رحلتي جـزر المالديف

سحيم السليطي · 28-08-2015, 11:26 AM

السلام عليكم ورحمة الله وبركاته

سفرتي الي جزيرة مالديف تعتبر اول سفره لي الي الجزيرة الخيالية

المهم . .

شلونكم ؟

وبما ان اللي ياخذ اجازة ويقعد في الدوحة هو غلطان واكبر غلطان . .

فقررت وبكل تأكيد أني اسافر . .

طيب هممم وين نروح وين نروح وين نروح . . .

اها !!

المالديـــف . . !!

المالديف كانت في بالي من فترة طويلة . . يمكن قرابة السنتين . . لكن كنت انتظر الوقت المناسب . . والوقت المناسب يعني بعد الزواج . . لان المالديف كما كان يبدو . . وكما اقتنعت عند ذهابي لها . . ما تنفع إلا للمتزوجين . . اما العزاب عندهم مشيرب والكورنيش يتصورون فيه ابرك

بدات في البحث والتحري عن الفندق المناسب . .

ومن وجهة نظري اهم شي في المالديف هو ان الفندق يكون مناسب . .

قولوا ليــــش ؟؟

اها قلتوا ليش . . لأن المالديف . . لمن لا يعرفها . . .هي عبارة عن مجموعة كبيرة من الجزر . . وكل فندق ماخذله جزيرة لوحده . . فالفندق هو الجزيرة والجزيرة هي الفندق . . وهذا يعني ان ماعندك لا تقول بروح اتعشى شوارما اليوم . . ولا باروح اتمشى في بطيخ ستريت . . ولا في سوق . . وهذا اهم شي

100 % من وقتك انت مربوط بالفندق . . بمطاعمه وبأنشطته . .

عملية البحث كانت اكثرها على موقع السفر المفضل لدي

Reviews of vacations, hotels, resorts, vacation and travel packages - TripAdvisor

الصراحة هذا الموقع - توب - يتيح لك البحث عن الدول والفنادق والمطاعم والمعالم السياحية . . وانا شخصيا ً قبل ما اروح اي فندق اجيك عليه في ترب ادفايزر لانك تجد تقارير عن الفندق . . وصور التقطها النزلاء السابقين . . وهذا يعني انك تشوف صور حقيقية بعيدة عن تلميع وتفتشيب موقع الفندق الرسمي . . وتاخذ معلومات حقيقية ومجرّبة عن الفندق وفخامته ونظافته ومستوى الخدمة . .

المهم . .

في النهاية وقع الاختيار على فندق كونراد رانجالي Conrad Rangali . .

وهو الفندق الذي كان يعرف زورا ً وبهتانا ً وسابقا ً باسم هيلتون رانجالي . .

اسباب اختياري لهذا الفندق كثيرة . .

- الفندق يقع على جزيرتين . . وهذا يعني ان مساحته دبل مساحة الفنادق الاخرى . .

- الفلل المائية منتشرة على كل مكان ف الجزيرتين . . بينما في اغلب الفنادق الاخرى الفلل المائية كلها مصفوفة عند بعض . . وهذي ميزتها انك تحس بخصوصية أكبر . .

- المطاعم متنوعة في الفندق ( سبعة مطاعم )

- في موقع تريب ادفايزر . . تقريبا ً فوق 90 % من التقارير كانت تمدح الفندق . . وهي ما وجدتها في غيره من الفنادق . .

- في استطلاع للموقع . . حصل لسنتين على التوالي على ( افخم فندق / منتجع في العالم )

وفي الفندق خمس انواع من الغرف . .

Beach Villa

فلة شاطئية . . او شاليه بالاصح

Deluxe Beach Villa

فلة شاطئية مع حمام سباحة خاص . . بس تراه صغير . .

Water Villa

وهذي اللي حجزت فيها . . فلل فوق الميّه . .

Superior Water Villa

مادري شالفرق بينها وبين العادية !

Spa Water Villa

تتبع سبا الفندق . . وهي الأكبر حجما ً لوجود غرف خاصة للمساج فيها . .

Deluxe Water Villa

هذول فيهم جاكوزي . .

أسعار الغرف تبدأ من 3300 ريال في الليلة للبيتش فيلا حتى 5800 ريال للديلوكس ووتر فيلا . .

