارن لكم اسعار اجار السيارات في مختلف شركات التأجير وممكن تستاجرون عن طريقه عددكم ما شاء الله كبير وصعب تلاقون سكن مناسب عن طريق موقع بوكنج خصوصا الاماكن اللي تريدونها وفيه بعض الخيارات في شمال لوس انجلوس في منطقة مارينا ديل ري وفيه ايضا بعض الخيارات في منطقة انهايم جنوب لوس انجلوس وبما ان عددكم كبير فممكن انكم تسكنون في منطقة وحده وهي جنوب لوس انجلوس سواء في انهايم او في ارفاين او نيوبورت وهذا موقع للحجوزات ممكن يفيدكم https://www.airbnb.com/ وفيه شقق وبيوت للايجار واقل مدة للايجار هي اسبوع على الاقل ومنطقة جنوب لوس انجلوس مناسبة للسكن وتكون منطقة انطلاق الى العديد من الاماكن السياحية ومنها بعد تزورون لوس انجلوي اللي تبعد بحدود الساعه وايضا تزورون ساندييجو واللي تبعد بحدود الساعه بالنسبة للاس فيغاس ففيها بعض الخيارات من الشقق الفندقية القريبه من شارع الستريب وممكن اساعدكم بالبحث عنها بعد تحديد تاريخ السفر وتوزيع الايام سان فراسيسكو صعب تحصلون فيها شقق فندقية واسعار الفنادق مرتفعه وممكن تاخذون فيها غرفتين في فندق بس السعر تقريبا بيكون 2000 ريال في اليوم او اكثر |
اقتباس:
مشكوووور اخوي / فارس الجبيل ان شاءالله راح ابحث في موقع اكسبيديا وشركة السيارات ألمو وربي ييسر |
اقتباس:
ألف شكر لك استاذي الكريم على الاقتراحات وراح نآخذ فيها ان شاءالله .. بس ماقلتلي : ماهي المواصلات البديله داخل فرانسسكو لو ماأستأجرنا فيها سياره ؟؟ واي الخطوط الداخليه اللي تنصح فيها للسفر من فرانسسكو الى لاس فيقاس ؟ خطوط رخيصه و كم حقيبة للشخص الواحد مجاني ؟ ممكن فضلاً لا أمراً تعطيني الرابط الخاص بموقع الخطوط ؟ وماقصرت اخوي |
العفو اختي في سان فرنسيسكو الانتقال يكون بالبااص السياحي وبالترام ومن المطار الى سان فرانسيسكو بالتاكسي افضل خطوط الطيران هي جت بلو وفيرجين وأيضا يونايتد جيدة واسعارها رخيصة الرحلة مدتها ساعه ونصف الحقائب تعتمد على نوع التذكرة اللي بتاخذنها قمثلا في طيران البلو جت شيكت على أسعار التذاكر بتاريخ 28 جولاي ارخص تذكرة واسمها بلو الحقائب غير مجاني والحقيبة الوحدة تدفع عليها 25 دولار والثنتين 35 دولار وكل حقيبة ما يتعدى وزنها 23 كيلو اما التذكرة اللي اسمها بلو بلس فهي اغلى شوي بعشرة او 20 دولار وعندكم حقيبة وحدة مجانية لكل شخص اما التذكرة اللي اسمها بلو فليكس فيعطونكم حقيبتين مجانيات اما شركة الونايتد الحقايب ليست مجانية و تدفع عليها 25 دولار للحقيبة و 35 للحقيبتين ويكون وزن الحقيبة الوحدة ما يتعدا 23 كيلو هذا موقع اكسبيديا وممكن والحجز منه ارخص بس الحقائب كلها بفلوس https://www.expedia.com/Flights?v=b وممكن تدخلون على مواقع شركات الطيران وتشوفون الأسعار منها |
شكرا لكل اللي نبهنا لموقع اكسبيديا عروض مره رهيبه و خيارات أكثر + أسعار مناسبه جدا كنت أبحث في البوكينج فقط لأنه الأشهر و كانت الخيارات جدا محدوده :e304: |
السلام عليكم حبيت اسأل اللي راحوا للمقابله والتبصيم بالسفاره الامريكيه بالرياض هالأيام هذي .. من عمر كم يلزم حضور الأطفال مع ذويهم ؟؟ المتعارف عليه الاطفال دون ال 12 سنه مايحضرون .. لكن سألنا احد المعقبين وقال : حضور جميع الاطفال للسفاره (كافة الاعمار ) .. فهل هذا صحيح ؟؟ هل النظام تغير هذي السنه ؟؟ يالييت اللي راح وقابل من العوائل هذي الأيام يفيدنا مشكووراً |
شكرا لكم |
شكرا لكم جدا استفدت من تخطيط الرحلة خاصة إن سفرتي بتكون في سبمتبر لكن مدتها أقل في برنامج اسمه spothero حملته لكن مابعد أجربه يدلك على أماكن توقف فيها السيارة لفترات طويلة في أمريكا وبرنامج ثاني اسمهgasbuddy يطلع لك محطات البنزين اللي حولك وأسعارهم بالنسبة لسان فرانسيسكو هل فيها مناسبة في تاريخ 27 سبتمبر لان السكن فيها خلال هاليومين ضعفين الأسعار في أوقات ثانية في لوس أنجلوس حجزت فندق قريب المطار في منطقة gardena وبتكون عندي سيارة وسعر الليلة لشخصين مع الفطور 500 ريال |
| الساعة الآن 09:13 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO