بالنسبه للجوازات والحجوزات لازم النسخ للصور والحجوزات تتوزع على اكثر من جهاز ولا تعتمدون على جهاز واحد
وغيرها صوروها اوراق بعد افضل

مادري انا شاركت في هالموضوع من قبل ولا لا
احس اني قريته بس مالقيت تعليقي هههه

المواقف وايد بعضهم حلو و بعضهم حزين هههه
احلى موقف يوم تاخرنا على الطيران العماني
نشوف الساعة للحين بدري لان احنا على توقيت قطر
و نسينا ان عمان تفرق عن توقيتنا ساعة
ومسكين الرجال ينادي ينادي و الاهل يقولون هذي كأنه ينادي على طيارتنا
وانا اقولهم لالا باقي ساعة للحين و الاخ قاعد في كوستا يتقهوى على راحته هههه
عقب سألنا انتوا رايحين قطر قلنا له اي خذ تذاكرنا و قال انتوا وين يلااا بتطير عنكم الطيارة
وركيييض لين وصلنا و الحمدلله دخلونا لكن مافي مكان في السياحية و قعدونا في البزنس
فكان احلى تأخير هههه

ومرة في مطار انقرة

اول مانزلنا من الطيارة قبل الكونترات الا مستقبلنا واحد
جانا احنا بالذات من بد كل الناس و متوجه لنا بشكل غريب
سلم علينا و قال معاكم الشرطة وهو بلباس مدني
و راونا بطاقته العسكرية وقال تفضلوا معاي في المكتب


رحنا معاه ارتبكنا شوي لكن قلنا بنشوف شعنده
احنا ماعندنا شي نخاف منه
جلسنا الا يقول هذا اجراء روتيني
نسويه بشكل عشوائي لاتخافون الموضوع عادي

تم يسألنا شعندكم في تركيا
قلنا له سياحة و راويته خطة الرحلة
و الحمدلله كنت شايل معاي حجوزات و خرايط

قال كم عندكم كاش
قلنا له مجموع الي عندنا كلنا 10,000 قال كانه مبلغ كبير
قلت له لا مب كبير ورانا فنادق و سيارة و احنا 4 يعني مبلغ عادي جدا

تم يسال وين تشتغلون و هل عندكم صديق في تركيا
و طول هالفترة جوازاتنا خذهم العسكري راح يدقق عليهم و تأخر علينا

يوم شفته تاخر شوي ارتبكت
الي معاي اصغر مني في مسؤوليتي قدام اهلهم
رفعت جوالي فكرت اتصل للسفارة
ثم سألته هل في مشكلة تستدعي اتصل في السفارة ؟

قال لالا ابدا الموضوع بسيط
الحين بيجيبون جوازاتكم وخلاص و اتصل للعسكري وجاب جوازاتنا
و الحمدلله عدت على خير , كان اجراء غريب , لكن عذرناهم يمكن كانت فترة مابعد الانقلاب
و احنا نازلين في انقرة العادة السياح يكونون في اسطنبول ..

و الحمدلله كانت نص ساعة او اكثر شوي لكن عدت على خير.

المواقف كثيرة منها الطريف و منها الصعب و منها المحزن ...

و أذكر في أحد سفراتي .. كنت في تونس .. و رحلة عودتي إلى السعودية عن طريق روما ...
تونس - روما - الرياض .. .. أقلاعي من تونس الساعة 11 الظهر و وصلت المطار الساعة 7 الصباح
و كان الزحااام شديد لدرجة أنه يستحميل أن ألحق على رحلة تونس روما ... "الكلام قديم قبل خدمة أونلاين"
وقفت في الطابور يمكن ساعة ما تحركت ... !! شوي و اشوف موظف بالمطار حامل بطاقة و سألته إذا يقدر يساعدني ..
و قلت له (لك مني الحلاوة ) المهم شال الشنطة و 5 دقائق و أنا أول واحد بالطابور (شغل واسطات)
كل اللى وراي يهاوشون و اللى يسب و أنا ساكت لا أنقليزي و لا عربي و لا أفريقي و لا لغة في العالم أعرفها

و خوينا موظف المطار يطل من فوق و شوي خلصت و أخذت البوردنق ... و على الجوازات و أختم جوازي و على صالة المغادرة ..و توي بس جلست و أسمع أسمي ينادونه في المطار و أنه على التوجهة الى مكتب الأمن ..
المهم مالكم بالطويلة ... إلى يومكم و الله ما أدري وش كانوا يبون مني ..

سبحان الله وبحمده .. سبحان الله العظيم