السلام عليكم ورحمة الله وبركاته ..

اخواني الاعزاء الله يسعدكم ابي فزعتكم حاب اسافر لاوروبا باذن الله ب شهر 8 هجري ممكن ترتبون لي خط سير الرحله راح ازور المانيا وسويسرا وفرنسا وايطاليا مدة الرحله 15 يوم


ايش افضل مطار ننزل فيه ونغادر منه
افضل شركة تأجير سيارات وتكون اسعارهم رخيصه
افضل المدن والقري اللي تنصحون ب زيارتها وكم يوم نجلس فيها

الله يرضالي عليكم لاتتأخرون علي ب الرد ابي استعجل ب الحجوزات

معقوله ولا رد !!

15 يوم في اربع دول بتتعب وبتضيع مسك خطوط ومشاوير
لكن
ممكن يكون وصولك باريس وعودتك فرانكفورت

باريس 5 ليالي منها ليله لدزني لاند
وبالقطار من باريس الى جنيف دايركت وتاخذ سيارة من مطار جنيف الجزء الفرنسي
انترلاكن 4 او 5 ليالي
بادن 3 ليالي
فرانكفورت ليلتين
اذا جاز لك اقتراحي ممتاز واذا ماجاز لك عين فراش وعين غطى

آمر وابشر باللي يرضي خاطرك

تحياتي

آخر مواضيع قايد

- دعوة للتمتع بالتسوق في ارجاء المانيا - برشلونه الساحرة (دليل سياحي ) بقلم المنقلب - الدليل السياحي للدنمارك - الطريق الجديد بين الرياض الى عمان - الدليل السياحي لامبراطورية اليابان

توقيع : قايد

معرفاتنا بوسائل التواصل الإجتماعي تويتر إنستغرام

لا تحاتي يا علي الأخوان هنا ما يقصرون راح يفيدونك و اخونا قايد ما قصر
لكن تصفح بوابات الدول اللي بتسافر لها و راح تستفيد كثييييييييييير

شكراً

مرحبا اخوي علي

منور الله يسلمك

نفس ماقال لك مشرفنا الاخ قايد
15 يوم قليله جدا لزياره اربع دول
تقدر تروح اربع دول بس ماراح تستمتع بكل مكان تنزل وممايمديك تشوف المنطقه وتستمتع بنشاطاتها

واشكر خبيرنا في المانيا مشرفنا الغالي ملللوك

نحاول نعطيك خيارات اكثر على اساس تشوف المناسب لك
وباخذ بالحسبان ان تكون رحله الطيران دايركت
الخطوط السعوديه دايركت تستعمل المطارات التاليه
فرانكفورت - جنيف - باريس - ميلانو

مخططي كالتالي :

الوصول ميلانو الجلوس فيها يومين
والانتقال الى لوقانو يوم واحد
والانتقال الى انتر لاكن والجلوس فيها 4 ايام
والانتقال الى بادن بادن او ستراسبورغ 3 ايام
الانتقال الى باريس ودزني لاند مقسمه الى 5 ايام

مجموع الليالي 15 ليله
وطريق العوده من باريس ( كذا الذهاب والعوده دايركت )

وتقدر يكون الجدول العكس
الوصول باريس والعوده من ميلانو

واذا تبغي واجباري تروح جنيف اقدر اقلب لك الجدول

ميلانو ( الوصول ) - انتر لاكن - جنيف - باريس ودزني لاند - بادن بادن - والعوده من فرانكفورت


شوف كل المخططات ومخمخها على مزاجك وانا والاخوان ماراح نقصر او نبخل عليك بأي معلومه

الله يسعدكم ويفرجها لكم
شكراً لكم جميعاً ماقصرتوا لاخلا ولا عدم
كل مخطط اجمل من الثاني ب صراحه حيرتون ماخيرتون شكلي باخذهن كلهن وبقسمهن لما يخلصن شكلها بتكون رحلتي 3 شهور
السفره انا وزوجتي
ب النسبه لايطاليا يوم واحد للبندقيه حاب ازورها

اليوم سويت هالتخطيط وش رايكم فيه طبعاً محطة الوصول ميونخ والمغادره باريس

الدول
المانيا 2 ايام - ميونخ
النمسا ٥ايام
طبعاً زلامسي - كابرون
ايطاليا 1 - البندقيه
سويسرا ٤ ايام - انترلاكن
انسي 1 ايام
فرنسا 2 ايام
بعدين ع السعوديه

هاه ي حيي وش رايكم

العفو اخوي

متعبه جدا جدا من ناحيتي مانصحك
ماراح تستمتع ولا راح يمديك اشوف المكان
ومعظم المناطق بينها مسافات طويله

زيلامسي الى البندقيه اذا بالقطار اكثر من 7 ساعات
واذا بتطلع من سالزبورغ الى البندقيه دايركت اكثر من 6 ساعات

وخاصه بتوصل البندقيه يوم واحد
بتكون جاي من رحله طويله
الى رحله طويله اخرى من البندقيه الى انتر لاكن

ومن البندقيه الى انتر لاكن مسافه طويله ايضا
اجباري يروح القطار ميلانو وبعدها انتر لاكن اكثر من 6 ساعات

من انتر لاكن الى انسي ايضا مسافه


جدولك ينفع لو سفرتك اكثر من 20 يوم على اقل تقدير بتكون حلوه

طيب راح الغي ايطاليا
واحصرها ع المانيا وسويسرا وفرنسا

حاب استفسر عن الحجز من ميونخ ل باريس كيف طريقته واسعار التذاكر غاليه والا رخيصه ؟