|
تجربتي السيئة مع شركة Sixt لتاجير السيارات السلام عليكم ورحمه الله وبركاته بخبركم عن تجربتي السيئة مع شركة سيكست لتاجير السيارات اجرت سياره من الشركة من المحطة القريبة من محطة قطارات مانشيستر بيكاديلي من تاريخ 1-3 فبراير 2022 كنت ماجرة بيجو 3008 ( فوريل) اتوماتيك بسعر 319 باوند شامل تامين شامل ( صفر تحمل) المهم وصلت المكتب وقال لي تبين BMW X5 , قلت له بتسوي لي اب قريد بدون ما ادفع لك شي قال لي طبعا لا قلت له , خلاص خلني على البيجو ما بدفع فلوس وايد ( انا بهذا المبلغ اشوف السياره وايد غالية) وانا اول مره بحياتي أأجر سيارة في بريطانيا المهم دور في السيارات اللي عنده وقال لي عندي ادوي Q2 اوكي بالنسبة لج وعندي 600 مايل للاستخدام ومن بعدها يبتدي العداد يحسب علي قلت له اوكي توكل وعطني السياره شوي الا يقولي انتي التامين اللي مختارته مو شامل كل شي مع انه مذكور في الويب سايت تحمل صفر ولازم تدفعين زيادة سالته كم يعني؟ وصل سعر السياره مع التامين الى 382.88 باوند( الفرق 63 باوند) وافقت لان وصلت الساعه 1:50 الظهر ووراي خط الى الويندمير واول مره بسوق في شوارع بريطانيا وما ابي تظلم علي الدنيا, ابي اوصل والدنيا نهار شرح لي وين مكان السياره , وجيكت عليها يازعم وشفت شخطة وحده وصورتها شوي الا واصلني العقد من المكتب وكاتب فيه كل الخدوش الموجوده في السياراة واللي ما شفتها اصلا وصلنا الفندق قريب المغرب والامور طيبه ومستانسين على الفندق والاجواء يوم ثاني سوينا تشيك اوت ورحنا لفندق ثاني بعد التشيك اوت قررنا نطلع نستكشف المكان الا واحد من العمال اللي يشتغلون في الفندق يقول لي ترى التاير مبنجر انا هني انصعقت, كيف يعني مبنجر , ومتى بنجر وليش اصلا بنجر :28: ومو حزته قالي انا حصلت لج شركة بينفخون لج التاير اذا انت حابه بس انا خفت , قلت يمكن التاير فيه مسمار وما اعرف شنو سبب البنجر خفت اطلع ويرد يبنجر بعد ما ينفخونه قلت له بتصل على رقم Breakdown اللي عطوني اياه وبشوف قالي على راحتج بس هالموضوع بياخذ وقت طويل ذيج الحزه ما كنت حاسة لكلامه وقلت له انا دافعه تامين كامل واكيد بيطرشون احد يشوف شنو الخلل رحت للريبيشن وقلت لها دقي لي على رقم البريك داون ( طبعا اللي يشتغلون في الفندق كلهم دروا بالسالفة) طبعا هذا الكلام الساعه 1.30 الظهر قالت لي مالت الريبشين انتي ارتاحي وانا بتواصل معاهم عشان يصلحون التاير مسكينه تتصل وكل واحد يحولها على الثاني او اتم على Hold فترة طويله طلبوا معلومات عن التاير والعامل اللي هناك حليله ما قصر ووفر كل المعلومات رحت الغرفة ورقدت ومن حلات سريرهم رقدت نومه اهل الكهف صحيت على الساعه 6 المسا على امل ان انحلت المشكلة وقالت لي بيتصلون فيج بكرا الساعه 8.30 الصبح وبيخبرونج الساعه كم بيمرون ياخذون السياره قلت يللا ما عليه اهم شي سلامتنا وقدر الله ماشاء فعل والحمد لله صار الشي وانا في الفندق ومو في نص الشارع او محطة بترول الساعه 8:45 الصبح ما وصلني تلفون فرحت للريسبشن وقلت لها الموضوع وقالت اعرف موضوعج عطيني الرقم وروحي تريقي وانا بتواصل معهم عشان يحلون المشكلة بعد ساعه رديت لها , قالت لي قالوا بيتصلون بعد نص ساعه ومحد كلمني وتميت واقفه فوق ارسها لين الساعه 11:30تخيلوا اتصالات متواصله ما بين Breakdown الى Hotline نبي بس احد يشوف لنا الموضوع ويحله مافي من المواقف 1.توها الموظفه معرفها عن عمرها وانها من الفندق الفلاني قالت لها بحولج على الموظف المسؤول ؟؟ انزين انتي للحين ما عرفتي شنو المشكلة 2.الثانيه قالت لها الاسم اللي على العقد غير عن الاسم اللي انتي عطيتينا اياه ,ارجعي الى hotline وتاكدي من المعلومات؟؟؟ 3.طبعا غير التحويلات بين الموظفين بدون اي جدوى واخر شي قلت لها انا لازم ارجع مانشستر عشان اخذ قطار الى لندن وبصراحه ما ينفع اتم اكثر في الفندق كل النزلاء سووا تشيك اوت الساعه 11 وعرفوا بسالفتي وانا موقفه في الريبيشن ( الله يغربلهم خربوا رحلتي) :28: في النهاية الكل كان يتصل هي تتصل من الريبيشن والموظفين الباك اوفيس يتصلون عشان يحصلون لي حل اخر شي قالوا بنمر الساعه 3 الظهر بناخذ السياره وبنوديها للمحل وبنحل المشكلة قلت لها قولي لهم بعد مره وحده ياخذون السياره يرجعونها الى مانشستر لان ما اقدر اتاخر اكثر والله اعلم بييون ياخذون السياره ولا بتصير نفس مشكلة يوم امس وحجزت قطار من الويندمير الى مانشستر وصلني ايميل من الفندق الساعه 2 الظهر ان توهم ماخذين السياره على المسا وصلني ايميل من سكست فيه الفاتورة وكانت الصدمه العالمية حسبوا علي قيمة one way وترجعها للمكتب متاخر الساعه 8 المسا وقيمة السائق اللي وصل السياره من الويندمير الى مانشستر هذا كله بقيمة 300 باوند ( قيمة الوديعه من الكرديت كارد) طبعا وصل الغضب فيني حده طرشت ايميلات لخدمة العملاء وقلت لهم انا احتج على الفاتورة وانا عندي تامين شامل والمفروض ما تحسبون علي هذي الرسوم والبنجر من اهمالكم لانكم ما جيكتوا على السياره والسياره مافيها تاير اسبير وانا اطالب تردون الوديعه وتردون قيمة اليوم اللي ما استخدمت فيه السياره وقيمه التاكسي اللي وداني من الفندق للمطار وقيمة القطار وبعد 50 الف تذكير وصلني ايميل عطيني فواتير التاكسي والقطار!! التاكسي 10 باوند ودفعته كاش وماعندي فاتورة والقطار لشخصين يمكن 20 باوند هههههه ومطالباتي بترجيع الوديعه واليوم مالها طاري بعد يومين وانا في لندن كانوا مطرشين لي اييمل لتقييم الخدمة قلت بس ارجع الديره بلعن خير خيركم في التقييم وهذا اللي سويته , خسفت فيهم في التقييم يوم ثاني وصلني اتصال من المكتب من مانشستر وشكله عوره الكلام وقالي البنجر ممكن يصير في اي وقت والمفروض ما تحملين المشكلة على موظف المكتب وقانون بريطانيا اليديد ان مافي تاير اسبير في السيايير اليديده قلت له انتو خربتوا رحلتي وهي كلها يومين بس وبفضلكم وبفضل خدمة العملاء السيئة مالتكم تميت قاعده في الفندق بدل ما اطلع واستكشف المنطقة والسياره مشت بس 80 مايلز اتذكر كنت في كارفور حزة الاتصال وهو يصارخ وانا اصارخ هههههه شر البليه وقلت له رجعوا الوديعه وقال لي طرشي ايميل لخدمة العملاء قلت له طرشت ومافي رد وهذا دليل على خدمتكم الخايسة وتخيل ان هالموقف يصير لي وانا بشارع سريع ومافي خدمة وانا شاريه خدمة ودافعه فلوسها وما عرف شنو يقول وبس وسلامتكم هذي قصتي مع شركة تاجير السيارات وقلت توبه أجرر من سكست لا في بريطانيا ولا في اوربا واخر مره اخذها من مانشستر ومره ثانية اذا الله كتب ورحت منطقة البحيرات بروح كاندل وباجر السياره على الاقل اذا صار شي فيها اكون قريب منهم ومب بعيد بساعتين صورة السياره https://www.arabtrvl.com/up/uploads/...3532082661.jpg صورة التاير المبنجر https://www.arabtrvl.com/up/uploads/...3532099012.jpg |
و عليكم السلام و رحمة الله و بركاته ... الحمد لله على السلامة ... و شكراً على مشاركة التجربة دائماً نحرص و نشدد على أن يكون المستأجر متأكد مما يشمله عقده و خصوصاً التغطية في أوقات الطؤارى لأن بعض الشركات تتعمد تحصيل إي تكاليف من المستأجر حتى ولو بغير وجه حق !! بالنسبة لشركة SIXT's دائماً في عقودهم يكون تغطية Car rental with roadside assistance و هي تغطي تكلفة التعطل كما ورد في موقعهم: What is Roadside Assistance Protection? Car rental with roadside assistanceRoadside Assistance Protection is optional with your car rental and will be provided at no added cost for non-covered roadside emergencies such as replacement of lost keys or key fobs, key lockout service, flat tire service, jump-starts, and empty fuel tank issues. All the roadside assistance services can only be ordered by a direct claim with SIXT's 24-hour Roadside Protection at +1 (888) 749-8227, select option 6. بناء عليه ... من حقك المطالبة بأستعادة المبلغ |
يا الله يابو معتز توني اليوم استاجرت من عندهم في هولندا والله يستر https://uploads.tapatalk-cdn.com/202...1bb94215a2.jpg تم الإرسال من SM-N960F باستخدام Tapatalk |
اقتباس:
بصراحة انا شخصياً جربت الحجز معاهم في ألمانيا و في أمريكا و كانت تجربتي ممتازة … المهم تعرف عقدك و التغطيات اللى يشملها … و تأمينك يكون شامل تحمل (صفر) في أمريكا الصيف الماضي … أستلمت السيارة بعد وصولنا إلى واشنطن و مشينا إلى أورلاندو … و بعد أسبوع تعطلت السيارة (ميكانيكياً) و تواصلت معاهم و جابوا لي سيارة بديلة من نفس الفئة إلى قدام باب البيت و أخذوا السيارة المتعطلة و كل شئ على حسابهم ما دفعت دولار واحد … نتمنى لك رحلة سعيدة |
اقتباس:
وبالفعل انا متاكده من التغطية واللي انت ذاكره هذا في التامين الاساسي مالهم ( تامين طرف ثالث) ودايم ااجر من sixt في اوربا ومرتاحه معاهم وبتعاملهم واعرف التامين شنو يغطي وعشان افك راسي ادفع تامين زيادة واخذ صفر تحمل في حال السياره اندعمت او انسرقت او انكسر الزجاج ..الخ وهالمره نفس الشي اخذت نفس التامين لاني اعرف نظامهم واول مره تصير معاي مثل هذي المشكلة واكتشفت ان خدمة العملاء عندهم جدا سيئة يعني لو طرشوا الريكفري في نفس اليوم جان انحلت المشكلة وماصار كل اللي كتبته بس للاسف سيئين في بريطانيا واليوم واصلني ايميل منهم يقولون لي ما عندنا اثبات انج اتصلتي في خدمة العملاء واذا عندج رقم مرجعي ابعثيه لنا تخيل اتصالات على مدار يومين ويقولون لنا ان المكالمة مسجله واخر شي تقول ما عندها شي يثبت اني متصله انزين كيف ياا الريكفري وشال السياره؟ عرف بروحه؟ وكيف وصلت السياره لمانشستر بعد عرف السواق بروحه انه لازم يوصلها هناك ولا بناء على طلبي؟ هذي كلها تجارب نتعلم منها شكرا لحضورك |
اقتباس:
وان شاء الله ما تواجهه اي مشاكل وترجع بالسلامة اللي لاحظته حتى في سيارات اوربا تكون السياره فل ابوبشن في بريطانيا عطوني سياره الجير اتوماتيك بناء على حجزي والدرايش اوتوماتيك وباقي السياره كلها Manual هههه |
اقتباس:
فعلاً كل ما يمر بنا في السفر أو غيره "تجارب نتعلم منها ..." و أفضل شئ في السفر أو في التعامل مع أطراف أخرى للأثبات هو الأيميل بعد أي تواصل هاتفي أو رسالة نصية يتم توثيق المشكلة بشكل مفصل بالأيميل |