طبعا ً هناك أيضا Sunset Water Villa وهم فلتين كل وحده لها مسبحها الخاص المحفور في البحر . . وارضيتها زجاج . . وغرفتين نوم .. وفيها بلاوي وحركات . . لكن كل شي بحسابه طبعا ً !!

المهم توكلت على الله وحجزت ووتر فيلا عادية من عند السفريات لمدة 4 ليالي . .

انزين كأني قاعد ابربر وايد بدون صور . .

خلونا نبتدي أول شي هذي صور من الطيارة قبل هبوطنا صباحا ً في مطار العاصمة مالي . .

بالمناسبة . . حسب كتيّب الفندق . . 99,66 % من مساحة المالديف هي من المياه . . والنسبة الضئيلة الباقية هي الجزر !!

وصلنا بحمد الله ورعايته إلى المالديف . . ومثل ما تشوفون المطار صغير ومجكنم وما كان فيه ذيك الحزة غير طيارتنا وطيارة إماراتية . . ولا في باصات ولا هم يحزنون انزل وامش لين المبنى . .

خلصنا اجراءات الجوازات وخذنا شناطنا وطلعنا . .

اتلفت يمين يسار . .

وين اللي مفروض ينطرنا من الفندق ؟؟

جا واحد مالديفي اصلي وكلمني قائلا ً : انت يالاخو . .

انا : هاه . .
. . . ويش تمبى ؟؟

هو : وين رايح انت ؟؟

انا : كونراد رانجالي . .

هو : شفت هالكاونتر ؟؟ روح هناك . .

انا : مشكور وما تقصر . .

لمهم مشينا خطوتين لين الكاونتر وفجأة نقز جدامي واحد في صورة عمو علاء الدين بس على جينز . .

هو : انت مستر السلطان ؟؟

انا : هيه . .
. . . ويش تمبى ؟؟

هو : حياكم الله في المالديف . . نورتونا . . هاك هذا الفاوتشر عطه للفندق ؟؟

وراح عمو علاء الدين وجاء مندوب الفندق . . وتم يتأسف لين ما قال بس على انه خلانا ثانيتين ننطر . . المهم خذنا بو الشباب للباص . . ومن الباص الى مطار التاكسي المائي . . وتحديدا ً إلى قاعة الفندق الخاصة . .

وطلب منا تعبئة اوراق التشيك ان والانتظار لين موعد الطيارة المائية . .

مع العلم . . بأن كونراد هو المنتجع الوحيد اللي عنده قاعة انتظار . . اما باقي الفنادق فلابد لنزلائها انهم ينطرون في الحر والرطوبة

وعلمنا هناك بوجود ساعة فرق بين العاصمة مالي وبين المنتجع . .

المهم نطرنا حوالي هاه ربع ساعة ثلث ساعة . . لين ما جانا ابو العريف مرة ثانية . . وقالي حياكم معاي . .

طيارة الفندق الخاصة اللي ما ركبناها . .

تكاسي المطار

استعداد للانطلاق

آخر فخامة من الداخل . . مراوح وكراسي جلد والطيار حافي !!

ويلاحظ من الصورة ان مافي غير الكبلز والمتزوجين

صورة لمنتجع آخر من الجو . . اعتقد ان ما خاب ظني هو فندق تاج اكزوتيكا

وصلنا إلى الفندق . .

وهو عبارة عن جزيرتين موصولين بجسر . . وفي وسط الجسر منطقة الاستقبال والمغادرة للطائرات المائية . .

ما ان نزلنا من التاكسي بعد رحلة ممتعة وحارة استمرت حوالي 45 دقيقة . .

.

مشينا ورا زاهر على الجسر حتى وصلنا لوبي الفندق . . وكان الخبر السعيد ( سوينا لكم ابجريد لـ Spa Water Villa) . .

المهم جلسنا وجابوا لنا عصير مادري شلون شكله . . اظن جوز الهند وشي معاه . . وبالاضافة الى عسكريم ليمون . .

وبعدها بخمس دقايق جانا الاخ زاهر محملا ً بالاوراق منها خريطة الفندق ، وتأكيد حجز بعض المطاعم و، وورقة بالانشطة والرحلات وغيرها . . وعقب ما خلص من هذرته جزاه الله خير خذنا على ظهر سيارة الجولف الصغيرة إلى محل إقامتنا الميمونة لليالي الأربع القادمة . .

نترككم الآن مشاهدينا مع جولة في الفلة المذكورة . .

فيلا 403 من الخارج . .

منظر على البحر من الفيلا . .

البتاع اللي هوّه . .

واستقبال كان بالغيوم . . أولا ً . .

والرعد ثانياً ( طبعا ً ما يبين في الصورة *j13* )

والأمطار ثالثا ً . .

وبالمناسبة . . بعد ما حجزت ودفعت كل شي . . اكتشفت ان شهر يونيو ( اللي سافرنا فيه ) فيه أكبر معدل لهبوط الأمطار في المالديف . . يعني شي مب شي *34* . .

البتاع الثاني بتاع البتاع . .

الفيلا المجاورة لفلتنا . . كانت خالية طوال فترة اقامتنا هناك . .

هذا البحر ولا بلاش . .

الفيلا المجاورة لنا . .

الدري مباشرة من الفيلا ع البحر . .

لكن صراحة كانت في مشكلتين . .

الاولى . . المنطقة تحت الفيلا مباشرة كانت كلها صخور . . لذلك صعب الواحد ينزل بدون ما يلبس شي في ريله . .

الثانية . . وهذي ع عموم المنتجع . . بعد الساعة 3 العصر تقريبا ً السباحة تصير مستحيلة وخصوصا ً عند الفيلا بسبب الأمواج والتيارات القوية . .

قبقوب . . كان ينخش تحت الدري . . بس صار رفيجنا بعدين . .

صور الفيلا من الداخل . .

المبيد لزوم القضاء على بعض الكائنات غير المرغوب فيها *64*

لايف جاكيت عشان محد يجيب العيد . .

يتبع

عدة الغطس . . تاخذها من مركز الغوص مجانا ً طول فترة إقامتك . . والصراحة اجمل مافي المالديف بالنسبة لي كان الغطس ومشاهدة الألوان والأشكال البديعة والعجيبة الغريبة من ( السمش / السمج / السمك ) . .

بعد ما اخذنا خمدة بسيطة بعد وصولنا لكمن ساعة . .

كان بالطبع اول شي نسويه هو اخذ لفة حول الجزيرة الرئيسية . .

Spa Water Villas

برضه Spa Water Villas

الجسر اللي يربط الجزيرة بالفلل . .

جانب من الجزيرة الرئيسية . . وفي الخلفية الجزيرة الأخرى . .

لزوم التفهي . .

فرص لا تقدر بثمن *64*

فلان مر من هنا . .

العواصف قادمة . . كما يبدو

قواقع

أشجار جوز الهند منتشرة في كل مكان . .

قباقب *28*

الدوني ( لنج مالديفي محلي ) . . وفي الخلفية الجسر ومنطقة استقبال التاكسي المائي . .

هذا المكان اللي يشرح الصدر . .

وينسيك حفر الدوحة وزحمتها *64*

دوني آخر . . يستخدمونه في نقل الضيوف من الجزيرة إلى الجزيرة الاخرى والعكس . .

نقل المواد التموينية . . واحد من اسباب غلاء المالديف ان كل شيء ينقلونه بالبحر . . يعني تكلفة اضافية . . عاد هذا كلامهم مادري صج ولا عيارة . .

ممرات وسط الجزيرة . .

كوفي شوب . . وبار . .

مركز الرياضات المائية . .

المووجووود والماااموجوووود تلقاه هنانه . .

بس بيني وبينكم أجرنا سكوتر وحسينا التجربة هممم . .

لان المنطقة اللي تقدر تتحرك فيها محددة وما تقدر تتخطاها . .

فيعني . . مب مكانه *64*

مطعم Atoll Market

بوفيه الفندق . .

فيه بوفيه مالديفي . . هندي . . ياباني . . إيطالي . .

الأكل بصراحة كان لذيذ فيه . .

جلسة في الكوفي شوب . .

صــور إضافية للفيلا ليلا ً . .

النجوووم كما تبدو في سماء المالديف

في اليوم الثالث كان لدينا موعد لرحلة صيد خااااااصة لمدة خمس ساعات . .

تبدأ من الساعة السابعة صباحا ً . .

وتنتهي في الساعة الثانية عشرة ظهرا ً . .

طبعا ً كلمونا الرسبشن وقالوا ترا كل شي بنجهزه لكم الفطور والغدا وصيدكم بنطبخه لكم ع العشا . .

قلنا والله تمام وشغل عدل . . *101*

قمنا في اليوم الموعود وع الساعة 7 كنا موجودين في لوبي الفندق . .

وامامنا الجماعة يجهزون اليخت . .

شوي ولا يجيني واحد . .

هو : مستر السلطان ؟؟

انا : هيــه أنا . .
. . . ويش تمبى ؟؟

هو: محسوبك الكابتن يوسف . . كابتن يختكم الخاص لهذا اليوم . . حياكم ويانا . .

تفضلنا مع الكابتن يوسف . . وركبنا ذاك اليخيت الحلو . . واقتصدنا في تصويره على اعتبار ان بنصوره ( بعدين ) . .*j11*

الكابتن يوسف والاخ مساعده . .

جزيرة صغيرة تابعة للفندق يقومون برحلات خاصة لشخصين اليها . .

طائرة مائية . .

وكمان طائرة مائية . . *101*

الكابتن يوسف . . جائنا وبعد ان غادرنا متسائلا ً . .

هو :شلونكم مع دوار البحر ؟؟ *64*

انا : همممم مادري

هو : شرايكم تاخذون الحبة . . ترا اليوم الموج عالي واكيد بتحسون ان راسكم يعوركم . .

انا : يالله ما نقول لا . .

هو : بس ترا بتاخذ ساعة على ما يبتدي مفعولها *64* . . لكن ان بدا راسك يدور . . خلاص انسى !

سوينا مثل ما قال . . وخذنا الحبة . . لكن المفاجآت بدت بعد فترة قصيرة جدا جدا . .

شوي الحبيب قام يدخل في المحيط . . وكل ما يدخل . . كل ما يعلى الموج . .

لحد الحين كل شي تمام . .

وجابوا لنا الفطور البسيط . .

هاه اهني شوي بديت احس . . كأن راسي يعورني ؟؟

المهم رحت لهم مكان ما مثبتين السنارة . . طلعت السالفة كلها ان الواحد اجر الخيط وبس . . عاد انه صاد *34*

ومع مرور الدقائق . . يزداد الراس انتفاخا ً . . والكبد لوعة . .

حتى إذا ما وصلنا إلى هذه اللقطة . .

مسكتها . .

صورتها . .

سلمتها لهم . .

هني . .

قعدت . . . وأشرت ليوسف . . ترا خلاص !!

فاشار لي بسبابته إلى الماء . .

ثم . .

بووووووووووووووووووووووووووووووووووووووووووووووووو وووووووع

اقدر اقول وبكل فخر . . إني ربما اكون العنابي الوحيد الذي ترك ( بصمته ) في المحيط الهندي . . بالمناسبة كان وردي نظرا لاني كلت روب بالفراولة . .

المهم الجماعة شكلهم متعودين ع المنظر . . جابوا لي ماي وفوطة مبللة . .

وحسيت بتحسن نسبي . . وتم اصطياد السمكة الثانية . .

لكن هني بدت الأمواج تتلاطم ( وفي رواية تتطاطم ) . . واحنا يمين ويسار . . ومع كل ميلان لليخت احس ان مخي يطلع من راسي ويرجع مرة ثانية . .

حتى حانت الحزة اللي لا مفر منها . . .

بووووووووووووووووووووووووووووووووووووووووووووووووو ووووووووووووع

هني . . قلت مالت عليكم وعلى اللي يبي يستانس وياكم . . ردوني الفندق يالله . .

المهم . . رجعنا الفندق . . والرحلة من خمس ساعات صارت ساعة ونص فقط . .

بعد العودة من الرحلة كان لابد من أخذ قسط من النوم لمعالجة الصداع الشديد . .

اما بقية النهار فقضيناه في التمشي . .

والتفهي *64*

مطعم فيلو Vilu ع الجزيرة الثانية

الدوني يقوم برحلة بين الجزيرتين . .

الفلل المائية العادية . .

من الأماكن اللي يتميز فيها منتجع كونراد المالديف . .

احتواءه على المطعم الوحيد في العالم والموجود بالكامل تحت الماء . .

عاد هل هو فعلا ً المطعم الوحيد مادري بس هم يقولون هيك . .

الحجز للمطعم هذا واسمه

إيتا

Ithaa

يجب أن يتم باسبوعين على الاقل حتى تضمن وجود طاولة لك . . لان المطعم صغير ولا يضم سوى 8 طاولات . .

لكن على حظنا في يومنا لم يكن هناك سوى اثنين اجانب ( زوج وزوجته ) فقط . . يعني خذنا راحتنا إلى حد ما

مدخل المطعم

ثم صور المطعم من الداخل

المطعم هذا فيه مينو واحد فقط . . ولا يمكن أن تختار سوى الطبق الرئيسي بين السمك او الستيك . . اما الباقي فغصبا ً عليك تاكله . .

أولا ً . . شاي مالديفي بالاعشاب . .

اختياركم من الخبز . . هنا خبز بالموز وخبز بالفلفل الحار . .

المقبلات . .

الشوربات

طبق اللوبستر . . كان عجيب !!

الرئيسي . . الستيك

الرئيسي . . السمششششش

السويت . .

وفي النهاية . . أعطونا هذه اللؤلؤة كتذكار من المطعم . .

يتبع

أبن السلطنة, ماجد الفهد و أبوعبدالله (الاسفار ) معجبون بهذا.

سحيم السليطي · 28-08-2015, 11:27 AM

في الليلة الأخيرة لنا في المالديف . .

قدمت اقتراح بأن نذهب للتمشي في الجزيرة الثانية لان ما رحنا لها . . وبالمرة نتعشى هناك . .

طبعا ً كنت ابي اروح هناك لغرض في نفس يعقوب *64*

في الطريق إلى الجزيرة الثانية . .

فلل السبا كما تبدو من بعيد . .

فلل مائية عادية . .

مطعم فيلو . .

همممم

اممممم

Over Water Spa

الخاص بالجزيرة الثانية . .

Superior Water Villa

. .

. .

أما هذيلا فينطبق عليهم قول محمد عبده : ( وانا تلقاني بكل شارع وسكة . . امشي في ظلك واحساسي معاك )*64*

بس تراهم أليفين . .

وما يعضون . .

رايح فييييييييييين

. .

. .

. .

. .

خفاش *64*

. . المهم عقب ما خذنا جولتنا حول الجزيرة . . ودقت الساعة السابعة والنصف تقريبا ً . .

وبينما نحن نتمشى . . كما كان يبدو . . على غير هدى . . واذا برجل متشح بالسواد يخرج إلينا . .

ويناديني قائلا : مستر السلطان ؟؟

انا : هيه انا . .
. . . ويش تمبى ؟؟

هو : محسوبك حبيب . . فولو مي بليييييز . .

وتبعنا الاخ الحبيب حبيب . . إلى هذه المفاجأة الصغيرة . .

هذي الله يسلمكم الفندق يضبطها لك . .

ممكن تختار جلسة ع الارض او طاولة . .

وتختار المنيو : لحم ودجاج أو سي فود . .

حركات يعني *64*

افا وشو ذيه

لالا . . هذا مشروب نفس البيبسي بس على توت وفراولة ومادري ايش . . الصراحة طعمه كان خيالي . .

وع هالطاري . . ميزة المالديف بسكانها المسلمين انك ما تحتاج في كل زاوية وفي كل مكان تأكد على مسالة الخمور . . فهم يتولون هالشي بنفسهم . .

وفي هذا المقام أيضا . . احب انبه إلى نقطة مهمة لمن يحب تجربة هذا العشاء . .

وهو . .

( عفوا ً إذا كانت الصورة مب واضحة ) . .

بس مع غروب الشمس . . راح تجد جيوش من القباقب وقد خرجت من مخابئها . .

ورغم ان القباقب تخاف وتشرد بمجرد ما تحس ان انسان يمشي من بعيد . . لكن وجودها قد يعطي احساس بعدم الراحة *28*

بعد انتهائنا من العشاء اللذيذ . .

اخذنا جولة تصويرية في اللوبي وما حواليه . .

اللوبي . .

اللوبي واماكن التفهي المميزة . .

مدخل الجزيرة . .

الجاليري . .

حيث يوجد محل مجوهرات ومحل تذكرات . . وفي الطابق الثاني قاعة للاسترخاء . .

وعذرا ً لإعوءاء الصورة ( اي ميلانها ) . .

اللوبي من زاوية أخرى . .

المدخل . .

مركز الرياضات المائية . .

الجسر . . وعذرا ً مرة أخرى لميلان الصورة . .

وهكذا . .

في اليوم التالي .. شارفت رحلتنا السعيدة على النهاية . .

واقتربنا من وداع كونراد المالديف

بتاعات للأذن عن ضوضاء الطائرة المائية

الطائرة اللي بتقلنا للمطار . .

باي باي . .

وهذي صور منوعة من الطريق للمطار

صور للعاصمة مالي ومدرج المطار . .

