أطرف موقف حصلي كان في مطار دبي [emoji2]

كنت مسافر انا وزوجتي من سريلانكا وعامل ترانزيت في مطار دبي للأردن، فكان لازم انزل في مطار دبي واخذ طيارة ثانية على الخطوط الأردنية

المهم وصلت عند الكاونتر علشان اخذ التذاكر فلقيت سربين، والسربين مخصصين للطيران الاردني

الكاونتر الأول مكتوب عليه "الخطوط الملكية الأردنية" وفي هذا السرب صينيين واجانب كثر، والثاني مكتوب عليه بالانجليزي بما معناه "العمالة الاجنبية الى اسرائيل" وفي هذا السرب واقفات فليبينيات

طيب من الطبيعي انه نوقف في السرب الأول للسياح، وبعد حوالي نص ساعة أجا دورنا، رفعنا جوازاتنا علشان نعطيهم اياها وقبل ما يستلموها طلبو منا بالانجليزي ننتقل للسرب الثاني [emoji21]

بدون ما ادخل بجدالات علشان ما تحصللنا مشاكل وبما انه السرب الثاني حاليا واقفه فيه بس فليبينيه وحده قلنا لبعض مش مشكلة وانتقلنا

استنينا هناك حوالي 5 دقايق واجا دورنا، رفعنا جوازاتنا وسلمناهم للصبيه الي عالكاونتر، فجأة نظرتلي نظرة تأمل وتفحص وبدأت تقلب في الجوازات، فأنا طبعا شعرت انه اذا ضليت ساكت رح تصير مشكلة اكيد، فاستبقت الامور وقلتلها "السلام عليكم، لو سمحتي تذكرتين عالأردن"، رفعت راسها وسألتني : عربي ؟ ، قلتلها : طبعا. فجأة فتحت الجوازات تفحص أسامينا كاملة بصوت عالي "مجدي ...." و "عبير ...." حكتلها أيوه وانا مبتسم، وانا عارف ان الابتسامه بتدخل للقلب مباشرة [emoji1]

وفجأة بتحكيلي : انت بتعرف اني صرلي 5 سنين بشتغل بالمطار وولا مره مسكت جواز اسرائيلي؟!. قلتلها : لأنه الاسرائيليين معهم جوازين واحد اسرائيلي وواحد اجنبي، فلما يعبرو دوله عربيه بعبرو بالجواز الاجنبي، اما احنا ما معنا غير هذا الجواز للأسف. اطلعت علي بتسألني : لهجتك فلسطيني ! قلتلها : مني فلسطيني. ابتسمت وبلشت ترتب جوازاتنا والتذاكر.

وهي بتجهز فيهن اجا واحد من الشغالين على كاونتير قريب منها فشافها ماسكه جوازاتنا، فاتصلب فجأة مكانه ونظرلي نظره فيها شر وشرار، فهي لمحته فقالتله بدون ما يسألها : "فلسطيني". اطلع علي هيك باستغراب وانا مبتسم واخذ نفسه وراح.

خلصت الاجراءات سلمتنا الجوازات واتمنلتلنا رحلة موفقه، شكرناها وتوجهنا للبوابه، واحنا ماشيين زوجتي راحت تشتري اشي خفيف، وانا ضليت واقف في نص المطار مع الشنط وحامل تلفوني بحاول امسك انترنت، فجأة اجا واحد من بعيد لعندي حامل سيجاره بسألني : هو فين ممكن اخذ سيجاره؟، لهجته طبعا مصريه، حكيتله : صراحه بعرفش بس بتقدر تدخنها بالحمام مهو محدا شايفك، وصرت اضحك، وبلشت اطلع حولي لحد ما شفت لافته مكتوب عليها للتدخين وجنبها سهم، فقلتله هناك.

فهو هيك اطلع علي شوي بتفحص فيي، وبعد حوالي نص دقيقه اخذ حاله شوي شوي وراح، بس المشكله راح عالجهة المعاكسة للمكان المخصص للتدخين [emoji47] السؤال ليش يا ترى ؟


وبالاخر علشان تفهمو الموضوع، الفلسطينيين جوازاتهم مقسمه، قسم حامل جواز سفر السلطة الفلسطينية، وهمي الي ساكنين داخل الضفه وغزه. وقسم حاملين جواز وهوية مواطنه مؤقته اسرائيلية وهمي سكان القدس. وقسم حاملين جواز وهوية مواطنه دائمة اسرائيلية وهمي الي ساكنين في المناطق الي تم احتلالها بعد النكبة وقبل النكسة.

بالنهاية الفلسطيني واحد والأوراق مختلفة

sent from Galaxy Note 5 using Tabatalk

آخر مواضيع مجدي

- ^^ مواصفات جهاز كمبيوتر PC جديد ^^ - وفاة إبنة عم أختنا Deena رحمها الله - واي فاي مجاني في مطارات العالم - (@) دليل الحيران في بكين وهونان - الصين بالفيديو والصور يولـ2016يـو (@) - (*) إستخراج فيزا الصين الشعبية 2016 (*)

توقيع : مجدي

تفضلوا بمتابعتي في تقريري الجديد لهذا العام 2016 دلـيـل الحـيـران فـي بـكيـن وهـونان

---

التعديل الأخير تم بواسطة مجدي ; 17-12-2015 الساعة 07:40 PM