اسعد الله مسائكم
من منطلق تقديم اقل شي تجاه ما تمت الإستفادة من هذا المنتدى

اعرض لكم تجربتي في التقديم على التأشيرة البريطانية

قبل اسبوعين كلمت المكاتب وقالوا لي نطلعها لك ب 900 اللي يقول ب 1200
قلت انا معي عقل واعرف اعبي النموذج ( قولوا ماشاء الله علي )

عبيت النموذج مع الشكر والتقدير لهذا المنتدى اللي استفدت منه في الخطوات
وحجزت الموعد واللي كان اليوم الصباح الساعة 9 ص

دفعت مبلغ 136 دولار رسوم الفيزا وحجز الموعد

توجهت اليوم الصباح لهم
الساعة 9 فتح المكتب الخاص بالتأشيرات البريطانية والاسترالية في زون A اتوقع

قبل الدخول شاف الامن الورقة الخاصة بالموعد
وختم عليها ودخلت

في الاستقبال الشخص دقق على الاوراق
من النموذج وكشف الحساب وتعريف الراتب

وعطاني رقم وقال مع الممر يسار او مكتب يسار ( لان حجزي سياحي مو درجة اولى )

ما كان قدامي الا واحد وهي 3 موظفين يخدمون التأشيرة البريطانية
جاء الدور وجيت لموظف واخذ النموذج وكشف الحساب والتعريف وطلب صورتين وعطيته

وقال مستعجل والا عادي
المستعجل زيادة 780 ريال وفي 7 ايام يطلع
والعادي 3 اسابيع

قلت عادي وش انا مستعجل عليه

بعد ما قام يطقطق على الجهاز قال رساله يبقى زيادة 8 ريال قلت هاتها
وعطيته 8 ريال

وبعدها حط جوازي واوراقي في شنطة سوداء وقال تعال وراي
انا هنا قلت لا يقول مقابلة وانا ما ادري وش بقول

وداني لمكتب البصمة
واول ما دخلت قال شيل شماغ

وشلنا الشماغ وطالعت في الكاميرا اللي ف السقف مزروعه
وبعدها بصمة الاصابع كلها ثم صورة
وقال توكل على الله

انتظر الرسالة



بس هذي علومي وسلامتكم




-> مبطي عن الكتابة في المنتديات من عام 2010

مساء النور

1000 مبروك التقديم

لازم الواحد ينتبه أن فيه تصوير و لا بيطلع سبايكي ههههه

شكراً لطرح تجربتك

ولازالت لديك الموهبة رغم غيابك لمدة طويلة

اسعد الله مسائك

شكرا لك لذكر تجربتك
اتوقع اقل من اسبوعين وهي حاهزه

تحديث:

وصلتني البارحه رسالة نصية يقولوا تم إرسال الجواز إلى UKVI

( The visa application for GWF0*******92 was forwarded to UKVI on 9/7/2015.
)

ماشاء الله عليك

حلو انك تحط تجربتك يستفيد منها غيرك ويدعي لك بالخير ...
انا بعد اتوقع الاسبوع الجاي تاخذها لان احس الموسم خلص وماعندهم شغل ... خصوصا انك جاي وهم فاضين
.. ننتظر معك الاخبار السعيده