اختي اجبت على بعض الاجابات الي حاوبلت انها تكون تفصيليه
وبعدها اكمل الباقي لاني طالع بشغله
واعتبري ها الاجابات تفصيليه
وبعدها بتكون اجابه عمليه وبالصور والمحطات

اشكر مديرنا فيصل ومشرفتنا ام ريم
ماقصرو جزاهم الله خير

ان شاء الله ماعليكم خوف بالنقاب نفس ماقالت مشرفتنا ام ريم
واذا تحتطون اكثر مكن تحطين اللثمه على اساس تقيج من البرد

بالنسبه للأستفسارات الثانيه

ذكرت لج ان الفنادق المختاره من حيث المكان جيده
الفندقين قريبين من كل شي وقربهم لشوارع عامه وليست في ازقه وشوارع ضيقه
الاول قريب من الشانز بالضبط من محل فيرجن

والثاني قريب من برج ايفل وخلف المتحف الطبيعي والزراعي الفرنسي


س/الشانز من بدايته لنهايته بناخذه مشي ولا متعب بسبب احوال الطقس صعبه ؟؟

لا اختي مشي الشارع مب طويل كثير يعني تقريبا بطول 600 الى 700 متر
بالنسبه طبعا للمحلات التجاريه
وايضا يمتد اكثر من بعد المحلات ويصل نهايته الى ساحه الكونكور والمسله المصريه


س/ بطلع هالاماكن ..
الحي اللاتيني

الحي اللاتيني تروحين بوقت سكنج في ايفل افضل لانه قريب منج وتروحين له بالمترو
راح اعطيج محطات المترو وخارطه توضيحيه للأمكان الي راح تزورينها بمحطات المرتو المطلوبه


*هضبة مونمارت

الهضبه افضل تروحين لها بنفس يوم ذهابج الى الاوبرا وجاليري لافاييت لان اقرب وبنفس المنطقه تقريبا


ساحة فاندوم

بالنسبه لساحه فاندوم تروحين لها بنفس اليوم مع ساحه الكونكورد والحديقه المقابله لها حديقه Jardin des Tuileries لانها قريبه منهم

غاليري لافاييت


الغاليري لافييت ( منطقة الاوبرا )
غاليري لافاييت اما قاعه الاوبرا
والغاليري خلف دار الاوبرا بالضبط
المكان حلو والغاليري حلو
بس عندي تحذير + افاده

التحذير :
اما دار الاوبرا في الساحه يتواجدون مجموعات من البنات يتكون بعدد بين 3 الى 5 بنات
اعمارهم اقل من 18 سنه ( مراهقات )
يتصيدون للسواح
الوصف : ملابسهم ريفيه قديمه - اشكالهم نفس اشكال الشعب اللاتيني والشرق الاسيوي
طريقه السرقه :
اذا كانو اربع بنات يتجمعون منهم 3 بنات خلفج ملاصقين لج ويضربون على الكتف او اليد ضربات بسيطه لعمل ربكه وعدم احساس بالحركه
والبنت الرابعه تيسرق اغراض شنطه اليد
وحركه البنات الثلالث تشتت تفكيرج عن الرابعه وماتحسين بحركتها وهي تفتح الشنطه بلمح البصر
السموحه مابي ارهبج بس ابي انبهج لاني صادفت هالموقف بنفسي وناس ثانيين ايضا
الوقت الي بتروحين في الاوبرا للحيطه خلي معظم بطاقاتج البنكيه والمبالغ الكاش عن زوجج
وربي يحفظكم

الافاده :
في مجمع جاليري لافاييت بعد شراء الاغراض تاخذون من عندهم ورقه التاكسي فري tax free
في مكتب داخل المجمع تعطينهم ورقه tax free ويعطونج المبلغ كاش عشان تستفيدين من المبلغ بالسفره ( فقط الاغراض المشتراه من غاليري لافاييت وليس كل التاكس فري )

اذا بغيتي تسترجعين
في حاله استخدام بطاقه البنك ATM العاديه ( لا يقبل التاكس فري الا بالمطار )
فقط اذا كان الشراء عن طريق بطاقات الفيزا او ماستر كارد او امريكان اكسبرس ( تستلمين المبلغ بالمجمع كاش )


منطقة الباستل

منطقه و اوبرا وساحه الباستيل تروحين لها بنفس اليوم مع منطقه بيرسي لو حابه تروحين بيرسي جنب محطه قطارات كير دي ليون


اللاديفانس
س/نقدر نروح لها مشي ولا مترو ؟؟
س/طيب الحين صار فيها مترو .. شو التذاكر اللي تخدم هالاماكن ؟ وأقصها من الاثنين*
الي السبت يوم العوده للوطن*

اللاديفانس لا تروحين لها مشي بعيده اشوي
عن طريق المترو ان شاء الله راح اشرحها لج بالصور ومحطه النزول وشنو تسوين بالضبط
في مشاركه قادمه والاغلب بتكون اليوم بالليل ان شاء الله

اختي وايد ينفعج المترو في تنقلاتج
90% بتكون مترو
وتخدم تقريبا معظم الاماكن الي بتروحين لها
وراح اسهل لج موضوع المترو تطمني

وايضا انتظري موضوع الجديد راح ينفعج ان شاء الله بس اهم شي يكون عندج ايفون او جلكسي نوت
واخلصه وانزله احتمالي اليوم بالليل ان شاء الله


رحلتنا استجمام واستكنان خاصه اننا بالعيد الفطر اللي راح هجولنا في سويسرا والغابات*
السود .. علشان كذا السفره هذه تكيه كافيهات واستمتاع بالطقس المفقود عندنا بالخليج واللي ساعدنا اننا*نحب المشي الكثير*
والرحله لشخصين يعني خفيفه*


ماشاء الله حلوووو
راح اعطيج خطين سير للمشي بين الشانز وبرج ايفل استمتع فيهم
مع قعدتي المفضله جدا جدا في الكوفي المقابل لنهر السين وبرج ايفل
والكوفي هذا قريبا جدا جدا من مكان ركوب المركب لجوله في نهر السين
وطريق المركب من هذا الكوفي الانطلاق في النهر وتمرون من تحت جسر العشاق ويصل حتى كنيسه روتردام وبعدها يرجع الى ان يصل الى برج ايفل
قبل التوقف في محطته للنزول منها


س/ فيه مكان قدام بلديه باريس ساحه تزلج وينها فيه بالضبط ؟؟ ابي محطه مترو توصلني لها !!

اختي هالمكان ملاصق للبلديه بالضبط
وللأسف هو مؤقت وليس دائم يعني بس ايام اراس السنه والكريسمس يفتح
وبعدها يغلق
والدخول للتزلج مجاني ودفع 6 يورو عشان تستأجرون حذاء التزلج

هذا مكانه بالضبط

مطل على نهر السين
مابين متحف اللوفر ومنطقه الباستيل

اسم المحطه الي توصلج هي Hôtel de Ville
هي اسمها جذي تطمني مش فندق ههههههههه

وهذا مكان التزلج المؤقت

العاب

وانا اكتب استفساراتي الكثيرة والمتشعبة
كنت عارفة
ان الباريسي القطري
قدها وقدود ماشاء الله
ما قصرت اخوي قطر
كفيت ووفيت ومداخلتك زادت موضوعي جمال مع مداخلات الفيصل وأم الريم
يعطيكم العافيه جميعاً
اخوي قطر
انتظر كل ما تجود به يمينك حرمها ربي عن النار
الف شكر

رحله موفقه .. وماشاء الله ماقصصروا الجميع ..
طمنينآ اذا رجعتوا بالسسلامه ..عن الاوضاع لاننا بنسسافر في مايوا وزوجي متخوف من اللي صار ويقول نكنسلهآ وانا اقول نتوكل على الله مآراح يصير الا كل خير ,,
الله يسسعدكم وييسسر اموركم .. وترجعون بالسسلامه

اهلا أختي حلم
وش بلانا حنا ي الحريم متحمسين لباريس
عكس رجالنا اللي ودهم بالكنسله
اللهم امين وياك وكل مسلم
ان شالله ان رحت وجيت ابشري بالعلوم

تكمله باقي الاستفسارات

س/محل بريماك *فتح جديد بباريس وين بالضبط مكانه ؟؟*

لهم 3 افرع وكلهم في ضواحي باريس
يعني ما في ولا فرع وسط باريس
راح ابينهم لج في المشاركه الاخيره وطريقه الوصول لهم

س/ تتوقعون المطاعم راح تكرشني اذا شافت اني لابسه لثام ؟ خاصه بالوضع الراهن !!*
واجهنا هالموقف في مطعم في فنيسيا !!*
اشرطوا دخولي للمطعم اشيل النقاب !!*
عارفه أثقلت عليكم*

لا لا ماعتقد
بس خبرج لكل قاعده شواذ
يعني يمكن بأي مكان يجي واحد يكون عنصري ويطلب هالطلب
لكن في مطاعم كثيره محترمه في باريس
وركزي على مطعم نوره فرعهم قريب من شارع جورج سانغ والثاني جنب الاوبرا وغاليري لافاييت
ايضا راح اشرح لج عن المطاعم

تنبيه اخير :

في شارع الشانز مرات تصادفج من شخص ان يقول لج ان هذا الخاتم طايح منج
لاتردين عليه ولا تعطينه بال وامشي بطريقج
هذا الخاتم يكون معاه لما تمرين قريب منه يقطه قدامج يقول هذا الخاتم طاح منج
عشان تعطينه المقسوم هههههههههههههه

بالنسبه لقصر فرساي
اذا انتي من محبين المتاحف وشي اساسي بالنسبه ممكن تروحين له
نفس شرح مشرفتنا ام ريم
وبنس الطريق من باريس الى قصر فرساي يوجد هناك فرنسا المصغره France Miniature
وهي المنطقه كل معالم فرنسا فيها بس مصغره يعني بتكون بطريقكم و انتو رايحين فرساي

بس اذا الجو مايناسب والوقت ضيق مافي داعي تروحون فرساي

ممكن تروحون اللوفر و تتفرجون على لوحه الموناليزا

حاولت اجاوب على استفساراتج بالشرح
وبعدها ان شاء الله نبدأ التطبيق العملي بالصور ومحطات المترو

وبالتوفيق

الله يحفظكم أختى .. وتوكلوا على الله بعد الاستخارة والله هو الحافظ ..
وطمننوا بعد عودتكم بإذن الله .. وان شاء الله الامور بتكون طيبة ..
سفرا ميمونا باذن الله ..

مرحبا اختي
كيف الحال

نبدأ بالعملي

بخصوص محلات بريمارك
لهم 3 افرع وكلهم في ضواحي باريس ولا يوجد فرع في وسط باريس

انا حددت لج فرع واحد منهم وهو الانسب لج بوجهه نظري
للأسباب
ان يوجد داخل مجمع تجاري كبير وفي محلات ثانيه وكارفور
السبب الاخر ان محطه المترو تنزلج جنب المجمع التجاري بالضبط
اما الفروع الاخرى في مسافه مب بسيطه بين محطه المترو الى محل بريمارك

هذا الفرع في منطقه Créteil

صوره للمحل

العاب

العنوان :
101 Avenue du Général de Gaulle
94000 Créteil
France

اوقات الدوام
Sunday CLOSED
Monday 10:00 - 20:00
Tuesday 10:00 - 21:00
Wednesday 10:00 - 21:00
Thursday 10:00 - 21:00
Friday 10:00 - 21:00
Saturday 10:00 - 20:00

طريقه الوصول له
اخترت لج اقرب محطه حق فندقكم الي في الشانز قريبه جدا
اسمها Franklin D. Roosevelt وهي محطه الانطلاق
في هالمحطه تاخذين الخط رقم (1) باللون الاصفر
ولما توصلين المحطه Reuilly - Diderot
تغيرين الخط وتاخذين رقم ( 8) باللون البنفسجي
وتنزلين في محطه Créteil - Préfecture
والمجمع التجاري الي فيه محل بريمارك يكون جنب هالمحطه

بالنسبه للأستفسارات الاخرى :

1- صعود البرج
المصاعد مفتوحه من الساعه 9 ونص صباحا الى الساعه 11 مساء اخر مصعد
بالنسبه لو بغيتو تروحون الطابق الاخير قمه البرج اخر مصعد 10 ونص مساء

اسعار التذاكر :
الصعود الى الطابق الثاني
للكبار (9 يورو)- الشباب من 12 الى 24 (7 يورو)- الاطفال من 4 - الى 11 (4 ونص يورو)

الصعود الى الطابق العلوي
على نفس الترتيب للكبار 15ونص يورو - الشباب 13 ونص يورو - الاطفال 11 يورو

2-رحلة السين

اقرب محطه مترو لمكان المراكب في نهر السين Alma - Marceau
هالمحطه تطلعج على تقاطع اشارات
تروحين جهه النهر بتحصلين نزله الى النهر تنزلين منها تكون مكان وقوف المراكب قدامج

وصف ثاني لو بغيتو تروحون للمراكب من الشانز مشي
في شارع الشانز تدخلون بالشارع مابين لويس فوتون وكوفي فوكيتس
اسم الشارع جورج سانغ وتمشون في هالشارع الى نهايته يكون امامكم التقاطع الي فيه نفس محطه المترو
على يسارج مقابل التقاطع يكون يسارج كوفي شوب فيه مظلات حمره انصحكمفي الجلسه الخارجيه ممتعه وخاصه ليلا يعطيكم منظر للنهر وبرج ايفل
ومن هذا الكوفي تعدون التقاطع بأتجاه النهر بتشوفون يساركم منزل على تحت للنهر
تنزلون منه هنا المراكب امامكم

رحله نهر السين يطلع بالنهر الى ان يصل الى كنيسه نوتردام مرورا من تحت جسر العشاق
ويرجع مره ثانيه الى ان يصل االى برج ايفل قبل العوده الى مكان الصعود

3-جسر العشاق


اقرب محطتين مترو هم :
1- Pont Neuf
2- Louvre - Rivoli

اذا قررتو تروحون بيوم متحف اللوفر
ممكن تروحون جسر العشاق بنفس اليوم

وفي طريقه ثانيه للوصول بدل المترو
عن طريق السيكل ( الدراجه الهوائيه ) السياحيه وفيها عربه تكفي 3 اشخاص
حلو تغيير انا مجربها ورايح جسر العشاق بها هههههه

'طريقه جسر العشاق شراء قفل مع مفتاح
وكتابه الاسماء عليه او الحروف
وقفله بالشبك الموجود على اطراف الجسر
ومن بعدها رمي المفتاح في النهر

4- الحدائق المحيطة بالبرج

بالنسبه للحدايق
حديقه برج ايفل وهي بنفس مكان البرج
وحديقه لوكسمبورغ توصلين لها عن طريق محطه الرير الازرق B
الى محطه port-royal
ومحطه برج ايفل اسمها Bir-hakeim

وخلف حديقه لوكسمبورغ توجد الحي اللاتيني ممكن تروحين له مشي خلف القصر الي داخل الحديقه

اما اذا بغيتي تروحين الحي اللاتيني في يوم اخر
اسم محطه الوصول له هي Saint-Michel

بخصوص قصر فرساي
ماتروحين له من محطه بير حكيم
اطلعي من المحطه جنب برج ايفل champ de mars tour eiffel
على الرير الاصفر حرف C

العاب


العاب

بالنسبه للذهاب الى اللاديفانس
الافضل الذهاب لها من الشانز بمحطه مترو George V
وتنزلين بمحطه La Defense يعني اخر محطه بالخط الاصفر
من توصلون الى هالمحطه هي كبيره كثير
في مدخل يدخلكم للمجمع التجاري Temps ( الفصول الاربعه )

بالنسبه لحديقه دزني ماقصرتي مشرفتنا الكبيره ام ريم في الاجابات عليها

بس ممكن تروحين محل دزني لاند في الشانز تستفسرين وشراء التذاكر من هناك


وان شاء الله الامور الحين صارت واضحه