|
مخططي الى الفلبين في اجازه عيد الاضحى ان شاء الله ارائكم ياخبراء اول مره اروح لها السلام عليكم ورحمة الله وبركاته اسعد الله اوقاتكم جميعا باذن الله رحلتنا انا والمدام وطفلين راح تكون في 31 اغسطس حتى 15 سبتمبر يعني بتكون عدد الايام الي بقضيها 14 يوم لاني ماراح احسب اول يوم واخر يوم اغلبها بيكون بالطائره ولي تقريبا شهر ادور بين المواقع ومن بينها موقعكم الرائع واكتسبت الكثير من المعلومات الميزانيه بتكون 15 الف ريال من غير التذاكر لاني قصيها خلاص وهي تذاكر قابله للتعديل حسب الامكانيه اي وقت الخطه كالتالي الاقامه في مانيلا يومين بعد الوصول وثلاث ايام قبل العوده ازور فيها الاماكن التالية اول يومين بعد الوصول
يومين ايام قبل العودة الى الرياض
بعد اول يومين اقضيها في مانيلا سأتجه الى جزيره بالاوان لقضاء ست ايام باذن الله على النحو التالي يومين في بورتو برنسيسا لزيارة الاماكن التالية
ثم التوجه الى جزيرة ال نيدو لقضاء اربع ايام السكن ماراح اخذ غالي لان اغلب وقتي بيكون برا ما احب اجلس بالفندق الا للنوم وحصلت فنادق كثيره اسعارها جدا مناسبه في كل المناطق فما ادري هل الميزانيه مناسبه بمعدل 1070 ريال يوميا لشخصين بالغين وطفلين سكن ومعيشه ومواصلات او ازيدها شوي طبعا مثل ماتشوفون باقي لي 4 ايام تقريبا محتار وين اقضيها ودي اروح لسيبو ومنها ازور شلالات كاساوان وجبال الشكولاته في بوهول و منطقه Oslob Whale Shark Swim قريت عنها بالمنتدى هنا بس احس الميزانيه ماتغطي :24: او اقلص عدد ايام الرحله ابي رايكم بالجدول هذا واقتراحاتكم بخصوص الاربع ايام المتبقيه او اي تعديل على المخطط بشكل عام ومشكورين الله يسعدكم |
وعليكم السلام ورحمة الله وبركاته الجدول مرتب والتنقلات فيه قليله وهذا اهم شي لانه معاك عائله والتحرك دايم بطئ مع الحريم الاماكن اللي راح تزورها في اليومين الاولى ممتازه واختيارك حلووو لاتنسى انه فيلا ايسكوديرو تبعد عن مانيلا بالباص ساعتين بالسياره اقل بشويتين وكمان نفس الشي تقايتاي تبعد 3 ساعات واكثر وتستاهل انك تجلس فيها يوم كامل لان الاجواء في الصباح جميله خصوصا انها منطقه مرتفعه نسبيا تقدر تضيف برضو منطقة لاقونا باقسنقهان Laguna Pagsanjan تبعد ساعه ونص من مانيلا فيها نهر طويل بين الجبال الخضراء وتركبون القوار الخشبيه الين الشلال الكبير تستاهل الزياره اما بالنسبه لجزيرة بالاوان عدد الايام مناسب جدا بالرغم انه الجزيرة تستاهل شهر كامل لانها جميله ورايقه تقدر تزور الاماكن هاذي وانته في بويرتو: 1- Honda Bay 2- Mt Salakot تحتاج تتسلق الجبل 3- Bonton Falls تحتاج تتسلق الجبل واذا وصلت النيدو تقدر تنسق رحلات بحريه هناك مع قروبات او حتى لحالكم ع راحتكم وتستاهل التجربه لانه افضل شي في النيدو زيارة Twin Lagoons وبالنسبه للمعيشه صعب تحددها وانا اقول اكثر من 1070 ريال بحكم انه مانيلا اصبحت غاليه شويتين من اول سيبو وبوهول تستاهل الزياره لكن جدولكم راح يكون متعب لو اضفتها في نفس الرحله اي استفسارات اخرى حاضرين ان شاءالله تحياتي |
تسلم ياكنق اجل شورك وهداية الله اتوقع اني بستغني عن سيبو للاسباب الي ذكرتها فعلا التنقلات الكثيره بترهقنا وتقلل من متعة الرحله على كذا بخلي الرحله 14 يوم بدلا من 16 وازيد يوم في ال نيدو ويوم في مانيلا بس اتمنى اقتراح المزيد من الاماكن في ال نيدو على اقل من مهلكم : ) ابي اروح واشخص عليهم على اني فاهم :14: وباذن الله راح يكون لي تقرير مصور عن الرحلة |
اقتباس:
:1: زيادة يوم في النيدو افضل بكثير من ضياعه في التنقل والخروج والدخول الى الفنادق لاتشيل هم الأماكن في النيدو اول ماتوصل المنتجع اللي راح تسكن فيه راح يعرضون عليك كل الرحلات البحريه في الجزيرة وراح تزور 4 جزر مختلفه حول النيدو وماتنسى تزور مطعم ع شاطئ النيدو صاحبه واحد الماني لكن اكله رووعه وخصوصا المنظر وقت الغروب. واي إستفسارات أخرى حاضرين إن شاءالله تحياتي |
ماقصرت ياغالي عسى عمرك طويل اخر سؤال واسمح لي كثرت عليك اسأله هل تقترح علي مواقع غير بوكنق او اجودا للحجز مسبقا او احجز مباشره من الفندق وش رايك |
اقتباس:
الله يجزاك خير ع الدعوة الطيبه (الله يبارك في عمرك) خذ راحتك في الأسئله صدقني مستمتع في تقديم المساعده من ناحية الفنادق اغلب فنادق الفلبين تحصلها ارخص من اقودا لكن هاذي ليست قاعده ثابتة الأفضل اختار الفندق والتواريخ وشوف أسعاره في اقودا وبوكنق وإختار اللي يكون سعره أرخص اما بخصوص المنتجعات الأفضل حجزها من موقعهم مباشره لان أسعارها في بوكنق غالية وأي إستفسارات أخرى ماراح نقصر معاك إن شاءالله في شئ تحياتي |
حبيب قلبي ماتقصر والله بس تراني ما انعطى وجه بس دامك ملزم خذ سؤال :29: نظام التكاسي عندهم عداد او تفاوض وهل الحساب يكون للشخص او للمجموعه وبخصوص منطقه Laguna Pagsanjan هذي رائعه الله يجزاك الف خير اشوى انها مافاتتني القوارب الي فيها هل الاسعار للشخص الواحد او للقارب فقط للمعرفه عشان لايلعبون علي |
نظام التكاسي بالعداد ماعدا الرحلات خارج مانيلا تقدر تفاوض فيها خصوصا لو كان فيها انتظار الاسعار تختلف الان عن الفتره اللي زرتها لكن ماتتجاوز 1500 بيسو للشخص الشعب طيب وصريح خلي ظنك طيب بالناس تحياتي |
ممتاز انا اشوف تعاملهم هنا راقين و خلوقين بالمستشفيات و المطاعم والشركات بس بعض المواضيع تشكك وسألت من باب الاحتياط يعطيك العافيه |
| الساعة الآن 12:51 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO