|
أفضل وسيلة تنقل في لندن . السلام عليكم .... جزاكم الله خير احنا 6 اشخاص كبار رايحين لندن ان شاء الله .. ونبي نعرف ايش افضل واوفر وسيلة تنقل لنا في لندن (علماً اننا رايحين نتمشى نبي نمشي كثير ) ماعدا المناطق البعيده نحتاج وسيلة نقل .. احترت بما اننا 6 ؟ ايش نعتمد عليه في تنقلنا ؟؟ تكسي ، اوبر ، اويستر كارد ؟ الاويستر لنا 6 راح تكلفنا 180 باوند لاسبوع واحد واحنا اتوقع ماراح نركب كثير :/ فكرت في اوبر في احد مدحهم لي ويقول اعتمد عليه في لندن مريح واوفر من التكسي بس هل اوفر من الاويستر ؟؟ شرايكم ؟؟:e419: |
اوبر يكون تاكسي واو اي شخص مشترك بالخدمة ويكون قريب منكم يوصلكم للمكان اللي تبغونه ممكن تاكسي او سيارة خاصه بس أكيد بيكون سعره ضعف الاويستر وللا تنسين ان التاكسي الواحد ما يحمل الا خمس اشخاص واكيد بتاخذون تاكسيين فبيكون دبل أحسن شي لكم الباص والميتروو اختي انتي وايد تستفسرين عن الأسعار فصدقيني الباص اوفر هو والقطار والمترو بس حجزيي بدري وانا احب الباص لأن حتى لو بتمشين بالسوق وشارع الأكسفورد ركبي الباص ليوصلج من محطه لمحطه حللي تذكرتك لا تحاتين ،،،،، وياريت تكون استقساراتك حبيبتي استبرق بموضوع واحد علشان انتي ما تتعبين بالبحث وقت السفرة وحياج |
الله يسعدك بس قالوا لي استفسري بموضوع خاص علشان كذا افصل ... طيب رايك اننا ناخذ اويستر ؟ طيب ايش تشمل الاويستر وكيف استخدمها ؟ يعني هي تشمل الباصات الحمراء الكبيرة مال لندن ؟؟ |
نعم تشمل التيوب وباصات لندن الحمراء |
اختي اولا ماعتقد الاوبر اوفر من الاويستر ثاني شي انتو ماشاء الله 6 اشخاص وتكاسي لندن معظمها تشيل 5 اشخاص 3 اشخاص بالكراسي الثابته وكرسيين ينفتحون فقط و اوبر مب بأي وقت راح تحصلين تكسي لعددكم الافضل تكثرون من الباصات بطاقه الاويستر تقدرون تشترونها للباص فقط وتقدرون تاخذونها للمترو فقط وتقدرون تشترونها للأثنين معا انا اخر مره شريت للباص فقط لمده اسبوع اعتقد طلعت 36 او 27 باوند في لندن من افضل وسائل النقل للباصات والمترو بالعالم وخاصه بالباصات ممتازه جدا جدا جدا انا مؤيد لها وبقوه وتصلح لكم فقط لما تركبين الباص مرري كرت الاويستر على الجهاز داخل الباص واصعدي حتى لو كانت البطاقه داخل محفظتج مايحتاج تطلعينها واذا تبغين اساعدج بطريقه التنقل او ارقام الباصات انا حاضر بالتوفيق يارب |
الباص وناسه وما يحتاج خوف تركبين وجهاز عند السايق راح تشوفين الركاب قبلج يسون نفس الحركة سوي نفسهم وخلاص يفتح ليت اخضر يعني اوكي، واذا تبون مكان ماتعرفون وين تنزلون تقدرون تطلبون من راعي الباص انه ينبهكم على المكان اذا وصل وبعد في شاشه تعرض اسم المنطقة ويكتب بعد الاسم في الباص تقدرون تشوفونها والله المسهل |
أنا مثلج إن شاء الله سفرتنا بأوغست و كنت جاية أسأل نفس السؤال و أنا بحثت و بحثت عن أفضل وسيلة تنقل لقيت مثل ما قالوا لج الأخوان و الاخوات الباص و الميترو و أنا حبيت الباص أكثر يمكن المترو أسرع بس الباص بتركبينه و بتشوفين لندن و تستمتعين بالجو فبإذن الله إننا بنركب الباص و يا ليت الأخ qa6ar911 إذا ما عليه كلافة يورينا نموذج مع العلم إني حفظت أرقام الباصات من قوقل ماب واضح فيه كل شي |
| الساعة الآن 09:35 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO