بـــــــــاريــــــــس سبتمبر 2015

ali pontiac · 01-10-2015, 08:56 PM

السلام عليكم ورحمة الله

هذي تقرير رحلتي لباريس من تاريخ 22 سبتمبر لي تاريخ 30 ، مدة الرحله 8 ايام (7 ليالي) وامس راجع

خططيت حق هذي السفره في عيد الفطر الي راح، كنت مع زوجتي في زحمة العيد بدون برنامج و ملل وقلت لها صرت ما ألوم الناس الي تسافر في العيد ، انه من النوع الي احب اقضي اول يوم العيد مع الأهل وشي مايتفوت عندي وخصوصا غداء العيد

درست الموضوع وقلبت الفكره في راسي وفكرنه وقلنه بنروح البوسنه تالي قلنه تركيا واخر شي باريس ، السبب اسعار التذاكر كانت ارخص ، و زوجتي تذكرتها تطلع بخصم حق باريس لنهي تحصل تذكرة staff ticket وانه حجزت تذكرتي من ُ من موقع Expedia مع السكن طلع علي سعر التذكره 220 دينار

سكنه 4 ليالي في باريس و 3 ليالي في Val d'Europe المنطقه الي فيها ديزني لاند.

الرحله كانت تاريخ 22 الليل الوصول اليوم الثاني تاريخ 23 الصبح ، نوينه صيام يوم عرفه بس صادني صداع من الرحله وللأسف فطرت ، وأذان المغرب كان متأخر فهذي الشي الوحيد الي نوعا ما ندمان عليه من السفر

نزلنه المطار وكنت باخذ شريحة/بطاقة تلفون بس ماحصلت مكان ، طلعنه من المطار وقلنه بنروح للفندق بالمترو فكرنه فيها قلنه اول مره نستخدم المترة ما نبي نضيع وقت خل ناخذ تاكسي وهناك نشوف طريقة المترو ، اخذنه التاكسي ورحنه الفندق وارتاحينه فندقنه اسمه Hotel Acacias Etoile بسيط نظيف وسعره مقبول وموقع ممتاز ونظافته ممتازه قريب من قوس النصر والشانزليه ويمه محطتين مترو ، محطة Argentine و محطة charles de gaulle و فيها خط RER.

عقب ماخذينه راحه تقريبا اقل من ساعه طلعنه من الفندق و شفنه يمنه مطعم ايطالي ، دخلنه و خذنه بيتزا متوسطه ...

بيتزا ماريقريتا ... المنيو كان بالفرنسي كنت اترجم مكونات الأطباق بالمترجم عندي بالتلفون وعرفت انه الخنزير وانتو بكرامه jambon

وهذي صورة المطعم

قريب من المطعم مكتب اتصالات Orange خذيت بطاقة وكانت سعة التنزيل 1GB بسعر 20 دينار اعتقد على حسب ما اتذكر.

ومن هني اول وجهة معروفة على طووول برج ايفل

وتمشينه تقريبا كانت المسافه من فندقنه لي البرج 25 دقيقه مشي

قوس النصر arc de triomphe دقيقتين مشي من الفندق

وبين برج ايفل

وصلنه عنده

كنت بحجز تذكره قبل السفر بالنت حق قمة البرج من قبل كم يوم من السفره بس كل الأيام كانو محجوزين ، و الطابور حق الأنتظار طويل و فواصلنه المشي...

زوجتي قالت تبي تروح تشوف تمثال الحريه الي في باريس

كان موقع التمثال قرب جسر Pont de Bir-Hakeim وفيه ممر في النهر طويييل ونهايته صاير تمثال الحرية طبعا كل الأماكن كنه نحدد موقعها من google Map

وهذي الممر الي صاير في النهر اسمه Allee des cygnes

وصلنه عنده

قلنه نرجع الفندق ونصلي الضهر والعصر ونرجع نطلع وهذي درب رجعة الفندق من صوب ثاني

وهذي صورة مخبز خذت من عنده سويت

بالصدفه طلعنه على هالمكان Palais de Chaillot .... اضبط مكان حق تصوير البرج

واصلنه الدرب لي الفندق

صلينه الضهر والعصر وطلعنه

ورحنه شارع الشنازلزيه champ elysees ماشاءالله الخليج كله متعسكر هناك

واصلنه لي ساحة الكونكورد Place de la Concorde

الغيوم و الغروب سبحان الله منظر جميل

بالقرب من ساحة الكونوكورد حديقة التويليريز Tuileries Garden بس كانت مسكره لنه الوقت ظلم

شفنه هالشارع ويبين منه محلات وقلنه بنروح نتمشه ، الشارع حيوي وفيه محلات

تمشينه وطلعنه على L'église de la Madeleine

وتمشينه وخلاص تعبنه من المشي وقلنه نتعشه فتحت برنامج الـ Yelp اشوف لنه مطعم وكل ما اشوف مطعم زين زوجتي تقول لا بصير الفندق بعيد قلت لها تدرين يم الفندق وايد مطاعم نروح ونشوف شي قريب تمشينه و وصلنه وماعرفنه شنو ناكل او من اي مطعم وشفنه هالمطعم فاتح خلف الفندق مطعم فرنسي ، انه طلبت نودلز ، و زوجتي طلبت برجر دجاج ، اهيه من النوع الي ماتاكل سلطه من المطاعم واشرت له على الطبق في المنيو وقالت له بس الدجاج والجبن ... قالها بس الدجاج وجبن ؟؟ قالت ايه .... المهم نفذ طلبها بكل حذافيره جاب لها فخذ دجاج على جبن و قعدت اضحك وقلت لها شكله عجيب (اقنعها فيه) المهم تعشينه ورجعنه الفندق نرتاح حق اليوم الثاني

هذي صورة الأطباق

اهم شي الدجاج بالجبن

وهذي صورة المطعم

بصراحه باريس عجبتني وحلوه ، يسمونها ديرة العشاق !! انه اقول اهيه ديرة المطاعم والكوفي شوبات ، في كل مكان مطعم وكوفي شوب في كل زاويه حته الشوارع الفرعيه الصغيره.

يتبع

شارلوك هولمز, فارس من خيال, الايمان و 2 آخرون معجبون بهذا.

fanda · 02-10-2015, 08:46 AM

وعليكم السلام

موعودين بتقرير مميز مثل التقرير الامريكي
الأجواء عجيبه تنعكس في الصور
عجبني استكشافك للمطاعم والكوفي شوبات اغلب الأعضاء ما يحب يغامر ويجرب شي جديد لازم بتوصيه

يا ريت جزء ولو بسيط مع كم صوره للفندق
ورايك ببطاقة اورانج خصوصا من حيث قوة النت

متابعين ....

bufahad · 02-10-2015, 12:49 PM

الحمدلله على السلامة ورحلة موفقة
ما شاء الله اخوي ........صورك وايد صافية وزواياها حلوة
شنو نوع الكاميرة والعدسة اللي استخدمتهم

ali pontiac · 02-10-2015, 07:01 PM

مشكوره اختي fanda ان شاءالله يعجبكم التقرير ويستفيدون منه الأعضاء ، الأجواء حلوه الجو بارد حلو ، انه من النوع الي احب اغير مطاعم واجرب اشياء يديده واطباق يديده واكلات غريبه ، بالنسبه للفندق للأسف ماصورته ، بس اكيد بحصل له صور في trip advisor ، بخصوص بطاقة اورانج توقعت الـ 1GB مابتفكيني بس كفت و وفت مع اني وايد استخدم snapchat و google map، اول الأيام كان سريع تالي صار بطيئ بس يمشي اللعب.

