عدستي بصحبة عائلتي لتوثيق رحلتي للبلاد الأفرو أوروبية (جنوب إفريقيا 2012 )بقلم محيرهم - الصفحة 2

فريق التطوير · 06-03-2016, 04:18 AM

يتبــــع...

قررت التوجه مع هالدرج عل وعسى احصل الشلال

خريطة ثانية

محافظة على الأشجار

لو عندنا اتوقع كد صارت حطب مندي هههههههه

مناظر جميييلة من الأعلى

وهذا يطلع من الشجر سبحان الله

مدري وشووو

وهذا كرسي للراحة والإستمتاع

الظاهر مااااا حولك شلال ولا حتى صوت شلال

وهذي أفضل صورة أخذتها من فوق لويلدرنس الجميلة

منظر علوي جميييل

رجعنا ونزلنا تحت وليتنا لفينا يمين لسيارتنا

لفينا يسار ببالي هالشلال هههههههه

ومن كثر المشي

قلت نطلع بهالحركات من الكام ههههههه

يقوووولك يالله رجليك ياولد

أيست من شوفة ( شلال قريح ) خربت خلاص هههههههههه

وأرجع وأركز باللوحة أثر الله لايعمينا المسافة 3.5 كم

أبو الشباب طاقه كعابي ههههههه

تبي واحد من الصبح وهو رايح

عرفت بعدين إن له طريق حلوووو

اللي هو من وسط البحيرة تستاجر قارب وتجدف بنفسك

لما تاصله طبعاً ما يصلح للي معه أطفال لإن المسافة مو قريبة

المهم رجعت للسيارة

وقلنا نروح لوسط الحديقة وتكي شوي فيها

واحد ما شاء الله

طاق خيمته وينزل اغراضه

ياسهرة على ضفاف هالبحيرة والإ الدعوى فيها نووووم

وهذي أفياش كهرباء جااااهزة

وهذي مخصصة للشوي

وكثييييرة بكل مكان

وهذي دورة المياه الله يكرمكم

ومكان للرجال ومكان للنساء

وهااااااتك نظافة وشغل مرتب

مشينا بندور مكان نجلس فيه

وهذي منطقة خاصة بالكرفانات

مرقمه ومرتبه وهذا فاااااالها ما شاء الله عليه

حصلت مكان ووقفت السيارة

عند منطقة ألعاب قلنا خل العيال يستانسون شوي

رحت اتمشى ولفت إنتباهي هالمكان العام

ياووووولد نزل العزبة بسررررعة هههههههه

من الداخل

وهذي منطقة الألعاب

ويظهر ملعب السله و الطائرة

وهذا مكان ثاني

للطبخ و النفخ

وهذا استغلال الكفرات عندهم

لو عندنا مدري وش بنسويبهن ما ودي أقول هههههههه

حتي السنافر عندهم ههههههه

ياولد مقلوووووبه ههههههه

مشينا منها للفندق

ومثل ما قلتلكم قبل مكانها قرررريب لفندقنا

ويوم وصلت الخط العام وبلف يسار لفندقنا

الإ بوجهي لوحة الفندق المشهوووور ميس أميس

وصلنا فندقنا ريحنا

وضبطنا المهييييله وهي أهم شي

ولها نكهة خااااصة هناك وخاصة مع السكري هههههه

بعدها صحصحت شوي

وقلت بروح أخذلي كم صورة ع الشاطئ

وهذي ميزته تروووح على ارجولك

ولااااا اطلع مع الباب الزجاج ع الحديقة على طول ولف يسار للشاطئ

أخذت لكم صورتين

من فوق

ومن تحت

وحول العشاء مشينا لمول القاردن رووت

اللي يبعد 10 كم عن فندقنا

عشان نتعشى بأوشن باسكت

ماااااسكه عليه من أمس ههههههههه

مشكل بحري يحبه قلبك

وفيه جلسات داخل المطعم وفيه برا

حنا جلسنا برا

وفيه دفايات أنيقة تلطف الجو المائل للبرودة

هذي جابوها مخصوصه لنا بجنب طاولتنا

وهكذا إنتهى يومنا

وآخر ليلة لنا بالقاردن رووت

ومن بكرا تبدأ تفاصيل جديدة

لرحلتنا العائلية

ترقبووووها...

دمتم بحفظ الله

الشعباويمعجبون بهذا.

فريق التطوير · 06-03-2016, 04:18 AM

يا هلاااااا وغلااااا بالغالين

اليوم يوم وداع القاردن رووت

وتحديداً ويلدرنس

وقبل التوديع نقيم هالفندق

تقييمي

8 / 10

يمكن تقولون ليش نقصت هالنقطتين

بقولكم عشان الغرف ما فيها ثلاجة

وعشان مطعمهم الرسمي لايقدم الأكل الحلال

ولا الفندق اللي بجنبهم ( وش دخله هههههههه )

يعني تروح لمول القاردن رووت ويبعد 10 كم على طريق جورج

عشان المطاعم هناك...

والباقي كل شي حلوووو

( يكفي موقعه للإستجمام وللتصوير وهو الأهم هههههههه )

من البارح مستعدين للرحلة القادمة وتوديع سكن وإستقبال سكن ثاني

وكالعادة لازم تشحن الأجهزة بعد من الليل

طبعاً

اتوقع إن الفندق للحين يبحثون عني

وش الهبال هذا هههههههههههه

شكله طفى كهرب الغرف الثانية

وترا اللي بالوسط سلك توصيله بعد ههههههه

عملنا التشك أوت

بكل يسر وسهوله

ما قلتلكم قبل إنا أخذنا رقم اصحاب الهيلوكبتر

وكنت معطيهم جوالي السعودي لإني ما طلعت للحين رقم من عندهم

والصراحة كانو متواصلين معي وبالرسائل

لإني قايلهم عن آخر يوم أقدر فيه أمرهم

وفعلاً اليوم اللي قبل نمشي فيه جتني رسالة قبل العصر تقول إذا بتجون اليوم زين الجو