وعليكم السلام والرحمة ... الحمدلله على السلامة .. بس لحد الان ماعرفنا وش سبب البنشر ؟ فيه مسمار التاير ولا ايش ...؟؟؟ صحيح مافيه اثبات عندك من اول يوم بنشر للسيارة خصوصا اذا ماكان ايميل بس حاولي اكثر من مره وصعدي الموضوع للمانجر واللي فوق خليها كلها مراسلات بالايميل ... واذا فيه فرع لـ Sixt في البحرين تواصلي معهم بمشكلتك وخليهم يمسكون الموضوع .. هذي صارت لي في آيفيس بالمانيا كلمت اللي بالسعوديه وتواصلت معهم وشافوا الموضوع معهم هناك .. بالعربي لاتسكتين عن حقك صبحي ومسي عليهم . |
مـــــــــا أخفيك هما طمعوا لما سويتي Upgrade ,اعتقد انو الموظف الموجود في نفسه شئ ، شكراً على نقل التجربة والله يعوض عليك وأكيد هذا الموقف الكثير يستفيد منه . |
اقتباس:
يوم دخلت والويب سايت مالهم في قسم Help في اسئله واوجوبه ورقم hotline اللي مامنه فايده مافي اي ايميل لهم |
اقتباس:
وانا نفسك للحين ما اعرف شنو سبب البنجر هو مسمار ولا ضغط الهواء نازل انا كل يوم اطرش لهم ايميل هم اخيرا وافقوا ان ترجع الوديعه والمفروض اليوم اكمل 14 يوم وتنفك الوديعه بس بعد مارجعت للبنك قالوا لي مافي مبالغ على Hold ورجعت الى كشف البنك لقيت خاصمين المبلغ كامل واليوم من الصبح ايميلات معاهم اذا شفت مافي فايدة بدور فرع سيكست يمكن يقدرون يساعدوني شاكرة لك تواجدك وتعلقيك |
اقتباس:
انا ما سويت upgrade خذيت اودي Q2 وهي من نفس فئة بيجو 3008 واتمنى بالفعل الاعضاء يستفيديون ويدقوون ويسالون , لاني توقعتهم مثل سكست اللي في اوربا سهلين انا اللي غربلني خدمة العملاء عندهم جدا سيئة شكرا على مروروك وتعليقك |
الحمد لله على السلامة وموضوع استفدت منه .. شكراً لك |
اقتباس:
وشكرا على المرور |
ابشركم الحمد لله بدت الشركة تستجيب للايميلات والصور وغيرها وبدت ترجع لي المبالغ المستحقة لي |
اقتباس:
خبر ممتاز ... ما يضيع حق وراه مطالب |
اقتباس:
|
بو معتز الحمد لله , في الاخير استجابت الشركة للطلبات وفهموا ان الخطأ مو مني حازم اي الحمد استجابو للشكوى ورجعوا مبلغ الوديعه بالكامل |
اقتباس:
الحمد لله .. أبسط حقوق العميل المطالبة و على الشركات تعديل الخطأ من أجل سمعتها و هذا هو أسلوب التعامل في الشركات الحريصة على سمعتها بالتوفيق |
اقتباس:
الحمدلله بعد كل هالتعب اخذتي حقك ، بس ودنا نعرف وش سويتي بالضبط هل صعدتي الموضوع لأحد في الشركة ولا بس مراسلاتك مع نفس الشخص وفهم الوضع ؟ مع انهم في البدايه رفضوا وش اللي تغير ؟ |
اقتباس:
بعدين وصلني تقييم من الشركة عن الخدمه وخسفت فيهم الارض ومن بعد التقييم ياني اتصال من مكتبهم في مانشستر وسالني عن اسباب تقيمي وقال لي بانهم بيردون لي الوديعه , بس هذا كلام بالتلفون وماعندي شي رسمي فتميت ارسالهم واطرش لهم تذكير والحمد لله استجابو لي اول شي رجعوا لي مبلغ الوديعه ناقص وحسبوا علي one way location وتاخير في تسليم السياره وتناقشت معاهم وقلت لهم انتوا استلمتوا السياره من الفندق وانا ما اعرف اصلا وين رجعت وبعد ما رجع للنظام , قال لي بالفعل الغلط من عندنا هم وصلوها المطار اول شكوى كانت بتاريخ 4/2/2022 واخر ايميل بيني وبينهم وتاكيدي اني استلمت مبلغ الوديعه بتاريخ 22 فبراير يعني تقريبا 3 اسابيع للمطالبة |
اقتباس:
سكست شركة عالمية ولها سمعتها عشان جذي دايما افضل استاجر من الشركات العالمية حتى لو اغلى من الايجار من الشركات المحليه اللي ما بتقدر توصل لحقك بعد ما ترجع لبلدك |
| الساعة الآن 01:38 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO