كــان وأخواتها - جنوب فرنسا صيف 2012( بقلم / د.معمارية)

فريق التطوير · 02-03-2016, 04:37 AM

العرب المسافرون

بوابة السفر الى فرنسا

عنوان التقرير كــان وأخواتها - جنوب فرنسا صيف 2012( بقلم / د.معمارية)

يسعد أيامكم

أعزائي قراء منتدى العرب المسافرون

طاب مساؤكم أينما كنتم وتحية طيبة عطرة

******

كانت لنا جولة أوروبية في هذا الصيف بدايتها كان من أجل البزنيس

ولما نقول بزنيس لا نقصد بزنيس بحد ذاته ولكن كانت رحلة علمية أكاديمية ثم رحلة ترفيه وسياحة

بدأناها في بريطانيا

ومن بريطانيا إنتقلنا إلى جنوب فرنسا

ومن ثم قطعنا الحدود الإيطالية

(ثم الحدود السويسرية على السريع)

ثم عدنا مرة أخرى لجنوب فرنسا ومن ثم لندن

وأخيراً عدنا لديارنا في دبي

الرحلة بدأت 4 جولاي 2012

وأنتهت 22 جولاي 2012

*****

أحب أقول في البداية إن الرحلة الأوربية هذي كانت من إختيار أبو عمار

بعد سلسلة من المضاربات أنا أبغى المالديف وهو يبغى جنوب فرنسا

أستسلمت مقابل أن نسافر للمالديف مرتين على الأقل في السنة

السبب الثاني اللي خلاني أوافق إن الصيف

هو الويت سيزون في المالديف

يعني مطررررررر وقلت ما أبغى أروح أتضايق هناك ورضيت بالواقع

السبب الأخير اللي خلاني أوافق هو رحلة العمل مع الجامعة لبريطانيا

واللي تعتبر قريبة من جنوب فرنسا

طلعتلي شغلة تانية وهي مقابلة مع برفسور في بريطانيا

من أجل مناقشة بحث مشترك

وكمان أبو عمار عندو موعد في مانشستر

يعني أسباب كثير خلتني أقول اوكي

وأنا كنت حاطة إيدي على قلبي وخايفة إن جنوب فرنسا تطلع

زي باريس (اللي ما تعجبني كثير)

باريس رحتللها يمكن أكثر من 3 مرات

وخلالالاص حفظتها ويمكن على آخر مرة كرهتها

وصدقوني كل يجيني مؤتمر هناك أو شي اتهرب منو

لكن أتفاجأت بجنوب فرنسا ، كانت صدمة راااااااااائعة جداً جداً جداً

ما أتوقعت إننا ننبسط هناك ، مفاجأة غير متوقعة

كانت صديقتي الغالية (أمولة) تشجعني على جنوب فرنسا

وكنت أقول طيب بس جواة قلبي

كنت أتهرب منها لا إراديا وفي بالي أنها زي باريس لكن طلعت غييير

ورجعت شكرت امولة على النصيحة

اللي حلى الرحلة المفاجآت والمغامرات والضحكات اللي ضحكناها والأماكن اللي زرناها

واللي ما تتنسى أبداً يعني منجد كانت رحلة فللللة على الآخر

لكن الصدمة المقبولة هي ان ميلان لم تعجبني أبداً أبداً

لا مقارنة بينها وبين روما وجنوب إيطاليا

ووصلت لنتيجة ، جنوب فرنسا احلى من شمالها

وجنوب إيطاليا أيضاً أحلى من شمالها

*****

بودي أن يكون التقرير موحد وفي بوابة واحدة

ولكن أعرف أن العرف يقتضي أن

أهدي كل جزء من تقريري لبوابتها وقرائها

ولكن أتمنى أن لا تنقطع حبل افكاركم وأن تتابعوني في البوابات كلها

******

قلت لأبو عمار بحماس

إن شاء الله أكتب تقريراً جميلاً بحيث أن كل القراء سيشعرون أنهم معنا في كل الرحلة

وبالذات في السيارة المستأجرة

وهذا ما قصدته فبمتابعتكم ستشعرون (بإذن الله)