الله يسلمك اخوي bufahad الكيمره كانت canon 550 بس مب متأكد من العدسه بس اهيه اكبر من العدسه الأصليه الي مع الكيمره ، الصوره حلوه لأنه جوهم حلو ، لو في البحرين بنفس الكيمره بتشوف الصوره مب واضحه من الرطوبه والغبار ، الحمدلله على كل حال.

ali pontiac · 03-10-2015, 01:41 AM

اليوم الثاني

اليوم الثاني كان عندنه برنامج سياكل (دراجه هوائيه) مع Blue bike tours و عندهم اكثر من توور منهم

Best of paris bike tour

Versailles bike tour

secret of paris bike tour

وعندهم توورز مثل مال الـ catacombs ( الممر الي فيه جماجم )

وهذي موقعهم الي حجزت منه التور
v
v
v
v

Paris Bike Tour | #1 Bike Tour TripAdvisor | Blue Bike Tours - Paris

احنه اختارينه secret of paris bike tour حق شخصين بسعر 58 يورو ، وكانت نقطة التجمع في الـ Latin quarter تقريبا ساعه مشي من فندقنه ، المهم صحينه الصبح وتجهزنه وعلى طول طلعنه نبي تاكسي ويوصلنه لنه اذا رحنه مشي بنوصل على الوقت ، التور يبتدي الساعه 10 الصبح والمسافه ساعه كامله وكانت الساعه 9 وشوي وفي الأيميل كاتبين بالأحمر Please be there 15 min before the official departure time!Tours always start sharp at the appointed starting time

يعني مشي مستحيل نوصل على الوقت ، وقفنه على الشارع ونبي تاكسي وكل مانشوف تاكسي نأشر له مايوقف، شفنه تاكسي وقف ونزل سألناه ، قال لنه امشو مسافة دقيقتين بتشوفون علامة التاكسي ، وهناك يوقفون ، مشينه و وقفنه عند علامة الـ TAXI و كلهم مشغولين لي خلاص قلنه ما بنقدر نلحق على التور ، اتصلنه فيهم وقلنه لهم مانقدر نوصل واحنه متأخرين تقدرون تخلونه مع مجموعه ثانيه بكره ، قالت لي الموظفه واهيه تتكلم بجفاااااااف لا التور الي اخترتوه مليان ومافي مجال لا بكره ولا الي بعد بكره ، اذا تبقون اقدر اخليكم حق الـ night bike tour + Boat tour ، قلنه مب مشكله ، يمكن خيره ، على كل حال قلنه بنتمشه لي هناك والنقطه صايره نهاية شارع Boulevard saint germain ، وتمشينه لي ماوصلنه والشارع حلو وايد وحيوي

هذي صورة العلامه الي تاكسي يوقف عندها ( صوره من قوقول )

واحنه نمشي

وهذي صور GRAND PALAIS قريب من جسر PONT ALEXANDER 3

صورة الجسر

وهذي The Army Museum

وصلنه شارع SAINT GERMAIN

وتفطرنه في هذي المكان ومزحوم اعتقد معروف عندهم

طلعنه وكملنه المشي الطويل

شفت في برنامج الـ Yelp محل أيسكريم تقييمه قوي ، وكان تقريبا مسافة 15 دقيقه وقلنه نمشي له نحلي شوي

وهذي كنيسة Cathédrale Notre-Dame de تصميم هندسي ولا اروع

وصلنه عند محل الأيسكريم اسمه Berthillon بصراحه انصدمت المحل صغير وداخل في طاولات ، كنه بندخل قالنه صاحب المحل داخل فقط حق الحجوزات اذا عندكم حجز قلنه لا بس بناخذ ايسكريم ، خذينه الأيسكريم ، كان جيد بس مب واو ! ، وقالنه تقدرون تجلسون في محلنه الثاني صاير يسار ، رحنه ودخلنه وقالنه واحد sorry this is tea room !! ماعطلت ولا قلت له ذاك قالنه تعالو جلسو في هالمكان على طوول طلعت

وهني خلاص مشينه بما فيه الكفايه احس تكسرت من المشي ، مع اني امشي تقريبا بشكل يومي، وقلنه خلاص احين وقت المترو ، وبالـ google map شفنه اجرب محطه الي تنزلنه عند محطة فندقنه الي اسمها Argentine كأول مره استخدم المترو شوي كنت متخوف ، بس طلع اسهل من السهل ومنظم و افضل وسيلة مواصلات ، لأنه التاكسي في باريس اشوف اسعارهم غاليه، المهم المترو عجيب وسريع ويوصل كل مكان وكان كل شي نبي نروحه فقط في زون 1 و زون 2. رحنه الفندق وارتاحينه و صلينه وتجهزنه حق نرجع الـ Latin qaurter حق التور.

وصلنه قبل الوقت قبل ساعه ، التور كان يبتدي الساعه 7 واحنه وصلنه عند نقطة التجمع 6 ، قلنه ناكل شي قبل التور وكلنه من هذي المطعم الصغير مقابل النهر

انه طلبت Fish & chips و زوجتي طلبت برجر لحم ، بس هالمره كان برجر مو لحم وجبن

خلصنه الأكل ودفعت الفاتوره واحنه ماشيين اله الي تشتغل في المطعم تركض وراي وعطتني تلفوني ، شلووون نسيته جان مشكله بالنسبه لي ، الحمدلله رب العالمين.

رجعت عند نقطة التجمع وشفنه المرشد والمجموعه كلها الي معانه ، كانت معانه امريكيه ، و بلجيكيين ، و الباقي مانعرف من وين. واخذنا المرشد مسافة دقيقتين مشي حق موقف سيارات تحت الأرض الي فيه السياكل

المفروض اخذ كيمره Go Pro حق التور بالسياكل ، حق اصور الجوله فيديو كامل ، المرشد كان اسمه ( انطوان ) شخص طيب وخلوق ومبتسم ، وقالنه انه المفروض يكون في تور النهار الي secret of paris بس غير له الجدول وقالو معاك ثنين بنزلون في الـ night tour bike tour + boat tour ، الساعه 7 بالضبط تحركنه بالسياكل ونزل عليه مطر ماشاءالله روعه ، كان في كل سيكل جاكيت عن المطر ، لبسناه و واصلنه الجوله لي عند النهر ، وقفنه السياكل و خذينه جوله بالعباره في النهر ، تمر العباره على كنيسة النوتر دام ، وبرج ايفل ، وعدد من الجسور ، والقصور ، والمرشد يشرح لنه عن تواريخهم ، خلصت الجوله بالعباره، ورجعنه للسياكل وعطانه مصابيح حق السياكل لأنه الوقت صار مظلم ولبسنه عواكس ( حق نبين في الظلمه ) نفس الي في الصوره

تحركنه وخذانه عند musee du louvre متحف اللوفر و ساحة الكونكورد

هذي صوره من على العباره

وانتهت جولتنه وبصراحه كانت متعه وانصح فيها ، الشي الغريب انه ما عطانه خوذه نلبسها ، في شخص من المجموعه سأله ليش ما تعطون خوذه ، رد عليه المرشد انه في باريس نسبة الي تصيدهم حوادث بالخوذه اكثر !!! ، دفعنه 12 يورو حق انطوان المرشد ، الي اهوه فرق سعر التور بين secret of paris و night tour + boat tour قالو لنه دفع الفرق في التلفون يوم اتصل لهم حق تغيير الموعد مال التور.

وانتهى البرنامج وتأخر الوقت ورجعنه الفندق وهذي صورتين واحنه راجعين ، محطة المترو سكرت اضطرينه ناخذ تاكسي .

وهذي نهاية اليوم الثاني

يتبع ،،،

فارس من خيال, الايمان و عامر الزعابي معجبون بهذا.

fanda · 03-10-2015, 08:05 AM

حلوه رحلات السياكل في اوروبا مع الجو والمناظر الي عندهم
جربنا شي مقارب لها في برشلونه
هل الجوله تشمل شرح للأماكن الي تمرونها وتعريف عنها او مرور فقط؟!

المترو والله سهل استخدامه ، سريع ، مريح و رخيص بعد

مستمتعين ومتابعين ....

الايمانمعجبون بهذا.

فيصل · 03-10-2015, 08:21 AM

وعليكم السلام

رحله السياكل حلوه
التاكسي هذي مشكلتهم ما يوقفون بأي مكان
الفندق اعتقد عرفه صغيره صح وقريب منه بقالات فيها عرب

ali pontiac · 03-10-2015, 09:11 AM

fanda اي نعم مع شرح الأماكن

فيصل اي نعم يمه بقالتين ومطعم صيني ومخبز ومحلات ثانيه

ali pontiac · 04-10-2015, 12:32 AM

اليوم الثالث

بما انه ما عندنه برنامج الصبح صحينه الضهر ، وركبنه المترو ورحنه مطعم بيتزا اسمه pizza Julia المطعم صغير يادوب ثلاثة اشخاص يدخلون داخل، قريت انه صاحب المطعم حائز على جوائز افضل بيتزا ، و داخل المطعم صور و شهادات التكريم للبيتزا

دوار Bastille قريب من المطعم

وهذي المطعم الصغير

وهذي البيتزا ، الطباخ نفسه كان موجود واهوه الي يعد البيتزا ومعاه المساعده ، ماكان يتكلم انجليزي بس كان يقول انواع البيتزا الحلال عنده، عموما لاحظتهم اذا شي مب حلال او مطبوخ في كحول يقولون لنه

البيتزا سعرها 7 يورو والماي فري

طلعنه وركبنه المترو وقلت ابقي اروح اللوفر و اصور في النهار وتالي نروح حديقة التويليريز tuileries garden

اليوم الي قبله في الليل مع تور السياكل يوم رحنه اللوفر المكان كان شبه خالي وفي النهار زحمممه ، وصور الليل كانت احلى مثل ماشفتو خصوصا انه الجو كان ممطر

هذي الغراب مرقم !!

يوم كنه نشووف صور حديقة التويليريز كنه نشوف لعبة eye of paris هذي ( صوره من قوقل ) بس يوم رحنه ماكانت موجوده !

جلسنه في الحديقه وتالي رجعنه الفندق وصلينه واتراحينه شوي

طلعنه العصر وكنت ابي اروح مطعم برجر اسمه Big fernard و له اكثر من فرع في باريس ، اقرب فرع كان مسكر ، ورحنه فرع آخر صاير في مكان حلو قريب من مجمع فيه محلات اثاث

هذي المجمع اسمه Marché de St-Honoré

والمكان حلو فيه مطاعم وفي نفس المجمع في الزاويه وكالة سيارات أودي

وهذي المطعم

البرجر لذيذ

تالي توجهنه حق حديقة لوكسمبورق Jardin du Luxembourg مكان جدا جدا جميل

الحديقه تسكر قبل لا يظلم الوقت بساعه ، ومن الحديقه رحنه عند برج ايفل في الليل حق نصوره عند بداية كل ساعه ويصير الـ light show

ورجعنه الفندق مشي بما انه فينه شوي طاقه، واحنه نتشمه احيانا google map يطلع على شوارع فرعيه حق اختصار المسافه ، دخلنه شارع هادئ ومافيه حيويه ابد ، طلع لنه واحد اضخم مني المشكله شكله مرتب ولابس ونظيف يأشر يقولي يبي فلوس حق ياكل هزيت راسي يعني NO وماتكلمت معاه ، وعلى طول راح اهوه ، وطول الدرب زوجتي تقول في احد ورانه وهذي كان نهاية اليوم الثالث.

يتبع

فارس من خيال, الايمان و عامر الزعابي معجبون بهذا.

fanda · 04-10-2015, 08:51 AM

فعلا لوكسمبورغ من اجمل الحدائق
Ferris Wheel لها وقت معين في السنه
تفتح من نوفمبر الى فبراير على ما اظن

متابعين ....

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
يومياتي في استراليا سبتمبر 2015	آخـــرفـــرصـــة	بوابة استراليا ونيوزلندا	149	15-09-2018 07:30 AM
ملاحظات ماليزيه من رحلتي سبتمبر 2015	Al-Hajri VIP	بوابة ماليزيا	57	17-07-2018 06:06 AM
تقرير رحلتي الى جورجيا سبتمبر 2015	عيونك	بوابة جورجيا و اذربيجان	30	11-07-2018 12:05 PM
تقريري عن بوكيت الساحره سبتمبر 2015	mustafa_bh	بوابة تايلند	126	08-03-2018 10:21 PM
رحلتي القادمة الى تركيا سبتمبر 2015	mahmood	تركيا	9	28-07-2015 10:47 AM