بس فكرت بكرا أفضل لإن مكانهم بموسل باي وهي على طريق سكني القادم

وبنفس الوقت هم قايلين بالرسالة الحين أو بكرا أفضل بكرا بكرا

حطيت أحداثيتهم

وهي ماخذها من حبيب قلبي ابوهاشم

مكان ركوب الهيلوكوبتر في موسل باي

S 34°09.551
E 22°03.643

مشينا والطريق جمييييل جداً وسيدين

ولا يخلو من ساهر

بس لي مع ساهر معلومات

بخليها بنهاية التقرير إذا كنت من الحيين

هي ومعلومات عااااامة

وصلنا لمكانهم

وصلنا للمكان ودقايق وهو جاي الكابتن يستقبلنا

وواضح من هيأتنا ( فملي سأودي ) يس يس

قالنا كم اللي بيركبون

قلت بس أنا والأبطال الثنين

قال أوكي دخل السيارة أتبعني

وهذي سيارته قدامنا

وعاد الجو والغيوم مايحتاج شوفة عيوووونكم

وقفنا السيارة ونزلنا على رجولنا

وصار كل مكان تقريباً فيه هيلوكبتر وتتسع لكم شخص

يعني المكان الأول اللي كان ينتظرنا فيه عنده هيلوكبتر تشيلنا كلنا

ويوم صرنا بس ثلاثة ودانا للمكان اللي فيه الهيلوكبتر الصغيرة

وهذا مكانهم مفتوح

ويبين مكان لبس ملابس القفز المضلي الحر

اللي وده يقفز يتولم بس

الطيارة العادية الصغيرة اللي بالصورة اللي فوق هي حقت القفز الحر

طيارة أفلام كرتون هههههههه

وهذي الإتحادية تنتظرنا

أكيد جازت لبعض ناس يوم قلت اتحادية

راح يجيب أوراق توقيع إخلا المسؤلية

أبد أبد

بتركبون بإذن الله

ويظهر بالصورة ناس غيرنا تنتظر بس طبعاً حنا قبلهم

وين من أيام حديقة الفراولة وحنا مارينهم

والرسوم قال كاش والإ فيزا قلت فيزا

وراح مره ثانية داخل وجاب جهاز السحب واير لس

بهالهواء الطلق

طبعاً عندهم السعر حسب المدة اللي تبي

10 - 15 - 20 وأكثر شي 45 دقيقة

وكل وقت يزود فيه دقيقتين تقريباً

أنا أخذت أقل شي 12 دقيقة طلعت تقريباً

لأشياء كثيرة بنفسي

منها إن وراي مشوار بالسيارة وثانياً طول الوقت بيكون على طول الشاطئ

المهم السعر ب 1500 راند

ركبنا وما تاخذ الإ أربع اشخاص فقط

اثنين ورا واثنين قدام

طبعاً أنا مساعد الطيار

ع اليسار جالس

عاد ما يحتاج اشرحلكم كل شي واضح

بسم الله توكلنا على الله

بدأت بالطيران

والآن أتركم مع الصور الجوية الجميلة

وأعذروني لو كثرتها أبيكم تعيشون كل شي شفته من فوق

مدينة موسل باي الجميلة

ملعب قولف

لمحبي القولف

بدأ شاطئ موسل باي الجميل

ياولد كل الكورنيش

ملاعب قولف

شكل البحر كله كور من كور القولف

بدينا ناصل رأس من روؤس كورنيش موسل باي

اللي ع الراس هذا

شكله فندق والله أعلم

جزيرة صغيرة

طلعت الجوال قلت لو اخذ صورة وحده

والحمدلله طلعت بصورة جميلة بتوقيتها

تمنيتها لو بالكام بس راحت

هذي هي لقطة الآيفون

الماء سر الحياة

وهذا مكان إقلاعنا من بعيد

هذيك الهيلوكبتر اللي تشيل أكثر

الجميع بإنتظارنا بما فيهم بعض الناس اللي يصور

صورة جماعية مع الكابتن

ودعناهم ومشينا

وركبنا التيدا

متوجهين لمكان الإقامة الجديد

مدينة الحيتان العالمية ( هرمانيوس )

أرجــــو عدم الرد...

الشعباويمعجبون بهذا.

فريق التطوير · 06-03-2016, 04:18 AM

يتبــــع...

هذي مسار رحلتنا من

موسل باي لهرمانيوس

المسافة تقريباً 315 كم

مشينا متوكلين على الله بعد وضع إحداثيات الفندق

والخط جميييييل

مرينا محطة بنزين وهي كعادة أي محطه فيها كل شي

وأخذنا المقسوم للخط...

طبعاً الخط طووويل وفيه مناظر حلووووه

والسرعة 120 كم

والإ يكفشك ساهر قريح

عاد ساهرهم المتحرك رجال جالس على كرسي

وقدامه حامل وكميرا وهااااتك تصوير

بس فيه ميزة ما ياقفون الإ عند إستراحات الطريق

يعني خلك منتبه للإستراحات

مو مثل عندنا يخترعون أماكن إختراع هههههههه

المهم مالكم بالطويله

تقل إني مليت من الخط شوي

والمشي 120 كم

وشوي وتسقط علي عجوز شقراء ( عاد مدري عجوز والإ أصغر شوي ) ههههههه

وهذي سيارتها

المهم راااااعية سرعة

والطريق هو نفسه طريق

كيب تاون

المهم خليتها قدامي تمسح الطريق

وفيه مدن صغيرة نمرها على الخط

وهذي من الإستراحات

وهي جميييييلة الصراحة

اللي لفت انتباهي على الطريق

مزارع القمح الكثيييرة

وواضح إنهم بموسم الحصاد خلاص

كل صورة فيها هالمرسيدس ههههههه

والسبب هو

هههههههه نبي نخلص الطريق

ونشوف هرمانيوس

لإن حجزنا فقط ليلة وحدة

كراحة من الطريق بين القاردن رووت و كيب تاون

شكلها مصانع للقمح

وهذا اللي أقولكم

شكله موسم الحصاد عندهم

طبعاً المحطات ما فيه خوووف موجودات بكثرة

من إستراحات الطريق

بس قهر اللي كان فيها واحد يحدد ما صورته

خلاص وصلنا لمفرق

قلنا القارمن لفو يسار

والمحروسه راحت سيدا ههههههه

شكلها رايحه كيب تاون

عاد حنا ما بقى كثير على هرمانيوس

وهذا مصنع ثاني

والله ياشفت هنا يتمشى وما حوله أحد ( كرك )

ياويل قلب بعض الناس عليه هههههههه

ياولد الخط من دون أكتاف

بس مااااافيه حفر أبد

سق وأنت مطمن

ننعطف ع اليمين جهة هرمانيوس

لوحة ثانية

جانا تي

شف شلالين من بعيد ووقفت على طوووول

رجعنا للبحر من جديد

وهذا الشاطئ نوووور الطريق

هذي بداية المدخل للمدينة

وطبعاً مدينة صغيرة بس جميييييلة

ومميزة عالمياً بالحيتان

اللي تاصل حد شواطئها

وصلنا ولله الحمد بدري

لا أحد يقول البركة بالمرسيدس هههههههه

وهذي والله مدري وشي

قلعة قديمة والإ كنيسة الله أعلم

وهذي الواجهة البحرية

وهذولا الشياب فااااالينها وأنواع المصارحات هههههههه

ووصلنا أخيراً لفندقنا الجميييل

اللي يبعد خطوات عن الواجهة البحرية الرسمية

بالحلقة القادمة

راح اصحبكم بجوله خفيفة في هذه المدينة

وبهذا الفندق الجمييييل

اللي سميته اسم

أيضاً بالحلقة القادمة أعلمكم

دمتم بحفظ الله

الشعباويمعجبون بهذا.

فريق التطوير · 06-03-2016, 04:18 AM

نكمل معكم حلقتنا الماضية

ووصول هيرمانوس

وتحديداً فندقها الجميييييل والأنيق

Harbour House Hotel

هذا مبني السكن واللي يسار الصورة مبنى الإستقبال والمطعم والحديقة والمسبح

وهو يحتوي 18 غرفة فقط

كل دور فيه 6 غرف

3 تطل للأمام و 3 للخلف

بس للأمانة أحجز لو ما تختار كلهم إطلالتهم حلووووه

بس أحرص ع الدور الثالث أفضل إطلالة وهو الدور الأعلى

طبعاً حطيت إحداثية الفندق هذا

وجابني على طريق الكورنيش يوم نشوف الشياب اللي يتصارحون ههههههه

المهم يوم قربنا شوي الإ العااااالم مجتمعين وعيووونهم وكميراتهم للبحر

وادخل لشارع الفندق وشارع صغير وقليلة المواقف

وفيه قبال الفندق مطعم إيضاً فللللل

وأحط السيارة على موقف مخطط بأصفر ( يعلمنا بسالفته أبوعلي )

وأنزل بالفوتشر للإستقبال وتدخل تجيب المفاتيح

قلت أبي أهم شي أوقف سيارتي

لإني شايف مواقف لهم تحت بالبدروم بس مقفله

قلت خلاص يروح معك هذا ويفتحلك بوابة الموقف وتجي

تحصل الأوراق جاهزة والمفاتيح

واعطيهم جوازي وبطاقتي الإئتمانية وتصورهم وتعطنياهم

عاد سألت الموظف اللي بيفتحلي الباب قلت هالعالم وش عنننندهم

قال فيه حيتان قررريبه واصله للشاطئ وتشوفها بعينك...

وهذي اللي أقولكم يميز هالمدينة ( هيرمانوس )

إن الحيتان تصل حتى شواطئها وبموسم معين بالسنة

وحتى شعاراتهم داخل المدينة ونشاطاتهم ( كلها حيتان وصور حيتان )

ولااااا لهم شعار ثاني بعد ( يموووتون فيه أهل الصيد )

لهالمدينة شعار طائر ( الكرك ) إذا له إسم ثاني مدري هههههه

وقفنا سيارتنا ورحت وجبت المفاتيح وساعدنا الموظف بحمل الشنط

مو كلهن أهم شي شنطة العزبة نبي ( مهيله ) ههههههه

وصار حجزنا غرفتين منفصلات بس ما بينهم باب !!

وحده بالوسط ووحده ع الجانب وبالدور الثالث

تقل طولت القرقر شوي ههههههه

يالله نعطيكم صور الحين للغرف

هن تقريباً مثل بعض بالضبط بس يختلفن بالسقف لإن السقف هرمي

وهذي إطلالة غرفة وهذيك الإطلالة الثانية

يعني وحده المجلس ووحدة المقلط هههههههه

الحين صورت يمين

وهذي صورة ع اليسار

وهذي المحروسة قابعه بالمواقف بعد السرعة اللي جتها ههههههه

هذي رجلين الفندق

ياولد لايطيح هههههههه

وبالزاوية اليسرى باب المواقف من تاصل له يفتح اتوماتيك

دعائية للتيدا خلفهم هههههه

زاااانت المهيله خل ناخذ فنجال ونصحصح بعد الطريق

وننزل ونعلمكم وش شفنا...

وهذي أفياش تقل اختلفت عن الفندق اللي قبل

يعني أكثر خيارات

وخاصة آخر واحد يسار أغلب أجهزتنا أم ثنائي وراس اسود

يجي على طول من دون توصيلة تحديداً مثل ( شاحن الكميرا )

بعد ما تقهوينا نزلنا تحت على رجولنا بنروح للواجهة البحرية

وهذي من مميزات الفندق الصراحة

وبنفس الوقت السرعة ما راحت عبث ههههههههه

وصلنا بدري وبنستفيد من يوم الوصول

هذا ممر بجنب الفندق

يوديك على طوووول للشاطئ

وهذا البحر قريب للفندق

إهداء لقلوبك النقية

وهذولا ما بين معهم كميرا والإ منظار ( دربيل ) لمشاهدة الحيتان

وهذولا أيضاً

بس والله يالعجوز ياهي متحمممسة للتصوير

وجالسه بوضعية إحترافيه ياولد ههههههه

عاد يوم شفتهن وغيرهين بهالمدينة تذكرت جدتي الله يطول بعمرها على طاعته

يالله تمشي ومساعدة عكاز وهذولي يتمغطاً ويصورن وحركات ههههههه

طبعاً الحوت ما يطلع منه الإ القليل وغالباً الذيل

وأكتفيت بصورتين

هذا الشاطئ الداخل

يصل لمسافات قريبه منه الحوت

وهذي من الحركات ع الكورنيش

وهذي لوحات تعريفية جميلة

وهذا اللي عليه العلم

و ع اليسار الأجزاء اللي تطلع منه خارج الماء

تدرون وشو هذا

هذا مسبح فندقنا على جنب هالخط

تقل ما قف باصات هههههههه

وهذا الخط اللي يفصل الفندق عن الكورنيش

وهذي من زاوية ثانية

على هاللفه مكانه

والوعد الليلة لتصويره

بعدها قلنا نروح نتمشى للشارع التجاري وهو قريب أيضاً

وعدك الليله يا حلوووو

بعدها رجعنا لإن أغلب المحلات سكرت لإن قبل غياب الشمس تقريباً بساعة يسكرون

يعني بين الساعة 5 و 6 مساءً

رجعنا لفندقنا وتحديداً للإستقبال

نسأله عن عروض رحلات الحيتان

وما قصر سوا كم إتصال على المكاتب المتخصصه وهم كثير بهيرمانوس

ويقول تطلع قبل الظهر مع وجبة غداء وتكلفة الشخص حول 600 راند

طبعاً ما حجزنا لإن من بكرا عندنا مشوار لكيب تاون

وبنفس الوقت ما راح تشوف أكثر مماشفت ع الشاطئ

ولو بنجلس يوم ثاني يمكن رحنا ع الرحلة

صور لما جوار الإستقبال

وهذا المسبح بالهواء الطلق ومع هالإطلالة الجميلة

وهذي صورة علوية لفندقنا واللي حوله معلقه عند الإستقبال وصورتها

وهنا بدأت شمس هيرمانوس بالغروب

وبالليل طلعت للمسبح ما سكه على تصويرة

رجعت للسكن وكانت الكميرا عليه عدسة الفيش اي

قلت ناخذ كم صورة

الشعباويمعجبون بهذا.

فريق التطوير · 06-03-2016, 04:19 AM

يتبــع...

أصبحنا وأصبح الملك لله

أخذت صور وداعية لفندقنا

فيش منبعج بسبب العدسة هههههههه

نزلنا تحت للفطور

وكان فيه جلسات داخلية و خارجية

اخترنا خارجية وكان وقتها لحالنا

والفطور بوفية وفيه طلبات خاصة للي يبي يسوونله على مزاجه

وكان حلو لو خيارات الفطور مو كثيرة بس اللي يسوولك أزين وحار

ايه تفرج ع السمك بس

بعدها طلعنا على رجلينا للسوق القريب

وفيه تقل سوق شعبي جميييل

عندهم اشغال يدوية إحترافية

وهالكلاب مدري وش قصتهن ههههه

وحتى هالسوق الشعبي اللي مبني من الشينكو ( الزنك ) فيه صرافة بعد

ولااااا حقت استاندرد بنك اللي ما اسحب الإ منها

الحوت لازم يكون حااااضر

هذا الكرك من شعارات هيرمانوس

بعدها رحت اطلع شرائح من فيديفون

لإن الأيام الماضية كنت استخدم جوالي السعودي

فيه مركز رسمي لهم بالسوق وقريب أيضاً على رجليني

طلبت شريحتين وحده ميكرو حقت آيفون ووحدة عادية

المطلوب الجواز فقط

وهذا سعر الشريحة العادية 15 راند والشحن تشحن من عندهم بالمبلغ اللي تبي

وهذي شريحة الآيفون ب 105 راند فرق كبير

قالو تبي حول ساعتين عشان تتفعل

قلت خلاص أروح وأرجع

رجعنا لفندقنا ورتبنا أغراضنا

وعملنا التشك آوت

وتقييمي للفندق

10 / 10

وسميته ( فندق العرسان ) ليش مدري ههههههه

مدري ع الأناقه فيه مدري نظام الغرف مدري الموقع مدري ومدري

المهم يصلح وبس ههههههه

ومريتهم وأخذت الشرائح

وحطينا احداثيات فندقنا بالووتر فرونت بكيب تاون

وتوكلنا على الله ومشينا

المسافة حول 120 كم

وهذا مسار الرحلة

وهذي صور من الطريق

اللي يبي حطب ههههههه

وقبل الوصول لكيب تاون بحول 40 كم

ونشوف هالمدينة الجميييلة

وكان الخط ينزل لها نزول

وآقف دون تردد عشان اصور

وهذي بعد ما نزلنا ووصلنا للمدينة

هي تكون يسارنا...

نوم العوااافي الوعد كيب تاون

وقفت عند محطة شل

وبجنب مكينة التعبئة ( طرمبة البانزين ) فيه حق الهواء لي مع عداد

وطبعاً كعادة المحطات هناك يهتمون عمال المحطة بسيارتك

من ناحية تنظيف الزجاج ولو فتحت كبوت السيارة من الداخل

هو على طول يرفع الكبوت ويشيك ع الزيت ويزود ماء المساحات

وما يطلب منك مقابل أنت عطه ما تجود به نفسك

وعادي لو شي بسيط ( من فلوسهم الحديد لو 5 راند )

وهذا سعر لتر البانزين عندهم 11.88 راند

وأنا عبيت ب 501 راند

الله يديم الرخص عندناااااا ههههههههه

دخلنا كيب تاون

وأحلى إستقبال من هالمسجد

ووصنا لفندقنا صاحب الشقة ال 5 نجوم

Waterfront Village

وطبعاً مبنى الإستقبال بمكان والبنايات السكنية بمكان ولهن بوابة خاصة

امش ياولد مو للبيع ههههههه

عملنا التشك إن

واخذنا مفتاح الشقة

وصورو الجواز والبطاقة الإئتمانية

ووصفولنا البوابة حقت الشقق

نرجع للدوار اللي جينا من عنده وبعدها نلف يمين

واول دوار نلف يمين أيضاً للبوابة الرئيسية للشقق

ونعطيهم الأوراق اللي معنا قال وقف هنا وتعال

وجيت لبوابة الأمن وأخذ معلوماتي وصور اخشيشتي

قال تدل شقتك قلت لا

بنايات كثار وين بحصلها

قال خلاص شوي ونطلب من يوصلك لشقتك

وما تأخرت جت موظفة قال ممكن أركب قلت أركبي بس إدلينا ههههههه

ونزلنا للمواقف تحت طبعاً أدوار وكل موقف مرقم برقم الشقق

وقفنا بالموقف وما قصرت أخذت معنا أغراضنا وللشقة

الغريب موقف السيارة بالدور 1 والشقة بالدور 0 ههههههه

أعلمكم وش صار بعد ما رجعت للسيارة

بس الحين باخذكم فاصل لصور الشقة الجمييييلة جداً

الشقة عبارة عن غرفتين لكل غرفة حمام تكرمون

وصالة كبيييرة ومطبخ

الغرفة الأولى حقت العيال

شقتنا بالدور 0 أقولكم يعني مطله وبنفس الوقت تقدر تنزل من عندك للممر المائي عندك درج ( وهذي أحلى ميزة )

وميزة ثانية إن المطل والجلسة كبييييرة

وميزة ثالثة إن المكان صاد وفيه أشجار كثيفة ومصادات خشبية يعني خذ راحتك ما أحد يشوفك

وفيه لي ماء بعد للي بيغسل سيارته ههههههه

وهنا فوق ع اليمين الدرج اللي ينزل للممر المائي

وبنفس الوقت تقدر تطلع من عنده بإتجاه الووتر فرونت على رجولك

وهذي الغرفة الثانية

الصالة ويمين غرفة ويسار غرفة

ومن مميزات هالشقة بعد تدفئة أرضية للصالة والغرف

نظام توزيع صوتي

والحين ضبطت المهيله نبي ناخذ كم فنجال

ونروح على رجولنا للووتر فرونت

وهذي ميزة إنك تاصل سكنك بدري

بعد ما تقهويت طلعت ودي أمر السيارة بأخذ غرض منها

المهم واطلع من الشقة وأروح يمين واحصل مصعد وادخل فيه واتك اللي ينزلك تحت وعيا

أثري بالدور 0 ههههههه

وارجع واحصل وحده من حقات التنظيف وحتى حرمه كبيرة

قلت الشقة هذا رقمها وين سيارتنا قلت تعال معي

ولنفس المصعد مره نرقى ومره ننزل ومفيش فايدة ههههههه

ونرجع ونمر من عند شقتنا ونطلع درج عادي لمصعد ثاني

المهم صلت للسيارة ومدري وشلون رجعت للشقة

( بعدين إستوعبت إني بالدور 0 وإذا بغيت السيارة اصعد بالمصعد فوق للدور 1 ) هههههههه

الله لا يعكسنا...

والله لايلومني مدام عاملة هالنظافة يا حووول داخت وهي تشتغل عندهم

وشلون أنا اللي لي ساعات بس هههههه

ولاااااا ترا مو بس أنا شفت واحد بعد والظاهر من ربعنا يدور بالمواقف واضح اللي مضييييع هههههه

رجعت الشقة وطلعنا بعدها على رجولنا للووتر فرونت

شقتنا بالعمارة المقابلة تحت ع اليمين

طلعنا من الشقة وطبعاً عبارة عن مجموعة بنايات

ولهم بوابتين الأول اللي دخلنا معها بالسيارة للمواقف

والثانية مريناها عشان نتطلع منها على رجولنا

الإ السيارات لها مسارها الواضح واللي على رجولهم إيضاً لهم مسار خاص

وهو عبارة عن باب لايفتح الإ بكرت شقتك وإذا دخلت كذالك

يعني تنظيم مااااا فيه واللي يبي يسير علي لازم يقولي ادخله ههههههه

وهذا من أشهر معالم الووتر فرونت بكيب تاون

مبني من صنادق الكوكاكولا البلاستيكية

أول برنامج لنا مرينا العجلة الكبيرة

قلنا نركب فيها عشان نشوف كل المعالم اللي حولنا

وعندهم عرض عائلي تقريباً ب 120 راند

مشاهدات من الأعلى

مول فكتوري

اللي بأول الصورة من تحت فندق فكتوري

يعتبر بقلب الووتر فرونت

نزلنا تحت

وشفنا المعلم الثاني من معالم الووتر فرونت

هالرجل البرونزي وحركاته التجميدية لجلب المال

دخلنا مول فكتوري

وهذا مطعم هندي بنفس المول

وهذي العجلة من المعالم المشهورة أيضاً

بعدها مرينا سوبرماركت كبيرة وأخذنا اغراضنا

وقابلت واحد جنوب إفريقي

هو اللي يوم شافني سلم علي وتبين إنه مسلم

وكان يسألني عن العيد بتعيد هنا

لأن عيد الأضحى كان بعد بكرا

قلت نعم ووين صلاة العيد قال تقريباً كل الجوامع يصلون العيد

قلت أبي واحد كبير عطني إسمه وأنا ابحثة بجهاز الجي بي إس ( القارمن )

عطاني الإسم وودعته...

والله يجعلنا كمسلمين دائماً نفرح بشوفة بعضنا بالدول الغربية

طلعنا من الووتر فرونت لشقتنا وكان الوقت حول العشاء

والحمدلله الوضع زين وغير مريب

وصلنا شقتنا وضبطنا عشانا

إلى هنا نصل لنهاية حلقتنا

وعلى موعد بإذن الله

بيومياتنا بالمدينة الأشهر بجنوب إفريقيا

كيب تاون

دمتم بحفظ الله

الشعباويمعجبون بهذا.