أنكم كنتم معنا في كل لحظة

وستسمتعون بكل لقطة صورتها بكاميرتي الجديدة

التي أشتريتها قبل السفر

وغير هذا وهذا نقلت لكم تقرير وافي عن كل الفنادق اللي زرتها

عشان تساعدكم في إختياراتكم المستقبلية

******

القصة بدأت عندما أختارتني الجامعة لأرافق

عميد كلية الهندسة وطلابي وطالباتي

وهم طلاب ماجستير الهندسة إلى بريطانيا

وكان من المفترض أن نرحل من دبي-لندن في يوم 30 جون 2012

اللي صار أنو كانت جوازات سفرنا أنا وأبو عمار في السفارة الفرنسية عشان الشنقن فيزا

طبعاً أضطر عميد كلية الهندسة أن يرافقهم لوحده

والإتفاق أن نتقابل في لندن يوم الأربعاء

والحمد لله ، وفي آخر لحظة إستلمنا جوازات سفرنا

بعد شق الأنفس الصراحة

****

كان من الصعب أن نأخذ عمار معنا في رحلتنا الأوربية هذه

كان يوم حزين يوم فراق عمار في دبي

اللي أخذه أبو عمار لجدة (عند والدتي)

والإتفاق مع أبو عمار أن نتقابل في لندن يوم الجمعة

ولكن ما تتخيلوا

قد إيش وحشنا عمار وأشتقناله مرررررة

وقلنا المرات الجاية لازم يجي معانا حتى لو للمالديف

(هي صعبة شوية بس عاد نشوف وقتها)

نلقاكم بود

فريق التطوير · 02-03-2016, 04:38 AM

مساء الخير والياسمين واللافندر

تحية مسائية طيبة أبعثها لكم من كمبيوتري ومن منزلي الدافيء
في هذا المساء الرائع ذو النسمات الشرقية الوردية

أشكر كل من حضر من بوابة بريطانيا
وأشكر كل من تابعني هنا وانتظرني

سأعود للردود بعد إكمال الحلقة
وأشكر متابعتكم الرائعة مقدماً
وخاصة كلمات التشجيع اللي تعطيني حماس أكمل
المشوار وأفيدكم بكل ما لدي من خبرتي المتواضعة
من أسفاري وحكاياتي

*************

مقدمة

French Riviera

الريفيرا الفرنسية

من موقع ويكيبيديا

الريفيرا الفرنسي (عرفها العرب قديمًا باسم سبتمانيا) منطقة

تقع جنوب شرق فرنسا علي البحر المتوسط، ومن أشهر مدنها نيس، كان، سانتروبيز
تولون ومارسيليا. وتكثر فيها المنتجعات السياحية.

يعني أهم المدن في الريفيرا الفرنسية
هي اللي عملت عليها دوائر حمراء في هذي الخريطة

Côte d'Azur,often known in English
as the French Riviera

بمعنى أن Côte d'Azur تقصد بها الريفيرا الفرنسية بالإنجليزية

ولا ننسى إضافة موناكو (ثاني أصغر دولة في العالم بعد الفاتيكان)
من ضمن سلسلة الريفيرا الفرنسية

وبمجرد ذكر الريفيرا الفرنسية يأتي على بالنا مناظر
اليخوت الفخمة والفنادق الفاخرة وحياة المشاهير ومهرجاناتهم

الحقيقة أن الجنوب الفرنسي أجمل من هذا بكثير
واللي صار إننا أكتشفناها وسبرنا أغوارها
رأينا ما يرى أي سائح عادي
وتعمقنا اكثر للقرى المجاورة واستشعرنا بجمال هذي المنطقة

