شبكة و منتديات العرب المسافرون - قربت رحلتني لإيطاليا واحتاج مساعدكم

- بوابة ايطاليا (https://www.arabtrvl.com/vb/f156.html)

- - قربت رحلتني لإيطاليا واحتاج مساعدكم (https://www.arabtrvl.com/vb/t32807.html)

قربت رحلتني لإيطاليا واحتاج مساعدكم

السلام عليكم ورحمة الله

انا بسافر ايطاليا من 26 ابريل الى 15 مايو
يعني 15 يوم

وابي اروح روما و فينيسا و ميلان وكومو و بورتفينو و لوقانو

وصراحة محتاااااااسه جدا ومخي تعب من كثر ماقريت قلت مالي اسألكم يا الاجاويد
عندي كم سؤال وتكفون تكفون تكفون ساعدوني والله ماني قادره ارتب افكاري
1-اول شي ايش اسم مطار روما الاساسي ؟ لاني لما ابحث يطلع لي اكثر من مطار
2-ثانيا هل اقدر اوصل على روما وارجع الرياض بعدين من ميلان ولا ماينفع؟
3-ثالثا هل تنصحوني ابيت في ميلان و اروح كومو و بورتفينو و لوقانو كل وحده بيوم وارجع انام في ميلان؟ لان في وحده نصحتني بهالشي ابي رايكم
4-وابي اعرف هل اقدر اتنقل بين المناطق مثلا روما و فينيسيا و ميلان وكومو و بورتفينو و لوقانو بالمترو و القطار؟ و ايش الفرق بين المترو و القطار
تحملوني شوي بس خايفه لانها اول رحله انظمها ومابي استعين بالمكاتب لانهم اكلوني باسعارهم والله
5-و ايش افضل اوتلت في هالمناطق كلها ابي تقولون لي عن افضل اسم لاني شفتهم كلهم واحترت اي واحد اروح
6-واحتاج نصايحكم عن مناطق السكن في كل مدينه
يعني مثلا فينيسيا وين اسكن ابي فندق مو غالي وقريب مني كل شي او بالباصات اروحلها لاننا مابناخذ سيارة ولا احد فينا يسوق للاسف
ومو لازم تقترحون اسماء فنادق بس هم شي ابي افضل شارع او منطقه في كل مدينه ذكرتها عشان اسكن فيها او حولها

7-وكيف بيكون الجو وقت سفرتي؟ ايش نوع الملابس الي اخذها؟

يعطيكم الف عافية صراحة موقع جباااااار
سويت الفيزا عن طريقكم لا خلا ولا عدم ❤❤❤ماكنت اعرف فيها شي بس تعلمت منكم

اسمه
مطار ليوناردو دا فينشي
هذا رمزه FCO

اسكن ببرغامو

https://www.arabtrvl.com/vb/t32312.html

من ميلان الى روما بالقطار 3:30 ساعات انا سويتها رحت و رجعت بنفس اليوم
من ميلان الى فينيسيا 2:30

افضل اوتلتين هم سيرفالي - قريب ميلان و نوفينتانا قريب فينيسيا

الجو ربيعي و حلو

اقتباس:

المشاركة الأصلية كتبت بواسطة منيرة (المشاركة 380701)

الله يعطيك الف عافية
هل قصدك اسكن ببرغامو ومنها اروح للمناطق الي ابيها وارجع؟
احس مرررع جبتني كومو افكر اسكن فيها
ايش رايك ؟؟:e329:

اقتباس:

المشاركة الأصلية كتبت بواسطة بيان (المشاركة 380704)

بداية ناويين تاخذون سيارة
السياره فيها حرية تنقل وين ووقت ماتبون عكس القطار
ممكن قطار الى روما و فينيسيا

بس اذا ودكم في جاردا و كومو و لوغانو افضل سياره والافضل السكن ببرغامو

اقتباس:

المشاركة الأصلية كتبت بواسطة منيرة (المشاركة 380707)

للاسف كلنا بنات ماعندنا احد يسوق
انا ودي بروما ثم فينيسيا ثم ميلان ثم كومو و لوقانو ينفع بالقطار كلها صحيح؟؟
وبضيف بروغامو حسب مشورتك

اقتباس:

المشاركة الأصلية كتبت بواسطة بيان (المشاركة 380718)

برغامو للسكن فقط لكن اذا ماعندكم سياره خلاص استقروا بميلان حياه اكثر
وكل يوم انطلقوا مكان

اقتباس:

المشاركة الأصلية كتبت بواسطة منيرة (المشاركة 380707)

اختي بعد اذنك نسيت اسألك
الوصول من الرياض الى روما
العوده للرياض اخليها من ميلان افضل ؟؟

اي افضل
ولو شفتيها اغلى خليها ميلان ذهاب و عوده

من ميلان ممكن تزورون كومو ولوغانو وفنيسيا بالقطار وتوجد رحلات مباشرة
اما بورتفينو فممكن تزورونها من ميلان بالقطار من محطة ميلان سينترالي
ومدته من 3 الى 4 ساعات تقريبا الى بورتفينو
والقطار فيه عدة توقفات وبدون ماتنزلون منه وتنزلون منه في محطة Rapallo
ومنها تركبون باص الى بورتفينو ومدته تقريبا 27 دقيقة والرجوع نفس الشيء

مقترحي لكم لتوزيع الأيام

3 أيام روما
3 ايام فلورانس فلورانس ومنها زيارة برج بيزا
3 أيام فيرونا ومنها تزورون فينيسيا
6 أيام ميلان ومنها زيارة كومو ولوغانو وبورتفينو اذا اردتم .. بالإضافة الى اوت لت سيرفالي

اقتباس:

المشاركة الأصلية كتبت بواسطة بيان (المشاركة 380700)

السلام عليكم ورحمة الله
انا بسافر ايطاليا من 26 ابريل الى 15 مايو
يعني 15 يوم
2-ثانيا هل اقدر اوصل على روما وارجع الرياض بعدين من ميلان ولا ماينفع؟
السعر يحكمك وغالباً اذا اختلف مكان العودة عن الذهاب يفرق السعر ويكون اغلى واوقات يكون الاختلاف بسيط لكن بالمجمل اذا الذهاب والعودة من نفس المدينة يكون ارخص

3-ثالثا هل تنصحوني ابيت في ميلان و اروح كومو و بورتفينو و لوقانو كل وحده بيوم وارجع انام في ميلان؟ لان في وحده نصحتني بهالشي ابي رايكم
وقت سفرتكم بيكون الغروب تقريبا الساعة 8 الليل معناته النهار طويل فيمديكم تروحون وتجون في نفس اليوم لكن مدري عن التكلفة المادية للتكت ذهاب وعوده قطار او عن طريق الباص وانتم مجموعة ؟؟

4-وابي اعرف هل اقدر اتنقل بين المناطق مثلا روما و فينيسيا و ميلان وكومو و بورتفينو و لوقانو بالمترو و القطار؟ و ايش الفرق بين المترو و القطار
المترو هو قطار الانفاق داخل المدينة أما القطار تصميمه مشابه للمترو لكن اكبر حجم وينقلك من المطار للمدينة ولا من مدينه الى مدينة وتكون له محطات خاصه فيه مالها علاقة بمحطات المترو وحتى التذاكر تختلف
واظاهر فيه في ايطاليا قطارات سريعه بين المدن تكون اغلى سعر وفيه قطارات عاديه وطبعاً فيها بعد فئات درجه اولا وسياحي ... وفيه في ميلان باصات سياحيه رحلة يوم واحد يودونك كومو ولا الاوت ليت تحصلين البروشورات حقتها في المكتب السياحي او عند باصات الهوب اند هو والشركه الثانيه الي تسوي رحلات سياحيه

5-و ايش افضل اوتلت في هالمناطق كلها ابي تقولون لي عن افضل اسم لاني شفتهم كلهم واحترت اي واحد اروح
Serravalle و FoxTown
انا مارحت الا لسيرفالي كان حلو وكان على طريقي من بورتفينو لميلان لكن فوكس تاون اظاهر فيه الماركات اكثر

6-واحتاج نصايحكم عن مناطق السكن في كل مدينه
انا يوم ابحث عن رحلتي الاخيره في ايطاليا ما كانت عندي فكره عن الديره واماكن السكن لكن كنت اركز على المناطق الي حول الدومو في كل مدينة واقارن الاسعار واقراء تعليقات الناس عن السكن ووش فيه قريب منه عشان ما احتاج لسياره
البندقية: صغيره وفنادقها اغلبها قديمة تجيب الهم وغاليه على مستواها ومافيها سيارات
طبعاً في فينيسيا اذا معكم شنط كبيره بتتمرمطون اذا السكن موب قريب من موقف باص لان التاكسي يا يوقفك عند الفندق اذا كان له باب على الممر المائي او يوقفك عند موقف الباص لانها عباره عن ممرات صغيره من حجر وعند كل ممر مائي فيه جسر ترقون درج
San Marco هذي هي الساحه المشهوره في البندقية وكل ما تبعدين عنها ترخص الاسعار وكل ما يكون الفندق على ممر مائي يزيد السعر
ميلان: انا هالفندق UNA Hotel Cusani جربته وعاجبني لو بروح مره ثانيه بسكن فيه وسعره بالنسبه لي كان حلو بالمقارنه بغيره
نظيف ومكانه مرتب وهادي وقريب من ممر كله مقاهي وماطاعم وقريب من المترو وقريب من محطة القطار وقريب من موقف الباصات السياحية
روما ماعندي خلفيه عنها للاسف

7-وكيف بيكون الجو وقت سفرتي؟ ايش نوع الملابس الي اخذها؟
بالمقارنه بالرياض اتوقع بيكون مقارب لها او ابرد شوي يتوقعون نهاية ايبرل تكون العظمى 23 والصغرى الصباح واخر الليل 10 لكنها ميب دقيقه اذا بتاخذون شتوي يكفي البلوفر لان الشمس حقتهم حاره تصك الراس

الله يستر عليكم ورحلة سعيدة :50:

كل استفسار بتحصلين تحته وجهة نظري فيه <-- كتبت هالكلام لان المنتدى يقول ردك قصير جداً لاني مسوي اقتباس :47: