27-01-2016, 08:35 AM
|
#126 |
عضو قدير
تاريخ التسجيل : Mar 2015 رقم العضوية : 2615 الدولة : الكويت الجنس : انثى المشاركات : 2,760
| 
صباح النور والخير والسرور
يومياتي سريعا بكتبها قبل لا انساها ليوم امس تاريخ السادس والعشرون من شهر يناير
استيقضت ونزلت ع الافطار انا ومنتوشي شوشي ومن ثم صعدنا ورتبت الحقائب الي اكره شي عندي في السفر ترتيب الشنط ع قولة اخوانا المصريين صارت الساعه الواحده نزلنا اللوبي وتركت الحقائب عندهم واخذت السائق الخاص لي الى جبل اولوداغ
**** جبل أولو داغ حيث يبلغ ارتفاع الجبل 2543 متر ويعتبر مركزا شعبيا لممارسة الرياضات الشتوية ومركزا للرحلات الصيفية كرحلات التخييم، ويعني اسم اولوداغ في اللغة التركية الجبل العالي ويعتبر اولوداغ اعلي جبل في منطقة مرمرة ويحتوي علي حديقة وطنية جميلة ويمكنك الصعود إليها عبر التلفريك أو السيارة وتبعد حوالي 22 كيلومتر من مدينة بورصة.
طبعا من كنا بالفندق شاهدت الثلج يتساقط وبرد وقلت لايكون بس التلفريك يغلق ويسكر ومايشتغل
خليت السايق يتصل ويتأكد حتى اتحاشى ضياع الوقت اني اذهب وبالاخير مافيش حدت وموقفه العمل بسبب الثلوج لكن اخبرني السائق انه التلفريك شغال ياحجه
رحنا وزحمه الشوارع بصراحه وصلنا وقطعت تذاكر الشخص الكبير خمسه وثلاثون والطفل ع خمسه وعشرن بما اني سبق وكنت في هذا الجبل فانصدمت من زيادة السعر للتلفريك فستفسرت من الموضفين قالي واحدمنهم كل سنه نزيد ع قيمة التذاكر والباترول غالي
صعدنا لاول محطه ولعبنا وصورنا وبعدها لثاني محطه لعبنا وصورنا والسكيتي موتر تأجيره ع مئتان ليره وبالصيف الدباب او البانشي ع مئه فرق الاسعار بين الصيف والشتاء وايد
ومن ثم قربت عند محلات الجاكيتات والا محل الي ع اليمين شافتني ورحبت فيني وانا اشوفها ابيها تتذكرني ما تذكرتني الا من رفعت القبعه الي مدفيه صماخي من البرد والا ترحب وتبوس ومن هالقبلات وشلونج شخبارج ووووو طبعا انا صارلي موقف مع هالمحل بالسفره السابقه انه صاحب الحلال انعجب فيني مالت عليه وكلمني ورفضت ما كو شغل ويرسل لي هالعامله السوريه الي عندي تحاول فيني عاد انا ما احب هالسوالف المراهقيه قتلها تعالي يابنت انا اولا عربيه وخليجيه وتكلم عربي وخليجي وتركي ما اعرف نفرض ومن سابع المستحيلات طبعا انه اقول اوكي بله شلون بنتفاهم ونتناقش ونتهاوش. ونسولف ونجذب ع بعض يعني كذب بالعربي ومن هالسالفه جان وجاااان تقول الي يحب يعمل المستحيل وانتي تعلمينه عربي واهو يعلمج تركي وحياة امج انا فاضيه اعلم لابوه لا ابوه جده ناقصه عوار راس وتدريس وتعليم لاياقلبي عيب هالكلام وبعدين مايصحش هيك تصرف منه
قتلها ممكن سؤال تركيات وايد عندكم زمبلبطه وعادي ومايمنعهم شي بالحب وحياتهم فله وفري ليش مايحب وحده منه وفيه طايح الحظ بس ها تراه خوش واحد والله سوالي خصم من قبل لايقول واعرف اني ابيها
جان تقول لا اهو يقول الخليجيه جميله اسمع يالي ماتسمع يامال البط بعيونك يالي ماتقدرن الي عندكم وتركضون ورا هالاجانب وبعض الدول العربيه وانها الخليجيه تهتم بنفسها وتعرف لنفسها واتكيت وسنعه وفاشن وميك اب ابن الكستنه يبي باريس هيلتون هالتركي اي وبعدين شيقول بعد هالتركي بس حبيبتي يقول انعجب فيك وعايزك ضحكت والله ضحكه كسرت الدنيا وقتلها لا ياقلبي قوليله نو نو نو مستحيل ولايعيد هالشي لامعاي ولا مع اي خليجيه انا طوفت له وسكت والله لو كان معاي احد من العربان كان كسر ضلوعه وخلاها وجبه دسمه للكلاب والذياب عزكم الله
المهم رحبت فيني واستانست وافرحت من شافت الحب الحب عادانا قلت خل اتحرش ههههه قتله فينو حبيبي جان تقول ياخساره اليوم سافر قلت احسن ههههه جان قول عاد انا لي خمس ليالي هني قالت والله لو يدري كان ماسافر الحمدلله انه مايدري ههههه طبعا المره الي فاتت حاولت تاخذ رقمي لكن ماتلعبها علي وما اعطيتها رقمي قالت اوكي اخذي رقمه قلت عيب ع هيك نسوان تاخذ ارقام زلمات وشنبات مايمشي علينا هيك حركات نص كم
دوختكم بسوالفي المهم سولفنا وضحكنا وتغشمرنا وبعدها رحت للمحل الثاني بعد ماضيفوني شاي يدفي الجسم من قساوة البرد
بس قربت للمحل المقابلها اخذتني بالاحضان وهلا وحمدلله ع السلامه وبوسات ياربي ادخل القلب بسرعه شسوي بنفسي المهم نفس الاسطوانه وينج ليش مامريتي من زمان واحسن انج مامريتي الا اليوم لانه قبل خمس ليالي كان البرد عندنا موبرد الا صعيق متجمد تجمد حتى الصخر
سولفنا وضيفني الشيبه راعي المحل واشتريت منها وطلعت ع اعلى قمه وكانت تقولي لاتروحين برد قلت لابروح اشوف الفنادق والديسكو والرقص والنار والقمه رحت بالتلفريك وطبعا المسافه اطول وابعد وثلج وضباب فالمنظر بالغصب تشوفه المهم وصلنا وبرررررررد موت واسرع سريع تصورنا وبعدها ركبنا باص يوصل للفنادق الشخص ع ليرتين ونص وصلنا ونزلنا واخ يالبرد وياروعة المنظر شي خيال طبعا اغلب العرب والخليجين مايعرفون هالمكان واغلب المكانب والمرشدين السياحين ماياخذونهم الى هذا المكان اختصارا للوقت ويكثر فيه الاتراك والاجانب
لكن مكان مبهر وجميل ورائع ولا بالاحلام مدينه ثلجيه بالكامل مدينه مغطاه بالثلج بالكامل تصورنا ولعبنا بعد ما اجرنا السكيتي والصحن ومن ثم المغربيه بس اظلمت الدنيا اشتغل الديسكو وياروعته الديسكو غير شكل مسرح وفطه موسيقى والليزرات الشغاله والاضاءه هذا ع استيج الديسكو الي يكون مكشوف ع الساحه ومقابله علب كبار درامات صناديق معبأه حطب ومولعه نار للتدفأه والوقوف بجانبها والرقص وكانت الساحه مليانه ويمين ويسار لكن بمسافه بعيده قليلا في ديسكو ثاني ببلاش طبعا ونظامه حلو للاستمتاع بالمشاهده رقص وجنون بالمجان يعني انت ماعليك بالمشروب والي يشربون استمتع بفصلتهم بالرقص والوناسه
ومن ثم توجهنا الى محلات الي بجانبهم منتوشي اخذ له قناع كامل يغطي الوجهه وبعدها ركبنا التلفريك وردينا المركز لكن في ملاحظه عندهم باصات تنقل السواح الى مركز المدينه اي الى الشارع الرئيسي السوق الشخص ثلاث عشر ليره طبعا عندهم باصات لاكثر من مكان وقبل هذا اذا بتصعدون التلفريك بعد المحطه الثانيه قولولو اولوداغ مو بورصه لانه عندهم تلفريكات صاعده لاعلى القمه وعندهم نازله لبورصه وسلامتكم
اخذنا الجوع يطقطق بكروشنا ويصرخ وكانت الساعه الثامنه ليلا والى مطعم جديد اسمه رجب رجب رجب وفعلا اختيار موفق ومعروف ومشهور هالمطعم لذيذ للغايه راقي كبير نظيف عمال بشوشين سعره كـ سعر مطاعم بلادنا وضيافتهم حلوه
طلبت وجبة ارز مع لحمه لشخصين وطبعا تكفي ولبن واهم اول ماتجلسون ع الطاوله يقدمون لك المقبلات سلطه وملفوف بدنجان دولمه وكفته المهم العيش الارز مايكفي اليوعانييين والي ذابحهم الجوع لانه من الصبح ماكلينا غير الريوق انا ومنتوشي اما شحيته ولاشي ماكله المهم اخذ مني وقت المطعم حول الساعتين طلبنا مرتين ماعون ارز تركي فقط وماعون لشخصين لحم ورز لانه ماشاءلله اللحم بعد تقطيعه من قبلهم وايد ويكفي وزايد وبعد المالح تلذذت بقهوته التركيه ومن ثم الشاي وبالاخير الشماليه السوداء
العربيه ومع البسبوسه والبقلاوه لذيذ وايس كريم اجمالي الطلب مع وجبة عشاء السائق مئه و ثمانون ليره لاربع اشخاص
بعدها الى الفندق اخذنا حقائبنا وكنت مسويه جيك اوت من الصبح ودافعه حق ليله مئتان لغرفه واحده وبعدها اخذت ثلاث ليالي اجمالي المبلغ للي مادفعت لهم ثلاث ليالي ستمائه ليره مع الافطار وانتبهو السعر للفندق ارخص من اقودا وبوكينج كان اغلى ومباشره من الاستقبال الفندق عطاني سعر الليله نفسها باقودا
اخذت قشي حقائبي الى فندق اخر نظام شقق وبصراحه روعه الاختيار وسعرها اروع وكامله الشقه للحين مادري شنو الي حولها وبجانبها لكن من داخل الشقه روعه وكامله المواصفات ومريحه واستغلاليه شي واحد غير متوفر غسالة الملابس
اخترت الشقه اسرع سريع سويت بحث بقوقل وبوكينغ وبعد ما شاهدت كثير فنادق وشقق واقرا التعليقات والتقيم توكلت ع الله واخترت الي انا فيه وتوفقت فيه الحمدلله
****** ملاحظه ياعالم وانتم بالسفر تصدقو عن انفسكم ولاتبخلو الصدقه تدفع البلاء والهم والعين وووووووو لاتقولون احنا مسافرين ومادري شنو ولاتقول ارجع واتصدق لا وين ماتكون تصدق
واحلا غفوه اخذتها بعد تعب الجبل الممتع
كلفتني رحلة امس مع التاكسي طبعا حول
مئه التاكسي الجبل والمطعم والفندق الاول والثاني الحساب ماله دخل بالعداد اهو يقولي عداد ويعطيني التسعيره بس انا دايما معاه فصرت ما اعبر العداد لكل مكان وبالاخص اذا كان معاي اكثر من مشوار باليوم وستمائه الفندق والجبل حول ثلاث مائه دفعت والمطعم مئه وثمانون يعني تقريبا اكثر من مئه دينار كويتي مع دفع اول ليلة للفندق الجديد
وسلامتكم خل اقوم اصلي واتروش واطلع واشوف الاكل التركي وكأنه لعب فيني وخلاني سمينه بطبوطه وانا مابحبش المتن والسمنه وشحيته كذلك ومنتوشي بعد فابي اخذ رجولي ريولي الي ربي رزقني بالصحه والعافيه واحرك الدم الي فيهم واتمشى واستكشف المكان
وداعا والى حين اخر وتفاصيل اخرى |
| |
841الاعجاب
العرض العادي
المواضيع المتشابهه 
