بسم الله الرحمن الرحيم ..*
* الحمد لله رجعت بـ السلامة من ماليزيا بعد زيارتها في شهر فبراير 2016 لـ شهر العسل ..
و حاب اكتب رأيي وتقييمي للفنادق اللي سكنت فيها ..
بس قبلها بـ اشكر العضو المميز و الخدوم جدا جدا .. هاي مزمز .. الله يسعده ويسعد الباقين
*
1- ذا فيلاز صنواي لاجون ( سيلانجور )
*
ايجابيات : مكان هادئ وجميل والفيلا ممتعة من الداخل و المسبح مويته حرارتها طيبة و جنب الصنواي لاجون .. وتشتري التذاكر من اللوبي بدال ما تصف في طابور الشراء , قريب جدا من اللوبي سوبرماركت 24 ساعة (اسمه 7/11 ) , المسبح مستور , الفطور 10 من 10 ماشاء الله
*
سلبيات : ما فـ بالي اي سلبية حاليا , ممكن المكان ششششوي موحش في الليل
*
أنصح به
******
2- تانجونج رهو ( لنكاوي )
*
إيجابيات : خدمة طاقم العمل جدا ممتازة وسريعة , الشاطئ جميل والرمال البيضاء ممتعة , قريب من مكان انطلاق رحلة المانجروف
*
سلبيات : امممم الصراحة ما ارتحت في الفندق , اعطوني غرفتي .. شوية قالو اب قريد .. رحنا الغرفة الجديدة .. اكبر و مطل افضل لكن في ريحة سيئة جدا في الحمام الله يكرمكم .. اليوم الأول مشيناه وجا اليوم الثاني حاولو يحلو المشكلة ما قدرو
قلتلهم ابغا غرفة ثاننية .. نقلنا غرفة ثانية بنفس المستوى .. لكن برضو كان في مشكلة .. اللي هي كثرة الحشرات في الحمام تشبه الذبان ..
وكمان من اكبر عيوبه .. انه بعيييييد عن العالم .. و لو بتروح شارع سينانج او كواه يبغالك نص ساعة او 35 دقيقة في الخط ..
وماجنبه مطاعم ولا شي.. ف من بعد العشا كانك معزول عن العالم
+ من اقوى العيوب .. لا يوجد واي فاي في الغرفة !!
والفطور جدا عادي في مكان مكشوف
*
ابدا ما انصح به
*
3- قولدن ساندز ( بينانج )
*
إيجابيات : المسبح ممتاز حق الفندق , الفندق حيوي و مليء بالزوار , موقعه جدا كويس .. على شاطئ الباتو فرينجي و الأنشطة البحرية .. والشارع ما ينام الى ساعات متأخرة .. وفي محلات قريبة كثير , فطورهم كويس .. 8/10 تقريبا
*
سلبيات : خدمتهم بطيئة ( ممكن بسبب الزحمة في إجازة عيد الصينيين )
*
انصح به
* 4- كاميرون هايلاند ريزورت ( كاميرون )
*
إيجابيات : الفندق فخم , فطورهم طيب .. 8/10
*
سلبيات : في سلبيات كثير واجهتها .. مافي مكيفات .. والمنطقة مو مرة باردة .. + وقت النوم تفك الشباك عشان يدخل شوية هوا ويكون الجو طيب مع المروحة .. بس أصوات السياارات مرة مزعجة .. و المنظر من الشباك مو مرة حلو .. في فنادق لها مناظر احلى وبسعر ارخص .. لكن احس الفندق هذا ماخذ سمعة .. مو مرة ارتحت لطاقم العمل .. احس مو مرة احترافيين .. + مافي مطاعم قريبة غير مطعم واحد .. عموما ما انصح بزيارة كاميرون هايلاند .. مافيها شي مميز غير مزارع الأرز
*
ما انصح به
*
5- رويال شولان ( كوالا )
*
إيجابيات : الموقع جدا ممتاز .. تقدر تروح مشي لـ البافيليون اللي فيه كل شي .. سوولي ابقريد من نفسهم .. و قلتلهم التلفزيون فيه مشكلة و اعطوني ابقريد ثاني .. متعاونين و اكلهم ممتاز كـ فطور و لو بتطلب للغرفة
*
سلبيات : ما واجهت أي سلبية
*
انصح به
*
طبعا التقييم يعود لـ وجهة نظري المتواضعة .. والناس اذواق .. حبيت افيد أعضاء وزوار المنتدى
لاني استفدت كثير من هذا الصرح .. وشكرا لكم و أي استفسار انا حاضر
وقريب حـ اكتب عن تجربتي لـ السواقة في لناكوي الممتعة : )
*
اللهم صل وسلم على محمد
8الاعجاب
22-02-2016, 09:59 AM
تقييمي لـ ذا فيلاز , تانجونج رهو , قولدن ساندز , كاميرون ريزورت و رويال شولان 
العرض الشجري
المواضيع المتشابهه 
