القيادة في الشمال التركي والحقائب
 

السلام عليكم ورحمة الله وبركاته.

بإذن الله بنقضي أنا والأهل ١٦ يوم في الشمال التركي خلال شهر يوليو المقبل. خلاص الحمدلله التذاكر محجوزة من وإلى طرابزون والجدول مكتمل والفنادق محجوزة في ٤ مناطق مختلفة، وأيضا حجز مبدأي لسيارة مع سائق طوال المدة. طبعا الجميع يشجع على ايجار السيارة بدون سائق، وأنا كشخص أيضا أفضل هالشيء من تجارب مختلفة في دول عديدة سابقا، لكن متردد هنا فقط بسبب موضوع الحقائب. يعني نحن ٥ أشخاص فغالبا بتكون عندنا من ٤ ل ٥ حقائب كبيرة، السيارة مع السائق فان وعن تجربة تكفي هالعدد من الشنط، ولكن متخوف اذا حجزت سيارة بدون سائق ما أحصل شي مناسب. فعلا بحثت والسيارات اللي سعرها مناسب وتتسع لهالعدد من الحقائب قليلة غير انك ما تضمن انهم يعطوك نفسها لما توصل، اما الفانات فسعرها مبالغ فيه وأغلى من اني استأجر فان بسائق بكثير، غير اني ما أفضل أسوق فان كبيرة وحدي. بناءا على كل ما تقدم، طرحت هالموضوع استفيد من خبراتكم وتجاربكم في موضوع الحقائب؟ مع العلم اني الرجل الوحيد من بين الخمسة بالتالي ما ممكن نستأجر أكثر من سيارة واحدة.

عليكم السلام

رحلة سعيدة بأذن الله

ايجار السيارات في الشمال التركي فترة الموسم مزعج جدا واسعار مبالغ فيها

طيب فيه حل ممكن تستأجر سيارة بدون سائق تقودها بنفسك حتى تروح وترجع على راحتك اما في الايام التي تحتاج تغيير السكن ممكن تستأجر سيارة فقط لتوصيل الشنط للمكان الجديد

الأسعار مع السائق اللي حاجزنها حاليا الحمدلله معقولة، لكن السيارات الكبيرة بدون سائق فعلا مرتفعة وغير منطقية. عالعموم اقتراح طيب منك أخوي فبحاول أتواصل مع الشركات اذا يقدروا يوفرولي سيارات كبيرة مع سائق فقط في أيام التنقل وفي نفس الوقت أخذ سيارة متوسطة لنا لكامل الفترة. حتى لو كلفنا الموضع أكثر شوي بيعطينا حرية التنقل.

مشكور مجددا أخوي على اقتراحك.

حاولت فعلا في الشركة المذكور لكن للآسف كل السيارات الكبيرة غير متوفرة في فترة رحلتنا، أما سيارة داستر فصغيرة ما تكفي الشنط للآسف الا اذا نقصنا الملابس بشكل كبير وما أظن بنقدر نسوي كذا.

مقترح اوردو مقترح طيب بحكم ان ضمن رحلتنا بنقضي فيها ٣ ليالي في بداية الرحلة، فممكن بشوف اني أبدأ الإيجار من هناك بدل طرابزون.

شكرا أختي على الإقتراح.

ممكن تخبرني جدولك واسماء المناطق والفنادق لو ماعليك امر

رحله ممتعه :1: