|
مساعدة في مخطط الرحلة - كرمًا - شاركنا رأيك السلام عليكم ورحمة الله وبركاته أسعد الله أوقاتكم بكل خير ممكن مساعدة في مخطط رحلة للدول التالية ( السويد ، النرويج ، الدنمارك ) • مدة الرحلة بيعتمد على الإجابات ( ممكن مخططين ؛ مخطط 21 يوم وآخر 15 يوم ). • لشخصين. • التنقل طيران اقتصادي وقطارات - لن يتوفر لنا استئجار سيارة-. • تقريبا كم سعر تذكرة الطيران الاقتصادي - بالريال السعودي - ؟ • يهمنا جدا تكون المدن المختارة وسائل التنقل فيها سهلة ومتاحة من باصات وقطارات وأوبر والخ.. بحكم إن ما معنا سيارة. • يهمنا أمان المدن وحياتها وحركتها. • الغرض من السفر الاستمتاع بالطبيعة وحياة المدن والتسوق. • كيف الجو بيكون في جولاي ان شاء الله ؟ • كثير يقولون الدول الاسكندنافية غالية ، ممكن أعرف مدى غلاها ؟ مثلا المعيشة والتنقلات اليومية كم ممكن تكلف ؟ والسكن أيضا يتراوح بين .. ؟ • كيف تعامل الشعوب ؟ ولغتهم الانجليزية ؟ وهل يتقبلون الحجاب والعرب ؟ • الدنمارك تستحق الزيارة ؟ والا يفضل حذفها من المخطط ؟ • أفضل وأرخص طيران من الرياض ؟ تقترحون محطة الوصول تكون أي مدينة ؟ وكذلك العودة ؟ هل أفضل نحجز ذهاب منفصل عن العودة ونخليهم مدن مختلفة ؟ • نصائح هامة يجب أخذها بعين الاعتبار بشكل عام ؟ بانتظاركم شاكرين ومقدرين مع التحية |
ممكن مقترحاتكم بأسرع وقت ممكن أسعار التذاكر قاعده ترتفع ولسا ما حجزنا فودنا نحجز في أقرب وقت وبيعتمد ذلك على ما تقترحون من محطة وصول ومحطة عودة |
لي رجعه بالليل ارد عليك |
الله يعطيك العافية بانتظارك |
ننتظرك |
اقتباس:
|
جزاك الله خير أخوي ما قصرت لو خليناها ٢١ يوم ، مع إن تكلفة وجبة ٤٠٠ ريال شيء مش طبيعي ، المطاعم الفاخرة هذي والا العادية المعتادة ؟ فرضا ٥٠٠ ريال مصروف يومي للشخص الواحد معيشة وتنقلات غير السكن كافي ؟ صراحة خوفتنا :19: شخصين مدة ٢١ يوم سكن نظيف نقول ٣ الى ٤ نجوم ، تنقل قطارات وباصات وممكن طيران اقتصادي ، ومعيشة يومية عادية مثلا كوفي ووجبة غداء او عشاء باليوم ، كم تقريبا ممكن تكلف ؟ مقترحك لمخطط الرحلة إن شاء الله نبدأ في السويد وننتهي بالدنمارك أو النرويج ؟ ممكن مسار الرحلة المقترح بالمدن وعدد الأيام المناسبة ( تقسيم ٢١ يوم ) الاتحاد لقيتها توقف ترانزليت في مدينتين ونفضل صراحة وقفه وحده الخطوط التركية متخوفين من التجارب السيئة اللي سمعنا عنهم ما فيه خطوط دايركت من الرياض للسويد ؟ ومن اوسلو للرياض ؟ الطيران النرويجي الاقتصادي قريت انه أفضل شيء ؟ بالنسبة للتنقل بين الثلاث دول صحيح ؟ والا فيه أفضل منه ؟ إذن بكذا ما عندنا مشكلة في السويد والدنمارك من ناحية السيارة ، لكن النرويج مثلا هل يمدينا نحجز في أوسلو أسبوع ومنها يكون التنقل بين المدن بشكل يومي ؟ والا بعيدة ؟ لأن من الصور حسيت المناطق اللي فيها طبيعة نائية شوي وما أدري هل بيكون فيها سبل مواصلات غير السيارة متاحة ؟ وأيضا أبدا ما ودنا بسائق خاص نظرا لارتفاع أسعارهم فمضطرين للأسف نرتب الرحلة لمدن رسمية كبيرة يكون منها نتنقل بالوسائل العامة .. فما أدري وش الحل المقترح للنرويج في هذه الحالة ؟ خاصة إننا ما نبغى تفوتنا طبيعتها الخلابة بالنسبة لمسار الرحلة فنفضل الاستقرار في مدينة رسمية والتنقل منها لمدن أخرى ، مثلا لو حصل أسبوع في السويد في مدينة محددة وأسبوع في النرويج في مدينة محددة وأسبوع في الدنمارك في مدينة محددة ومن هالمدن نتنقل بشكل يومي لأماكن حولها فأفضل بكثير من التنقل المستمر بين المدن وقلة الأيام فيها < جربناها سابقا الوضع مرهق .. إلا في حال كان هناك مدن فعلا تستحق الزيارة وبعيده .. أضف إلى ذلك الآن مبدئيا عندنا رحلتين دوليتين داخل السفرة من السويد للدنمارك مثلا ومن الدنمارك للنرويج هذه بحد ذاتها بتكون عبء ، وما أدري هل بنحتاج أيضا إلى طيران داخلي داخل الدول نفسها أو لا ؟ الخلاصة ، ودنا بمخطط مرتب ومريح وشامل أهم المدن وأشرحها ، ودنا زي ما قلت التنقل يكون أقل ما يمكن في مقابل إمكانية الزيارات اليومية ، على سبيل المثال أمستردام جلسنا فيها أسبوع لكن أبدا ما ملينا كل يوم رايحين قرية أو مدينة بالقطار اللي تبعد نصف ساعة واللي ساعة وهكذا .. فما أدري ايش وضع الدول الاسكندنافية من هالناحية ؟ بانتظار رأيكم شاكرين ومقدرين تعاونكم جدا مع التحية |
اقتباس:
https://www.arabtrvl.com/vb/t27629.html |
وعليكم السلام الله يحييك بيننا ما شاء الله اسم معرف متميز ما قصر ابو راكان الخبير الاسكندنافي طالما اثنين اشوف الشغلة مقدور عليها بس محتاجة شوي ترتيب مسار الرحلة المقترح حسب راي حضرتنا الرياض فرانكفورت الرياض ذهاب وعودة نشتريها من عطلات السعودية وهذي راح تكون محطة تسوقنا بالنهاية من المطار نتوجه الى كوبنهاقن ونعتمد النرويجية او ساس ايهما ارخص ونقضي فيها 3 ايام ومن هناك نفس الطيران على ستوكهولم ونقضي 3 ايام ومن ستوكهولم الى اوسلو 7 ايام نستلم السيارة وعلى بيرجن ونزور فلام واللي حواليها ومن اوسلو على فرانكفورت 2 يوم للتسوق فرانكفورت كوبنهاقن 3 ايام ستوكهولم 3 ايام اوسلو 7 ايام فرانكفورت 2 يوم الان لو عندكم زيادة ايام ممكن تضيفون هنا وهناك مهم جدا نختار السكن بعناية من موقع airbnb وترى حتى 3 نجوم عندهم نظيف جدا الدول الاسكندنافية من ناحية الطبيعة شي خيالي وتعامل راقي جدا لكن الحياة فيها اقل من اوروبا الغربية يمكن استثني ستوكهولم الرائعة اشبه ماتكون بحياة الريف وكل واحد بحاله في اسكندنافيا لا يمكن مقارنتها بحياة لندن باريس امستردام او حتى فرانكفورت |
اقتباس:
معلومات كافية ووافية وضحت لي الصورة كثير فشكرا جزيلا بالفعل بعد البحث المكثف وجدت الأنسب طيران الإمارتية لكن أخليها الرياض ستوكهولم ، العودة أفضل من أوسلو للرياض ؟ أو كوبنهاقن الرياض ؟ |
| الساعة الآن 12:04 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO