السلام عليكم
ترددت كثير في طرح الموضوع ، وخفت انه يسبب احباط او شي ، ولكن هذا واقع لازم نواجهه ونبحث له عن حلول .

المتأمل لوضع المنتديات حالياً من قلة التفاعل والغياب والحضور المتقطع هو امر طبيعي في ظل المتغيرات التقنية .

انا متواجد في المنتديات من عام 2001 وعاصرت كل التقنيات والتغيرات واشوف ان اللي قاعد يصير للمنتديات امر طبيعي لان التطور التقني وظهور مواقع التواصل الاجتماعية والهواتف الذكية اغنت المتصفح عن المنتديات وقللت من رغبته في دخولها .

مواقع التواصل توفر لك السرعة والحرية والانتشار بدون حاجه لفتح المنتدى والتسجيل ثم فتح موضوع جديد وتكتب وتتعرض لرقابة المشرف وتنتظر التفاعل .

بامكانك تفتح تويتر من جوالك وتغرد اللي تحب والتواصل يكون فوري وسريع وبدون رقابه وقس على ذلك الواتس اب والانستقرام والفيس بوك والتلقرام والسناب شات وغيره من التطبيقات . اضف لذلك ان الشركة المنتجة للمنتديات ما غيرت ولا واكبت التطور وبقت زي ماهي .

من عام 2010 بدأ التراجع التدريجي والآن اغلب المنتديات انتهت وما بقى منها الا المنتديات المتخصصة وبنشاط اقل .

زبدة الموضوع كيف نجعل المنتديات تتماشى مع الواقع الحالي ؟
كيف نخلي منتدى العرب المسافرون زي ما كان منبر سياحي متميز ؟

خلونا نتشارك في الافكار والآراء ونطلع بحلول ممكن تطبيقها .

وسلامتكم