نامت عيوني على حسنك ؟؟

q8ya metnaqla · 18-01-2015, 05:45 PM

بسم الله الرحمن الرحيم

اسم تقريري نامت عيوني على حسنك وشفتك حلم
امسي واصبح على رواد منتدى العرب المسافرون الغالين

ببتدي ان شاءالله معاكم في هالتقرير الخفيف والقصير عن رحلتنا لسويسرا ومجاورها

وحبيت اشكر كل من ضاف اي معلومه صغيره كانت او جبيره

واسمحولي اخص بالشكر لاخواني القطري جدولك كان عجيييب ومتعوب عليه ومساعدتك لي في الاحداثيه والطريج من ميلان الى زيورخ

اخوي اوشنز الجندي المجهول لما قدم لي من معلومات ونصايح خلف الكواليس

اخواني مقدام وعاشق الخالد اشكركم من القلب على تقاريركم الوافيه واجاباتكم على اسألتي ومساعدتكم لي واخوي qa6ar911

نتوكل على وندش في الموضوع

هالمره المجندات عددهم 3 انا واختي وبنت عمي ورابعتنا نبع الحنان امي

رحلتنا كانت للتمشي بعيده كل البعد عن السووووق ومن اختياري كانت للطبيعه فقط لاغير

حجزت الطيران مباشره من بعد عيد الفطر وبعدها باسبوعين حجزت الفنادق

الطيران من موقع اكسبيديا و اول مره احجز منه وكنت خايفه منه لان اللي قريته اغلبهم يمدحون حجز داخلي مو دولي وفي ناس امدحته وبيني وبينكم كان اهو افضل سعر احصله ان كانت حجوزات نت او مكاتب سفر عندنا ...

التذكره كانت بسعر 325 دينار كويتي من تاريخ 1-11 اكتوبر2014

كويت-ابوظبي-جنيف

زيورخ-ابوظبي-كويت

على طيران الاتحــــاد

الطيران ممتاز من خدمه وترفيه بس حصل اشويه تأخير يعني مو بس الكويتيه اتأخر يا ربعنا اللي يذمونها

حجوزات الفنادق لاربع مناطق بسعر 410 دينار كويتي للشخص

وتأجير سياره من هيرتز لمده 10 ايام بسعر 285 دينار كويتي

يعني كل وحده تدفع 806 د.ك شامل الفندق الطيران السياره

واخيرا وبعد تقريبا 20 سنه رديت لسويسرا واشوفها وانا شباب مو ياهل

يوم المغادره والحمدلله ما حشتنا زحمه الحجاج

وهذي بعض الصور من الطياره

وصلنا يوم الخميس 2 اكتوبر الساعه 8 ص
خلصنا اجراءات الجمارك ورحبوا فينا وهلا بالكاكاو
اول شي سوينا في مطار جنيف حطينا خطوط وشغلنا النت
وبعدها خذينا الشتل ووصلنا مواقف سيارات التأجير عشان نستلم سيارتنا

وهذي صوره لها من النت للاسف ماصورتها بروحها نسيت

كانت هيونداي i 40 - قير اتوماتيك - ديزل

وبعدها ركبنا القارمن وكان المفروض نروح انسي بس اشوي المجندات تعبانين ويبون يريحون استسلمت لهم بعد راي الاغلبيه

صور من الطريج الى فندقنا وكان الفندق في مونترو الهاديه اللي لو تقطون ابره تسمعون صوتها

واحنا بالطريج وقفنا ونزلت جمعيه coop اللي وصاني عليها اخوي اوشنز لانها كانت في دربنا شرينا بعض القروضات والخرابيط وبعدها وصلنا بالسلامه فندقنا وهذي صوره من البلكونه

بما اني اول مره اسوق في ديره جبال استانست على الطريج وقلت اشوه الطريج حلو وسهالات عالاقل احسن من بريطانيا اللي يننوني في السرعه والسكان العوي لكن العوي طلع اهون

نرد على فندقنا
اسم الفندق رويال بلازا
royal plaza montreux
على البحيره مباشره يطل وغرفنا عالبحيره فندقنا هذا من غير ريوق كان
وهذا موقعه الالكتروني
Royal Plaza Montreux & SPA in Montreux - Book a Luxury hotel in Lake Geneva

المفروض انه 5 ستار لكن اثاثه قديم للاسف يعني ممكن اقيمه 4 احسن من 5 بس موقع ممتاز وغرف وسيعه وحمامات عزكم الله وسيعه

بعض الصور من برا

اللوبي وتحت يكون الريوق على شارع التمشي والبحيره

الغرفه من داخل

الحمام عزكم الله

البلكونه وصور منها

اهني يتني فكره اني اهاجر بس بحكم القوي اخ بس اخ

عفيه لاتلومني اذا في صور مكرره مو مني من اللي قاعده اشوفه سبحانك ربي عكس الاجلحه والملحه بس هم يازينها من جلحه

مونترو ترا حييييل هاااااديه مو اشويه على قولت البنات يقولون ابرار هذي مو لنا حق كبلز احنا سناقل نبي اماكن صيحه ولويه قلت ماكو كل الاماكن لنا
واحنا نسوي صيحه ولويه

وهذي صوره ليليه من مونترو الرومانسيه
والصوت الجريح كان حاضر معاي بقوه في هالرحله
واسري بليل وانته بيدي سراي
امشي على نورك يجرني شعورك
خطوه ورا خطوه ألوذ في سورك

ماخلصنا يومنا الاول بكمل معاكم باجر ان شاءالله
وسامحوني راح اعيد التقرير لاني ماعرفت انقله كامل

الايمان, هاوية الاسفار, فارس من خيال و 3 آخرون معجبون بهذا.

مقدام · 18-01-2015, 06:43 PM

بداية رائعه مشرفتنا

واختيار موفق للفندق وموقعه واطلالاته على البحيرة

موقع اكسبيديا ممتاز وبعض الاحيان اسعاره تكون اقل
وعن نفسي دائما احجز منه للرحلات الداخلية في امريكا ومرة حجزت عن طريقه من ميلان الى لندن
وكانت اسعاره هي الارخص

سجليني اول المتابعين (درجة اولى )
وتقبلي تحياتي

محمدويوسفمعجبون بهذا.

آخر مواضيع مقدام

- الشمال الايطالي ثم الى بورتفينو وجنوه 2019
- رحلة شتوية الى جورجيا (تبليسي وثلوج غودوري)
- رحلتي العائلية الى الأراضي النرويجية
- كرواتيا ... زغرب وروعة بحيرات وشلالات بلتيفيتش
- جولة في ارض الطبيعه (البوسنة) .. مايو .. 2018

توقيع : مقدام

(كن _سفيرا_ لدينك_ ووطنك )
احداثيات وخرائط للاماكن سياحية شمال ايطاليا
موسوعة مقدام الامريكية ..اماكن سياحية.احداثيات.خرائط
احداثيات ومواقع الاماكن السياحية في سويسرا وما حولها
جنيف اين تذهب فيها واين تذهب منها ..
خريطة سويسرا السياحية

نازف حرف · 18-01-2015, 08:07 PM

ماشاء الله بداية موفقة

متابع بشغف

فيصل · 19-01-2015, 03:09 AM

كل الشكر لهم ولك علي التقرير
اطلاله رائعه

محمدويوسفمعجبون بهذا.

وجهات أوروبية · 19-01-2015, 04:22 AM

اولا الحمدلله على سلامتج مشرفتنا ابرار
ثانيا الف شكر على الاطراء

وماشاء الله سجليني من المتابعين الى النهايه

سلمت يمناك وعساج على القوه

الغردقاوي · 19-01-2015, 04:58 AM

بدايه جميله وممتعه بقياده سويسريه جبليه هادئه ما فيها حد ييننك مثل بريطانيا ولا السكان العوي اللي العوي طلع اهون
لكن عموما الصور جميله والبدايه ممتعه وإطلالة الفندق ساحره

متابعينك مشرفتنا لنرافقكم عبر كاميراتكم في رحلتكم لأرض السحر والجمال

محمدويوسفمعجبون بهذا.

رعبوب · 19-01-2015, 09:28 AM

يعيطك الف عافية يا مجندة ههههههههههه يطرح فيك البركة

تقرير ررائع وبنتظار البقية

Medo 77 · 19-01-2015, 11:39 AM

ما شاء الله تبارك الرحمن ...شكلنا موعودين بتقرير من العيار الثقيل

صور جميلة وسرد أجمل ..متابعين وياكم ...ومنتظرين الأكشششن متى يبدأ

q8ya metnaqla · 19-01-2015, 04:28 PM

مسائكم معطر بدهن العود والبخوور

نكمل تقريرنا معاكم

نسيت اكتب المسافه من جنيف الى مونترو ساعه وربع

اكمل يومنا الاول اللي اهو يوم الوصول 10/2

بعد ماسويتا جيك ان كل وحده سوت ريفرش حق عمرها عشان نكمل المسير وبما ان الجدول اخترب ما رحنا انسي قلنا خلاص نمر على فيفي ونتمشى في مونترو

وهذيل بعض الصور من فيفي ومونترو

كل العاده اول وحد اخلص واجكجك على مايخلصون

على شط بحر الهوى رسيِتْ مراكبنا
والشوق جمعنا سوى إحنا وحبايبنا

ياللي خذيتي الشمس
لو تتركين لليل بعض النور

خلصنا شغلنا السياره وتوكلنا على الله الى vevey وهذي صور منها

جان يستقبلني الحب ويقول هلا بالمتن

مع ككاو سايح وبريد ايبااااا

كل مااشوف بيت قلت هذا بيتي احترت شختار والسكيك ياحلوهم

يا الله ياكريم ماخاب طلابك

اخيه على سكيكهم ومحلاتهم اللي بين السكيك تعذبني

من الصور اللي حبيتها

when you come to a fork in the road , take it

شارلي شابلن يسلم عليكم

بيوووووتهم ومطاعهم ماادري احسهم العاب والله يفتحووون النفس هذي البيوت ولا بلاش مو بيوتنا باني 4 ادوار يقولي بيت عماره مو بيت

امووت على الخماجيير (الخرابيط )

بعد ماخلصنا من السكيك ولا ننصدم بخبر

الا وهو المطاعم تسكر الساعه 2 ويفتحون 7

ياويلتاااااا الماما يوعانه والمجندات بياكلوني ونحوس ونحوس نبي مطعم فاتح مافي اخر شي قالت لنا وحده مافي الا مطعم واحد اهو اللي فاتح انا طلعت عيني قلت عسى شي امي تاكله

جان تقولنا مطعم ايطالي اسمه ميلانو قلت هياااا الحمدلله امي تاكل ايطالي قالت كملوا سيدا وعند راس العاير تلقون المطعم وجحته مشي لين لقيناه

والله شحلوه المطعم مرتب وشغل عدل وجبير

وهذيل صور منه وغدانا وعشانا يميع

وبدت طلباتنا توصل

وهلا بالمتن من احلى الرافيلولي اللي ذقتهم

في اطباق ماتصورت بسبب اليوع الكافر

بصراحه المطعم ممتاز من كل النواحي اقيمه 5/5

حتى السويت خذينا تيك اوي وكان لذيذ

انصح فيه وبقوه

فاتورتنا تقريبا 130 فرنك لاربع اشخاص

بعدها رجعنا صوب فندقنا وقعدنا في فندق فكوتوريا بالروف شربنا قهوه ورجعنا فندقنا نريح لطلعت اليوم الثاني

خلكم متابعين رادتلكم

الايمان, هاوية الاسفار, فارس من خيال و 3 آخرون معجبون بهذا.

q8ya metnaqla · 19-01-2015, 04:45 PM

اقتباس:
المشاركة الأصلية كتبت بواسطة مقدام
بداية رائعه مشرفتنا
واختيار موفق للفندق وموقعه واطلالاته على البحيرة
اي والله الحمدلله موقعه ممتاز
موقع اكسبيديا ممتاز وبعض الاحيان اسعاره تكون اقل
وعن نفسي دائما احجز منه للرحلات الداخلية في امريكا ومرة حجزت عن طريقه من ميلان الى لندن
وكانت اسعاره هي الارخص
بالضبط مثل ماقلت قارنت بينه وبين جم موقع اهو الارخص والحمدلله اموري كانت طيبه معاه..
سجليني اول المتابعين (درجة اولى )
وتقبلي تحياتي
انت مكان الكابتن وتشرفني متابعتك لي

اقتباس:
المشاركة الأصلية كتبت بواسطة نازف حرف
ماشاء الله بداية موفقة
متابع بشغف
مش حتأدر تغمض عينيك

اقتباس:
المشاركة الأصلية كتبت بواسطة فيصل
كل الشكر لهم ولك علي التقرير
اطلاله رائعه
العفووو بوغازي - اي نعم لهم شكر وعرفان ماقصروا
اطلاله تسحر ودك تهاجر

اقتباس:
المشاركة الأصلية كتبت بواسطة qa6ar911
اولا الحمدلله على سلامتج مشرفتنا ابرار
ثانيا الف شكر على الاطراء
الله يسلمك - ولو والله تستاهلون اكثر من هالكلام لولا الله وثم انتوا ما كانت رحلتنا بتكون في هالحلاوه
وماشاء الله سجليني من المتابعين الى النهايه

سلمت يمناك وعساج على القوه
الله يسلمك - وتشرفني متابعتك

اقتباس:
المشاركة الأصلية كتبت بواسطة الغردقاوي
بدايه جميله وممتعه بقياده سويسريه جبليه هادئه ما فيها حد ييننك مثل بريطانيا ولا السكان العوي اللي العوي طلع اهون
هههههههه شوف انا مااختلف معاك انها حلووه جبيله واتينن لكن ..... تابع وبتعرف شنو صار معانا - هههه صج انه عوي بس مافيه دوخه راس ولا لوعه جبد وارتفاعات اتخرع
لكن عموما الصور جميله والبدايه ممتعه وإطلالة الفندق ساحره
حضورك الاجمل اي والله الفندق اطلالته اتيين

متابعينك مشرفتنا لنرافقكم عبر كاميراتكم في رحلتكم لأرض السحر والجمال
خلك متابع مش حتأدر تغمض عينيك

اقتباس:
المشاركة الأصلية كتبت بواسطة رعبوب
يعيطك الف عافية يا مجندة ههههههههههه يطرح فيك البركة

تقرير ررائع وبنتظار البقية
هههههه الله يسلمك - ان شاءالله الخير ياي

اقتباس:
المشاركة الأصلية كتبت بواسطة Medo 77
ما شاء الله تبارك الرحمن ...شكلنا موعودين بتقرير من العيار الثقيل
صور جميلة وسرد أجمل ..متابعين وياكم ...ومنتظرين الأكشششن متى يبدأ
ان شاءالله يكون قد مستواكم تستاهلون اكثر والله - مرورك الاجمل يا ميدو - ان شاءالله الاكشششن يايك

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الأسواق والتسوق في إيطاليا .. بقلم ام عيوني	فريق التطوير	بوابة ايطاليا	15	26-08-2019 05:51 AM