مغامراتي البحريه في الكروز MSC للأراضي النروجيه - الصفحة 7

هداوه · 18-10-2015, 02:28 PM

اقتباس : المشاركة الأصلية كتبت بواسطة qa6ar911

العفوو لا شكر على واجب
في خيارات كثيره للحجز سواء من الشركه نفسها او من الشركات الوسيطه وهي كثيره ايضا

ههههههههههه ماشاء الله عليج ام عيسى تفاصيل دقيقه وشرح لجميع المشاكل

اقتباس : المشاركة الأصلية كتبت بواسطة qa6ar911

لو انا بكتب هالتفاصيل يمكن سنه ونص اخصل التقرير هههههههههههه

بس مهمه جدا هالتفاصيل تفيد الى بيحجز بعدكم بالكروز
في ميزان حسناتج ان شاء الله

انا الحمجلله ماواجهتني اي مشكله ولأي نوع من المشاكل
بالعكس كان كلشي نفس ماتوقعته

يمكن لاني انا الي كنت احجز حق نفسي واعرف شنو الي ابغيه وشنو المتوفر

والسعر وايد حلووو
واعجبتني سفينتكم فيها اشياء مب موجوده عندنا

ومعاج للأخر ان شاء الله عساج على القوه

هيه والله يابوسعد تفاصيل كثيره

أحاول قد ما أقدر اجمع كل المعلومات

لأنه فعلا لما بغيت أروح هاي الرحله ماحصلت تقرير يساعدني

وماكنت أعرف أي شي داخله لعالم مجهول

عشان جيه أبا الناس تاخذ فكره واضحه عن الكروز

ولو اختلفت الشركات مابيكون الفرق كبير

هههههههههههههههههههههههههه

إيه عليك انزين خلصه في سنه

وبعدين بوسعد انته عاطني لقب كبير وهو ملكة التقارير ولازم أكون قد هاللقب

اللهم آمين في ميزان حسناتي وحسناتك

لو متمكنه من اللغه وقادره أحجز بروحي واتفاهم وياهم جان تداركت وايد أخطاء

وبوعيسى صح ماقصر وحجز ولكن الله يهديه كم مره أقوله أقرأ التفاصيل تأكد من كل شي

ولكن ماكان يشيك وعشان جيه وقعنا في أخطاء

ومن ناحيه ثانيه لا أنا ولاهو سبق جربنا الكروزات وكانت تجربه يديده علينا والخطأ وارد

اتمنى اللي يروحون من بعدنا يتجاوزن اخطائنا

ياسلام ودي توضح اكثر الفرق بين النرويجن وال MSC

عشان نعرف نختار عدل الكروز المناسب

الله يقويك أخويي وسعيده بمتابعتك ومشاركتك وتهمني وايد ملاحظاتك

اقتباس : المشاركة الأصلية كتبت بواسطة amooonosh

ماشاء الله عليج اخت هداوه مبدددددعه كالعاده ��

اقتباس : المشاركة الأصلية كتبت بواسطة amooonosh

مدري احس رحله الكروز لمده11 يوم مو ممله شوي ��

و هل الي فيه دوار للبحر يتعب من الرحله

كملي للامام ��

شكرا حبيبتي

بالنسبه لي ابدا ماكانت ممله

انا من النوع اللي يصيبني دوار البحر واذا الرايح شديده ممكن يصيب اللي شراتي

وفي رحلتي هاي مره وحده حسيت بدوار البحر

اقتباس : المشاركة الأصلية كتبت بواسطة أبو طلال*

انا انتظر بهالتقرير
جرينجر والشلالات السبع
وكل شوى افتح اشيك عالتقرير
واقول ياريت تنزل كامل التقرير مره وحده
مستعجل

هههههههههههههههههههههههههههههه

حاسه فيك

لكن وين جرنجير بعدك مشوارك طويل ياطويل العمر

هداوه · 19-10-2015, 12:47 AM

منو سهران ويايي

ابالي نص ساعه أو أقل وبنزل جزء يديد

اللي يتابعني وسهران أباه يعلق ع الجزء اليديد

هداوه · 19-10-2015, 01:24 AM

الجزء الرابع

برنامج رحلتنا

انطباع عن رحلتنا بالكروز

اليوم بكسر القاعده وبخبركم عنانطباعي قبل لا أدخل في التفاصيل

والسبب

اباكم تعيشون شعوري واحساسي اللي عشته في هاي الرحله

هاي الرحله من الرحلات الجميله في حياتي

فاقت كل توقعاتي

ما توقعت اني بحبها هالكثر وأحب البحر اللي علاقتي معاه ضعيفه

المتعه والجمال مب في المناطق اللي زرناها في النرويج

هاي بالنسبه لي مثل أي رحله لأي بلد

ولكن الجمال كان في الكروز

الناس اللي معانا واقصد المسافرين تحسونهم كأنهم معاكم

يعني ماشعرنا بالوحده من كثر مالناس طيبين وحبوبين

وحتى العاملين كانوا وايد يحبونا ويعتنون فينا لأنهم عارفين انه نحن بروحنا

فخامة السفينه وجمالها تعطيك شعور بالراحه والمتعه

تعدد الانشطه ماتخليك تشعر بالملل وودك بوقت أطول

بناتي جدا استانسوا وتعرفوا ع بنات فرنسيات في سنهم تقريبا

وصاروا يلعبون معاهم ولازالت علاقتهم مستمره

وهذا شي جميل

بالنسبه لي واكثر متعه وسعاده حسيتها في الكروز هي هاذيج

اللحظات اللي كنت أيلس فيها مع نفسي وانا مجابله البحر

واستمع للأغاني واقرأ كتاب

واحيانا أتأمل وأفكر في أمور كثيره بذهن صافي

ماسبق حسيت او عشت مثل هالاسترخاء مثل اللي حسيته في هالسفينه

فعلا الانسان يحتاج مثل هاي اللحظات

تصدقون كنت أوقات اتمنى ماتوقف السفينه وماننزل

وأوقات لما نطلع رحله أكون متشوقه ابا أرجع للسفينه

طافوا 11 يوم بسرعه وكنت أتمنى لو يلسنا أكثر

اتمنى اللي بيجرب رحلة الكروز انه فعلا يحاول يستمتع بوقته

ويعيش لحظات جميله مثل ماعشناها

تخطيط رحلتنا

هههههههههههههههههههههه

والله كل ما أحاول أبدا في التفاصيل اليوميه

اشوف جدامي معلومات لازم أقولها قبل

شو أسوي يعني

هاي تفاصيل رحلتنا الكروزيه

الانطلاق ع كروز MSC

من ميناء هامبورغ تاريخ 12 / 8

الساعه 6 المغرب تتحرك السفينه

العوده بتاريخ 23 / 8 لميناء هامبورغ

المدة 11 يوم

نو الغرفه : غرفه مع بلكونه ومطل ع المحيط

خط رحلتنا بالكروز

12 / 8 هامبورغ الانطلاق

13 / 8 في البحر

أول توقف بيكون في أول منطقه في النرويج وهي

14 / 8 Alesund, Norway

10:00 17:00

هالوقت اللي بنقضيه في منطقة Alesund

المده 7 ساعات

يوم 15 / 8 بنقضيه في البحر

يوم 16 / 8 الوصول الى منطقة

Honningsvag, Norway 15:00

Honningsvag, Norway − 02:00

بنوصل الساعه 3 العصر وبنظل الى الساعه 2 بعد منتصف الليل

يعني 11 ساعه عندنا نستكشف فيها هالمنطقه

تاريخ 17 / 8 بنوصل لمنطقة

Tromso, Norway

13:00 21:00

وبنوصل الساعه 1 الظهر الى 8 المساء

المده 7 ساعات

تاريخ 18 / 8 بنقضيه في البحر

تاريخ 19 / 8 بنوصل الى منطقة

Molde Fjord, Norway

08:00 18:00

المده 10 ساعات بنقضيه فيها

تاريخ 20 / 8 بنوصل لمنطقة

Hellesylt/Geiranger, Norway

08:00 18:00

المده 10 ساعات بنقضيه فيها

تاريخ 21 / 8 نوصل لمنطقة

Bergen, Norway

07:30 18:00

وبنقضي المده 10 ساعات ونص فيها

تاريخ 22 / 8 بنقضيه في البحر

ويوم 23 / 8 بنوصل هامبورغ

موقف صار وكان بيغير خطة السفر

قبل مانوصل بيرجن بيومين يتني فكره وكنت بغير مخطط سفرنا

فكرت انه لما نوصل بيرجن ننزل ومانكمل الرحله معاهم

ونظل في بيرجن يوم

وعقب نسافر بطيران داخلي الى اوسلو عاصمة النرويج

ونظل كم يوم وهنيه ممكن نرجع من أوسلو ع الامارات

أو نطولها ونرجع من هامبورغ

وتميت أفكر في هاي الفكره بروحي بدون ما أخبر البنات

لأني عارفه انهم بيوافقون ع هالاقتراح لأنه في خاطرهم يسيرون اوسلو

تميت أتشاور مع بوعيسى وهو ماكان متشجع وايد لأنه مايبانا نتأخر أكثر

وبعد نقاش وتفكير قررت اني أظل ع برنامجنا

واتعوذ من الشيطان ومن افكاري الجنونيه

معلومات جمعتها

قبل لا أسافر يلست أدور في النت والانستا والاستعانه بصديق لين

جمعت بعض المعلومات الموجوده في بعض مناطق النرويج

لأنه كنا مقررين انه بعض المناطق مانطلع فيها مع القروبات السياحيه

ونتمشى فيها بروحنا ونستكشفها

وكنا مختارين 3 مناطق بس نطلع فيها مع القروبات السياحيه

يعني بس 3 رحلات

لكن اللي صار عقب غيــــــــــــــــر

وعقب بتعرفون الاسباب

المعلومات اللي جمعناها

أولا مدينة Alesund

هاي بدون قروب سياحي وبنيلس فيها 7 ساعات

الاماكن السياحيه اللي فيها

1- فيها تله مرتفعه ولازم نصعد لها ونسأل كيف نسيرلها وفوق مطعم وفيو

Fjellstua Utsiktspunkt

2- أكواريوم واسمه

Atlanterhavsparken alesund akvarium

3- مزرعه أسمها

Ytste-skotet

4- بحيرتين وسط الجبال وهاذيل فيهم مباني مطموره

NORANGSDALEN (( THE queens route ))

هاي المنطقه من أضيق الوديان في النرويج

متحف الكنز

Exhibition : therunde treasure , bird mountain

and silver of the sea

5- شلال وقريب واسمه

Dynjafossen waterfall

Gudbrandsjuvet

6- جزيره فيها بط غريب شكله وطيور مهاجره والجزيره جبليه
اسمها

Rundebranden

7- بعد الباص السياحي

ثانيا : قرية Tromso

بنيلس فيها 6 ساعات
الانشطه الموجوده فيها :

1-تزلج مع غزلان الرنه

2-التزلج مع الكلاب الهاسكي وغالبا تكون في الحدود بين

النرويجج والسويد وفنلندا التي تسمى لاب لاند

lapland

3-مشاهدة الحيتان والدلافين

4-ركوب الخيل

5-جوله بحريه وسط الجليد

6-جوله بالهيلوكوبتر

7-كيبل كار ونشوف الفيو من فوق

8-استئجار قارب خاص ورحله لصيد السمك في البحيرات المتجمده

9-المتاحف زيارة الجامعه اللي فيها تقدر تشوف الشفق بالضبط اذا ماشفته بعينك

10- رؤية الشفق القطبي في الشتاء

11-استئجار الدراجات الثلجيه في وديان منطقة لاب لاند

ثالثا : منطقة Honningsvag

بنيلس فيها بنوصل 3 الظهر وبنتم لين ثاني يوم 2 فليل

بنطلع هاي الرحله مع القروب

King crab safari bus experience:

2,5 ساعه

بنبحث عن رحلات ثانيه حق باقي اليوم وفكرت أييب المعلومات من المكتب السياحي

بس هذا اللي جمعته في وقتها وكان البرنامج مب واضح بالنسبه

يعني كيف بنسير لي مكان سياحي

ولكن عقب انتظمت امورنا لما طلعنا في الكروز وبدأت تتضح عني الامور أكثر وأكثر

وان شاالله عند كل منطقه بنزورها وقتها بعطيكم معلومات أكثر

أشياء لازم تاخذونها معاكم في رحلة الكروز

1- حسب خط رحلتكم ووقت رحلتكم يتحدد اللبس اذا شتوي أو صيفي

ولكن نصيحتي هاتوا ثياب خاصه حق السفينه غير اللي بتلبسونها

في الرحلات أو المناطق اللي بتنزلون فيها ولازم تكون ثياب مريحه ومناسبه

بالنسبه للصبايا

هاتوا معاكم شيل أو اسكارفات الشعر غير عن اللي بتطلعون فيهم

لأنه هاي الاسكارفات بتستعملونها يوم بتمارسون انشطه في السفينه

أو بتسيرون المطعم فممكن تتوسخ أو تضرب فيهم الريحه

يعني اللي تلبس اسكارفات ماركات لاتلبسها في السفينه

السفينه شرات بيتكم متكشخين بس بالبسيط

فهمتوني صح

2- هاتوا لبس رياضي وهذا للجنسين حقق الجيم ن طبعا حق اللي يبا

3- هاتوا لبس للسباحه للجميع حتى لو البلاد بارده لأنه في مسابح داخليه ودافيه

والصبايا لبس مايو اسلامي

نحن ماخذينا معانا لأنه ماندخل المسابح المختلطه بس انا أخبركم للعموم

4- الحذاء لازم يكون مريح للرحلات ونعال مريح حق السفينه

أنا كنت ماخذه نعال عزكم الله بس ألبسه في السفينه مريح وعملي

لأنه السفينه كبيره والمشي فيها وايد

5- لازم تاخذون شاحن متنقل احتياطي هذا وايد مهم

6- لاتشيلون شنط كبار ولا لبس وايد خليكم في الوسط لأنه الغرف

ماتكون واسعه وايد وبتتوهقون وين تحطون شنطكم

7- شيلوا معاكم كتاب تقرونه في بعض الاوقات

8- شيلوا معاكم بعض الالعاب مثل البته وحد يسميها ورقه أو زنجفه

وغيرها من الالعاب للتسليه

9- شيلوا معاكم دواء لدوار البحر في حالة احتجوتوا له

10- خزنوا بعض الافلام والبرنامج اللي تبونها في اللاب توب

عشان تشوفونها وتقضون بعض الاوقات معاها

بناتي كانوا جيه مسوين

بالنسبه لي كان جوي غير ، كان رفيقي الكتاب

ملاحظه مهمه وااااايد

الارسال في السفينه في بعض الاوقات يكون مقطوع لأنكم تكونون في نص البحر

والنت في السفينه بالايجار وكان غاااااالي وايد وبتيكم سالفته من خلال الا حداث

فيعني ممكن اتمون ساعات طويله بدون خدمه ولا اتصال

باختصار دورولكم شي مفيد تشغلون وقتكم فيه

تقريبا هذا كله اللي ذكرته لين الحين

تابعوني في الجزء الخامس

يوم الوصول

هاوية الاسفارمعجبون بهذا.

MOBARKI · 19-10-2015, 01:33 AM

جزء رائع وتفاصيل مهمه لترتيب نفسك للسفرية

اعجبني طرحك للمدن اللي راح توقفوا فيها وافضل الاماكن

واهم شي الوقت المحدد للمدينه

معاك مش راح نغمض بس بدون روتانا خخخ

يعطيك العافية ام عيسى

أبو مهاب · 19-10-2015, 09:11 AM

متابع ومستمتع

لاحظتي او شفتي عوايل معاها اطفال (اقل من 10 سنوات) ؟

ايش رأيك ، رحلات الكروز بتناسبهم؟

هاوية الاسفارمعجبون بهذا.

هداوه · 19-10-2015, 11:45 AM

صباح الفل

اليوم وأنا أجلب أوراقي لقيت معلومات فاتتني أحطها في التفاصيل اللي فاتت

والميزه اللي في منتدانا انه نقدر ونضيف في أي وقت

فهاي ميزه وايد حلوه أرجوكم لاتغيرونها

اقتباس : المشاركة الأصلية كتبت بواسطة MOBARKI

جزء رائع وتفاصيل مهمه لترتيب نفسك للسفرية
اعجبني طرحك للمدن اللي راح توقفوا فيها وافضل الاماكن

اقتباس : المشاركة الأصلية كتبت بواسطة MOBARKI

واهم شي الوقت المحدد للمدينه
معاك مش راح نغمض بس بدون روتانا خخخ
يعطيك العافية ام عيسى

الله يعافيك ويسلمك ويخليك يارب

انته الوحيد اللي كنت سهران ويايي

وتستاهل هالورده

آخـــرفـــرصـــة · 19-10-2015, 12:50 PM

جميل ترتيبكم للرحلة و تخطيطكم لها

مسار الرحلة رائع و زين أنكم تميتوا عليه

واضح أن احساسكم بالراحة في الكروز خلاكم تستمتعون أكثر
و هذا سر الجمالية في رحلات الكروز أنها رحلات جماعية كبيرة

مقدام · 19-10-2015, 01:07 PM

ماشاء الله تفاصيل ومعلومات ونصايح مهمة
تسلمين ام عيسى على ما تقدمينه

حمستينا لرحلات الكروز
وخط سير رحلتكم شكله حلو

وبانتظار التقرير والاحداث

آخر مواضيع مقدام

- الشمال الايطالي ثم الى بورتفينو وجنوه 2019
- رحلة شتوية الى جورجيا (تبليسي وثلوج غودوري)
- رحلتي العائلية الى الأراضي النرويجية
- كرواتيا ... زغرب وروعة بحيرات وشلالات بلتيفيتش
- جولة في ارض الطبيعه (البوسنة) .. مايو .. 2018

توقيع : مقدام

(كن _سفيرا_ لدينك_ ووطنك )
احداثيات وخرائط للاماكن سياحية شمال ايطاليا
موسوعة مقدام الامريكية ..اماكن سياحية.احداثيات.خرائط
احداثيات ومواقع الاماكن السياحية في سويسرا وما حولها
جنيف اين تذهب فيها واين تذهب منها ..
خريطة سويسرا السياحية

سوسو الصغيرة · 19-10-2015, 01:09 PM

زين لحقت على الطيارة قبل لا اطير
لي عودة مرة ثانية

أبن السلطنةمعجبون بهذا.

أبوفيصل · 19-10-2015, 01:50 PM

متابعين

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة الأحلام المتوسطيه في الكروز EPIC	وجهات أوروبية	رحلات الجزر والكروز	157	05-08-2019 04:10 PM
رحلات الكروز cruise Tasik فى بحيرة بوتراجايا الرائعة	أبوعبدالله (الاسفار )	ماليزيا	16	07-12-2017 05:40 PM
رحلة فردية للأراضي الامريكية ...	Tamem	بوابة امريكا	108	20-11-2015 08:37 AM
اريد قائمة لاسماء شركات الكروز من تقوم برحلات على المضايق النرويجية وجزيرة ايسلندا	غرام الامل	بوابة اسكندنافيا	3	25-02-2015 03:00 PM