مشاركة بسيطة عن رحلتي الى مانيلا وبوراكاي
 

السلام عليكم ورحمة الله وبركاته

الحمدلله والصلاة والسلام على رسول الله

ودي اشارك ببعض المعلومات اللي ممكن تكون مكرره لكن للتذكير فقط وراح اتكلم حسب اللي اشوفه انه افضل مع اختلاف الرغبات

اول شي حجوزات الطيران الافضل ان الرحلة تكون مباشرة لمانيلا عن طريق الخطوط السعودية وحاول تتصيد العروض اللي عندهم انا قصيت التذكره ب 1499 ريال ذهاب واياب وكانت من الطيارات الجديده المريحه مدة الرحلة ثمان ساعات ونص اما بالنسبة للرحلات من مانيلا الى اي مدينة ثانية انصح استخدام تطبيق ويقو ولا فلاي سكانر وكل ماحجزت بدري السعر يكون ارخص انا قصيت التذكره الى بوراكاي ب 400 ريال ذهاب واياب كانت مع خطوط سكاي جت ومدة الرحلة اربعين دقيقه .

اجراءات الوصول في المطار سهله وسريعة ولما تدخل الصالة اللي برا بتلقى محلات شرائح الاتصال لا تاخذ من عندهم اسعارهم ثلاث اضعاف السعر الاصلي اشتر من مكاتبهم في مكاتي استخدمت شركة سمارت كانت جيده ما واجهت مشاكل

وفيه محل صرف عملات سعره كان ممتاز 12.7بيسو للريال الواحد

لما تطلع برا المطار خذ التاكسي الاصفر هو ارخص من الابيض والشركات الباقيه السعر الى مكاتي 300 بيسو او تقوله استخدم العداد بس مانيلا زحمة جداً بيطلع لك اغلى اما داخل مانيلا اذا المكان بعيد تفاصل على سعر واذا قرريب خله عداد اعلى سعر دفعته للتاكسي 300 بيسو .

بالنسبة للسكن سكنت في فندقين الاول فريزر بليس جناح غرفتين وصاله ومطبخ ممتاز جداً وخدماتهم حلوه والثاني دياموند مكاتي جناح غرفه وصاله ومطبخ افخم من فريزر بليس وموقعه احسن قدام القرين بلت بس سعرهم غالي وخدماتهم لك عليها انصح الحجز يكون عن طريق تطبيق اقودا ارخص سعر وشامل الضرايب وتدفع لهم ما تدفع للفندق واغلب الفنادق يطلبون تأمين اما 100 دولار او 500 ريال او 6000 بيسو او بطاقة ائتمانية يحجزون مبلغ منها وهذا الخيار ما انصح فيه ابداً لان لازم وانت طالع تفك الحجز وممكن تنسى .
واغلب الفنادق عندهم خدمة تخزين الامتعة اذا بتروح بوراكاي ولا جزيرة غيرها ماراح تحتاج اغلب ملابسك الرسمية يفضل انك تخليها في فندقك اللي بمانيلا بدون رسوم طبعاً خصوصا ان اغلب خطوط الطيران الاقتصادية تسمح لك بشنطة وحده 10 كيلو .

التمشيات في مانيلا كل واحد ورغبته كل شي موجود شلالات غابات بحر اسواق متاحف مطاعم مقاهي اللي انصح بزيارتها الاسواق مثل قرين بلت وقلوريتا كلها جنب بعض وكلها ماركات معروفه بعدهم روبنسون واسيا مول وبعدهم فنيسيا والسوق الصيني واسعار الاسواق مو ارخص من السعودية ابداً

المطاعم اللي موجوده في قرين بلت هي الافضل وفيه كل المطاعم افضلهم الهندي والايطالي وما يمنع تجرب مطاعم في اماكن ثانيه مع العلم ان كان عندنا طباخه في الفندق تطبخ جميع انواع الاكل باحترافيه ويوميتها 1000 بيسو وموجوده معاك 24 ساعه وشغل نظيف وتغسل الملابس وترتبها وتضبط الشنطه قبل تسافر لانها اكبر همي الشنطة وترتيبها

المقاهي انصح ب قاردن سيتي المقهى في السطح وتشوف مانيلا ومقهى قرامرسي مقابله في مكاتي افنيو
بالنسبة للحياة الليلية انت ورغبتك بس احذركم من محلات اسمها كريوكي باختصار سرقة في سرقة شي ما يستاهل تجيه اذا الله بلاك ورحت بتلقى الفاتوره عاليه عموما اذا تورطت في اي مكان وواجهتك مشكلة اطلب الشرطة راح ينقصون في السعر نص وبعدها اطلب السفارة راح تدفع الربع وللامانة ما كلمنا السفارة في مشاكل مثل كذا لكن كلمناهم في مشكلة مالية مع فندق وحضر المندوب وحل المشكلة مشكوراً.

فيه شارع اسمه برقص كل العالم كانو يوصون عليه لما رحنا هناك لقيناه اقذر شارع في العالم تشوف الايدز في كل مكان لا انصح بزيارته الا مرور بالسياره عن قولت انك جيته . محلات المساج اغلب المحلات اذا جيتهم يحسبون تبي مساج لهذاك خصوصاً المحلات الصغيره لا تفكر تسوي مساج عندهم لانها معدومه وفيه محلات جيده مثل الرتز وونشه بس مبالغ باسعارهم وفيه محل اسمه اير فورس ون قالو انه افضل محل مساج بس لما رحت اكتشفت انه عبارة عن ييت دعارة انتبه تروح له افضل شي للمساج انك تطلب عن طريق الفندق وفي غرفتك وشركة معروفه ونظيفه وسعره ما يتعدى 600 بيسو او انك تطلب انت من شركة مساج والفندق يسمح بالدخول هذا ما يخص المساج .

عموماً الفلبين تصلح للكبلز او للي ما يدور الخرابيط في رأيي .

بتكلم عن الذهاب لبوراكاي غالباً تكون رحلاتها في صالة 2 تحتاج بالكثير الى 45 دقيقه عشان توصل للمطار طبعاً حجزك يكون على مطار كاتكلان هو الاقرب لبوراكاي اول ماتنزل الصاله راح تلقى مكاتب تعرض عليك التوصيل للفندق في بوراكاي ب 500 بيسو حلوه بس مشكلتهم يطولون في التوصيل تنتظر لين يمتلي الباص وشغله الافضل انك تطلع من الصاله وتاخذ تراي سايكل ثلاث كفرات للميناء واذا وصلت الميناء تقص تذكره وياخذونك بقارب لبوراكاي الميناء وتاخذ تراي سايكل للفندق اسرع لك وارخص طبعاً حاول تاخذ تراي سايكل الكهربائي اريح واوسع

حجزت في فندقين الاول اسمه ازاليا فندق جديد له سنه تقريبا نظيف جداً واثاثه جديد وموقعه قريب من البحر طبعاً في ستيشن 2 بس مشكلة الفندق ما يسمح بالتدخين داخل كانت غرفتين وصاله ومطبخ والفندق الثاني اسمه هينان ريجنسي جنب ازاليا على البحر مسموح التدخين والمرافق اللي فيه جميلة جداً انصح باستخدام جميع المرافق في جميع الفنادق لانك دافع سعرها مع الغرفة كثير يغفلون عنها .

بوراكاي اذا ما خططت ليومك راح تطفش لانها صغيره لازم انك تخطط او تتواصل مع مرشده سياحيه معروفه هناك اسمها منيرة بوراكاي
لها حساب في تويتر تسوي لك جدول اول يومين كنا نخطط من انفسنا والاسعار عاليه اقصد اسعار النشاطات الترفيهيه عرفتها بالصدفه وسوت لنا جدول ومعنا 24 ساعه هي اللي تصحينا من النوم وتودينا المطاعم العربية والخليجية واسعار الالعاب عندها نص السعر اللي موجود في المكاتب والمواصلات مجاناً معاها لانها تبع شركة تجي سيارة تاخذك من اي مكان واذا انت اللي تبي تسوي جدولك انصح انك تقوم الساعه عشر الصباح عشان تلحق واذا بتلعب روح للمكاتب اللي في ستيشن 1 او 3

لا تتعامل مع الوسطاء اللي ع البحر انصح بالغوص والبراشوت والجت سكي والفلاي فش والزبلاين والدبابات والراليات اغلب الالعاب فيه مصورين يصورونك او انك تصور نفسك بس حط جوالك في بلاستيك له حبل يبيعونه على البحر المطاعم في مطعم هندي موجود في دي مول ومطعم ايطالي في ستيشن 2 ومطعم خليجيه في دي مول
واذا تبي سي فود روح لسوق السمك واشتر اللي تبي ووده وفيه مطاعم تطبخ لك قدام السوق .

محلات المساح فيه اللي على البحر كلها مو نظيفه وفيه في ستيشن 3 مندرين وتترا بس غاليه اسعارهم افضل شي تطلب عن طريق الفندق .

الحياة الليلية اغلب المطاعم والمقاهي تقلب اغاني وديسكوات بعد الساعه عشره ومافي شي يستاهل انك تطول اغلبهم كبلز يعني ريح ولا تشد حيلك .

بوراكاي لا تجلس فيها اكثر من اربع ايام .

