نامت عيوني على حسنك ؟؟

q8ya metnaqla · 21-01-2015, 06:02 PM

مسائكم خير وبركه

اليوم جزء يديد وخفيف على مااضبط الصور والفيديوهات

واتمنى يعجبكم

بعد ما طلعنا من مونترو وتوكلنا على الله ضبطنا القارمن على وجهتنا الثانيه

وهذي بعض الصور من الطريج

مرني مرني

اذا الوقت يسمحلك وتقدر

وقفنا اهني وصورنا عند هالمطل واسمه Jaun-Bellegrade

المنظر يقووووول لاتمشوووون والله نزلنا من السياره حفاي من غير جواتي عزكم الله

عمري كان خطوات في درب الامان

والزمان ماكنت احس انا بزمان

انا اللي هدني السفر ( لاماهدني والله )

ترا واحنا واقفين اهني انا صرخت من قمت راسي ليش ماادري بس حبيت اصرخ

كان الله يسلمكم طريجنا من مونترو الى آسرة القلووووب انترلاكن

from : montreux to interlaken

الطريج كان حلوو مع اشويه جبال وتعب بس الحمدلله

واخذ منا وقت ساعه ونص

وصلنا الى ملكة الجمال انترلاكن

وكان فندقنا اسمه : Lindner Grand Hotel Beau Rivage

مصنف : 5 نجوووم

لكن للاسف حتى 2 وايد عليه

الفندق من برا وشكله اللي يشوفه يقول وااو بس داخل يقول واويلاه شنو هالحظ

تقيمي للفندق جدا سيء الاثاث ولابيزة قدييييم ومتهاااالك والغرف صغيره

البرده (الستاره) ابسط شي وصخه

- بصراحه ماحبيت الفندق وضاق خلقي عليه حتى قلت للقروب نكسله وناخذ فكتوريا بس للاسف كان فل رضينا بالامر والواقع وقعدنا فيه وقزرناها بما ان مدتنا مو طويله.

بس انا ما انصح فيه حتى لو مده قصيره بصراحه حسيت B & B

عطونا نظام شقه فيها غرفتين وحمامين عزكم الله وهذيل بعض الصور وبتشوفون الحجم والاثاث ..

اللي تعجبت منه كان متروس خليجين مع انه موحلووو

الفندق من الجهه الامامية

ومن الجهة الخلفيه

الشقه

وحده من الغرف على النهر ووحده على مواقف السيارات

الحمام عزكم الله واحد صغير وواحد جبير

تكملة الغرف

وهذي الجهه اللي تطل على النهر

الممر

مكان الريوق

بعد ما ضاق خلقي من الفندق القروب كان يبي يريح قلت ماكو راحه الا وقت النوم لما نكون متليشين عدل نرتاح

خذيتهم وضبطت القارمن ورحنا قعدنا نشوف هالمنظر اللي بس يخليك تقول يالله ارزقني الينه

مطل لانجيرن lungern

n46 32.0544

e 008 08.591

نور خده يشبه البرق المنير

او كما برق تجلى من سحاب

بعد المطل والتصوير والسرحااااااان الى اخر مدى رجعنا ادراجنا

قطينا السياره الفندق وعطونا كروت الباص

طبعا اهني اقتراح اختي نتمشى في الباص اهي ونبع الحنان

رحنا ركبنا خذينا الباص اللي يم فندقنا وقطنا على محطة القطار الثانيه يعني طالعين فيها نبي ينزلنا لي البحير

اللله وكيلكم ماكو احد بالباص غير العيايز اللي حسيت نبع الحنان عمرها 30 واحنا الياهال من كثر ما اهما كبار مشاءالله

المهم ركبنا الباص الثاني ويصعد فينا ويبعد عن البحيرات ويصعد الجبل قلنا لا بالله لاطبنا ولا غدا الشر وين رايحين وشلون نرد قلت حق بنت عمي شوفي الجهه الثانية اذا في محطة عشان اطق الجرس ننزل ونبدل بالثانية اشوه حصلنا عقب مانزلنا والله ماقصر السايق قال وين بتروحون احنا في الجبل قلنا بنروح انترلاكن جان يقول نطروا ويدق على الباص الثاني ويقوله اوقف في قروب اخذهم معاك والله ضحكنا على اشكالنا واحنا نركض نعبر للجهه الثانية وناخذ الباص والعياييز كلهم يضحكون علينا اثاريهم رايحين بيوتهم فوق الجبل

المراد لا حد يتفلسف ويركب الباص ويعدي البحيرات من تشوفونهم طقوا الجرس ونزلوا لاتصيرون مثلنا

بعض الصور من طريج الباص

ناطرين الباص الثاني اللي صعدنا معاه لي الجبل )

ونعدي البحيره بكل ثقه

مهما نصير ابعاد

لابد نلتقي لابد لنا ميعاد

اسفه امون اذا شفت هذا الشي ما اقاومه وانسى ابو القهوه ومنو يقول اني اشرب قهوه للاسف موراعية قهوه اكل الكاكاو صرف

اهما طلبوا بس انا ظليت قاعده اهني

بعد ماخلصوا من قهوتهم وانا من ككاوي

رحنا تغدينا في المطعم الامريكي

Hooters

بعض الصور من طاولتنا

وصلت المقبلات

الاطباق الرئيسية

للاسف الشديد ماجربتهمنبع الحنان مارضت وحلف وزف

البارشوتات

الحديقه اللي ينزلون فيها المظليين

قلبي يفرفر عليهم

مقدر على بعدك لحظه ولا أصبر
كل دنيتي بقربك يا سيدي واكثر
أنا إلي حبيتك وأنا إلي شلتك فوق
وأنا إلي عزيتك وشلون أداري الشوق
ياحبيبي ياحبيبي وبصبر

القاكم في الجزء القادم انشاءالله

واتمنى ينال اعجابكم هالجزء

وسامحوني على التقصير

الايمان, أبن السلطنة, فارس من خيال و 1 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الأسواق والتسوق في إيطاليا .. بقلم ام عيوني	فريق التطوير	بوابة ايطاليا	15	26-08-2019 05:51 AM