|
مواصلات سنغافورة السلام عليكم وورحمة الله وبركاته اعذروني على كثرة الاسئلة ولكن لدي استفسر مهم جداً الا وهو المواصلات في سنغافورة طريقة استعمال الميترو والباص بحثت في كثير من المواضيع وفهمت للميترو شوي لكن الباصات عجزت افهم طريقتها بالضبط هل اركب ميترو ثم انزل واركب الباص ولا كيف بالضبط وانا اابي كل تنقلاتي بالميترو والباص وش افضل بطاقة اشتريها وللمعلومية ماعمري ركبت ميترو ☺ في قوقل ماب يعلمك اماكن انتظار الباصات واذا ضغطت عليه تطلع لي ارقام كثيرة مدري هي ارقام الباصات ااو الرحلات ومتى عطلة سنغافورة الاسبوعية اتمنى تساعدوني ووبارك الله فيكم وجزااكم الله خير |
و عليكم السلام البوابة هنا مخصصة لاستفسارات الفيز فقط سأقوم بالنقل لاستفسارات دول آسيا الاخرى |
اقتباس:
العذر والسموحة ما انتبهت للقسم |
مترو سنغافوره زي اندرقراوند لندن ما يضيع أبداً و له 3 خيارات يوم / يومين / ثلاثة تقدر تطلع الباصات و القطارات بلا حدود شوف اسعار كرت السياح فيه (10) دولار قابلة للارجاع عند ارجاع الكرت http://www.thesingaporetouristpass.c...015/06/STP.jpg |
اقتباس:
جزاك الله خير وباارك الله فيك |
وعليكم السلام ورحمه الله وبركاته التنقل داخل سنغافوره بالمواصلات العامه سهل جدا التاكسي انصح ب استخدامه اثناء وصولك للمطار وعند العوده فقط وسعره مناسب جدا بخصوص البطاقه شرحها لك الغالي اخر فرصه رح لأقرب محطه اندرقراوند وتوجه لشباك التذاكر وورهم الصوره واطلب البطاقه حسب المده الي تبيها ولاتنسى ترجعها لأن فيه مبلغ 10 دولار يرجعونه لك بعدين طريقه استخدامه المواصلات العامه في ابلد اروح له هي عن طريق قوقل ماب تحدد من موقعك وتكتب اسم المكان الي تريد التوجه اليه على سبيل المثال انت في شارع الأورتشاد وتريد الذهاب لحديقه الحيوانات تحط نقطه الوصول singapore zoo وتختار وسائل النقل العامه راح يعطيك حسب المتاح بعض الأحيان المترو لحاله يوصلك ولاتحتاج تستخدم غيره وبعض الأحيان تاخذ المترو ثم تطلع فوق وتروح للشارع وتركب باص ثم يوصلك لجهتك وبعض الأحيان تاخذ باص ويوديك الين المكان الي تبيه ( قد يكون فيه تبديل بين الباصات مثلا تاخذ الباص رقم 941 وبيوصلك لنقطه معينه ثم من هناك تاخذ باص اخر رقمه 980 وهو الي بيوصلك لجهتك وهالشي هذا كله شارح لك قوقل ماب ارقام الباصات ومواعيدها طبعا تقدر تحدد وقت المغادره ( دائم يفضل تختار الأن ) بخصوص المترو فهو بسيط جدا فقط تحتاج تعرف وش المحطه القريبه من سكنك والمحطه القريبه من المكان السياحي الي تبيه تروح له عشان تنزل فيها مثلا : انت ساكن في شارع اورتشاد وتريد الذهاب لمنطقه المارينا تكتب في قوقل ماب وتحدد الانطلاق من موقعك الى اسم المنطقه او المعلم السياحي الي تريد الذهاب اليه خلنا نختار المارينا بيعطيك قوقل ماب عده خيارات ( باص + مترو ) حسب المتاح لأن بعض المناطق مايغطيها المترو فلازم تستخدم الباص معه وبعض الأحيان مالك الا تسخدم الباص فقط تتوجه في البدايه للمحطه القريبه من سكنك وتروح للمسار الي حدده لك قوقل ماب فيه عده مسارات ( بنفسجي , اصفر , اخضر , احمر , الخ ) وكل واحد منهم عليه محطات انت لازم تعرف اي مسار راح تاخذ وايش المحطه الي لازم تنزل فيها قوقل ماب قالك رح للمسار الأخضر مثلا وهالمسار له اتجاهين واحد راح شمال والثاني جنوب انت اول ماتدخل المحطه اتبع اللوحات للون المسار الي تبيه واذا وصلت بيجيك خيار للمسار انت هنا تشوف قوقل ماب بتحصله كاتب لك المسار كذا المتجه للمحطه كذا ( اسم المحطه ) تروح ل المسار وتوقف قدام البوابه وبتحصلك فوق مكتوب اسامي المحطات الي راح يمر عليه هالقطار اذا حصلت اسم المحطه الأخيره الي راح تنزل فيها موجود ف أنت في القطار الصحيح ونفس الشي في الرجعه تدخل على قوقل ماب وتسوي نفس الي قبل في البدايه بيكون فيه لخبطه عادي بس مره ومرتين وبتوضح لك الأمور التطبيق افضل من الشرح شف مقاطع باليوتيوب تشرح استخدام المترو وهاذي بعضها خاص بسنغافوره https://www.youtube.com/watch?v=JBXih9b77JA وهذا شرح للباصات في سنغافوره https://www.youtube.com/watch?v=A1Jhe4M4Mtw https://www.youtube.com/watch?v=bnWjvt8mP_g |
بخصوص الواي فاي والانترنت هناك انصحك بنصيحه وراح تغنيك عن الأنترنت التجوال وخرابيطه هذا موقع حصلته بالصدفه خاص ب اشياء كثيره يبع تذاكر يأجر واي فاي متنقل الخ .. انا حجزت منهم واي فاي متنقل لمده اسبوع ( استخدام مفتوح ) كلفني 200 ريال فقط وعندنا هنا تفعل بيانات تجوال 2 قيقا ب 150 ريال !!!!! هذا الموقع خش عليه واحجز منهم والدفع في المطار عند الوصول https://www.changirecommends.com/wifi_form.aspx تسجل معلوماتك ومده الأيجار وكم جهاز تبي واي تريمنال ورقم الجواز الخ .. طبعا الخطوط السعوديه تريمنال 3 فتحطه مكان الأستلام والتسليم في الأخير فيه خاص بالتأمين مكتوب عليه Insurance اسحب عليه عند العوده ترجعه لهم من نفس المكان الي استلمته معلومه : المكتب مقابل للبوابه الي تطلع للشارع عشان تاخذ تاكسي ابدا اول ماتطلع وتاخذ شنطنك امش وبتحصله عند البوابه واذا حسيت انك ضعت ابد اسئل موظفي المطار ويدلونك عليه اذا وصلت لهم وعطيتهم الحجز راح يطلبون انهم يسون بلوك على مبلغ في البطاقه ( كنوع من التأمين ) 200 دولار وبعدها يسلمونك الجهاز ( شنطه فيها الجهاز وسلك الشاحن ) اذا جيت ترجع لهم الجهاز بيخصمون منك وقتها قيمه الأيجار والمبلغ الي سوو عليه بلوك بيرجع لك بعد اسبوع تقريبا |
اقتباس:
مشكور مشكور مشكور طيب المطاعم فيه مطاعم تنصح فيها ولا نقضيها فاست فوود |
اقتباس:
العفو وحاضرين بلي نقدر عليه المطاعم انت وهواك انا نوعت صراحه فاست فود وفي منطقه الكلارك كيو تعشيت في تشيليز ( لايفوتك ) ومره تعشيت في الفندق هههههه ( ماطلع الا الساعه 11 والمطاعم اغلبها قفلت :thumbdown: ) بس بشكل عام ابتعد عن المطاعم الصينيه او الأسيويه |
| الساعة الآن 04:23 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO