نامت عيوني على حسنك ؟؟ - الصفحة 2

وجهات أوروبية · 19-01-2015, 05:28 PM

تعبيراتج اعجبتني وايد
سكيك وسكان عوي هههههه وكل بيت تبغينه
الله يرزقج ان شاء الله ببيت على البحيره

صور البحيره مع الجبال روعه
وبلدتهم وسكيكهم شكلها قديمه وناس بسطاء

واكلات المطعم شكله قريب حتى الرافيولي مربعات حراااكات

تقرير مشوق جدا واخذتينا معاج بالسفره
تسلم يمناك على ماخطت

متاابع الى النهايه

طارق عنايات · 19-01-2015, 05:52 PM

يا سلام عليك مشرفتنا الكريمة

التقرير جميل و الصور حلوة

بس اللي عجبني جدا هو طريقة سردك للاحداث

متابع معك و مستانس

حفظكم الله

الغردقاوي · 19-01-2015, 06:22 PM

تسلمي مشرفتنا
ولكن قبل أن أقرأ باقي التقرير
لتعديل الإقتباس عندك ولا يتداخل من النص المقتبس
أذهبي للوحة التحكم
ثم تعديل الخيارات
ثم تعالي إلى واجهة تنسيق النصوص
وعدليها إلى خيار
اللوحة القياسيه - الصندوق الشائع

وأروح أقرأ الجزء الجديد من التقرير
سلام مؤقت

الغردقاوي · 19-01-2015, 06:33 PM

صور جميله ومدن مرتبه ونظيفه
ونظامهم حلو يغلقون 2 ويفتحوا 7 لأن معظم الشعب يكون وقت راحتهم
وقليل ما يطلعون أو يشترون
فعلا بلاد ما إرتقت إلا بالنظام وحسن إدارة حياتهم
متابعينك مشرفتنا

q8ya metnaqla · 19-01-2015, 11:23 PM

اليوم الثاني 10/3

قعدنا من النوم على هالمناظر اللي ترد الروح

صبـــــح الصباح فتاح يا عليم
والجيـــب مفهــــــش ولا مليـم
بس المزاج رايـــــــــق وسليـم
باب الامل بابك يارحيــــــــــــم

ضبطنا شغلنا والجي بي اس وخذينا قروضاتنا للطريج وتوكلنا على الله

الطريج كان ممتع بس وايد نلف على الجبال و هذيل بعض صور الطريج الى وجهتنا المقصوده

ولما الحين بالطريج

قبل هالطريج تقريبا بمسافه كيلو كانوا البيوت على يمينا ويسارنا منظرهم من احلى مايكوون والله لي اليوم اقول حق امي تحسفت مانزلت اصور المكان صورتهم مو راضيه تروح من بالي

ان شاءالله ارد واسافر لهم مره ثانيه

وداع يا شوق يا ذكرى وداع يا زمان كان

وكل اللي اقوله الان اباركلك بالنسيان

الحين وصلنا وجهتنا اللي خذت منا تقريبا مسافه طريج من مونترو لها ساعه ونص

والقارمن وقوقل ماب شغالين على جهازين عشان نتأكد من طريجنا

من montreux الى chamonix

الطريج كان جبلي وهذي اول تجربه لي اسوق خط جبلي عكس جنيف الى مونترو كان خط سريع الجبال وااايد وترتني وانا اسوووووق مااخفي عليكم كنت خايفه بس بالعتها عشان نبع الحنان ماتعطيني اسطوانتها المعهوده اللي مايطيع يضيع وانا قلتلج خلينا عالقطارات انتي ماتسمعين الحجي ف اضطريت اسكت واسوي روحي الوضع طبيعي )

وصلنا شامونيه عشان نصعد قمه مون-بلان وفي ماركه رجاليه على اسمها واشيائهم اتينن

اجرنا وانتوا بكرامه جواتي لان خفنا نزلق ال 3 ساعات ب 12 يورو تقريبا وصعدنا للسحتني

الارتفاع 3842m

سعر التذكره 55 يورو للشخص

ركبنا التلفريك لصعود القمة

بدينا نشوفهم وقلبي يفرفر عليهم

وهذي شامونيه كل مالها وماتبين

هذيل الصور من الوقفه الاولى لان بعدها نصعد تليفريك ثاني ونكمل لي فوق ولما الحين امورنا طيبه

بنوصل المحطة الثانيه قمه مون بلان

وصلنا بالسلامة للقمه وهذي بعض الصور منها

جهه خضره وجبال وجهه ثلوج سبحانه

اللقطات اللي تحت التعليق حصيلت هالتفكير والتعليق

طبعا اهني انا شبه انهد حيلي اللي قلت بيني وبين نفسي وااي انا صج عيزت وكبرت كسرت خاطر نفسي

شنو اللي صار لما وصلنا طلعنا برا نصور وفي جسر يدخلنا على الكهف الثلجي والجبل الثاني الجوتي عزكم الله احسه بالمشي صار ثقيل وخطوتي اثقلت قمت اتعب قلت الله يا الفشله ابرار وانتي شباب جذي شخليتي حق العياييز واتم امشي معاهم وساكته ماابي ابين اشفيني

المهم ونشوف في مكان نصعد فوق غرفه زجاجيه نوقف فيها قالت اختي امشي نروح قلت مااقدر تعبت انا جان تضحك علي شنو مسويه ومن هالحجي قلت ماسويت شي بس احس بتعب

جان تقولي عيوز انتي ترا كلهم جم دريه امشي وراحت عني المهم امي وبنت عمي اقعدوا تحت واختي اصعدت قبلي وانا رحت الحقها بطلع العيوزه اللي فيني اشوف الدري اقصر من دري بيتنا قلت زين سهالات المهم صعدت جم ادريه الله وكيلكم الا النفس عندي حسيته خلص والله في مكان عقب الدري الاول يوفقون عنده الاوادم يوقفون دقيقه والله انا ربع ساعه واخذ بخاخي احس تعبانه حيل وانا اصعد الدري ريلي ثقيله واشوف عايله هنديه مع عيالهم صغار ولا الصغير يتحلطم على اهله ويقولهم انا تعبان والام تقول انا بعد قلت اشوه مو بروحي

صعدت اكمل لي الاخير على ماوصلت السطح مااشوف الا اختي طايحتله تصوير وانا ويهيي وصل لي ركبتي من التعب جان تقولي قعدي عالكرسي واقعد واشوفها واقول في قلبي شلون انا تعبت وليش مع انه الدري قصير والله ضاق خلقي وبعد ماريحت قمت كملت تصوير

صورنا ويتنا بنت عمي وبعدها نزلنا حق امي ورحنا الجهه الثانيه

عاد امي تقول ابرار جوتيهم تعبني قلت سكتي انا ذبحني وانا صاعده نفسي نقطع جان تقول انا ييت بصعد لكم صعدت دريتيين وماقدرت قلت اشوه انج ماكملتي انا انهد حيلي جان اشكي لها الحال ليش تعبت اقولها جان تقول من الجوتي والجاذبيه لان مافي جاذبيه تتعبين اقولها اللي حارني انه الدري قصير جان تقول اي من الجاذبيه وقلة الاوكسجين اهني تطمنت قلت اشوه ماعيزت

بعدها اختي وبنت عمي اعترفوا انهم تعبوا واهما يصعدون عاد زفيتهم ليش ماتقولون لي انكم تعبتوا بس شاطرين تضحكون علي انا راعية ربو مو مثلكم

نصيحه اي شخص راعي ربو قلب او مافي لياقه لايصعد والله متعبه بشكل خيالي هالصعده للسطح

نكمل الصور

الثلج ودي اغوص داخله

قبل لا ننزل من الجبل في مطعم فوق بس عقب ماشفنا الدري هونا وقررنا نزل مع انه المنظر في اينن والدري قصير بس التعب هد حيلنا .. واختكم من كثر ما اهي تعبانه افصخت الجوتي عزكم الله ومشت حافيه والله اني ارتحت
بس انزفيت من نبع الحنان فشله لبسي احد يشوفنا يما تكفين انا تعبانه مو لازم احد عيب الفاهمه

وبعدها نزلنا بسلام
خلصنا من مون بلان وبنطلع من شامونيه الى .... والحين بنتجه الى مكان ثاني وحلوووو

خلكم متابعين

الايمان, هاوية الاسفار, فارس من خيال و 3 آخرون معجبون بهذا.

q8ya metnaqla · 19-01-2015, 11:30 PM

اقتباس:
المشاركة الأصلية كتبت بواسطة qa6ar911
تعبيراتج اعجبتني وايد
سكيك وسكان عوي هههههه وكل بيت تبغينه
الله يرزقج ان شاء الله ببيت على البحيره
هههههه - وي اميييين الله يسمع منك والله تشوق بيوتهم احسن من بيوتنا كبار عالفاضي

صور البحيره مع الجبال روعه
وبلدتهم وسكيكهم شكلها قديمه وناس بسطاء
اي البحيرات اهما اللي دودهوني وخلوني كل ماشفت بيت قلت ابيه
اي حيييل يازين حياتهم

واكلات المطعم شكله قريب حتى الرافيولي مربعات حراااكات
تقرير مشوق جدا واخذتينا معاج بالسفره
تسلم يمناك على ماخطت
متاابع الى النهايه
المطعم لذيذ والله والرافيولي ضابطينه لك صعبين
الله يسلمك وان شاءالله الياي يعجبك

اقتباس:
المشاركة الأصلية كتبت بواسطة طارق عنايات
يا سلام عليك مشرفتنا الكريمة
التقرير جميل و الصور حلوة
والله يا طارق الصور حلوه لانها الديره في غاية الجمال
بس اللي عجبني جدا هو طريقة سردك للاحداث
متابع معك و مستانس
اشكرك - حياك تشرفني متابعتك
حفظكم الله

q8ya metnaqla · 19-01-2015, 11:35 PM

اقتباس:
المشاركة الأصلية كتبت بواسطة الغردقاوي
صور جميله ومدن مرتبه ونظيفه
ونظامهم حلو يغلقون 2 ويفتحوا 7 لأن معظم الشعب يكون وقت راحتهم
وقليل ما يطلعون أو يشترون
فعلا بلاد ما إرتقت إلا بالنظام وحسن إدارة حياتهم
متابعينك مشرفتنا

ترا سويت اللي قلتلي عليه بس اللي صار لما ييت انزل يوم يديد ما قدرت انزل الصور

اي مدن مرتبه ونظافه واايدد مو اشويه - صح كلهم حلو نظامهم بس يفتحون عالاقل 5 وايد 7 شنو ذنب السواح احم احم
يسعدني حضورك يا الغردقاي

BoAziz2001 · 19-01-2015, 11:47 PM

يعطيج العافيه علي السرد المميز
سويسرا من احلي دول العالم ، الطبيعه عجيبه
متابعين للاخر
تحياتي

الغردقاوي · 20-01-2015, 12:14 AM

اقتباس : المشاركة الأصلية كتبت بواسطة q8ya metnaqla

ترا سويت اللي قلتلي عليه بس اللي صار لما ييت انزل يوم يديد ما قدرت انزل الصور

اي مدن مرتبه ونظافه واايدد مو اشويه - صح كلهم حلو نظامهم بس يفتحون عالاقل 5 وايد 7 شنو ذنب السواح احم احم
يسعدني حضورك يا الغردقاي

لا تنزل الصور عادي عبر الضغط على أيقونة مفتاح تعديل العرض لما تكوني حتنزلي صور والأيقونه هي التي بأعلى المربع على اليسار على شكل حرف A

وصدقتي المفروض يراعون السياح لكن ممكن تكون المدينه ليست مشهوره سياحيا
يلا بروح أشوف الحلقه الجديده ولي عوده بإذن الرحمن

الغردقاوي · 20-01-2015, 12:32 AM

هههههه حلوه الدخله بالملاليم بس المليم بطلوه من زمان
والتعب فعلا في الأماكن المرتفعه من نقص الأوكسجين
فعادي لا تحاتين
الصور رائعه والطبيعه سبحان الخالق ساحره
وصورة إشراقة اليوم على البحيره وأشعة الشمس تتدلى عليها في غاية الرومانسيه

أكملي متابعين

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الأسواق والتسوق في إيطاليا .. بقلم ام عيوني	فريق التطوير	بوابة ايطاليا	15	26-08-2019 05:51 AM