بسم الله الرحمن الرحيم



العرب المسافرون البوابة العامة


المسافر يمر على مطارات كثيرة .. قوانينها مختلفة عن ما تعود عليها
و الاجراءات مرات تكون معقدة .. و مرات من سهولتها تستغرب


هالموضوع ... اتمنى الكل يطرح مواقف صعبة مر فيها ... و ممكن الكل يستفيد منها
هالمواقف بالذات .. لما نتذكرها بعد فترة .. في الغالب نضحك عليها


اتذكر وحدة من العضوات تأخروا عن الطيارة و ظلوا يركضون بالمطار عشان يلحقون عليها
و كانت تضحك بالتقرير ... لكن انا متأكدة ان الموقف مر عليها بصعوبة شديدة
و هذا مثال للي اقصده


الحين نبدا بموقفي الجميل


كنا راجعين من مطار فرانفكورت في 2012 ... راجعين ديرتنا
زوجي ملتحي ... بس لحيته خفيفة ... لكن في ذاك اليوم لحيته كانت شوي اكثف لان صار له فترة ما حلقها
و انا والحمدلله متحجبة

يعني واضح ان احنا عرب و مسلمين

مرينا في الاجراءات العادية و اتذكر رحنا خلصنا التاكس فري
و اغراضنا اللي عليها تاكس ... كنا مخلينها بشنطة نحملها معانا بالطيارة
وعليها قفل و كان المفتاح مع زوجي


لما دخلنا شنطتنا على الجهاز للتفتيش الثاني
فجأة سكروا المسار اللي احنا فيه و حولوا المسافرين على مسارات ثانية
وشنطتنا للحين داخل الجهاز

الموظفة نادت الموظف اللي جنبها
طلعوا شنطتنا و رجعوا دخلوها
و رجعوا طلعوها و دخلوها اكثر من مرة
و في كل مرة ... يشوفونا بنظرة رعب !!!!

قامت الموظفة لبست قفازات
و راحت نادت موظف ثاني يتهيئ لي انه مسؤولهم
ونفس الشي يدخلون الشنطة و يطلعونها و نظراتهم لنا تخوووف
واكثر من موظف تجمع على الشاشة يطالع الشنطة
بعد شوي جاهم شرطي
و الكل حتى المسافرين صاروا يخزون فينا

على طول جا في بالي ... انهم شاكين فينا عشان مسلمين
و حاولت اتذكر الشنطة وشفيها ... لكن نظراتهم ربكتني و والله ذاكرتي خانتني
وماقدرت اتذكر شي

قلت يمكن خليناها بمكان و احد حط فيها شي
و بعدين تذكرت انها مقفولة

بعدين قلت يمكن لما فتحناها بالتاكس فري
احد حط فيها شي و ما انتبهنا

وظلت التساؤلات براسي

لحد ما التفت علينا الشرطي و المسؤول
سألونا .. الشنطة وشفيها ؟

جاوبهم زوجي باللي تذكره .. و انا اضفت اني كنت شارية اكسسوارات من شوارفسكي

طالعوا في بعض و واضح مو مقتنعين

قالوا الشنطة مقفولة فتحوها

ما ادري ليش وقتها انا اخذت المفتاح من زوجي ... و من زود الارتباك و الخوف
كل ما حاولت ادخل المفتاح بالقفل
يدي ترجف بقوووة و ما يدخل

عصب المسؤول وقال فتحيها بسرعة

حاولت اتمالك اعصابي و فتحتها

تجمعوا علي كلهم .. و أشروا على مكان محدد بزاوية الشنطة
و ساألوني ... شنو داخل بهالمكان

قلت ما ادري ... لان جد ما كنت قادرة اتذكر شي بس في نفس الوقت متأكدة ماعندي شي مخالف


دخلت يدي و انا اسمي و استغفر

كان المس كرتون صغير بحجم اليد و سحبته

و اول ما طلعته كلهم توزعوا من الخوف

من بعيد يسألني المسؤول ... شنو داخل هالكرتون
إبتسمت و قلت له ... بيضة فابريجيه (مو اصليه طبعا ههههههه) بس عشان يفهم بسرعة
هي علبة مجوهرات على شكل بيضة .. اصلها روسي و الاصلية تكون مطعمة بمجوهرات و تكون جدا غالية
مثل هالصورة



قال فتحي الكرتون
فتحته و طلعتها و كانت مغلفة بورق بس شفاف و شافها

فجأة كل الموظفين يضحكون ... خصوصا اول موظفة مسكت بطنها و تضحك

مافيه الا انا و زوجي نطالع في بعض و نقول شفيهم !!!!!!!

الموظفة قالت لي اجي اطل معاها بالشاشة
و فجأة !!!!!!!!!!!!!!!!!!

وضحت الصورة
شكل البيضة في الجهاز كان مثل قنبلة يدوية
الكريستالات على البيضة كانوا كأنهم حواف القنبلة المتعرجة
و رجول البيضة كانت كأنها حلقة الامان للقنبلة


ضحكت بخوف ... و مشونا و ركبنا الطيارة

وليومكم .. لا زلت اضحك على موقف القنبلة .. و البيضة ما استخدمتها كرهتها خلاص





بإنتظار مواقفكم .. الصعبة الطريفة ... في مطارات العالم

مواقف مرهبه حقيقة الله لايحطنا بهذه المواقف المشكله انك تخاف من تخويفهم لك مع اند واثق ماعندك شي مخالف



كنت في اسطنبول وطالع على المطار وكلي ثقة بان اوصل المطار بالقارمن وارجع السيارة الطريق الي متعود عليه مسكر و القارمن مصر على ها الطريق قلت ادخل من طريق اتاتورك الساحلي الكورنيش ولكن زحمة في زحمة حاولت اختصر وتهت الطريق باقيم ن الوقت ساعة وقفت تاكسي يوصلني المطار برغم من ان عندي سيارة وبالعافيه فهم مقصدي اني اتبعه وصلت المطار وكأن الموضوع خيال سلمت السيارة وصلت تسليم الشنط و الوقت خلاص انتها وطارت الطيارة
والله كأنه حلم

وكان فيه ناس حالهم ادمر وهو ان طارت عنهم الطيارة ولا محصلين حجز للعوده للامارات
اقترحت عليهم ان تذكرتكم رايحه رايحه مش لازم ترجعون على التركيه شوفو اي طيارة بكره رايحة الامارات مش شرط التركيه الي كنتوا عليها
مادري ايش صار معاهم لاني بحالة نفسي
حجزت من جديد السفر بكره
ورجعت حجزت فندق من جديد اقرب فندق للمطار نوفتيل اسطبنول في شارع اتاتورك الي كان فيه زحمة ولكنه قريب من المطار
طبعا كانت ليله متعبه جدا ومرهقه ومن الصبح شايلين اغراضنا ومسافرين قبل الموعد سعات كثيره خوف من اي تاخير

هههههههههه اما ريمه موقف البيضة مخيف ومضحك في نفس الوقت

بالنسبة لمواقفي في المطارات الحمد لله مافيه شي كارثي لكن مره كنت حاجز على بانكوك وبعد 3 ساعات من الوصول طالع رحلة ثانية لشانق ماي .. لما وصلنا لبانكوك باقي ساعه الا ربع على اقلاع رحلة شانق ماي .. يا حلاوة

وبسرعة نختم دخول ونستلم العفش وركض انا والمدام على الصالات الداخلية ههههه كأننا في سباق 400 متر تتابع .. اللي يشوفنا يقول ذولا مسوين جريمة ومنحاشين .. ولما وصلنا الصالة الداخلية لحقنا في آخر رمق الحمدلله ..

موضوع جميل ....
كلش ولا رحلة تفوت
مره كنا بدبي انا وعيالي ... كنا دايم نجي على مطار الشارقة لان دايم نلقى حجوزات رخيصه ... المره هذي لقينا على مطار دبي ... واول مره نجي له ... ونظامنا نستأجر سيارة من المطار ونرجعها لنفس المطار ...
مطار الشارقة صغير.... وكل شي قريب ... ما تتوه يعني ...
جاء يوم الرجعه... وكان جمعه ... متعودين نروح قبل الرحله بشوي ... نطقطقها لاخر لحظه .. حملنا شنطنا ومشينا ... باقي ساعتين يمكن على الرحلة ... وكنا بفندق ماجستيك ...
صار الطريق فيه صيانة + زحمة سيارات ....
يالله وصلنا المطار ومانعرف مكان ترجيع السيارة بعد
بعد السؤال عرفنا المكان وكان خلاص الرحلة بتقفل واحنا لسى في السيارة .... قلت لام عبدالله روحي يمكن يقبلون يسجلون دخولنا وانا بروح ارجع السيارة مع العيال ...
لقيت المكتب وقلت له اني متاخر .... جلس يقول بنزين ومدري ايش ... قلت عندك الفيزا سو اللي تبي .. سلام ... واشيل الشناط 2 كبار + لاب توب + طفلين واحد منهم 3 سنين يمكن ...
احمد ربي مافيه ذيك الايام سنابات ولا انستقرام والا كان صرت مشهور
مااتذكر الصالات الان بس اعتقد وحده كانت بعيده يمكن كيلو !! وامشي ببزراني في الشارع وحوسة شناط وشماغ وبزران لا يصدمون ، وتكاسي ترفض توقف لان ممنوع ...
وقف لنا تاكسي وهو اللي علمنا ان المكان اللي نبي بعيد ... ورحنا معه ... ونزلنا بمكان غلط
ورحنا نمشي ونركض بس هالمره قريب ... واشوى كان فيه موظفه اماراتيه الله يسعدها ويوفقها قدرت الموقف وماقفلت الرحله او ماادري وش سوت بالضبط ... المهم كلن عرفنا ان احنا اللي بتفوت رحلتنا( حقين الجمارك والشرطه والعمال والناس الموجودين ) لان كان فيه سرى طويل على البوابة واول ماشافني العسكري قال انت اللي متأخر على الرحلة ( ماقلت لكم مشهور ) تعال تعال والحمد لله مشت الاموار ولحقنا الرحله ...

الله يسعدكم مواقف رهيبة
البيضة العجيبة و سباق التتابع و مشهور افندي هههههه

موقفنا صار في وندرمير أو البحيرات في بريطانيا
و تعلمت منه أني ما احجز موعد بدري أبداً لأن اللي اوفره راح ادفعه دبل

و انا رايح للفندق حسبت الوقت نص ساعة من محطة القطار
بس الفرق أن رحلة العودة كانت الساعة 6 صباحاً لادنبره

حجز لي الفندق لرحلة العودة تاكسي يوصل الساعة 5 فجراً قلت ساعة و الخط فاضي اكيد نوصل بالراحة
التاكسي يمشي على أقل من مهله و يلمح لو يبغاني ازيد السرعة تدفع زيادة
واضح أنه نذل و أنا بديت أزعل لأنه يتعمد يهدي و حنا السيارة الوحيدة على الطريق
لما وصلنا نزلنا بالمكان الخطأ من المحطة و كان باقي 5 دقايق
على بال ما سألت الا واحد يقول هذا قطارك اللي جاي بس لازم تروح للجهة الثانية

فيه جسر خشبي يمر من فوق القطار يوديك للجهة الثانية
شنطتين معي و جري مع الدرج و أم غسان وراي ما تشوف الا غباري

عشان يتحرك القطار لازم تتقفل الابواب ثم يرفع المامور يده و يطلق صفيرة بصوت واحد

قفلت الابواب و رفع يده الا أنا زي الصاروخ نازل من الدرج و هو يطالع في باستغراب
نزل يده و ما صفر و قال " مان يو ار لكي " أنت مرة محظوظ
قلت بنفسي فيه من هو محظوظ اكثر مني و اطالع الا العباية ترفرف يمنةً و يسرة خخخخخ
يخرب بيتهم دقيقين جداً ترى بعض الاحيان الدقة ماهي زينة
وصلت ام غسان و طلعنا القطار لادنبره و حنا مو مصدقين أنه لحقنا عليه

عشان كذا انتبهوا من الرحلات اللي بدري سواء قطار أو طيارة
توقيتها سئ و اللي توفره فيها يأخذونه منك التكاسي

هههههه ابو غسان
محد احسن من احد عاد درج محطات القطار اللي يعدي للجهة الثانية اعرفه والله ياهو اقشر وواقف بزود
ذكرتني سالفة :
احنا ساكنين في كولشيستر ومااحب اروح لندن بالسيارة فاوقف بقرية ثانية عشان ارخص لتذاكر القطار والمترو ( الحين لقيت قرية في زون6 قريبه منا ) صرت على طول بالمترو ... المهم وقفنا السيارة وطلعنا والمساء وحنا راجعين لازم نغير القطار والقطارات هنا ماشاء الله ماتوقف ابد ...
نزلنا ورحنا لرصيف رقم 4 وركبنا القطار ويوم مشى القطار واثرنا نازلين من القطار الصح وركبنا واحد خطأ ... وننزل في المحطه الثانية ونقطع مع الجسر للجهة الثانية ونركب القطار ونرجع وننزل في محطتنا الاولى ...
واقرا الشاشة واشوف موعد قطارنا الصحيح .... ونجلس الا ويجي قطار قلت شكله هذا هو .. باقي 10 دقايق على الموعد ... وركض نركب فيه ويطلع نفس خطأ وننزل في نفس المحطه اللي رجعنا منها .... ونرقى الجسر ثانيه ونرجع نركب القطار اللي راجع واحس كاميراتهم تصورنا وتقول وش عندهم ذولي.... وننزل في المحطة الاولى واشوف الموعد والى باقي حوالي 20 دقيقه على قطارنا ... واجلس ويجي قطار وانا ودي اقول يلا نركب معه واترصص الين مشى ... كان ودي ادفه يمشي بسرعه لا اركب ... واشوى جا قطارنا ورحنا معه .... الحوسه ذي اخرتنا يمكن ساعه ونص ... ومحطات القرى اغلبها يكون فاضي وقت اخر العصر ...بس يعجبونك كل شوي قطار يعني ماراح تنقطع ابد ان شاء الله.... وسلامتكم