نصايح عامة اغراضك الشخصية مثل الجوازات وبطاقات الصراف خلها في السيفتي بوكس والفندق مسؤول عنها مسؤولية تامة اما الفلوس انصح تاخذ 5000 ريال كاش وتصرفها في مطار مانيلا واذا خلصت اصرف من صرافات بنك BDO هو اللي مسموح لك تصرف 10000 بيسو
الصرافات الباقيه اقل طبعا كل سحبه راح ياخذون 200 بيسو رسوم

لا تفكر تحاسب بالبطاقة في المحلات لانهم راح ياخذون رسوم 500 بيسو .
اما افياش الكهرباء خذ معك فيش راس ثنائي .

هذا اللي قدرت افيدكم فيه وصلى الله وسلم .

واخيراً نصيحة اخ لا تترك صلاتك مهما كان ولا تقرب الحرام

الله يعافيكم جميعاً

شكرا على المعلومات والنصايح المهمه لاتعتمد على اللي يقولك هذا احسن مكان واقوى مكان واخرتها يطلع اسوء مكان
صار معاي جذي في تايلند عن شارع العرب والكل يقولي روحي والله مارحت بس مريت من بعيد لي بعيد جان اقول انحش .. عرفت انه سيئ من البدايه
مرشدتكم منيره شنو اسم مكتبها اذا في اونلاين
ومشكوور مره ثانيه

تسلم أخي على هالنصائح :e303:

الله يسلمكم جميع وشكرا لكم

المرشدة منيرة مالها مكتب قابلتها صدفة عند مكاتب الالعاب وعرفتها وطلع عندها حساب في تويتر اسمه بوراكاي معا منيرة وللاسف ما حفظت رقمها كان في الشريحة الفلبينية . تقدرين تتواصلين معها عن طريق تويتر .

شكــــرا ...

الله يعافيكم جميعاً

شكرا على المعلومات
والنصايح المهمه
جزاك ربي كل خير

يعطيك العافيه اخوي معلومات مهمة للمسافرين

سؤال - انتوا كم شخص مسافرين ؟

كان عددنا شخصين وشاكر لكم

يعطيك العافيه يالغالي

حبيت اسئلك عن الفيزا . لازم فيزا ! .. وين افيز بمطار مانيلا ..

سعودي ما يحتاج تفيز اذا بتقعد اقل من شهر الجنسيات الاخرى لا اعلم .

شكرا لك اخي

نعم صحيح

شاكر لكم ويعطيكم العافية جميعاً

تسلم على هالنصايح ويسعدك ربي

..

حبيت اسألك عن انطباعك عن التعامل و الشعب وهل تنصح بزيارتها.
والف شكر لك على النصائح وبالتوفيق

بخصوص الحجز في فنادق مانيلا
 

انا حجزت ببطاقة الانماء (debit) اللي هي صرافة وفيزا بنفس الوقت
هل هي مقبوله في الحجز لان ارقام البطاقة مطبوعه طباعه وليست بارزه (محفوره)
علما ان الحجز تم ومؤكد من خلال اجودا

تسلم حبيبنا ....

تقرير ( مكتوب ) جميل وواضح ونصائح رائعة .. تمنيت لو كان مصوّر :62:

خذ حسابك الرحلة الثانية يكون لنا نصيب بتقرير متكامل .. :)

المرشدة منيرة ... وجدت حسابها في تويتر .. اطّلعت عليه ( مجتهدة ) في التعريف بالفلبين ..

لكن أتمنى أن تكون ( صادقة ) بالتعامل المباشر ...

تحياتي لك ..

تعاملهم كان ممتاز والشعب ودود وحبيب واكثر تعاملك راح يكون مع البائعين والسواقين ما شفت شي يزعجني اما زيارة الفلبين وضحت في الموضوع وش الفلبين باختصار اذا كانت اهدافك تتوافق مع الفلبين انصحك بزيارتها .

نعم مقبوله انا بطاقتي من مصرف الانماء جميع الحجوزات راح تقبلها الا مكاتب ايجار السيارات يطلبون كردت كارد عشان التأمين .

الله يسلمك اخوي التقرير الهدف منه معلومات ونصائح لان الكثير يحتاجها خصوصاً اللي اول مره يروح ما كنت حريص على الصور وغير مهتم بالتصوير في حياتي اما المرشده انا تعاملت معها شخصياً للامانه ما شفت منها اي شي غير صادق وننزل البحر واغراضنا الشخصيه معها طبعاً غلط وما انصح بالثقه المطلقه بس هذا اللي حصل .

شاكر لكم واسف على التأخير

رحله جميله وتقرير رائع

نصائح جميله ومن واقع خبره
يعطيك العافيه

شاكر لكم جميعاً

يعطيك العافيه اخوي وبارك الله فيك

شكرا لك