وهذي آخر صورتين لمدخل مطار مالي . .

وهكــذا وصلنا لختام هذا التقرير المصـور عن رحلة أخوكم السلطــان للمالديــف . .

الخلاصة . .

البلد جميل جدا ً . . ومثل ما يقولون . . جنة الله في ارضه . .

بكل تأكيد يصلح بالدرجة الأولى للمتزوجين واللي رايحين شهر العسل . . اما بالنسبة للعزوبية فتنفع لمجانين الغوص والسباحة لان ماشاء الله الطبيعة البحرية عندهم شيء خيالي . .

بالمناسبة . . التقرير هذا ما اعتبره كامل لاني لم اتمكن من تصوير البحر والغطس وهي المتعة الأولى هناك . . لكن على الاقل ان شاء الله تكونت لديكم فكرة . .

بالنسبة للفندق . . 10 / 10 . . وإذا فكرت اروح مرة ثانية بكل تأكيد ساذهب مرة أخرى لكونراد . .

ان شاء الله يكون التقرير حاز على إعجابكم . .

وأي استفسار أو سؤال أنا حاضر . .

تحياتي للجميع . .

أخوووكم / سحيم السليطي

</B></I>

أبن السلطنة, أسيرالغربة, أبوعبدالله (الاسفار ) و 1 آخرون معجبون بهذا.

OLGA · 28-08-2015, 06:47 PM

ماشاءالله اكثر من روعه كل شي فيها عجيب وو راقي ..
عليكم بالعافيه المطعم حلو الي تحت الماي ..
وو اكيد المالديف مقصد الاول للعرسان
شكرا

be nice · 28-08-2015, 07:01 PM

ياسلااام تقرير جميل وأسلوب أجمل ، وصور أروع

سؤال

هذي الصورة أعبجني الافكت عليها فلتر صح ؟ هل هو فسكوكام ؟ او وش الفلتر بالضبط لن اسر قلبي ^_^

آخـــرفـــرصـــة · 29-08-2015, 05:50 AM

ما شاء الله تقرير رائع عن المالديف

اختيار موفق للسكن

اللقطات رائعة واضح فيها الاحتراف

سأقوم بالنقل الى بوابة الجزر

الله يسعدك

ابو ماريا · 29-08-2015, 12:13 PM

ياسلام عليك
المالديف صورها ترد الروح
من زمان ماشفنا تقارير عن المالديف وتقريرك جميل جدا
كم كلفتك الرحلة حجوزات طيران خارجي وداخلي وكم تكلفة الفندق والاكل
شكرا لك

فيصل · 29-08-2015, 02:11 PM

كل الشكر لك

اعجبني المطعم كثيرا

Coolyaman · 29-08-2015, 05:01 PM

كام كلفت الرحلة وبرأيك كده كام يوم الواحد يجلس فيها بيكون مناسب ؟

توبليرون · 29-08-2015, 06:57 PM

اولا مبروك الزواج وحتى لو كان متاخر عادي نبارك لك وكمان اهلا وسهلا فيك بالمنتدى معانا
اسلوب حلووو ولطيف يا السلطان سحيم في كتابة التقرير
جذبني لتكملة التقرير والصور الحلوة ما شاءالله
الفندق روعه عليكم بالعافية
اشلون السباحة بالبحر من الفيلا يعني عميق البحر والا حلوو للي ما يغرف يسبح
والا يقعد على السلم وخلاص
وحده البانيو او الجاكوزي كافي عليه

المهم عليكم بالعافية بكل شي

سلامتك من دوار البحر هههههههههه ضحكتني على الوردي خخخخخ

المطعم داخل البحر روعه بكم حجزه وهديتهم حلوة ذكرى جميلة
ان شاءالله تسافرون كل سنة وتزودنا بالتقارير الجميله اللطيفة
شكراا لك

tab_el · 30-08-2015, 09:41 AM

الله يعطيك العافية على الصور الحلوة والتقرير الجميل

وألف مبروك الزواج

لاهنت

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مساعدتكم لبرنامجي شهر العسل ( المالديف - ماليزيا ) اسبوعين	sabic11	ماليزيا	7	30-05-2015 12:58 PM
المالديف ام بورا بورا	fhd.qtr	رحلات الجزر والكروز	3	04-03-2015 08:16 PM
فزعتكم في جزر المالديف	abodhme	رحلات الجزر والكروز	12	26-12-2014 06:38 PM