أكيد الثراء والفخامة موجودان لكن بالمقابل هنالك وجوه أخرى
وإذا أردتم أن تعرفوا أي مدينة جيداً يجب أن ترووا الوجهين

إذا تعالوا معي مدينة مدينة ولنكتشف معاً

الريفيرا الفرنسية

يتبع

فريق التطوير · 02-03-2016, 04:40 AM

Date 10 July 2012

نحنا الآن في لندن بريطانيا

بالقرب من مطار قاتويك

وتحديداً في فندق Holiday Inn Express

شمس بريطانيا الصيفي تشرق مبكراً

وهذي صورة من نافذتنا

كنا مستعدين لتشيك آوت سريع وأكسبريس على إسمهم

وزي ما قلتللكم المرة الماضية إن الفطور المبكر عادة
يكون إكسبريس للناس اللي بتطلع قبل موعد الإفطار

ما فطرنا ولا شيء فقط صورت

طلعنا على المواقف مع دعاء الصباح
شعور جداً راااااااااائع ..حماس وفي نفس الوقت
سكينة وهدوء في النفس

صباح جداً جميل واعد بسفرة جميلة للجنوب الفرنسي

رطوبة أو أسميها ندى الصباح

تعرفوا نظام أوروبا في إعادة سيارة التاجير

لازم البنزين يكون (فووول) وإلا يسحبوا من الكريديت كارد

أضعاف ما كنتم حتدفعوه عشان تعبوا البنزين

والمطار (فردة كعب) على قولتهم

وقفنا السيارة في المكان المناسب

وكنا مستأجرين من يوروب كار
مع السلامة .. سيارة ممتازة وخدمتنا جيداً

لسة موظفين التاجير يقولوا يا فتاح يا عليم ..

سلمنا المفاتيح وكل شيء

وفي طريقنا لداخل المطار ، التيرمنال الجنوبي

لقينا إيزي جيت وهي الطيارة التجارية

اللي نآخذها من لندن لمارسيليا

تلاقوا كل يوم تقريباً رحلة
وبصراحة ما أذكر كم كلفتنا .. بس السعر جداً معقول

الطيرانات التجارية في بريطانيا من كثر الناس

وكثر الرحلات تقولوا رحلات باص هذي مو رحلات طيران

طيران تجاري يعني كل شيء يندفعله

تبغوا تدخلوا بسرعة قبل الطابور تدفعوا زيادة
تبغوا فوق 20 كيلو تدفعوا مبلغ طاااااائل أنتبهوا

كثير يوقعوا في هذا الفخ

طبعاً أنسوا في الطيرانات التجارية تآكلوا ببلاش

وأكيد الإختيارات قليلة ومحدودة ويمكن غالية
فالأفضل تآكلوا مزبوووووط قبل ماتطلعوا الطيارة

وهذا اللي سويناه بنفطر

ساندويتش تونا ساخنة

وطول الوقت نقول يا ترى كيف جنوب فرنسا!!!

يتبع

توبليرونمعجبون بهذا.

فريق التطوير · 02-03-2016, 04:43 AM

نحنا عند إيزي جيت

وعشان نتخيل أكثر .. هذا مسار رحلتنا الجوية

إحدى مساويء إيزي جيت إنو مافي مقاعد محددة لكم
قلتللكم زي الباص تدخلوا وبالبركة .. تلاقوا كرسي فاضي
تتوكلوا على الله وتجلسوا
طبعاً اللي صار إنو ما لقينا عند شباك مقعدين جنب بعض
وأصلاً ثلاث مقاعد يمين وثلاث مقاعد يسار
وأنا إلا إلا أبغى شباك عشان أصور
في النهاية اتنازلنا
جلست أنا جنب شباك
وجنبي زوج وزوجته بريطانيين
وأبو عمار في المقعد الخلفي

شوفوا هذا الموظف (يا مامي) شافني أصور
وكان بيآكلني هههه

حماااااااااااااااس والطيارة بتقلع

وودعتنا إنجلترا بزخة مطر حلللللللوة

يعجبني صوت وإحساس الطيارة لما تدعس بقووة
أشعر بالحماس والإندفاع

<B style="LINE-HEIGHT: normal; WIDOWS: 1; TEXT-TRANSFORM: none; BACKGROUND-COLOR: rgb(255,255,255); FONT-VARIANT: normal; FONT-STYLE: normal; TEXT-INDENT: 0px; FONT-FAMILY: tahoma, verdana, geneva, lucida, 'lucida grande', arial, helvetica, sans-serif; WHITE-SPACE: normal; LETTER-SPACING: normal; COLOR: rgb(57,57,57); FONT-SIZE: 12px; WORD-SPACING: 0px; -webkit-text-stroke-width: 0px">

وبدأنا نطير .. ونطير ..ونطير

وداعاً بريطانيا

حلو لما تشوفوا الدنيا

Bird's view

وهنا معمارية ناااااااااااامت

يتبع

</B>

فريق التطوير · 02-03-2016, 04:47 AM

الطريق على ما أذكر كان ساعتين ونص

وأنا صحيت لما أنتبهت إنو كل الناس بيتفرجوا من الشباك
كدليل إنو قربنا من مارسيليا

وعلى فكرة بالإنجليزي ما تقولوا مارسيليا
تقولو (مارسيه)

وفعلاً قربنا من مارسيليا

صورت كثير من الشباك عشان تتأملوا في المنطقة من فوق

إنتم لا تشوفوا جناح الطيارة .. شوفوا تحت

جوانب متشابهة من حيث المزراع
فأوروبا كلها تشترك في هذه الطبيعة الجغرافية

شوفوا كيف سطح البحر ....روووعة

شوفوا كيف اليخوت تبحر فوق البحر

هذي الجزيرة شفناها من فوق

وهذي شكلها من قوقل ماب

هبوط تدريجي

مستعدين للهبوط

أكيد متخيلين الصوت لما ترتفع هذي على الأجنحة

وحمد لله تعالى على وصول عائلة آل ياسر في مطار مارسيليا
مع الشعب البريطاني

يتبع

فريق التطوير · 02-03-2016, 04:55 AM

بدأنا النزول من الطائرة

شكراً إيزي جيت

وبمجرد قرائتي لكلمة (سوغتي)
بمعنى مخرج عرفت أنني في فرنسا

متجهين لصالة الجوازات

ذكرني بمطار شارل ديغول
فمارسيليا ثاني اكبر مدينة فرنسية

التحقق من الشنغن فيزا
والختم .. ومن ثم أخذ الشنط
طبعاً كل هذا وحماااااس للشيء الذي لا نعرفه عن الجنوب الفرنسي

coffee need عند أبو عمار
جلسنا نآخذ نفسنا بس

وأتأكدنا ان المرة القادمة لما نسافر للندن
نيجي هنا من هذي الجهة

أول شيء عرفنا إنو تأجير السيارات
في التيرمنال الآخر .. يعني مسافة مشيء
بالأقدام

وبالمرة نتعرف على شكل المطار من الخارج

مسافة مسافة
بس كلو يعتبر من متعة السفر

التيرمنال الآخر

والمشكلة الفرنسيين قوميين للغتهم
تكلمهم إنجليزي يردوا بالفرنسي
من غير ما يسألوك تعرف فرنسي ولأ
بس الحمد لله خلفيتي الفرنسية الضئيلة جداً ساعدتنا

وأخيراً وصلنا مخرج الـ Car Rental

جلست آخذ نفسي
عبال أبو عمار يدور على الشركة اللي حجزنا فيها السيارة

ومثل المرة الماضية
أبو عمار الـDriver
وأنا الـ Navigator

عشان كدة من البداية قلت بسم الله
وفتحت الجي بي إس أحاول ألقط الإرسال
وأدخل عنوان أول فندق لنا في الجنوب الفرنسي

شركة التاجير اللي أتعاملنا معاها إسمها

Sixt

أبو عمار قال :شوفي يا معمارية
شايفة هذي البيجو الصغييييييرة هي بالضبط
اللي بنستأجرها ...

أنا بلعت ريقي وأبتسمت وقلت: أي شيء أهم شيء السلامة
بس جواة قلبي قلت يا ربي ..إيش هذا
من مرسيدس في بريطانيا لبيجو صغيرة ... بس معليش
أهم شيء المتعة في السفر والبهجة ..

سؤال للقراء..
ليش الإسفلت هنا بدأ بالتكسر؟؟؟؟

قلت لأبو عمار :إنت خلص إجراءات التأجير
وأنا بأشتغل لسة على الجي بي إس

والحمد لله لقط .. بس إذا تلاحظوا الوقت
فهي مسافة نوعاً ما طويلة عشان نوصل إلى قلب مارسيليا

هنا أبو عمار وصل وقال: الحقيني
أستلمت مفتاج البيجو

وفجأة وقف هنا وقال : ترااااااا مفاجأة

وأنا : لآلآلآلآلآلآ مو معقول ... .شكككككككرررراً

يقول: أفا عليكي يا أم عمار .. أنا أخليكي تركبي بيجو صغير

وأنا: شكررررررررررررررراً .... كدة الرحلة تحلو ههههه

مو عشان الفخامة صدقوني بس عشان
هذي رحلة طويلة نوعاً ما وفيها مشاوير كثيرة نقطعها
بين المدن .. لو سيارة صغيرة تعور الظهر ..
ولو سيارة مريحة ترتاحو صدقوني

الحلو فيها جي بي إس متطور ..
أستعملته بالإضافة للجي بي إس حقنا

الحلو في الجي بي إس هذا
إنو متحرك وفيه زووم مريح ويستخدم قوقل ماب
جداً ساعدنا في معرفة أسماء الشوارع بسرعة والإتجاهات

ودعاء ركوب السيارة
وبسم الله الرحمن الرحيم ..توكلنا على الله

يتبع

فريق التطوير · 02-03-2016, 04:57 AM

فندقنا واللي أتوفقنا فيه والحمد لله تعالى هو
Pullman Marseille Palm Beach

رابط الموقع

والله أستغربنا إنو 4 نجوم مقارنة بالخمس نجوم اللي شفناهم
بعد كدة في إيطاليا وتوصلنا لنظرية إن الفرنسيين صعب
يعطوا الخمس نجوم ولكن في إيطاليا في واسطات زي العرب هههه

كلفنا الفندق 388 دولار امريكي لليلة الواحدة
أي

1425 درهم إماراتي

طبعاً أكيد بندفع على الباركينج في فنادق فرنسا
بس هذا الفندق أعتقد كان ببلاش

نحنا الآن متجهين لفندقنا

فندق رااااااااااااايق جداً

فندق ..عصري .. مفتوح.. بحري ..
لكن المحصلة إنو فندق مريح جداً جداً للأعصاب

وما تمشوا في أي مكان إلا تلاقوا الفرنسيين
يعرفوكم أو ما يعرفوكم يقولولكم : بونجور .. أو بونسوار

وطول الوقت بأشم ريحة حلللللللوة
قلت عطر؟؟؟ لآ .. ريحة ورد
وأكتشف بعدين أن كل الرسبشن مليان أوركيد أبيض طبيعي

حتى قلت لأبو عمار: هذي صارت كوشة أفراح .. مو رسبشن هههههه

حتى طريقة التنسيق تهدي النفس وتريحها

وإذا مزجتو الرائحة الجميلة والمنظر الحلو .. وفجأة
نسمات وأمواج البحر ... شيء خرافي

وعبال ما نستلم المفتاح طلعت للبلكونة الخارجية

أستنشقوا بعمق .. واملئو رئتكم بالأوكسجين
وأنفثوا الهموم مع ثاني اكسيد الكربون

الفندق هذا لوحدوا أغنانا على مارسيليا كلها

وبدل ما يزرعوا للسطح أعشاب خضراء عادية
شوفوا إيش زارعين

لافندر

ورائحة اللافندر .. يا ربي شي مو طبيعي حلو
غمضت عيوني ورحت لعالم تاااااااااني

أبو عمار يناديني وأقول له خلاص بأقضي كل اليوم هنا ههههه
لافندر موفي وبحر أزرق ... مزيج نادر جداً
وتجربة لا تتكرر إلا في جنوب فرنسا

التصميم جداً رائع بغض النظر على تآكل التظليل

دخلنا تاني ولقينا مجسم بقرة في إستقبالنا

هذا قسم البزنيس
اللي فيه مكتبة صغيرة وكمبيوتر ...وطباعة وفاكس و و

هذا الفندق مبني بجوار جبل
جزء من الجبل محتفظين بيه وخللوه جزء من الديكور الداخلي
بطريقة مبتكرة جداً .. وهو شلال ينزل من فوق لتحت
معطي برودة منعشة وصوت راااااااائع ما أقدر أوصفه

حتى وصلنا غرفتنا

يتبع

فريق التطوير · 02-03-2016, 04:59 AM

كنا مستغربين كيف الفندق 4 نجوم وهو نظيف ومرتب وفخم
وبصراحة يستاهل الخمس نجوم ..
طلع الموضوع إنو
كان فيه تنافس بينهم وبين فندق مجاور
(واللي حنسكن فيه بعدين إن شاء الله)

بس الموظف في الإستقبال بيقول إنهم حيىخذونها
في الإختبار القادم للفنادق

وصلت شنطنا

وهذا الفيو من البلكونة

مكتوب بالم بيتش عليه

بصراحة أنا أعرف فنادق أوروبا
وأعرف إنو مو بالسهولة تلاقوا فنادق مرتبة ونظيف زي كدة
وبتشوفوا معانا بعدين كيف في إيطاليا

أخذنا راحة وصلينا وأتشطفنا
وبعدين قلنا ننزل تاني نكتشف مارسيليا قبل
ما نطلع منها تاني يوم

منطقة الجبل في الديكور الداخلي اللي كلمتكم عنه
مع صوت الشلال

وهنا كمان شميت ريحة الأوركيد قلت معقولة من
الموية .. طلع لأ... لقيت مزهرريات مليااااااانة أوركيد
موزعة في كل أرجاء الفندق

قلت المفروض يقلبوا إسمهم لفندق الأوركيد
يستاهلوا

كل الفندق عبارة عن آرت غاليري
معرض للفن المعاصر
وكل لوحة مكتوب عليها سعرها لو نفسكم تشتروه

بنطلع من الباركينج
وأمان وسكيوريتي

وهذي جولة تانية في المدينة
ويمكن الهدف منها نآكل .. لأننا جعنا خلاص

يتبع

فريق التطوير · 02-03-2016, 05:01 AM

الشيء اللي أنصدمنا فيه في جنوب فرنسا
أنو من الساعة تقريباً 2 الظهر إلى الساعة 6
ما تلاقوا ولا مطعم فاتح
إلا ناااااااادراً .. جداً

بس أماكن السناكز مفتوحة والسوبرماركت
غير كدة المطاعم الكويسة كلها قافلة

وهذا تعبنا كثير ونوعاً ما اضطرينا نأقلم ساعتنا البيولوجية المعدية
لهذا النظام

نحنا الآن في رحلة بحث عن طعام

دخلنا وسط البيوت .. ياهو يا عالم
مافي مطعم كويس فاتح

حتى جاكلين تعبت وهي تدور
كانت جيعانة ههههه
نقوللها: Nearest restaurant
بعدين تعللق هههههه

وزي ما قلتللكم تبغوا تتعرفوا على المكان سياحياً
شوفوا الحلو والمو حلو.. شوفوا الفخم وشوفوا الفقير
شوفوا القديم وشوفوا الجديد
شوفوا الناس .. شوفوا أكلاتهم .. ولبسهم وعمارتهم وفي المحصلة
تقدروا تآخذوا إنطباع صح عن المكان

أحياناً جاكلين تقول:
after 3oo yard..turn left

نطنشها ونمشي قدام
تقول بعدين:turn around when possible

ونطنش وترد مرة ثانية تقول
turn around when possible

شوية وتطلع تصرخ وتقول : قلتللكم ترن أراوند ون بوسسيبول
إيش بكم ما تسمعوا الكلام ههههههه

حتى لقينا مطعم ياباني مفتوح بابه
نزلنا وسألنا ردت علينا من جوة جرسونة ويقول ما نفتح إلا بعد 6

طيب ليش فاتحين من الأساس!!!
تعبتونا على الفاضي

وقلنا ما في غير السيتي سنتر
نلاقي أي باركينج وننزل برجلنا نمشي وندور على مطعم

وكان قرار صائب

يتبع

فريق التطوير · 02-03-2016, 05:04 AM

إنكم تسوقوا سيارة في الجنوب الفرنسي شيء رائع

بس تلاقوا مواقف في السيتي سنتر مأساة
طبعاً أكيد المواقف غالية ... بس يستاهل الموضوع

الحمد لله لقينا موقف ووقفنا ونزلنا بنفسنا
نتعرف على منطقة السيتي سنتر وهذي خريطة
لسيتي سنتر مارسيليا

وهذا الموقع وجدته مفيد جداً

الرابـــــــــط

تلاقوا فيه كل الخرائط المهمة والأماكن السياحية

وأحلى شيء هذا المنظر البانورامي اللي تحركوه بالماوس
وتشوفوا مارسيليا كلها

لا يفوتكم رهيييييييييب

الرابـــــــــط

نزلنا أنا وأبو عمار

وفجأة شفنا مطعم إيطالي عالمي معروف
فرحنا وبسرعة دخلنا ... وطلبنا أكل

المطعم هو
Vapiano

وعندنا فرع منو في دبي

بس جلسات هذا الفرع مميزة لأنها
قدام زرع الباسيل (الريحان) والروز ماري
إذا تبغوا منو قطفوا وحطوه على الأكل مباشرة

طباخ دمه خفيف رضي أصوره
وهو بيسوي حركات بهلوانية وبيطبخ مكرونتنا

حتى أستغرب وبيقول إنتم تآكلوا الساعة 3 ونص أو 4 وقتها

قلنالوا هذا أول يوم لنا واصلين ..

وهذي بيتزا برضوا كان الطباخ بشوش
وبيحاول يقول السلام عليكم وقال في جاليات عربية كثيرة
مهاجرة في مارسيليا

أعطونا جو مبهج بعد أتعلمنا درس
إنو مافي مطاعم في هذا الوقت

مع إني قلت لأبو عمار المفروض ما نآكل إيطالي
إلا في إيطاليا

عصافير بطننا كانت تصوصو

بالعافية أبو عمار

وبالعافية علي

نظام المطعم إنو أي طلب من الطلبات
الطباخ يحطها في بطاقة واحدة زي إضافة رصيد
وبعدين تعطوا هذي البطاقة للمحاسب ويطلعلكم التوتال

يوووووووووه على فيلم قودفاذر
قد ما أتفرج عليه ما أمل

يتبع

</B>

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تقرير: بلاد الشكولاتة بلجيكا - بروكسل+ بروج مايو 2011 (صور وفيديو) بقلم د. معمارية	فريق التطوير	تقارير لا تنسى	36	22-04-2024 10:58 AM
ليلتين في جنوب فرنسا	نجود	بوابة فرنسا	2	26-05-2015 04:45 PM