تقرير رحلتي الى سنغافوره - الصفحة 4

Deena · 08-01-2016, 10:13 AM

حبيبتي .. بدك تسامحيني على كتر الأسئلة
العرض الي كنتو تنتظروه، عرض يومي ولا في أوقات محددة؟ حاولت أشوف المواعيد اون لاين بس ما طلع معي غير عروض رأس السنة

توبليرون و Prince Kytu معجبون بهذا.

opera_kw · 08-01-2016, 10:29 AM

اليوم الثالث:

15 ديسمبر 2015

اليوم اخر يوم لنا في سنغافوره العاصمه .. بننتقل الى جزيره سانتوزا

كلمنا الفندق البارح انه يحجزون لنا سياره كبيره .. لانه عندنا شنط ماراح تكفي التاكسي

اقترح علينا الشخص اللي كلمناه من الفندق انه ناخذ سيارتين تاكسي .. ليش ؟؟؟

يقول انه السيارات الكبيره لها تسعيرات ثابته .. وسنتوزا قريبه مو بعيده

فلو ناخذ سيارتين تاكسي بنوفر وااااايد فيها

مشينا على شوره ..

قعدنا الصبح على راحتنا وتريقنا

وبعدها سوينا الجيك اوت وطلعنا

اخذنا سيارتين تاكسي

والحمدلله كفت

طلعت بالسياره انا والاطفال وبعض الشنط قبل بو بدر

وانطلقنا

ووصلنا عند البوابه

جان يقولي التاكسي وين الحجز ؟؟ قلت له مع زوجي

جان يقول لازم نوريهم عند البوابه

المهم نزلت الجام جان اكلم الموظفه قلت لها احنا حاجزين في هارد روك و الاوراق مع زوجي بالسياره الثانيه

جان تفتح لنا البوابه

وصلنا الريسورت وورلد .. عباره عن سلسله فنادق متفاوته اسعارهم

تم الحجز عن طريق مكتب سفريات بعد مقارنه الاسعار بين بوكينق و موقع الفندق نفسه

الاسعار تقريبا ببوكينق والموقع نفس الشي الا انها غير شامله الافطار

علشان جذي حجزنا من مكتب ومع افطار بحدود ال 70 شي و 70 دينار كويتي لليله الوحده

عند الفندق

وهذا فندقنا ..

هارد رووك

اللوبي

هذول اخذتهم من عند الفندق

المسبح بروووحه سياحه

والله وماطولنا عطونا الغرفه بسرعه

رقم الغرفه ..

الغرفه مطله عالمسبح وفيها بلكونه

الغرفه مساحتها كبيره

اهم شي تكفينا وتكفي الشنط

والسرير اللي عاليمين في تحته سرير جرار تسحبونه

يعني السراير كااافيه لنا احنا 4 اشخاص

الحمام عزكم الله (مافي شطاف)

والاطلاله

Deena, شارلوك هولمز, fanda و 11 آخرون معجبون بهذا.

opera_kw · 08-01-2016, 10:47 AM

احنا بنقعد 3 ايام في سنتوزا

التخطيط كان كالتالي

اليوم الاول نشوف المكان ونتمشى فيه

ثاني يوم يونيفرسال ستديو

ثالث يوم باقي انشطه الجزيره كلها

لمن كنا نبحث عن اسعار الفندق دخلت على موقعهم .. والحلو بالموقع يحطون كل الفعاليات اللي بتصير عالجزيره

شفت انه في وقتنا في عرض مسرحيه موسيقيه .. مسرحيه سندريلا

والعرض ياي من اوربا

عاد قلت حق بوبدر بحجز ما عجبه ... قالي سندريلا روحي انتي والاطفال بروحكم

عقب شفت انه في باكيج ( سعر عائلي يشمل 2 كبار و2 صغار ) ب 404 دولار سنغافوري جان احجزه واقوله في عرض حجزته كيفك اذا منت ياي انا بروح

فكان حجزنا يوم 17 ديسمبر يعني اخر يوم لنا بسنتوزا نفس اليوم اللي حددناه للانشطه

واصلا كان هذا اليوم الوحيد اللي متوفر

المهم

بما انه اليوم حددناه للتمشي والاستكشاف

قررنا نسبح بالمسبح حتى وقت الغدا

خلصنا تسبحنا

وطلعنا

على يمين الفندق على طول تبدي الانشطه والمطاعم واليونيفرسال كل شي قريب

المحلات والمطاعم

وهني عن المسرح

اجزاء مختلفه من المكان

ترا كل شي قريب مشي

واللي مايقدر عالمشي في القطار المعلق ينقلكم من محطه لي محطه ببلاش

والمحلات المغريه

حبيب الاطفال جلي بلي

وهذا اليونيفرسال

وسندريلا بعد

Deena, شارلوك هولمز, fanda و 10 آخرون معجبون بهذا.

opera_kw · 08-01-2016, 11:01 AM

فضلو الاطفال وبوبدر يتغدون بماك بس انا ماكنت ابي فاخذتلي خفايف من بريد توك

والكولا من ماك

وبعدها كملنا الاستكشاف

وهذا تمثال الاسد (ميرلايون)

هني بالليل يصير عرض ليزر وماي

كروز

وهذا الووتر بارك

يبيله يوم بروحه

التلفريك

في واحد ينقل من سنغافوره لي سنتوزا

وفي واحد ثاني داخل سنتوزا بس

الميرلايون بالليل

والممشى ورا الاسد

عيد الحب عندهم مو كريسماس

وهذا القطار المعلق

وصلنا لل

اي فلاي

للاسف كان مسكر

كان ودي اجرب

وهذا خط مسار القطار المعلق

كل محطه يبين شنو فيها

واللي مايعرف يقدر ياخذ بروشور الانشطه فيها كل نشاط بأي محطه

حيل سهل كلش مو صعب

بما انه الانتقال مجاني لسكان سنتوزا

قلنا نلعب بالحلال نروح فيفو ستي نتمششى ونتسوق عالخفيف
ونتعشى

وهذي المحطه عند فيفو ستي

طبعا اذا بترجعون سنتوزا لازم تدفعون تذاكر

الا اذا كنتو من سكان الجزيره بكون مجاني

والتذكره المجانيه لازم تكونون ماخذينها من الفندق قبل لا تطلعون ولا تتوهقون بالرده

وانتهى اليوم

بعد ما تشوقو الاطفال على بريد توك

اخذناله منه

وتصبحون على خير

شارلوك هولمز, |القحطاني|, فيصل و 10 آخرون معجبون بهذا.

opera_kw · 08-01-2016, 11:06 AM

اقتباس : المشاركة الأصلية كتبت بواسطة Deena

حبيبتي .. بدك تسامحيني على كتر الأسئلة
العرض الي كنتو تنتظروه، عرض يومي ولا في أوقات محددة؟ حاولت أشوف المواعيد اون لاين بس ما طلع معي غير عروض رأس السنة

سألي قد ما تبين

قصدج عرض الليزر اللي بالمارينا

موجود كل يوم و مرتين الساعه 7 ونص والساعه 9 ونص

تأكدي من الفندق لمن توصلون ان شالله

شارلوك هولمز, Deena و توبليرون معجبون بهذا.

شارلوك هولمز · 08-01-2016, 11:27 AM

ماشاء الله خبيرتنا تقرير رائع عن بلد مجهول لنا

ماقصرت وضحتي كثير عنه ومعلوماتك وافية شكرا لك

متابع معاك ..

هولمز

توبليرون و Prince Kytu معجبون بهذا.

fanda · 08-01-2016, 11:40 AM

ممتعه سانتوزا بس احس ٣ ايام ما تكفي كل الانشطه
الكل يقول سنغافورة غاليه مثل اوروبا حسيتي بهالشي ؟!

فيصل, قصة حب, توبليرون و 1 آخرون معجبون بهذا.

|القحطاني| · 08-01-2016, 02:28 PM

التسوق رهييييييب ما شاء الله

المولات روووعة دائما وسنغافورة مدينة مثالية

الصور في الليل روعة في العاب الليزر

سينتوزا روعة .. والجو فعلا جميل بالصور

الله يعطيك العافية

Sent from my SM-T705 using Tapatalk

توبليرون و Prince Kytu معجبون بهذا.

فيصل · 09-01-2016, 02:11 AM

ما قصرتي
نفس تساول ام ريم
المده هل تكفي
لأنك اشوفك تقولين الووتر بارك خساره ما رحتي لها
يعني اربع ايام تكفي

التذاكر يعطيني الفندق ببطاقه ام تذاكر ورقيه للعوده بالمترو من المول مثلا

توبليرون و Prince Kytu معجبون بهذا.

opera_kw · 09-01-2016, 11:21 AM

اقتباس : المشاركة الأصلية كتبت بواسطة شارلوك هولمز

ماشاء الله خبيرتنا تقرير رائع عن بلد مجهول لنا

ماقصرت وضحتي كثير عنه ومعلوماتك وافية شكرا لك

متابع معاك ..

هولمز

شكرااا وااايد

ان شالله فعلا اكون وضحت نقاط مهمه عن سنغافوره

اقتباس : المشاركة الأصلية كتبت بواسطة fanda

ممتعه سانتوزا بس احس ٣ ايام ما تكفي كل الانشطه
الكل يقول سنغافورة غاليه مثل اوروبا حسيتي بهالشي ؟!

3 ايام كافيه تغطين كل الانشطه بس هال 3 ايام مايكون فيها راحه وكل شي مره وحده

اما اللي يبي يرتاح ويتمشى يبيله اكثر

سنغافوره غاليه بالسكن .. الاكل .. المواصلات لكن التسوووق اسعارهم جدااا معقوووله

وانا ما اقول غاليه يعني مو مقدور عليها لااا انا اقصد غاليه يعني اغلى من دول اسيا الثانيه مثل ماليزيا وتايلند..

بس بكل الاحوال كل واحد يقدر ينظم ميزانيته ومصاريفه

اقتباس : المشاركة الأصلية كتبت بواسطة |القحطاني|

التسوق رهييييييب ما شاء الله

المولات روووعة دائما وسنغافورة مدينة مثالية

الصور في الليل روعة في العاب الليزر

سينتوزا روعة .. والجو فعلا جميل بالصور

الله يعطيك العافية

Sent from my SM-T705 using Tapatalk

الله يعافيك شكرااا على الكلام الحلو والمتابعه

اقتباس : المشاركة الأصلية كتبت بواسطة فيصل

ما قصرتي
نفس تساول ام ريم
المده هل تكفي
لأنك اشوفك تقولين الووتر بارك خساره ما رحتي لها
يعني اربع ايام تكفي

التذاكر يعطيني الفندق ببطاقه ام تذاكر ورقيه للعوده بالمترو من المول مثلا

الووتر بارك مارحناله لعده اسباب

اول شي احنا عندنا اكثر من جزء بالسفره بيكون فيها مدينه العاب مائيه فمارحنا الووتر بارك

والسبب الثاني .. كان عندنا مسبح كبير بالفندق كنا كل يوم نسبح الصبح قبل لا نطلع

يعني كنا نقدر نروح الووتر بارك بدل ما نسبح بالمسبح

والسبب الثالث .. احنا قعدنا باليونيفرسال يوم كامل .. مع انه خلصنا كل الالعاب الموجوده بس قعدنا لي الليل .. اللي يخلص يقدر يطلع ويروح نشاط ثاني

والسبب الرابع .. انه اليوم اللي وراه كنا حاجزين مسرحيه .. فخذت من وقتنا

ولانه عندنا وراها ليغو لاند .. وسن واي لاقون

مانبي الانشطه كلها تكون مقتصره عالماي .. وبس

ولا اللي يبي تكفيه 3 ايام بسنتوزا يقدر يغطي كل الانشطه

والتذاكر اللي يعطيها الفندق .. تذاكر ورقيه

|القحطاني|, قصة حب, Deena و 2 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تقرير عن باصات ايرولاين الناقلة من كوالالمبور إلى كل من جزيرة بينانج و دولة سنغافوره	أبوعبدالله (الاسفار )	بوابة ماليزيا	18	06-10-2018 01:05 AM
تقرير رحلتي الى ماليزيا	عاشق الجمال	بوابة ماليزيا	73	09-06-2018 06:07 AM
تقرير عن رحلتي العائلية الى اسطنبول	Gunner10	تركيا	136	13-04-2018 12:01 AM
تقرير رحلتي إلى تركيا .. (فيديو)	ناصر الخميساني	تركيا	25	01-10-2017 05:33 PM
منقول ..سنغافوره الساحرة (تقرير من تصويري) . للأخ Eengineer..sa	silent_dove	بوابة سنغافوره	27	10-05-2015 09:01 PM