مغامراتي البحريه في الكروز MSC للأراضي النروجيه - الصفحة 13

fanda · 25-10-2015, 08:28 AM

سلامات ام عيسى
خذي راحتج

الجوكر · 25-10-2015, 07:25 PM

طهور أن شاءالله. ..

ماشاء الله تبارك الله تخطيط ترتيب تنظيم حتى في سرت معلومات التقرير. ..

بصراحه فئه نادرة من تملك هذا الأسلوب وهذا دليل على أشياء كثيره ثقافه أناقة أدب. ..الخ

الله لايحرمكي الأجر على هذي المعلومات والنظره السياحيه الذي لايملكها الكثير. ..

اختيارك للمدن النرويجيه جميل جدا ماشاء الله نتعلم الكثير من هداوه احسنتي الاختيار. ..

على احر من الجمر انتظر بقية وكمال روعة التقرير. ..

هداوه · 25-10-2015, 11:48 PM

صباح الخيرات

اقتباس : المشاركة الأصلية كتبت بواسطة طارق عنايات

الف لا باس عليك ام عيسى

اقتباس : المشاركة الأصلية كتبت بواسطة طارق عنايات

طهور ان شاء الله
ننتظر الجزء الجديد

اللهم آمين وجزاك الله خير

اقتباس : المشاركة الأصلية كتبت بواسطة مسافر زاده الخيال

الحمد لله عالسلامة وانشا الله ماعقلبك شر ننتظر تتمة الابداع وبرايي المتواضع ومن دون مجاملة تقريرك افضل تقرير هذا العام لانه يجمع الاثارة والتشويق والمعلومات الغزيرة والتفاصيل الدقيقة

الله يسلمك يارب

ولا ع قلبك شكرا

السموحه والله أحاول ما أتأخر عليكم بس ع حسب ظروفي

الحمدالله انه نال رضاكم

وغايتي تستفيدون منه وتستمتعون

اقتباس : المشاركة الأصلية كتبت بواسطة fanda

سلامات ام عيسى

اقتباس : المشاركة الأصلية كتبت بواسطة fanda

خذي راحتج

الله يسلمج حبيبتي

ما أدري شو هاي الحاله اللي يتني تقريبا 3 أيام انا جيه

الحين افضل الحمدالله

اقتباس : المشاركة الأصلية كتبت بواسطة أبوفيصل

سلامتك من كل شر إن شاء الله اجر وعافية

الله يسلمك أخويي ويعافيك

اقتباس : المشاركة الأصلية كتبت بواسطة شخص ثآني

طهور أن شاءالله. ..

ماشاء الله تبارك الله تخطيط ترتيب تنظيم حتى في سرت معلومات التقرير. ..

بصراحه فئه نادرة من تملك هذا الأسلوب وهذا دليل على أشياء كثيره ثقافه أناقة أدب. ..الخ

الله لايحرمكي الأجر على هذي المعلومات والنظره السياحيه الذي لايملكها الكثير. ..

اختيارك للمدن النرويجيه جميل جدا ماشاء الله نتعلم الكثير من هداوه احسنتي الاختيار. ..

على احر من الجمر انتظر بقية وكمال روعة التقرير. ..

جزاك الله خير

قلت كلام كبير أخجلني ويعجز لساني عن شكرك

شكرا من القلب

[/CENTER]

هداوه · 26-10-2015, 01:18 AM

الجزء السادس

النرويج

تم تجميع المعلومات من الاخ Ra7la من الانستا

جزاه الله الف خير

النرويج بلد الطبيعه والجمال والامن والامان

هي بلد الشلالات والانهار والبحيرات

بلد معروفه بجمال طبيعتها مثلا

مساحتها من الجنوب الى الشمال تتعدى 2000 كيلومتر

والمدن الكبيره فيها قليله واغلبها قرى ريفيه وسط الجبال

واشهر المدن فيها

اوسلو وبيرجن

تكثر فيها الشلالات والبحيرات والجبال والانهارات والغابات والثلوج

وتتميز بالفيوردات والخلجان

فاذا بغيت تشوف جمال الطبيعه والارياف فانته تحتاج الى سياره

والافضل انك تسكن في بيرجن لأنها اقرب للاماكن السياحيه المعروفه

ويتوفر في بيرجن مطار

وهي تبعد عن اوسلو 7 ساعات تقريبا بالسياره

والافضل تأجر سياره وتسوقها بنفسك لأنه التكسي وايد غالي

وممكن تسير بيرجن بطيران داخلي ، واعتقد ممكن بالقطار

افضل وقت لزيارتها

مابين شهر 5 الى أول شهر 10

ومعروفه في الصيف لاتغرب الشمس عنها وبالشتاء يكون العكس ظلام دامس

وتتميز في الشتاء بالشفق القطبي

النرويج تحتاج فيزت الشينجن

سلبياتها

1- انه اغلب شوارعها تكون في الجبال واذا ممتمرس في السواقه فصعب انك تسوق

وخصوصا انه الشارع واحد والسرعه ماتتجاوز 80 و90

والمسافات بين المناطق كبيره وطويله بالساعات ، طبعا حسب المناطق

ممكن وحده تبعد ساعه والثانيه 5 ساعات أو أكثر هذا يعتمد ع حسب موقعك

2- النرويج تعتبر من البلدان الغاليه مقارنه بأوروبا

خاصه في المطاعم والضرائب

3- الاكل صعب وان وجد يكون غالي والمطاعم الحلال موجوده في المدن الكبيره

والافضل انه تعمل حسابك انك تطبخ وفي هاي الحاله لابد يكون سكنك في

أكواخ أو شقق أو بيوت

4- الشوارع الضيقه في الجبال

5- كثرة الانفاق فيها

6- أغلب الارياف خاليه من البشر

7- عدم وجود أماكن ترفيهيه للاطفال

8- لما تسافر النرويج مب بسهوله تقدر تزور بلد ثانيه قريبه منها مثل باقي دول أوروبا

ايجابياتها

1- مافيها عنصريه واي شخص هو حر في لبسه وشكله يعني

المنقبات والملتحين لايحاتون هالشي

2- اغلبهم يتكلمون انجليزي فهي تعتبر اللغه الثانيه

3- تتميز بالاماااان

4- التخييم في أي مكان والشواء مسموح عند الانهار والبحيرات بس طبعا تراعون النظافه

5- فيها الكثير من الانشطه اللي ممكن تقوم فيها

6- الشعب النرويجي شعب مبتسم ومسالم ومتعاون

اليوم الثالث

منطقة ALESUND

ALESUND

عمرها 100 سنه وتحيط بها عدة جزر متصله في بعض وتقع في الشمال الغربي من النرويج

وبها مطار اسمه VIGRA

ويوجد طيران يومي من العاصمه اوسلو

وتبعد عن جرانجير GEIRANGER ساعتين وعن أولدن وسترين ساعتين ونص

الاماكن السياحيه الموجوده فيها

1- فيها تله مرتفعه لها مطل ع القريه وفوق مطعم

اسم المطل

Aksla Utsiktspunkt

2- أكواريوم واسمه

Atlanterhavsparken alesund akvarium

3- مزرعه أسمها

Ytste-skotet

4- بحيرتين وسط الجبال وهاذيل فيهم مباني مطموره

NORANGSDALEN (( THE queens route ))

هاي المنطقه من أضيق الوديان في النرويج

متحف الكنز

Exhibition : therunde treasure , bird mountain

and silver of the sea

5- شلال وقريب واسمه

Dynjafossen waterfall

Gudbrandsjuvet

6- جزيره فيها بط غريب شكلهم وطيور مهاجره والجزيره جبليه
اسمها

Rundebranden

7- جوله في الباص السياحي

8- جوله بالقطار السياحي

9 - الكياكي

تفاصيل هذا اليوم

الوصول الساعه 10 الصبح الى منطقة ALESUND

وآخر صعود للسفينه بيكون الساعه 4 ونص

هاي بدون قروب سياحي وبنيلس فيها 7 ساعات

أحداث هاليوم

بالنسبه للجو في النرويج

قبل لانسافر باسبوع كان ولد أخويي راجع من النرويج وخبرني

انه الجو وايد بارد وغيوم وأمطار ووصاني ناخذ شتوي

وانا كنت أشوف درجة الحراره 18 أو أقل شويه فقلت الجو حلو ومب بارد وايد

لكن لما خبرني هو قلت يمكن النرويج غير جوها

قمنا حطينا أغلب لبسنا شتوي وقليل صيفي وهذا كنا شالينه حق هامبورغ

وهاللبس هو اللي نقذنا

وهناك كان الجو تعيس من سرنا نحن والدنيا كلها مشمسه وشمسهم حاره

وهاي من الامور اللي تناحست ويانا وضيقت خلقنا

واللي يقهر في السفينه قبل لانوصل هاي المنطقه قال الكابتن في الميكرفون

انه انتوا محظوظين لأنه الجو جميل ومشمس

والاجانب فرحانين

ونحن ماغطين بوزنا شبرين

نتابع معاكم

نشينا بدري وتريقنا في البوفيه

يامحلات الزيتون مالهم لذيذ ووملحوته قليله

نتريق وجدامنا ملامح قرية اللاساوند

وطلعنا من السفينه

المطلوب عند خروجك انه بطاقتك تكون معاك وأقصد بطاقة الغرفه

وفي المجله الاخباريه مكتوب وين المخارج

ولاتنسون العوده الساعه 4 ونص

ونحن طالعين خذيت معاي جوازاتنا وبطاقة فيزا وجزء من الفلوس والباقي تركته في الخزنه

في العاده ماآخذ جوازاتي معاي بس في رحلتنا هاي بالكروز

فكرت انه أفضل تكون معاي عشان لو صار وتأخرنا عن السفينه لأي سبب وراحت عنا ممكن نلحقهم ع المنطقه الثانيه

وبعد احتياط مصوره ع الفون برنامج الرحله

فأعرف التوقف الثاني وين بيكون ومتى

ياحسره ع بلكونتنا

أول ماطلعنا من السفينه شفنا جدامنا خيمتين

وحده حق باص سياحي يجولنا في المدينه

والثانيه قطار سياحي

قلنا أول شي بنسير نصرف

وهنيه بعد بوعيسى كان له موقف وبسببه تبهدلنا

قبل لانسافر وانا أقوله صرفنا فلوس بالكرونا النرويجيه

وهو يقول

مافي داعي أكيد في السفينه بتحصلون صراف

ولما صعدنا ع السفينه دورت صرافه وماحصلت

وفي هاليوم تبهدلنا لين قدرنا نصرف

أول شي

سرنا مول ندور محل صرافه ومال الفونات عشان نشتري بطاقات

ولمادخلنا المحل وطلبنا نصرف قال أنا ما أصرف

ودخلنا محل ثاني عطانا بطاقات الفون وفيها بكج

ولكن ترددنا نآخذها قلنالها بنفكر

وقابلنا وحده سوريه مقيمه وجزاها الله خير ساعدتنا

سألناها

عن أفضل شركه ناخذ منها البطاقات مع خدمة النت

وخبرتنا عن شركة My Call

وقالت بتحصلونها في سوبرماركت سفن الفن

ودلوني عن مكان التصريف وقاللي برع المول

طلعت مع بناتي أدور محل التصريف

وكل ما أسأل يوصفولي المكان

شفنا مطعم هندي في السنتر

مشينا وايد وفي الاخير طلعلي المكتب السياحي للمعلومات

استغربت شو علاقتهم بالتصريف

وانتظرت دوري ولما سألتهم قالوا

مانصرف هنيه ودلتني بالضبط المحل اللي يصرف

وتخيلوا كان هذا المحل قريب أول مادخلنا السنتر

ورجعنا نمشي مسافه لين وصلنا لمحل السوفينيير وطلع هو اللي يصرف

صرفنا جزء من اليورو

وطلع علينا اليورو = 8 كرونا

وعقب سألناهم عن سوبرماركت سفن الفن ودلونا

السنتر وايد حلو والمكان وايد جميل بس الجو تعيس وشمس وشمسهم قويه

المهم اشترينا البطاقات وهاي اسعارها

سعر السيم كارت = 49 كرون

سعرGB1

= 69 كرون

كل وحده منا خذت 2 GB

وخذينا وقت طويل لين خلصنا هاي الشغله

وبردنا ع عمارنا بماي بارد واذكر الماي كان وايد غالي ممتذكره كم بالضبط

يمكن الدبه الصغيره بشي وعشرين درهم

بعد ماخلصنا رجعنا عند الخيم عشان نحجز الباص السياحي

وكنا فرحانين انه اشتغلت الخدمه

وتخيلوا شكلنا

كل وحده منا عينها في فونها نمشي ونعبر شوارع لين وصلنا للخيم ههههههههه

عافانا الله مب شايفين خير هههههههههههه

ملاحظه مهمه

الواي فاي في السفينه ماكان مجانا ولا في أي مكان في السفينه

الا اذا كان عند قوم VIB

والمشكله انه الاشتراك وايد غالي

يعني الساعه كانت 17 يورو تقريبا 80 درهم

الصراحه وايد مبالغ

والبنات الله يهداهم مرتين أجروا الواي فاي من السفينه من مصروفهم

ولاكانوا يرضون يعطوني دقيقه

يقولولي اذا تبين أجري بروحج ماما

كله هذا عشان مارضيت أشركهم ع حسابي هههههههههههه

وانا مره

كنت أبا أكلم بوعيسى ضروري

وهذا من غير انه الارسال أحيانا يقطع نهائي حسب المنطقه اللي نمر فيها

يتبع ...

الركيب, أبن السلطنة و هاوية الاسفار معجبون بهذا.

هداوه · 26-10-2015, 10:17 AM

نكمل معاكم تفاصيل يومنا

سرنا الخيمه الخاصه بالباص السياحي

وحجزنا

طلع علينا 200 كرون للشخص

خبرونا انه موعد الباص الياي بيكون عقب ساعه

وعقب تحسفنا انه ماخذنا القطار والسبب

انه أحلى وأونس وأرخص وبيمر تقريبا ع نفس الاماكن

وكان بيتحرك بدري ومابنتريا مده مثل الباص

الخط الاحمر هي الاماكن اللي بيمر فيها القطار

المفروض كنا نشوف الخيارين وعقب نقرر مب ع طول نحجز

لما شفنا انه عندنا وقت قررنا نرجع السفينه ونضبط عمارنا ونرجع قبل مايوصل الباص بشويه

معلومات عن الباص

رجعنا عند موقف الباص وانطلقنا

أول محطه اخترناها هو المطل

Aksla Utsiktspunkt

وشفنا القطار واصل نفس المكان

الفيو من فوق

لو الجو مغيم جان الدنيا غير

سفينتا

المطعم واليلسات اللي فيه

ولابد انه نبرد ع عمارنا

وعقب ماتمينا فتره فوق

رجعنا ركبنا الباص مره ثانيه

ولما وصل السنتر عدال المكتب السياحي نزلوني البنات وقالوا

بنسالهم عن تأجير السياكل

لكن ماحصلوا فسألوا عن الكاياك Kayak

الصراحه انا عقب تضايقت اني سمعت كلامهم ونزلت

لانه حرام دفعنا هالمبلغ حق الباص السياحي ومانزلنا الا منطقه وحده

وعقب ردينا وين ماكنا الصبح

كان الاولى نكمل ويا الباص ونشوف المنطقه

لكن الله يهديهم ماعطوني فرصه أفكر

ع العموم سرنا ندور وين يأجرون الكاياك

حصلناه

وهم ركبوا القوارب ونسيت بكم أجرناها

وانا سرت أدورمطعم قريب منهم وأقدر أصورهم

طلبت شوربه لين خلصوا البنات

وعقب ماخلصوا تيلسنا نسولف

وعقب شفنا انه لازم نرجع السفينه خلص الوقت

والحمدالله السفينه قريبه منا

وقتها ماكنت متضايقه كنت مبسوطه لفرحتهم ووناستهم وماكدرني الا الجو شويه

عقب مارجعنا السفينه وريحنا شوي ع الساعه 7 سرنا المسرح نحضر الشووو

وكان هاليوم هو اليوم الاسباني

الشو كان أسباني والاكل في المطعم كان أسباني

وعقب ماخلص سرنا المطعم وتعشينا

وهنيه صارلي موقف

تعرفون الاسبانيين مشهوريين بأكلها اسمها بايلا بفواكه البحر يعني بالسي فود

وكانوا حاطين صينيه كبيره فيها هاي الاكله

وحطيتلي منها شويه وكنت بروحي

يلست أتغدى وكنت توني مآكله لقمتين من البايلا وكانت لذيذه وااااايد

شوي واللي يايين البنات وفي ايدهم أكلهم وبنتي لما شافت طبقي

قالتلي

ماما هذا فيه خنزير

عصبت وقلتلها

ماتشوفينه انه كله سي فود

قالت

انا كنت بغرف منه وجان أقرأ انه في خنزير

تنرفزت وسرت أتأكد بنفسي

وفعلا طلع فيه خنزير

يعني ليش يخربون الاكله علينا

كانت وايد لذيذه

وعقب تمشينا ويلسنا نصور ورغم الوقت متأخر الا انه الدنيا منوره

ماكانت الدنيا تظلم وهالشي وايد حبيته

عقب يلست ويالبنات في المطعم

وفليل بعد ماينتهي العشاء يعني من بعد 10 ونص يكون هادي وشويه ناس فيه

نآخذ زاويه أنا والبنات ونيلس نلعب بألعاب نحن يايبينها

ونتسلى بخفايف آخر الليل

والعيايز اللي حوالينا يبتسمون لنا

والموظفين مبسوطين علينا

الصراحه كنا مسوين جو

وعقب رجعنا غرفنا ونمنا أحلى نومه

على طاري النوم في السفينه

الحين عرفت ليش اليهال كانوا يرقدون يوم نهزهم شويه شويه

كنت أحس وانا حاطه راسي ع المخده كأنه حد يهزني بهدوء

كأني ع سرير طفل بس تدوخون وترقدون

هههههههههههههههههههه

كان حلو

موقفي مع بوعيسى عشان التصريف

لما رجعنا السفينه وخبرت بوعيسى عن بهدلتنا حق التصريف

وطبعا لومته

قاللي المفروض انه فيه تصريف في السفينه

سيري واسألي الرسبشن

يوم سالتهم

طلع صح عندهم وسعرهم افضل لأنه بدون فايده

انزين ليش مايخبرونا ، أكيد في ناس شراتنا مايدرون

والا يمكن كانوا موضحينه في الاوراق اللي عطونا ياها وانا ما أدري

ع العموم هالميزه موجوده في السفينه

وبوعيسى يافرحته يوم عرف انه موجود قال

شفتي ماقلتلج

قلتله انته قلت صرافه وماشي صرافه

موقفي مع الواسطه الكبيره

تذكرون مشكلة الرحلتين اللي خسرتهم

اليوم بخبركم كيف حليتهم

في هاليوم لما سرت أشيك ع حجوزاتي للرحلات اللي حجزناها بالنت

خبروني انه مموجود حجزنا ووقتها ماعرفت السبب

وحاولت أتدارك الموقف وأحجز اللي أقدر عليه من الرحلات

وخبروني انه رحلتين مابقدر أحصلهم

الرحله الاولى

وهي رحله بالباص لمشاهدة القباقيب العملاقه وهاي مدتها أعتقد 3 ساعات

والرحله الثانيه والاهم وهاي مدتها من 7 الى 8 ساعات في جرانجير

ومنها بنركب قطار وفيها وايد أشياء جميله

حاولت معاهم بس ماشي فايده

عاد طلعت من عندهم وأنا ماغطه بوزي شبرين وشويه وبصيح

حزينه ومكتئبه

وأمشي وانا مب في حاسيتي

كنت وايد مقهوره وحزينه وأحس الاشياء الحلوه ما أحصلها

أول شي الغرفه والبلكونه التعيسه والجو والحين الرحلات اللي أباها

وأنا أمشي ييت صوب محل العطور وكان بالصدفه عثمان المغربي

واقف برع المحل ومن شافني ع طول سألني

شوبلاج ليش زعلانه

انا من النوع اللي يبين علي الحزن والزعل ما أعرف أداري

عاد من سألني ماصدقت أني حصلت حد أكلمه خصوصا بناتي ما أعرف وينهم

ومانقدر نتواصل ماشي ارسال

وانا كنت في وضع تعييييييس ونفسيه خايسه

فضفضتله وخبرته عن مشكلتي وشويه وكنت بصيح جدامه

بعد هو ماقصر دار ويايي وعصب عليهم وقال

مب ع كيفهم اذا انتي حاجزه وهذا حقج

وعطاني أحلى فكره

قاللي

كلمي مدير السفينه وهو المسؤول عن كل شي وعطاني أسمه ورقم تحويلته

ونحن نرمس فجأه ركض ودخل المحل

وأنا مب فاهمه السالفه واركض وراه ههههههههههههههه

أقوله شوبلاك

قال هذاك هو المدير

وكانت عنده جوله تفقديه

وقاللي سيري وراه وكلميه

سرت وراه وشفته يرمس وقفت أترياه يخلص كلامه

هو لاحظ اني أنتظره ع طول التفتلي وياني

سلمت عليه وقلتله انته فلان

قال نعم

قلتله انا عندي مشكله

قاللي شو مشكلتج

خبرته انه زوجي حجز بالنت الرحلات اللي نباها وهنيه يقولولي انه هاي الرحلات ممحجوزه

وقلتله عندي ورقة الحجز وراويته ياها

ع طول من شاف الورقه قاللي

زوجج حجز وماكمل عملية الحجز

يعني هو اختار الرحلات وحطاهم في سلة المشتريات وماكمل لين الدفع

عاد أنا وقفت فاجه حلجي ومبققه عيني وقلتله

What

في خاطري هاتولي بوعيسى حيا أو ميتا

طبعا الدخنه تطلع من راسي ومن اذنيه من الغيظ اللي فيني

بس ماسكه نفسي ومب عارفه شو أقول

اللي قهرني انه بوعيسى في هاي الامور شاطر وأحسن مني مليون مره

وأنا واثقه فيه لدرجة ما أراجع وراه

المهم أنا بسرعه تمسكنت جدامه وقلتله

انا ما ادري وهو معتقد انه حجزه صحيح ونحن يايين هاي الرحله بدون زوجي ولا أي ريال معانا

وأول مره في حياتي أسافر ع كروز

واذا مابحصل هاي الرحلات معناته انه سفرتي هاي كلها اختربت

وشويه وبصيح جدامه

ماسكه نفسي غصب

كسرت خاطره وقاللي

لاتحاتين بتروحون كل الرحلات اللي تبونها

زين ماحبيته ع راسه هاذيج الساعه

صدق انه طلع نشمي

ع طول اتصل في الموظفه اللي في المكتب السياحي وخبرها انه تعطيني الرحلات اللي اباها

وعقب قاللي سيري عند فلانه وبتخلصلج شغلج

شكرته وايد

ومره من المرات تصادفت وياه في السفينه وكنت مع بناتي

يانا وسلم علينا

وعرفته ع بناتي وسألني

اذا اموري طيبه وشكرت مره ثانيه

أنا رجعت عند المكتب وسالت عن البنت اللي خبرني عنها

وطلعت هي اللي قالتلي فل

بس هاي المره المعامله غير

رحبت فيني ويلستني ع القنفه وتعاملت ويايي كأني شيخه

وانا أقول في خاطري

بعد الاجانب عندهم هالسوالف

المهم قالتلي

شو اللي تآمرين فيه طويلت العمر ههههههههههههههههه

قلتلها أبا رحلة القباقيب اللي في الباص

قالت تم

وقلتلها

أبا رحلة فلام

قالت هاي الرحله فيها مشكله

صاير حادث كبير في قرية افلام وموقفين القطار وننتظر منهم خبر

وقبل مانوصل بيوم لهاذيج المنطقه بنتأكد من الخبر

اذا فتحوا المجال بتكونون فيها واذا لا بتتكنسل نهائي

وحجزت بدالها رحله طويله احتياطي بدل هاي في حالة لو ماسمحولنا
عاد لما نوصل هاذيج المنطقه بخبركم شو اللي صار

عقب ماخلصت وياها طلعت فرحانه من عندها وشفت البنات في ويهي

قلتلهم

انتوا وينكم أنا عشت وضع صعب بسبب

ويلست أخبرهم بالسالفه كلها ونحش في ابوهم ونتحرطم

وعقب كلنا سرنا عند عثمان وشكرته واشترينه منه وايد عطور

اليوم الثاني اللي قضيناه في السفينه

هذا اليوم قضينا في الراحه والاسترخاء والاكل

واليوم كان اليوم الايطالي

الشو في المسرح ايطالي والاكل ايطالي

بعد ماتريقنا

البنات ساروا يأجرون العاب ويلعبونها

وأمهم عايشه جو ثاني بروحها

وقت الغدا نتجمع في المطعم وعشان اليوم ايطالي فكانوا مسوين أصناف متنوعه من الباستا

قسم الساندويشات موجود كل وطول اليوم بس يكون متنوع

الفواكهه والحلويات طول اليوم وتكون متنوعه

شوف كيف الزحمه

زاد وزنا في هاي الرحله من كثر المغريات

وعقب كم يوم يوم شفت الوضع جيه قمت أسوي كونترول ع عمري

ودايما عندا بزار في الايام اللي تبحر يوم كامل وساعات في أيام ثانيه

وداما عندهم خصومات وعروض

ومحلات متنوعه عندهم

وساعات نتجول في السفينه

وساعات نتيلس في اللوبي ونتفرج

مرينا ع المكتب السياحي خذينا تذاكرنا حق باجر

سرت الجيم بروحي وسويت رياضه ع الاجهزه ولكن شديت ع نفسي وايد

وأنا ماعندي لياقه وطلع عليه ثاني

في الجزء الياي بخبركم شو صارلي

حضرنا الاستعراض الايطالي في المسرح

وفي أوقات أيلسها مع نفسي وأقرأ في كتاب

والحلو انه الدنيا ماتظلم

هالمنظركان وقتها 11ونص فليل

تابعوني في الجزء الخامس

واليوم 5 من رحلتنا الى قرية Honningsvag

مجدي, الركيب, أبن السلطنة و 1 آخرون معجبون بهذا.

namareq · 26-10-2015, 11:59 AM

سلامات هداوه

مستمتعين بالرحله معاج

وايد حلوه قعدة الريوق والاطلاله

بس حسافه ما كملتوا بالباص السياحي

والكاياك كان سهل بالنسبه للبنات ؟ ودي اجربه بس اخاف يميل فيني على جنب واطيح بالماي

بانتظار باقي التقرير

هداوه · 26-10-2015, 01:06 PM

اقتباس : المشاركة الأصلية كتبت بواسطة namareq

سلامات هداوه

مستمتعين بالرحله معاج

وايد حلوه قعدة الريوق والاطلاله

بس حسافه ما كملتوا بالباص السياحي

والكاياك كان سهل بالنسبه للبنات ؟ ودي اجربه بس اخاف يميل فيني على جنب واطيح بالماي

بانتظار باقي التقرير
[/QUOTE]

ياهلاااا ومرحبااااا بأول الواصلين

مشتاقه أشوف ردود الباقين ، نزلت التقرير وطلعت وكل شوي أشيك أشوف منو رد منكم

الله يسلمج حبيبتي

هي والله حسافه ع التذاكر وماشفنا باقي الاماكن

ولكن عموما استمتعنا

المشكله ضيعنا وايد وقت في البدايه يوم سرنا نصرف

وعقب الباص راح واللي عقبه كان بيوصل متأخر

فضاع الوقت علينا

انا بعد كنت خايفه ع بناتي بس عقب تطمنت لأنه ملبسينهم لايف جاكيت

والمدرب راكب في واحد ثاني ويمشي معاهم يوجههم

بتشوفينه في الصوره

اهم شي جربوه والحمدالله ماعجبهم وايد ومن زمان يحنون يبون يجربونه وانا أرفض

اسعدتيني حبيبتي بمشاركتج

عناقيد الربيع · 26-10-2015, 01:20 PM

ام عيسى حبيبتي شفت اول 3 اجزاء من التقرير

وتفصيلج عن الكروز

سفرة بالكروز بدون اطلالة مال امها داعي
الصور مب ظاهرة مادري شو السالفة
راده لتقرير الرائع .. عسى الصور تظهر

دمتي بحفظ الرحمن

emo0o · 26-10-2015, 03:45 PM

رووعه روووعه

يعجبني اصرارك وتصميمك عالشي

والحمد لله تيسرت الأمور

الله يسعدك ياهداووة وجزء رااائع

متابعين

q8ya metnaqla · 26-10-2015, 08:56 PM

الله
خوووش جزء
ومازال بوعيسى قاعد ينرفزني اول شي على الصرف [emoji35] وثاني شي. على حجز الرحلات [emoji35]

بس الحمدلله تداركتيهم [emoji108][emoji113][emoji122][emoji122]

لالا عاد الكاياك عجييب انا من محبينه واحلى شي لما تكون المايه دهنه اسهل من انها تكون موي [emoji571][emoji571]

الحمدلله انهم جربوه [emoji120]
وقواج الله [emoji108][emoji108]

Sent from my iPhone using Tapatalk

آخر مواضيع q8ya metnaqla

- استفسارات اليابان
- رحلة صيفية بحرية في ربوع الجبل الأسود (مونتينيغرو 7/2024)
- حي الله هالقطري حي الله حبه ربى في حشاي .. مانحتاج حق السري سراينا هالجاي
- هنــــــــا سنغــافورة الكفــاح الإصــرار التعليــم التطــور
- هنـا وطـن اشعـار تكتـب فعشقـو معـروف للعـالم بمجدو انجازاتو تابته واللـه في قلب أرضـو

توقيع : q8ya metnaqla

كويتية متنقله في أعالي جبال الأنديز، قاطعه فيها الإكـــــوادور من الشمــال للجنـــوب

https://www.arabtrvl.com/vb/t49320.html

كنزٌ دفين اكتشافُ ارضٍ ضائعةٍ كنا نعرف بوجودها ولكن لم نستطع الوصول إليها(كولومبيــا)

https://www.arabtrvl.com/vb/t48941.html

مراسلتكم من الاتحاد السوفيتي سابقا (روسيــا 2019 )

https://www.arabtrvl.com/vb/t45053.html

في قصص الشعوب طرائف لاتنتهي وعالم حلو بهي يسكن في القلوب في قصص الشعوب (المكسيـــــك)

https://www.arabtrvl.com/vb/t41667.html

الى الزيتونة وعقبه بن نافع وابن خلدون بلد العلم والثقافة والتاريخ( تــونس الخضـــرا )

https://www.arabtrvl.com/vb/t39247.html

سـكــة سفــر فيهـا مشـاويـر العمــر ( امـريكــا ديسمبــر 2017 )

https://www.arabtrvl.com/vb/t31951.html

كل انسان يصبح شاعرا اذا لامس قلبه الحب : من بلاد الفلاسفه (اليونان)

https://www.arabtrvl.com/vb/t7554.html

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة الأحلام المتوسطيه في الكروز EPIC	وجهات أوروبية	رحلات الجزر والكروز	157	05-08-2019 04:10 PM
رحلات الكروز cruise Tasik فى بحيرة بوتراجايا الرائعة	أبوعبدالله (الاسفار )	ماليزيا	16	07-12-2017 05:40 PM
رحلة فردية للأراضي الامريكية ...	Tamem	بوابة امريكا	108	20-11-2015 08:37 AM
اريد قائمة لاسماء شركات الكروز من تقوم برحلات على المضايق النرويجية وجزيرة ايسلندا	غرام الامل	بوابة اسكندنافيا	3	25-02-2015 03:00 PM