فريق التطوير · 06-03-2016, 04:19 AM

اهلاً وسهلاً بكم من جديد

وتحديداً مع كيب تاون

الأجواء الرائعة الممزوجة بعيد الأضحى المبارك

والبداية من صورة تهم الجميع

صورة علوية للمكان اللي ساكن فيه واللي حوله

والصورة ماخذها من استقبال الشقق واخذتها بالسكنر ونزلتها لكم

اللي عليها دائرة حمراء هذي البناية اللي شقتي فيها

قمنا الصبح والفطور المنزلي

بعد الفطور

قررنا أول مزار لنا لهذا اليوم

زحليقة كيب تاون الجميلة

وحطينا الإحداثية

ع التنسيق التالي

h ddd mm ss.s

S 33 52 49.7
E018 37 47.2

وهي تقريباً 20 كم عن سكنا بالووتر فرونت

وصلنا والسيارة عندها قليلة

وهذي الأودي حقتنا قصدي التيدا حقتنا

تبون تلعبووون لا تخافون

ونشوف ناس تلعب

بس بعربتين وهم 4 أشخاص

وصار باقيلهم لفه أو لفتين وينتهون

يعني بنصير لحالنا أنواع الفله

وصلنا شباك التذاكر

وهذي التسعيرة

ميزتهم العرض العائلي ب 300 راند 15 لفه

المهم شافو الصغير قالو هاه يلعب قلنا يلعب حرام عليكم

عاد بيعرفون حرام عليكم

المهم شاورو كبيرهم مكتبه خلف شباك التذاكر

قال عادي يكون مع واحد منكم ويمسكه زين

واخذنا 3 عربات الأم مع الصغير وأنا وأبويد والكبير لحاله

وكل عربه لها 5 لفات يصير المجموع 15 لفه

المهم المسؤل عن العربات شاف الكميرا معي

قال كبيرة والأفضل ما تاخذها معك قلت طيب

بعطكياها وصورنا

واضبطها له

لإن الحين لحالنا ما عندهم غيرنا

طبعاً صورت بجوالي

صور الجوال عليهن توقيع واحد بس ع اليمين تحت وبالعربي

هذا سواقي أبو يد

الصعود صورة أمامية

الصعود صورة خلفية

والله ماااااا قصر صورنا صور صح

وأنا لازم أصور بعد بجوالي

ولااااا ابشركم صورة فيديو هههههههه

لإني من المقلين بتصوير الفيديو

ترجم يا مترجم ههههههه

وترجم بعد يا مترجم

الله من العجله بهالراس ابويد هههههههه

وداعية من مصورنا العزيز

ماااااا قصر

صورة من الجسر اللي تحته مسار الزحليقه من اليمين

من اليسار

وهذا مقطع فيديو للزحليقة

بعدها طلعنا

ووجهتنا الثانية لحديقة الطيور

وحطيت إحداثيتها

على التنسيق التالي

h ddd mm ss.s

S 34 01 03.7
E018 21 44.9

من الطريق

هذا جو وسماء الكيب تاون يارباااااااه

وصلنا الحديقة

وهذي تسعيرة الدخول

وقفة تأمل

( اللهم أرحمنا و أرحم ضعفنا )

فيه من يأخذ لصغير ليكفيه عناء المشي

وفيه من يضطر لأخذ كرسي متحرك لكبير لايستطيع المشي

للرومانسية عنوان

ياولد لاااااااا هههههههه

ابوناصر

مطلوووب أمنياً ههههههه وش هذا

فكرت الأبواب جميييلة عشان الطيور ما تختلط

مربوطه بحبل وفيه قطعة خشب كبيرة

إذا فتحت الباب ترتفع وإذا طلعت على طول تنزل وتسكر الباب من حالها

بسم الله

ترووووش وتبرد بعد

الطاووس المميز ذا اللون الأبيض

قال صلى الله عليه وسلم (( من بنى لله مسجدا ولو كمفحص قطاة أو أصغر بنى الله له بيتا في الجنة ))

قال الشيخ الألباني ( رحمه الله ) :
( كمفحص قطاة ) هو موضعها الذي تجثم فيه وتبيض . لأنها تفحص عنه التراب . وهذا مذكور لإفادة المبالغة . وإلا فأقل المسجد أن يكون موضعا لصلاة واحد .

فيه من ضمن الأقسام

قسم للطيور الجارحه

شبك خارجي وداخلي

( قل وشلون صورت ههههههه )

صورنا

حسربي هالبوم يالله فتح عيونه هههههههه

وفيه حيوانات آخرى بس قليلة

وفيه قسم خاص لنوع من انواع القرود

بس يعطونك قبل بعض التعليمات

وخاصة إنك ما تدخل بأكل معك

وداخل فيه كراسي ودك تجلس وتستمتع بالمشاهدة

ويمكن يقربن عندك

وهذا يااااا كثره عندهم

ودعنا الحديقة

وهي الصراحة مو ذاك الزود !!!

للي معه أطفال والإ وده يصور مثلي يروح

والإ غيره يدور مزار ثاني أفضله

الشعباويمعجبون بهذا.

فريق التطوير · 06-03-2016, 04:19 AM

يتبع...

بعدها قلنا نرجع نتمشى داخل كيب تاون

وقلنا نمر سوق الماركات المخفضة

وحطينا احداثيته

على التنسيق التالي

h ddd mm.mmm

S 33 59.231
E018 29.364

هذي مدري وشوله صورتها هههههه

وصلنا وبحثت عن موقف للسيارة

وبعد ما نزلت تفاجأت بشي ما توقعته

ولا شفته بعد هالموقف
.
.
.
.
.
وجود واي فاي مجاناً هههههههه

طبعاً جلست حول السيارة مدري كم دقيقة هههههه

وهذي المزيونة وملبق ع الريوس

خلاص لعبتي الدركسون اللي ع اليمين هههههههه

جازلي هالمحل وبضاعته وتعامل راعيه

وفيه محل اتوقع لمسلم معلق هاللوحة

بعد التسوق حصل لنا موقف لاننساه في حياتنا

وهو إنا ودنا نسأل عن مصلى بالسوق

ونشوف أحد أخواتنا من مصر الشقيقة هي وعيالها

بحجابها ربي يوفقها دنيا و آخرة

وتسألها المدام عن المصلى

وقبل الإجابة رحبت فيها بكل حب نابع من أصول ديننا الحنيف

وقالت للأسف ما فيه هنا

بس فيه بالحي اللي خلف السوق بينه وبين السوق الخط السريع جامع

وحنا ساكنين بهالحي

ونرحب فيكم وبزيارتكم لنا ونفرح لما نشوف مثلكم

والحمدلله على نعمة الإسلام اللي يخلي التعارف سهل بين المسلمين

قلنا خير إن شاء الله

قالت أم أحمد الله يخليها لعيالها وزوجها بتعيدون هنا

قالنا نعم

قالت خلاص الجامع اللي قلتلكم فيه صلاة عيد

كان بكرا يوافق عيد الأضحى المبارك

وأصرررررررت علينا الصلاة في هذا الجامع والعيد معهم في منزلهم

قلنا خير إن شاء الله

ودعتنا بعد ما أخذت جوال المدام

وأنا أخذت جوال أحمد ولدها أبوإياد

طلعنا من السوق على وجهة الحي اللي ساكنين فيه

كنت ببحث عن الجامع وأخزن إحداثيته عشان ما نتأخر بكرا بالبحث لاسمح الله

وبالفعل حصلناه وخزنا إحداثيته

ورجعنا للووتر فرونت حيث سكننا

وصلنا شقتنا قبل غروب الشمس

وقلنا نتعشى بدري وننام بدري

عشان من الفجر ما فيه نوم بنصلي العيد

( كأول عيد لي خارج الوطن )

وطبعاً لازم الإستمتاع بالتصوير الليلي داخل مجمعنا السكني بالووتر فرونت

ومن قدي تصوير ليلة العيد هههههههه

هذي العمارة اللي ساكن فيها

رهيب التصوير على هذا الجسر

بس بعلمكم وش صار عليه

لما جيت أصور فيه من بكرا بالليل أيضاً

رجعت للشقة ونووووم

صحينا الفجر وصلينا

وتجهزنا ومشينا

حطيت إحداثيات الجامع

على التنسيق التالي

h ddd mm.mmm

S 33 59.244
E018 29.835

وصلت للجامع والإ فيه ناس سابقينا ما شاء الله

ونوقف السيارة وننزل

طبعاً فيه مصلى معزول للنساء

وهذي المواضئ ونظافة تاااامة ما شاء الله

صلينا ولله الحمد وطلعنا

الناس تطلع ويبين كبر الجامع ودورين

الجو استقبلنا بالخارج

بشكل خوراااافي

بعد ما طلعنا من الجامع الولد الصغير عليه حرارة

وخافض الحرارة اللي معنا ( البارح فاكه وكابه الله يصلحه هههه )

فركب معنا ولد أم أحمد عبدالله

الله يجزاه عنا خير الجزاء

ورحنا صيدلية بهذا المجمع

وللأسف مسكره تفتح 9

رجعنا لصيدلية عندهم بالحي

وكان باقي 10 دقايق ويفتح على إنه داخل الصيدلية

بس خلاص ما يفتح الإ بالوقت المحدد نظام ياولد نظام ههههه

وناخذ علاج للولد

ونروح بيت أم أحمد

طبعاً عرفنا إن زوجها

كان بالمملكة العربية السعودية

لأدى فريضة الحج

وهو الشيخ : سليمان سلامه

مدير مركز فجر الإسلام الدعوي

ولها مجهودات كبيرة في كيب تاون

ويحمل هو وعائلته الجنسية الجنوب إفريقية

جعل ما يقوم به في ميزان حسناته

وهذا الموقع اللإكتروني لـ...

مركز فجر الإسلام

تعيدنا معهم ع السريع

فريق التطوير · 06-03-2016, 04:19 AM

يتبع...

وقالو بنروح لمزرعة فيها أضاحي تروحون معنا قلنا نعم

استقلو سيارتهم وحنا بسيارتنا

وبدأت السماء بالمطر

وصلنا للمزرعة اللي فيها الأضاحي

وبنفس الوقت للي وده ياخذ ذبيحه هناك ويفلهاااااا طبخ ونفخ ههههههه

وهذي إحداثية المزرعة

على التنسيق التالي

h ddd mm.mmm

S 34 02.037
E018 32.167

أخذت أضحية ب 1300 راند

أماكن للإنتظار للرجال والنساء

الهروووب من المطر

خلصنا ضحاينا وقبل نمشي من المزرعة

حلفت علينا أم أحمد الإ مشاركتها هي وأبنائها ( لحمة الأضحية )

الله يخليها لزوجها ولعيالها ( أم عن كم رجال )

رجعنا لبيتهم والجو صار حلووو وتوقف المطر

وحصلنا هالحلزون عندهم بيشاركنا العيد ههههه

ياولد إنزل ههههه ( سيارة حفيدهم ) ولد أحمد الله يصلحه

شاركناهم عيديتهم

الله يجمعنا بهم بجنات النعيم

كثر الله خيرهم

بعدها طلعنا قلنا نتمشى بالسيارة

وقررنا نمر على مول الكانل وولك

ناخذ فيه كم لفه ونرجع لشقتنا

دخلنا إحداثيه

على التنسيق التالي

h ddd mm.mmm

S 33 53.621
E018 30 787

من الطريق

شكلها خيمة سرك

وصلنا المول وهو كبيييير

وبجنبة مدينة ملاهي تقدر تروحلها مشي من المول

صورت داخل المول بس مو كثير عذراً

دورات المياة تكرمون غالباً هناك يرمزلها بالرموز ( رجل - مرأه - طفل )

من دون كتابة توليت أو غيرها

داخل المول فيه هايبر كبيرة

اللي شدني ( البامبرز ) تكرمون عاااالمي ياولد هههههه

وفيه أشياء ثانية بعد

بس ممنوووعة النشر هههههه

وحصلت هالمحل

قلت ياولد عادي معقوووول هههههه

صراحة شغل إحترافي

وصارن بلاستيك درجة فاخرة

والبنادق الهوائية الصراحة ما سألت عنهن

طلعنا من المول للمواقف وقبل تروح لسيارتك

تمر مكاين تسديد رسوم المواقف

تحط الكرت اللي أخذته قبل دخولك المواقف

ويطلع لك السعر

وتحط المبلغ وبعده يطلع لك كرتك مره ثانية

عشان تستخدمه عند بوابة الخروج

الغريب إن مكينتهم تصرفلك وترجعلك الباقي لو حطيت 10 راند

وحسابك أقل تاخذ اللي تبي وترجع الباقي

( تذكرت مكاين البيبسي عندنا لو تحط 5 ريال تاخذها ما عندها مشكلة بس تعطيك حبة وحده وتوكل على الله ههههههههه )

وهذي صورة مكينة المواقف

رجعنا لشقتنا الجمييييلة

وقلنا نسوي عشاء من ضحيتنا

وطلعت اصور كالعادة ليلي هههههه

رجعت للجسر مره ثانية أصور عليه

والموقف اللي حصل:

أنا شاك أساساً إن بيجي أحد من حراس الأمن

لإن فيه بوابة مو بعيده عني

والجو ليل وهدوء بس جاء واحد من العيال الله يصلحه

وهو يركض وبنفس الوقت ينادي بصوت مرتفع ما يدري ويني

وشوي وجاي حارس الأمن ههههههه

قال لاتصور ممنوع قلت وش اللي ممنوع

تصوير عادي ومو حول سكن أحد

قال معليش ممنوع قلت طيب أنا تراي ساكن هنا

وهذا كرت شقتي ( أخذه إحتياط ) لإن دايم المصورين يتعرضون لكلمة ( ممنوع التصوير )

شافها وعلى طووول ينسحب ويرجع وحاولت إني أخليه يشوف الصور اللي صورت

عشان يرتاح نفسياً بس رفض !!

بهذة الصورة

نختم حلقتنا وعيدنا الأول خارج الوطن

دمتم بحفظ الله

الشعباويمعجبون بهذا.

فريق التطوير · 06-03-2016, 04:19 AM

نكمل معكم تقريرنا

وتحديداً مع كيب تاون

بعد الفطور بالشقة

طلعنا ووجهتنا لحديقة الفراشات

حطيت الإحداثية

على التنسيق التالي

h ddd mm.mmm

S 33 48.004
E018 52.296

وصلنا

وهذي لوحتها وكالعادة باللون البني

وهذي بإستقبالنا عند المواقف

وهذي رسوم الدخول

بعد الإستقبال ودفع الرسوم

الباب داخل صالة الإستقبال وكالعادة أيضاً صالة الإستقبال

فيها بعض المشترايات التذاكارية والتموينية ( بقالة صغيرة ) ههههه

نبدأ معكم الصور من داخل الحديقة

وفيه طبعاً أشياء خااااطمة مع الفراشات ههههه

هدية لقلوبكم البيضاء

لسان حاله يقول للحين تصور يالحبيب ههههههه

لااااا تخافون مو حقيقية

مرحباً بكم بجنوب إفريقيا

بعدها طلعنا وتوجهنا منها

لشاطئ البطاريق

حطيت الإحداثية

على التنسيق التالي

h ddd mm.mmm

S 34 11.565
E 018 26.750

وقفنا السيارة ورحنا مشي

وهذولا بجنب الطريق

ع اليسار اللي يبي يروح للشاطئ الرسمي للبطاريق وفيه رسوم

والإ يكمل عدال ويشوفهن قريب

بس ما شفتهن قريب قريب

مثل غيري

واعلمكم بعد شوي

وهذا المليح من خلف السياج الخشبي

وهذي أسكانهن الخاصة

وش يشوفون

اهااا هذا

الصورتين اللي فوق

هذا شاطئ خاص للسباحة

وله إستقبال خاص و رسوم

الرسوم

حلووووه ( فل )

عموماً ما يصلح للعوائل المحافظة

عموماً طولت ما حصلت اللي يقولون

تشوفهن من قريب جداً

طلعت على تقل مواقف ثانية للسيارات

قلت نرجع وندخل رسمي مع بوابتهن

وكان رسوم الدخول

للكبار 45 راند

وللصغار 20 راند

والطفل الصغير مجاناً

كان الزوار مو كثير

وبعد فترة بسيطة

جو سياح يابانيين أفواااج أفواااج

الشعباويمعجبون بهذا.

فريق التطوير · 06-03-2016, 06:16 AM

يتبــع...

طلعنا من شاطئ البطاريق

ووجهتنا لرأس الرجاء الصالح

وميزة زيارته إنه على إمتداد الطريق

حطيت الإحداثية

على التنسيق التالي

h ddd mm.mmm

S 34 21.018
E018 29.026

وقابلنا بالطريق زحمممممة

الصراحة ملينا وبغينا نرجع

بس الحمدلله فتح الطريق

وصلنا البوابة

وبعد ما دخلنا لفينا يمين نزول بجنب الشاطئ

وحصلنا هاللي سارحات ههههههههه

وهنا وصلنا ولازم نتصور

رجعنا عشان نصعد لفوق

ومشاهدة المناره هناك

وبالطريق شفت إثنين يمارسون رياضة ركوب الأمواج

وقبل ناصل المواقف الرسمية

توقفنا ع اليمين لمشاهدة البحر و القرود

واللي وده يشوف إلتقى المحيطين يقدر من هالمكان والإ حتى من مواقف السيارات

مو شرط يصعد بالعربات والإ ع الأقدام للمنارة

زوووم لملتقى المحيط سبحان الله

مشينا بإتجاه المواقف الرئيسية

وهذي العربات اللي تصعد فيك للمنارة

ولفت إنتباهي مجموعة باصات

شكلها وفود رسمية

وحاطين أعلام الدول وفيه معهم علم ( الصهاينة إسرائيل ) الله يطهر فلسطين منهم

اخذنا لفه حول المكان

وهذا الطريق للي بيروح مشي

وبعدها رحنا للإستقبال لدفع الرسوم

وقالولي ما فيه الإ روحه فقط بالعربة

والرجوع مشي ياحبيبي

قلت الشكوى لله

شكلنا تأخرنا لإن آخر العصر

وهذي لوحات موجودة بإنتظار العربات

وهذولا كد خلصو ما شين

وحنا واقفين بالطابور ننتظر العربة

يوم خطم سايح هو وزوجته ولااااا عبرونا ( أوروبي شكله )

وصارو محل إستغراب الجميع ( يعني مو بس حنا العرب نتهم بعدم الإنضباطية )

فوق فيه هواااااء قوي

عمود المسافات

اللي وده يمسك خط من فوق هالبحر ههههه

صخرة الذكريات

رجعت لمكان إنتظار العربة وصورة من الداخل

والإ النزول توكل على الله كعااابي هههههه

بعده نزلنا مشي

والصراحة اللي بيروح يطلع بالعربات ويرجع مشي أحلى

والنزول سههههل

واللي عندهم لياقة حلوه يطلعون ويرجعون مشي وتفرج وجلسات بالطريق

حركات بهلوانية

الله حسيبك كيفك رحت و خليتني

نزلو الأعلام كلها

نصيحة لوجة الله

إنتبهوووو من القرود اللي قبل المواقف واللي عند المواقف

لإنها عادي تجي لمك والإ لم السيارة المفتوحة وتاخذ اللي وسطها وتهرب

وفيه حراس تشوفهم على جنب الطريق وعند المواقف مخصوصين لطرد القرود

بس ولو الحذر وااااجب...

طلعنا والنية الرجوع لكيب تاون وسط المدينة

إذا طلعت مع البوابة يجيك تي تروح مع اللي تبي يسار والإ يمين

أنا قالي القارمن اطلع يمين لأنه أقصر مسافة

قلتله عناااااد بروح يسار هههههه

لإن الزحمة اللي صادفتني بالطريق اللي ع اليمين

وهذي مزرعة نعام قريبة من رأس الرجاء الصالح

يعني اللي يبي يزورهن جميع بجنب بعض

وهذا الطريق المحاذي للبحر

يالله الجنة لنا ولوالدينا والمسلمين أجمعين

حصلت طريق ثاني يقول رح يمين

وقلت عناااد يسار ههههه

كله خوف يرجعني طريق الزحمة اللي جيت معه

المهم لفيت يمين بعد طريق طووويل

والعلامة البارزه محل على يمن الخط عنده منحوتات كبييييرة الحجم

بعده يكون الخط اثنين واحد يروح يسار وقباله قرية صغيرة وقريبة

والثاني يروح يمين وتقل فيه طلوع هذا اللي سلكت

وعليه قرى ومناظر جميلة

إلى ما وصلت مطل على مدينة أو قرية المهم مطل جميل

رغم تعتيم الجو شوي بس وقفت قلت ناخذ كم صورة ونمشي

وأخيراً صورة بانورامية لنفس المكان

نختم فيها حلقتنا

بعدها واصلنا طريقنا

للووتر فرونت حيث سكننا هناك

دمتم بحفظ الله

الشعباويمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كــان وأخواتها - جنوب فرنسا صيف 2012( بقلم / د.معمارية)	فريق التطوير	بوابة فرنسا	179	21-02-2018 12:15 PM